ಆರೋಗ್ಯ ಕಾಪಾಡಿಕೊಳ್ಳಲು ಪ್ರತಿದಿನ ಬೆಳಗ್ಗೆ-ಸಂಜೆ ವಾಕಿಂಗ್, ಜಾಗಿಂಗ್‌ಗಾಗಿ ಸರ್ಕಾರಿ ಜೂನಿಯರ್ ಕಾಲೇಜು ಮೈದಾನಕ್ಕೆ ಬರುವ ನೂರಾರು ನಾಗರಿಕರಿಗೆ ಇದೀಗ ಕತ್ತಲೇ ದೊಡ್ಡ ಸಮಸ್ಯೆಯಾಗಿದೆ. ಮುಂಜಾನೆಯ ನಸುಕು ಹಾಗೂ ಸಂಜೆ ಆವರಿಸುವ ಕತ್ತಲಿನಿಂದಾಗಿ ವಾಯುವಿಹಾರಿಗಳು ತಮ್ಮ ನಿತ್ಯದ ವ್ಯಾಯಾಮವನ್ನೇ ಮೊಟಕುಗೊಳಿಸಿ ಮನೆಗೆ ಮರಳುವ ಪರಿಸ್ಥಿತಿ ನಿರ್ಮಾಣವಾಗಿದೆ.
ವಿಶಾಲವಾದ ಕಾಲೇಜು ಮೈದಾನದಲ್ಲಿ ಬೆಳಗ್ಗೆ ಮತ್ತು ಸಂಜೆ ಮಹಿಳೆಯರು, ವೃದ್ಧರು, ಮಧ್ಯವಯಸ್ಕರು ಸೇರಿದಂತೆ ನೂರಾರು ಮಂದಿ ವಾಕಿಂಗ್ ಹಾಗೂ ಜಾಗಿಂಗ್ ಮಾಡುತ್ತಾರೆ. ಆದರೆ ಮೈದಾನದಲ್ಲಿದ್ದ ಬೆಳಕಿನ ವ್ಯವಸ್ಥೆ ಕೈಕೊಟ್ಟಿರುವುದರಿಂದ ಕತ್ತಲಾದ ಬಳಿಕ ಮೈದಾನದಲ್ಲಿ ಸಂಚರಿಸುವುದೇ ಅಪಾಯಕಾರಿಯಾಗಿದೆ ಎಂಬುದು ವಾಯುವಿಹಾರಿಗಳ ಅಳಲು.
ಒಂದೆಡೆ ಯುವಕರು ಕ್ರೀಡಾ ಚಟುವಟಿಕೆಗಳಲ್ಲಿ ತೊಡಗಿಕೊಳ್ಳುತ್ತಿದ್ದ ಈ ಮೈದಾನ, ಇತ್ತೀಚಿನ ವರ್ಷಗಳಲ್ಲಿ ಸಾರ್ವಜನಿಕರ ಆರೋಗ್ಯದ ತಾಣವಾಗಿಯೂ ರೂಪುಗೊಂಡಿದೆ. ಬೆಳಗಿನ ಜಾವ ಹಾಗೂ ಸಂಜೆ ನೂರಾರು ಮಂದಿ ಇಲ್ಲಿ ವಾಯುವಿಹಾರ ಮಾಡುತ್ತಿದ್ದಾರೆ. ಆದರೆ ಬೆಳಕಿನ ಕೊರತೆಯಿಂದಾಗಿ ಈ ಆರೋಗ್ಯದ ಹಾದಿಯೇ ಕತ್ತಲೆಯ ಹಾದಿಯಾಗುತ್ತಿದೆ.
ಕಾಲೇಜು ಪಕ್ಕದಲ್ಲಿರುವ ವಾಲಿಬಾಲ್ ಹಾಗೂ ಕೊಕ್ಕೋ ಮೈದಾನದಲ್ಲಿದ್ದ ದೀಪಗಳು ಕೂಡ ಕಾರ್ಯನಿರ್ವಹಿಸದ ಸ್ಥಿತಿಯಲ್ಲಿವೆ. ಸಂಜೆ ಕತ್ತಲಾಗುತ್ತಿದ್ದಂತೆ ಮೈದಾನದಲ್ಲಿ ವಾಕಿಂಗ್ ಮಾಡುವವರ ಸಂಖ್ಯೆ ಕಡಿಮೆಯಾಗುತ್ತದೆ. ಕತ್ತಲಿನ ಪರಿಸ್ಥಿತಿ ಅನೈತಿಕ ಚಟುವಟಿಕೆಗಳಿಗೆ ಅವಕಾಶ ಕಲ್ಪಿಸಬಹುದೆಂಬ ಆತಂಕವೂ ಸ್ಥಳೀಯರಲ್ಲಿ ವ್ಯಕ್ತವಾಗಿದೆ.
ಬೆಳಕಿನ ಕೊರತೆಯಿಂದಾಗಿ ಮಹಿಳೆಯರು ಮತ್ತು ವೃದ್ಧರು ಮುಂಜಾನೆ ಹಾಗೂ ಸಂಜೆ ವಾಕಿಂಗ್ ಮಾಡಲು ಹಿಂಜರಿಯುವಂತಾಗಿದೆ. ಇದರೊಂದಿಗೆ ಮೈದಾನದ ಸುತ್ತಮುತ್ತ ನಾಯಿಗಳ ಹಾವಳಿಯೂ ಇರುವುದರಿಂದ ಕತ್ತಲೆಯಲ್ಲಿ ಸಂಚರಿಸಲು ಮತ್ತಷ್ಟು ಭಯವಾಗುತ್ತಿದೆ ಎಂದು ವಾಯುವಿಹಾರಿಗಳು ಹೇಳುತ್ತಾರೆ.
“ಸರ್ಕಾರಿ ಮೈದಾನ ಸದಾ ಕ್ರೀಡಾ ಚಟುವಟಿಕೆಗಳಿಂದ ಕೂಡಿರುತ್ತಿತ್ತು. ಇದೀಗ ಮಹಿಳೆಯರು, ವೃದ್ಧರು ಸೇರಿದಂತೆ ನೂರಾರು ಮಂದಿ ವಾಯುವಿಹಾರಕ್ಕೆ ಬರುತ್ತಿದ್ದಾರೆ. ಬೆಳಗ್ಗೆ ಮತ್ತು ಸಂಜೆ ಕತ್ತಲಿನ ಸಮಸ್ಯೆ ಎಲ್ಲರಿಗೂ ತೊಂದರೆ ತಂದಿದೆ. ಹೈಮಾಸ್ಟ್ ಲೈಟ್ ಅಳವಡಿಸುವಂತೆ ಪಟ್ಟಣ ಪಂಚಾಯಿತಿ ಸಭೆಯಲ್ಲೂ ಮನವಿ ಮಾಡಿದ್ದರೂ ಈವರೆಗೆ ಕ್ರಮವಾಗಿಲ್ಲ ಎಂದು ವಕೀಲ ಜಿ.ಎಂ. ಶಿವಾನಂದ್ ಹೇಳಿದರು
“ದೈಹಿಕ ಆರೋಗ್ಯ ಕಾಪಾಡಿಕೊಳ್ಳಲು ಮಹಿಳೆಯರು, ವೃದ್ಧರು ಹಾಗೂ ರೋಗಿಗಳು ನಿತ್ಯ ವಾಕಿಂಗ್‌ಗಾಗಿ ಈ ಮೈದಾನವನ್ನೇ ಅವಲಂಬಿಸಿದ್ದಾರೆ. ಸೂಕ್ತ ವಾತಾವರಣವಿದ್ದರೂ ಬೆಳಕಿನ ಕೊರತೆ ದೊಡ್ಡ ಸಮಸ್ಯೆಯಾಗಿದೆ. ನಾಯಿಗಳ ಹಾವಳಿಯ ನಡುವೆ ಮುಂಜಾನೆ ಮತ್ತು ಸಂಜೆ ಓಡಾಡಲು ಭಯವಾಗುತ್ತದೆ. ನೂರಾರು ವಾಯುವಿಹಾರಿಗಳ ಸುರಕ್ಷತೆಗಾಗಿ ಪಟ್ಟಣ ಪಂಚಾಯಿತಿ ಕೂಡಲೇ ಬೆಳಕಿನ ವ್ಯವಸ್ಥೆ ಮಾಡಬೇಕು ಎಂದು ಬಿ.ಎಂ. ಚಂದ್ರಕಲಾ ಚಂದ್ರಶೇಖರ್ ತಿಳಿಸಿದರು
ಸಾರ್ವಜನಿಕರ ಆರೋಗ್ಯಕ್ಕಾಗಿ ಸರ್ಕಾರ ವಿವಿಧ ಯೋಜನೆಗಳನ್ನು ರೂಪಿಸುತ್ತಿರುವ ಸಂದರ್ಭದಲ್ಲಿ, ಪಟ್ಟಣದ ಪ್ರಮುಖ ಸಾರ್ವಜನಿಕ ಮೈದಾನದಲ್ಲಿ ಮೂಲಭೂತ ಬೆಳಕಿನ ವ್ಯವಸ್ಥೆಯೇ ಇಲ್ಲದಿರುವುದು ವಿಪರ್ಯಾಸವಾಗಿದೆ. ವಾಯುವಿಹಾರಿಗಳ ಆರೋಗ್ಯದ ಜೊತೆಗೆ ಅವರ ಸುರಕ್ಷತೆಯನ್ನೂ ಗಮನದಲ್ಲಿಟ್ಟುಕೊಂಡು ಪಟ್ಟಣ ಪಂಚಾಯಿತಿ ತಕ್ಷಣ ಹೈಮಾಸ್ಟ್ ಲೈಟ್ ಅಳವಡಿಸಬೇಕು ಎಂಬುದು ನಾಗರಿಕರ ಒತ್ತಾಯ.
