ಮಿಜೋರಾಂನಲ್ಲಿ ಮೊದಲ ಪತಿ ಅಥವಾ ಪತ್ನಿಯಿಂದ ಬೇರ್ಪಟ್ಟು ಮತ್ತೊಂದು ಮದುವೆಯಾಗಲು ಬಯಸುವವರಿಗೆ ನ್ಯಾಯಾಲಯದಿಂದ ನೀಡಲಾದ ಅಧಿಕೃತ ವಿಚ್ಛೇದನ ಪ್ರಮಾಣಪತ್ರವನ್ನು ಕಡ್ಡಾಯಗೊಳಿಸಲಾಗಿದೆ. ಮಿಜೋರಾಂ ವಿಧಾನಸಭೆಯು ಅಂಗೀಕರಿಸಿರುವ ‘ಮಿಜೋ ಮದುವೆ ಮತ್ತು ಆಸ್ತಿ ಹಕ್ಕು ತಿದ್ದುಪಡಿ ಕಾಯ್ದೆ-2026’ರ ಅಡಿಯಲ್ಲಿ ಈ ಹೊಸ ನಿಯಮವನ್ನು ಜಾರಿಗೆ ತರಲಾಗಿದೆ.
ಮಿಜೋ ಮದುವೆ ಮತ್ತು ಆಸ್ತಿ ಹಕ್ಕು ಕಾಯ್ದೆಯ ಪರಿಶೀಲನಾ ಸಮಿತಿಯ ಸಭೆಯ ನಂತರ ಈ ನಿರ್ಧಾರವನ್ನು ಅಧಿಕೃತವಾಗಿ ಪ್ರಕಟಿಸಲಾಗಿದೆ. ಕಾನೂನು ಮತ್ತು ನ್ಯಾಯಾಂಗ ಇಲಾಖೆಯ ಹೆಚ್ಚುವರಿ ಕಾರ್ಯದರ್ಶಿ ಝಹ್ಮಿಂಗ್‌ಥಂಗ ರೌತೆ ಅವರ ಅಧ್ಯಕ್ಷತೆಯಲ್ಲಿ ನಡೆದ ಈ ಸಮಿತಿ ಸಭೆಯಲ್ಲಿ ಹಲವು ಮಹತ್ವದ ಸಂಗತಿಗಳನ್ನು ಸ್ಪಷ್ಟಪಡಿಸಲಾಗಿದೆ.
ಇದನ್ನೂ ಓದಿ: ‘ಮದುವೆಯಾಗುವುದು ಮಾನವ ಹಕ್ಕು’- ಹಿಂದೂ ವಿವಾಹ ಕಾಯಿದೆ ತಿದ್ದುಪಡಿಗೆ ಮದ್ರಾಸ್ ಹೈಕೋರ್ಟ್ ಸಲಹೆ
ಮರುಮದುವೆ ನಡೆಸಿಕೊಡುವ ವ್ಯಕ್ತಿ ಅಥವಾ ಧಾರ್ಮಿಕ ಸಂಸ್ಥೆಗಳು, ವ್ಯಕ್ತಿಯ ಹಿಂದಿನ ಮದುವೆ ಕಾನೂನುಬದ್ಧವಾಗಿ ರದ್ದಾಗಿದೆಯೇ ಎಂಬುದನ್ನು ಪರಿಶೀಲಿಸಿ, ಕೋರ್ಟ್ ನೀಡಿರುವ ವಿಚ್ಛೇದನ ಪ್ರಮಾಣಪತ್ರವನ್ನು ಖಚಿತಪಡಿಸಿಕೊಳ್ಳುವುದು ಕಡ್ಡಾಯವಾಗಿದೆ. ನ್ಯಾಯಾಲಯದ ವಿಚ್ಛೇದನ ಪ್ರಮಾಣಪತ್ರವನ್ನು ಸಲ್ಲಿಸದೆ ಅಕ್ರಮವಾಗಿ ಮರುಮದುವೆಯಾದರೆ, ಪರಿಸ್ಥಿತಿಗೆ ಅನುಗುಣವಾಗಿ 7ರಿಂದ 10 ವರ್ಷಗಳವರೆಗೆ ಕಠಿಣ ಜೈಲು ಶಿಕ್ಷೆ ವಿಧಿಸಲು ಕಾಯ್ದೆಯಲ್ಲಿ ಅವಕಾಶವಿದೆ ಎಂದು ಸರ್ಕಾರದ ಹೊಸ ನಿಯಮ ಹೇಳುತ್ತದೆ.
ಚರ್ಚ್‌ಗಳು ತಮ್ಮ ವ್ಯಾಪ್ತಿಯಲ್ಲಿ ಮದುವೆ ಮತ್ತು ಮರುಮದುವೆಯನ್ನು ನಿಯಂತ್ರಿಸುವುದನ್ನು ಮುಂದುವರಿಸಬಹುದು. ಆದರೆ ಮದುವೆ ಪ್ರಮಾಣಪತ್ರಗಳಲ್ಲಿ “ವಿಚ್ಛೇದನ” (Divorce) ಎಂಬ ಪದದ ಬದಲು “ಮಿಜೋ ಮದುವೆ ಮತ್ತು ಆಸ್ತಿ ಉತ್ತರಾಧಿಕಾರ ಕಾಯ್ದೆ 2014ರ ಪ್ರಕಾರ” ಎಂಬ ವಾಕ್ಯವನ್ನು ಬಳಸುವಂತೆ ಚರ್ಚ್‌ಗಳಿಗೆ ವಿನಂತಿಸಲಾಗಿದೆ.
ವಧುವಿನ ಕಡೆಯವರಿಗೆ ನೀಡಲಾಗುವ ಸಾಂಪ್ರದಾಯಿಕ ಶುಲ್ಕಗಳ ಮೇಲೆಯೂ ಸಮಿತಿ ಸುಧಾರಣೆ ತಂದಿದ್ದು, ಹೊಸದಾಗಿ ಆರಂಭವಾಗಿದ್ದ ‘ನುಟಾ ಮಾನ್’ (ಸಹೋದರರ ಶುಲ್ಕ) ಅನ್ನು ನಿಲ್ಲಿಸುವಂತೆ ಮತ್ತು ಜೀವತಳೆದ ಹೆತ್ತ ತಾಯಿಗೆ ಮಾತ್ರ ‘ನು ಮಾನ್’ ಶುಲ್ಕ ಸಿಗುವಂತೆ ಸ್ಪಷ್ಟಪಡಿಸಿದೆ.
ಈ ಸಭೆಯಲ್ಲಿ ಸರ್ಕಾರಿ ಅಧಿಕಾರಿಗಳು, ಚರ್ಚ್ ಪ್ರತಿನಿಧಿಗಳು, ನಾಗರಿಕ ಸಮಾಜ ಸಂಸ್ಥೆಗಳು, ಮಿಜೋರಾಂ ಮಹಿಳಾ ಆಯೋಗ ಮತ್ತು ಮಿಜೋರಾಂ ವಿಶ್ವವಿದ್ಯಾಲಯದ ತಜ್ಞರು ಭಾಗವಹಿಸಿದ್ದರು.
