ಲೈಂಗಿಕ ಕಿರುಕುಳದ ದೂರುಗಳನ್ನು ವಿಚಾರಣೆ ನಡೆಸುವುದು ಹಾಗೂ ಲಿಂಗ ಸಮಾನತೆ ಮತ್ತು ಸಂವೇದನಾಶೀಲತೆ ಕುರಿತು ಜಾಗೃತಿ ಮೂಡಿಸುವ ಉದ್ದೇಶದಿಂದ ಕೇರಳ ಹೈಕೋರ್ಟ್ 12 ಸದಸ್ಯರ ಲಿಂಗ ಸಂವೇದನಾಶೀಲತೆ ಮತ್ತು ಆಂತರಿಕ ದೂರುಗಳ ಸಮಿತಿ (GSICC) ರಚಿಸಿದೆ.
ಹೈಕೋರ್ಟ್‌ನ ನ್ಯಾಯಮೂರ್ತಿ ಜೆ. ನಿಶಾ ಬಾನು ಅವರನ್ನು ಸಮಿತಿಯ ಅಧ್ಯಕ್ಷರನ್ನಾಗಿ ನೇಮಕ ಮಾಡಲಾಗಿದ್ದು, ನ್ಯಾಯಮೂರ್ತಿ ಶೋಭಾ ಅನ್ನಮ್ಮ ಈಪನ್ ಅವರು ಸದಸ್ಯರಾಗಿದ್ದಾರೆ. 2026ರ ‘ಕೇರಳ ಹೈಕೋರ್ಟ್‌ನಲ್ಲಿ ಮಹಿಳೆಯರ ಲಿಂಗ ಸಂವೇದನಾಶೀಲತೆ ಮತ್ತು ಲೈಂಗಿಕ ಕಿರುಕುಳ ತಡೆ, ನಿಷೇಧ ಮತ್ತು ಪರಿಹಾರ ನಿಯಮಾವಳಿ’ಯ ನಿಯಮ 4ರ ಅನ್ವಯ ಈ ಸಮಿತಿ ರಚಿಸಲಾಗಿದೆ.
ಹೈಕೋರ್ಟ್ ಆವರಣದಲ್ಲಿ ಲೈಂಗಿಕ ಕಿರುಕುಳಕ್ಕೆ ಸಂಬಂಧಿಸಿದ ದೂರುಗಳನ್ನು ಸ್ವೀಕರಿಸಿ ಸೂಕ್ತ ಕ್ರಮ ಕೈಗೊಳ್ಳುವುದು ಹಾಗೂ ಸಾರ್ವಜನಿಕರಲ್ಲಿ ಲಿಂಗ ಸಂಬಂಧಿತ ವಿಚಾರಗಳ ಕುರಿತು ಜಾಗೃತಿ ಮೂಡಿಸುವುದು ಸಮಿತಿಯ ಪ್ರಮುಖ ಜವಾಬ್ದಾರಿಯಾಗಿದೆ. ಸಮಿತಿಯ ಅವಧಿ ಎರಡು ವರ್ಷಗಳಾಗಿದ್ದು, ಯಾವುದೇ ಸದಸ್ಯರನ್ನು ಸತತವಾಗಿ ಎರಡು ಅವಧಿಗಳಿಗಿಂತ ಹೆಚ್ಚು ಕಾಲ ನೇಮಕ ಮಾಡುವಂತಿಲ್ಲ.
ಸಮಿತಿಯ ಸದಸ್ಯರಾಗಿ ಹೈಕೋರ್ಟ್ ವಿಜಿಲೆನ್ಸ್‌ ರಿಜಿಸ್ಟ್ರಾರ್‌ ಡಾ. ಮಿನಿ ಎಸ್. ದಾಸ್ ಅವರನ್ನು ಸದಸ್ಯ ಕಾರ್ಯದರ್ಶಿಯಾಗಿ ನೇಮಕ ಮಾಡಲಾಗಿದೆ. ವಕೀಲರಾದ ಪಾರ್ವತಿ ಮೆನನ್ ಎ., ವಿನೋದ್ ಭಟ್ ಎಸ್., ಬೋಬಿ ಎಂ. ಶೇಖರ್‌, ಅಂಜನಾ ಕಣ್ಣಾಥ, ಎಂ. ಶಜ್ನಾ ಮತ್ತು ಸಂಧ್ಯಾ ರಾಜು ಅವರು ಸದಸ್ಯರಾಗಿದ್ದಾರೆ.
ಇದನ್ನೂ ಓದಿ: ಕಾರ್ಗಿಲ್‌ ಯೋಧನಿಗೆ 24 ವರ್ಷವಾದರೂ ಸಿಗದ ಭೂಮಿ; ಆತ್ಮಹತ್ಯೆಗೆ ಯತ್ನ
ಈ ಪೈಕಿ ಬೋಬಿ ಎಂ. ಶೇಖರ್‌ ಮತ್ತು ಅಂಜನಾ ಕಣ್ಣಾಥ ಅವರನ್ನು ಕೇರಳ ಹೈಕೋರ್ಟ್ ವಕೀಲರ ಸಂಘ, ಎಂ. ಶಜ್ನಾ ಅವರನ್ನು ಕೇರಳ ಫೆಡರೇಶನ್‌ ಆಫ್‌ ವುಮೆನ್‌ ಲಾಯರ್ಸ್‌ ಪರವಾಗಿ ನಾಮನಿರ್ದೇಶನ ಮಾಡಲಾಗಿದೆ. ಸಂಧ್ಯಾ ರಾಜು ಅವರು ಎರ್ನಾಕುಲಂನ ಸೆಂಟರ್‌ ಫಾರ್‌ ಕಾನ್‌ಸ್ಟಿಟ್ಯೂಷನಲ್‌ ರೈಟ್ಸ್‌ ರಿಸರ್ಚ್‌ ಆ್ಯಂಡ್‌ ಅಡ್ವೊಕಸಿ (CCRRA) ನಿರ್ದೇಶಕರಾಗಿದ್ದು, POSH ಕಾಯ್ದೆಯಡಿ ಸ್ಥಳೀಯ ಸಮಿತಿಯ ಎನ್‌ಜಿಒ ಪ್ರತಿನಿಧಿಯಾಗಿದ್ದಾರೆ.
ಹೈಕೋರ್ಟ್‌ನ ಉಪ ರಿಜಿಸ್ಟ್ರಾರ್‌ ಶ್ರೀದೇವಿ ಎ.ಆರ್., ಅಡ್ವೊಕೇಟ್‌ ಜನರಲ್‌ ಕಚೇರಿಯ ಅಂಡರ್‌ ಸೆಕ್ರೆಟರಿ ಗೀತಾ ವಿ. ಮೋಹನನ್ ಹಾಗೂ ಹೈಕೋರ್ಟ್ ವಕೀಲರ ಗುಮಾಸ್ತರ ಸಂಘದಿಂದ ನಾಮನಿರ್ದೇಶನಗೊಂಡ ಸೋನಿ ಜಾನ್ ಅವರೂ ಸಮಿತಿಯಲ್ಲಿದ್ದಾರೆ.
