ಭಾರತದಲ್ಲಿ ಇಂಧನ ಪೂರೈಕೆಯಲ್ಲಿ ಎಥೆನಾಲ್ ಮಿಶ್ರಣ (E20) ಕಡ್ಡಾಯವಾಗುತ್ತಿರುವ ಹೊತ್ತಲ್ಲೇ, ಛತ್ತೀಸ್‌ಗಢ ರಾಜ್ಯದ ರಾಯ್‌ಪುರ ಜಿಲ್ಲಾ ಗ್ರಾಹಕ ವ್ಯಾಜ್ಯಗಳ ಪರಿಹಾರ ಆಯೋಗವು ಕಾರು ತಯಾರಿಕಾ ಕಂಪನಿಯೊಂದಕ್ಕೆ ಶಾಕ್ ನೀಡಿದೆ. E20 ಇಂಧನಕ್ಕೆ ಹೊಂದಿಕೆಯಾಗದ ವಾಹನವನ್ನು ಮಾರಾಟ ಮಾಡಿದ್ದಲ್ಲದೆ, ಹಳೆಯ ವಾಹನವನ್ನು ಹೊಸದು ಎಂದು ನಂಬಿಸಿ ಮಾರಾಟ ಮಾಡಿದ ಆರೋಪದ ಮೇಲೆ, ಪ್ರಮುಖ ವಾಹನ ತಯಾರಕ ಕಂಪನಿ ಮತ್ತು ಅದರ ಸ್ಥಳೀಯ ಡೀಲರ್‌ಗೆ ಕಾರನ್ನು ಬದಲಾಯಿಸಲು ಅಥವಾ ಸಂಪೂರ್ಣ ಹಣವನ್ನು ಮರುಪಾವತಿಸಲು ನ್ಯಾಯಾಲಯ ಆದೇಶಿಸಿದೆ.
ಏನಿದು ಪ್ರಕರಣ?: ರಾಯ್‌ಪುರದ ವೈದ್ಯ ಡಾ. ಪ್ರೇಮ್‌ರಾಜ್ ದೇವತಾ ಅವರು ಅಧಿಕೃತ ಡೀಲರ್ ಮೂಲಕ ಗ್ರ್ಯಾಂಡ್‌ ವಿಟಾರಾದ ಹೈಬ್ರಿಡ್ ಕಾರೊಂದನ್ನು ಖರೀದಿಸಿದ್ದರು. ನೋಂದಣಿ ಶುಲ್ಕ ಮತ್ತು ವಿಮೆ ಸೇರಿದಂತೆ ಒಟ್ಟು 20,50,494 ರೂಪಾಯಿಗಳನ್ನು ಪಾವತಿಸಿದ್ದರು. ಆದರೆ, ವಾಹನವು 21,913 ಕಿ.ಮೀ ಕ್ರಮಿಸಿದ ನಂತರ ಪದೇ ಪದೇ ಕೆಟ್ಟು ನಿಲ್ಲಲು ಆರಂಭಿಸಿತು. 2024ರ ನವೆಂಬರ್ 11ರಂದು ಎಂಜಿನ್ ಮಾಲ್ ಫಂಕ್ಷನ್ ಅಲರ್ಟ್ ಬಂದು ಕಾರು ಸ್ಥಗಿತಗೊಂಡಿತು. ಈ ವೇಳೆ ಡೀಲರ್ ಬಳಿಗೆ ಕಾರನ್ನು ಐದು ಬಾರಿ ಕೊಂಡೊಯ್ದರೂ ಪ್ರಯೋಜನವಾಗಲಿಲ್ಲ. ಆರಂಭದಲ್ಲಿ, “ಇಂಧನದಲ್ಲಿ ಕಲಬೆರಕೆ ಇದೆ” ಎಂದು ಕಂಪನಿಯು ಸಬೂಬು ನೀಡಿತ್ತು.
ತನಿಖೆಯಲ್ಲಿ ಇಂಧನವು E20 ಆಗಿರುವುದು ದೃಢಪಟ್ಟಿತು. ಆದರೆ, ಕಂಪನಿ ಮಾರಾಟ ಮಾಡಿದ್ದ ವಾಹನದ ಎಂಜಿನ್ E20 ಇಂಧನವನ್ನು ಬೆಂಬಲಿಸುವುದಿಲ್ಲ ಎಂಬುದು ದಾಖಲೆಗಳಿಂದ ಸಾಬೀತಾಯಿತು. ಅಲ್ಲದೆ, ಗ್ರಾಹಕರಿಗೆ 2024ರ ಜೂನ್‌ನಲ್ಲಿ ಮಾರಾಟ ಮಾಡಿದ್ದ ಕಾರು ವಾಸ್ತವವಾಗಿ 2023ರ ಜನವರಿಯಲ್ಲಿ ಉತ್ಪಾದನೆಯಾಗಿದ್ದ ಹಳೆಯ ಸ್ಟಾಕ್ ಎಂಬುದು ಬೆಳಕಿಗೆ ಬಂತು. ಅಂದರೆ, ಒಂದೂವರೆ ವರ್ಷ ಹಳೆಯ ವಾಹನವನ್ನು ಹೊಸ ಕಾರಿನ ದರದಲ್ಲಿ ಮಾರಾಟ ಮಾಡಲಾಗಿತ್ತು. ಇದು ಸೇವಾ ನ್ಯೂನತೆ ಮತ್ತು ಮೋಸದ ವ್ಯಾಪಾರ ಪದ್ಧತಿ ಎಂದು ಆಯೋಗ ಅಭಿಪ್ರಾಯಪಟ್ಟಿದೆ.
ಇದನ್ನೂ ಓದಿ: ತೇವಾಂಶ ಹೀರುವ ಎಥೆನಾಲ್ ಗುಣವೇ ಪೆಟ್ರೋಲ್ ಮಾಲಿನ್ಯಕ್ಕೆ ಕಾರಣ: ಕಂಗೆಟ್ಟ ಬಂಕ್‌ ಮಾಲೀಕರು
ಆಯೋಗದ ಅಧ್ಯಕ್ಷ ಪ್ರಶಾಂತ್ ಕುಂಡು ಮತ್ತು ಸದಸ್ಯ ಡಾ. ಆನಂದ್ ವರ್ಗೀಸ್ ಅವರಿದ್ದ ಪೀಠವು ಜುಲೈ 14ರಂದು ಈ ಮಹತ್ವದ ತೀರ್ಪು ನೀಡಿದೆ. ದೋಷಯುಕ್ತ ವಾಹನವನ್ನು ವಾಪಸ್ ಪಡೆದು, 45 ದಿನಗಳ ಒಳಗೆ E20 ಎಂಜಿನ್ ಹೊಂದಿರುವ ಅದೇ ಮಾದರಿಯ ಹೊಸ ಕಾರನ್ನು ನೀಡಬೇಕು. ಒಂದು ವೇಳೆ ಹೊಸ ಕಾರು ನೀಡಲು ವಿಫಲವಾದರೆ, ನೋಂದಣಿ ಮತ್ತು ವಿಮೆ ಸೇರಿದಂತೆ ಒಟ್ಟು 20,50,494 ರೂಪಾಯಿಗಳನ್ನು ಗ್ರಾಹಕರಿಗೆ ಮರುಪಾವತಿಸಬೇಕು. ಮಾನಸಿಕ ಕಿರುಕುಳಕ್ಕಾಗಿ 1 ಲಕ್ಷ ರೂಪಾಯಿ ಮತ್ತು ಕಾನೂನು ಹೋರಾಟದ ಖರ್ಚಿಗಾಗಿ 10,000 ರೂಪಾಯಿಗಳನ್ನು 45 ದಿನಗಳ ಒಳಗೆ ಪಾವತಿಸಬೇಕು. ಒಂದು ವೇಳೆ ನಿಗದಿತ ಅವಧಿಯಲ್ಲಿ ಹಣ ಪಾವತಿಸದಿದ್ದರೆ, ಆದೇಶದ ದಿನಾಂಕದಿಂದ ಪಾವತಿಯಾಗುವವರೆಗೆ ವಾರ್ಷಿಕ ಶೇ. 7ರಷ್ಟು ಬಡ್ಡಿಯನ್ನು ವಿಧಿಸಲಾಗುವುದು ಎಂದು ತೀರ್ಪು ನೀಡಿದೆ.
ಈ ತೀರ್ಪು E20 ಇಂಧನದ ಕುರಿತು ವಾಹನ ತಯಾರಕರು ಮತ್ತು ಗ್ರಾಹಕರ ನಡುವೆ ಉಂಟಾಗಿರುವ ಗೊಂದಲಕ್ಕೆ ಹೊಸ ಆಯಾಮ ನೀಡಿದ್ದು, ಗ್ರಾಹಕರ ಹಕ್ಕುಗಳನ್ನು ಎತ್ತಿಹಿಡಿದಿದೆ.
