ಅನ್ನಭಾಗ್ಯ ಯೋಜನೆಯಡಿ ಬಡವರಿಗೆ ವಿತರಿಸಬೇಕಾದ ಪಡಿತರ ಅಕ್ಕಿಯನ್ನು ಅಕ್ರಮವಾಗಿ ಕಾಳಸಂತೆಗೆ ಸಾಗಿಸುತ್ತಿದ್ದ ಶಂಕೆ ಮೇರೆಗೆ ಪಾವಗಡ ಪೊಲೀಸರು 30.75 ಕ್ವಿಂಟಲ್ ಸಾರವರ್ಧಿತ (ಫೋರ್ಟಿಫೈಡ್) ಅಕ್ಕಿಯನ್ನು ವಶಪಡಿಸಿಕೊಂಡು ಪ್ರಕರಣ ದಾಖಲಿಸಿದ್ದಾರೆ.
ಪಡಿತರ ಚೀಟಿ ಅಕ್ಕಿಯನ್ನು ಅಕ್ರಮವಾಗಿ ಸಾಗಿಸಲಾಗುತ್ತಿದೆ ಎಂಬ ಮಾಹಿತಿ ಪತ್ರಕರ್ತರಿಂದ ಪಾವಗಡ ತಹಶೀಲ್ದಾರ್ ವೈ. ರವಿ ಅವರಿಗೆ ತಲುಪಿದ ಹಿನ್ನೆಲೆಯಲ್ಲಿ, ಅವರ ನೇತೃತ್ವದಲ್ಲಿ ಪೊಲೀಸರು ದಾಳಿ ನಡೆಸಿ 60 ಚೀಲ ಅಕ್ಕಿ ಹಾಗೂ ಸಾಗಾಟಕ್ಕೆ ಬಳಸಲಾಗಿದ್ದ ಅಶೋಕ್ ಲೇಲ್ಯಾಂಡ್ ಲಾರಿಯನ್ನು ವಶಪಡಿಸಿಕೊಂಡರು. ಬಳಿಕ ವಶಪಡಿಸಿಕೊಂಡ ಅಕ್ಕಿಯ ಬಗ್ಗೆ ಪರಿಶೀಲನೆ ನಡೆಸುವಂತೆ ಆಹಾರ ಇಲಾಖೆಗೆ ಸೂಚಿಸಲಾಗಿತ್ತು.
ಆಹಾರ ನಿರೀಕ್ಷಕ ರಾಹುಲ್ ಎ.ಸಿ. ಅವರು ಅಕ್ಕಿಯನ್ನು ಪರಿಶೀಲಿಸಿ ನೀಡಿದ ವರದಿಯ ಆಧಾರದ ಮೇಲೆ ಜುಲೈ 14ರಂದು ಪ್ರಕರಣ ದಾಖಲಾಗಿದೆ. ಜುಲೈ 7ರಂದು ಪಾವಗಡ–ತುಮಕೂರು ರಸ್ತೆಯ ರಾಯಲ್ ಹೆರಿಟೇಜ್ ಸಮೀಪ ಕೆ.ಎ-06-ಎಬಿ-6339 ಸಂಖ್ಯೆಯ ಲಾರಿಯಲ್ಲಿ ಅಕ್ಕಿ ಹಾಗೂ ನುಚ್ಚು ಅಕ್ಕಿ ಸಾಗಾಟವಾಗುತ್ತಿರುವ ಮಾಹಿತಿ ದೊರೆತಿದ್ದು, ಸ್ಥಳೀಯರು ವಾಹನವನ್ನು ತಡೆದು ಅಧಿಕಾರಿಗಳಿಗೆ ಮಾಹಿತಿ ನೀಡಿದ್ದರು.
ಪೊಲೀಸರು ಮತ್ತು ಆಹಾರ ಇಲಾಖೆ ಅಧಿಕಾರಿಗಳ ಪರಿಶೀಲನೆಯಲ್ಲಿ ವಾಹನದಲ್ಲಿ ಒಟ್ಟು 60 ಚೀಲಗಳಲ್ಲಿ 30.75 ಕ್ವಿಂಟಲ್ ಸಾರವರ್ಧಿತ ಅಕ್ಕಿ ಪತ್ತೆಯಾಗಿದ್ದು, ಇದರ ಮೌಲ್ಯ ಸುಮಾರು ₹71,340 ಎಂದು ಅಂದಾಜಿಸಲಾಗಿದೆ. ಭಾರತ ಆಹಾರ ನಿಗಮ (ಎಫ್‌ಸಿಐ)ದ ಅಧಿಕೃತ ಲೇಬಲ್ ಹೊಂದಿರುವ ಗೋಣಿಚೀಲಗಳು ಪತ್ತೆಯಾಗಿರುವ ಹಿನ್ನೆಲೆಯಲ್ಲಿ, ಇದು ಸಾರ್ವಜನಿಕ ವಿತರಣಾ ವ್ಯವಸ್ಥೆ (ಪಡಿತರ) ಅಕ್ಕಿಯಾಗಿರುವ ಸಾಧ್ಯತೆ ಇದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ವಶಪಡಿಸಿಕೊಂಡ ಅಕ್ಕಿಯನ್ನು ಸುರಕ್ಷತಾ ದೃಷ್ಟಿಯಿಂದ ಕೆಎಫ್‌ಸಿಎಸ್‌ಸಿ ಪಾವಗಡ ಸಗಟು ಗೋದಾಮಿನಲ್ಲಿ ಸಂಗ್ರಹಿಸಲಾಗಿದೆ. ಈ ಸಂಬಂಧ ಎಸ್‌ಕೆಆರ್ ಜನರಲ್ ಸ್ಟೋರ್ಸ್ ಮಾಲೀಕ ಆರ್. ಸುರೇಶ್ ಹಾಗೂ ಲಾರಿ ಚಾಲಕ ಸೈಯ್ಯದ್ ಮೊಹಮ್ಮದ್ ತನ್ವೀರ್ ವಿರುದ್ಧ ಅಗತ್ಯ ವಸ್ತುಗಳ ಕಾಯ್ದೆ (Essential Commodities Act) ಕಲಂ 3 ಮತ್ತು 7ರಡಿ ಪಾವಗಡ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಲಾಗಿದ್ದು, ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ.
