ಸಮಕಾಲೀನ ಕಾವ್ಯದ ಬರವಣಿಗೆ ದೊಡ್ಡ ಪ್ರಮಾಣದಲ್ಲಿ ಹೊಸ ಹೊಸ ಸಂವೇದನೆಗಳಿಂದ ಹೊರಬರುತ್ತಿದೆ. ಅದನ್ನು ವಿಮರ್ಶೆಗೆ ಒಳಪಡಿಸುವ ಪ್ರಮಾಣ ಗಂಭೀರವಾಗಿ ನಡೆಯುತ್ತಿಲ್ಲ ಎಂದು ದಾವಣಗೆರೆ ವಿಶ್ವವಿದ್ಯಾಲಯದ ಪ್ರಾಧ್ಯಾಪಕ ಡಾ.ಮಹಾಂತೇಶ ಪಾಟೀಲ ಹೇಳಿದರು.
ಬೀದರ್ ನಗರದ ಡಾ.ಚನ್ನಬಸವ ಪಟ್ಟದ್ದೇವರು ರಂಗಮಂದಿರದ ಆವರಣದಲ್ಲಿಬಸವಕಲ್ಯಾಣದ ಡಾ.ಜಯದೇವಿತಾಯಿ ಲಿಗಾಡೆ ಪ್ರತಿಷ್ಠಾನದಿಂದ 2024ನೇ ಸಾಲಿನ ಕರ್ನಾಟಕ ಸಾಹಿತ್ಯ ಅಕಾಡೆಮಿ ಪುಸ್ತಕ ಪ್ರಶಸ್ತಿ (‘ಬೆಳಕು ಬೆಳೆಯುವ ಹೊತ್ತು’ ) ಪುರಸ್ಕೃತ ಕವಿ, ವಿಮರ್ಶಕ ಡಾ.ಮಹಾಂತೇಶ ಪಾಟೀಲ ಅವರನ್ನು ಸನ್ಮಾನಿಸಿ ಅಭಿನಂದಿಸಲಾಯಿತು.
ಸನ್ಮಾನ ಸ್ವೀಕರಿಸಿ ಮಾತನಾಡಿದ ಅವರು, ‘ಕಾವ್ಯ, ವಿಮರ್ಶೆ ಎರಡೂ ಕಸುಬನ್ನು ಕನ್ನಡದ ಪರಂಪರೆಯಲ್ಲಿದೆ. ಎಲ್ಲಾ ಕಾಲವೂ ವಿಮರ್ಶೆಗೆ ಬಿಕ್ಕಟ್ಟಿನದ್ದೇ ಆಗಿದೆ. ನಾವು ಸಾಹಿತ್ಯ ಸಂವಾದ ಪರಂಪರೆ ಮುಂದುವರಿಸಿದಾಗ ಸಮಸ್ಯೆಗಳು ನಿವಾರಣೆ ಆಗುತ್ತವೆ. ಪ್ರಜಾಪ್ರಭುತ್ವ ವ್ಯವಸ್ಥೆಯಲ್ಲಿ ವಿಮರ್ಶೆಗೆ ಹೆಚ್ಚು ಅವಕಾಶ ಇರುತ್ತದೆ’ ಎಂದರು.
ಕಲಬುರಗಿ ಕೆ.ಬಿ.ಎನ್ ವಿಶ್ವವಿದ್ಯಾಲಯದ ಪ್ರಾಧ್ಯಾಪಕ, ಕತೆಗಾರ ಡಾ.ಸಂಗನಗೌಡ ಹಿರೇಗೌಡ ಮಾತನಾಡಿ, ‘ಸಮಕಾಲೀನ ಸಾಮಾಜಿಕ ಸಂಕೀರ್ಣತೆಗಳು ಸದ್ಯದ ಹೊಸ ತಲೆಮಾರಿನವರ ಸೃಜನಶೀಲ ಪಠ್ಯಗಳಲ್ಲಿ ಹೇಗೆ ನಿರೂಪಿತವಾಗಿವೆ ಎನ್ನುವ ಕುರಿತು ಮಹಾಂತೇಶ ಪಾಟೀಲ ತಮ್ಮ ‘ಬೆಳಕು ಬೆಳೆವ ಹೊತ್ತು’ ಕೃತಿಯಲ್ಲಿ ಚರ್ಚಿಸಿದ್ದಾರೆ’ ಎಂದರು.
ಬೆಂಗಳೂರು ಅಲಯನ್ಸ್ ವಿಶ್ವವಿದ್ಯಾಲಯದ ಪ್ರಾಧ್ಯಾಪಕ ಡಾ.ವಿವೇಕಾನಂದ ಸಜ್ಜನ ಮಾತನಾಡಿ, ‘ಪರಿಸರವಾದಿ ಚಿಂತನೆ, ಸಾಮಾಜಿಕ ಆಯಾಮ ಮಹಾಂತೇಶ ಪಾಟೀಲ ಅವರ ವಿಮರ್ಶೆಯ ನಿಲುವು ವಾಗಿದೆ. ಅವರು ವಿಮರ್ಶೆಯಷ್ಟೇ ಶಕ್ತ ಕವಿಯೂ ಕವಿತೆಗಳು ಬರೆದಿದ್ದಾರೆ’ ಎಂದರು.
ಪತ್ರಕರ್ತ ಬಾಲಾಜಿ ಕುಂಬಾರ ಮಾತನಾಡಿ, ‘ಕಲಬುರಗಿಯ ಸಿಯುಕೆ ಕನ್ನಡ ವಿಭಾಗದ ಗರಡಿಯಲ್ಲಿ ಸಾಹಿತ್ಯದ ಹೊಸ ಫಸಲು ಹುಲುಸಾಗಿ ಬೆಳೆಯುತ್ತಿದೆ. ಹೊಸ ತಲೆಮಾರಿನ ಬರಹಗಾರರಿಂದ ಹೊಸ ಚಿಂತನೆಗಳು ಹುಟ್ಟಲು ಕಾರಣವಾಗಿದೆ’ ಎಂದರು.
ಇದನ್ನೂ ಓದಿ : ಔರಾದ್‌ ಸೀಮೆಯ ಕನ್ನಡ | ಸುಡು ಬಿಸಲಾಗ ಭಾಳ ಓಡಾಡಬ್ಯಾಡ; ಬೇಮಾರ ಬಿದ್ದೂರ್ ಹೈರಾಣ ಅದಾ!
ಹಿರಿಯ ಪತ್ರಕರ್ತ ವಿಜಯಕುಮಾರ್ ಬೆಲ್ದೆ, ಪ್ರತಿಷ್ಠಾನದ ನಿರ್ದೇಶಕ ಡಾ.ಶಿವಾಜಿ ಮೇತ್ರೆ, ಡಾ.ಭೀಮಾಶಂಕರ ಬಿರಾದಾರ, ವಿಜಯಕುಮಾರ್ ಪಾಟೀಲ ಬಾಚಿಪಾಳಿ , ಬಿಕೆಇಸಿ ರೆಜಿಸ್ಟ್ರಾರ್ ಪ್ರೇಮಸಾಗರ ಪಾಟೀಲ ಮೊದಲಾದವರು ಇದ್ದರು. ಪ್ರತಿಷ್ಠಾನದ ಕಾರ್ಯದರ್ಶಿ ದೇವೇಂದ್ರ ಬರಗಾಲೆ ಸ್ವಾಗತಿಸಿ, ನಿರೂಪಿಸಿದರು.
