ಉತ್ತರ ಪ್ರದೇಶದ ಸಹರಾನ್‌ಪುರ ಜಿಲ್ಲೆಯ ಹೆದ್ದಾರಿ ಪಕ್ಕದಲ್ಲಿರುವ ಸೈಯದ್ ಮಜ್ರಾ ಎಂಬ ಹಳ್ಳಿಯ ಸ್ಮಶಾನದಲ್ಲಿ ಮೂರು ದಿನಗಳ ಕಾಲ ಸತತವಾಗಿ ಸುರಿದ ಭಾರೀ ಮಳೆಯಿಂದಾಗಿ ತೀವ್ರ ಜಲಾವೃತ ಮತ್ತು ಮಣ್ಣಿನ ಸವೆತ ಉಂಟಾಗಿದೆ. ಮಳೆಯ ನೀರಿನ ತೀವ್ರತೆ ಎಷ್ಟಿದೆ ಎಂದರೆ ಗೋರಿಗಳ ಮೇಲಿದ್ದ ಮಣ್ಣು ಕೊಚ್ಚಿ ಹೋಗಿ, ಹೂಳಲಾಗಿದ್ದ ಹಲವು ಮೃತದೇಹಗಳು ಈಗ ನೀರಿನಲ್ಲಿ ತೇಲುತ್ತಿದೆ. ಸದ್ಯ ಈ ವಿಡಿಯೋ ಸ್ಥಳೀಯವಾಗಿ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದೆ.
ಇನ್ನು ವಿಡಿಯೋ ಹರಿದಾಡಿದ ಬೆನ್ನಲ್ಲೇ ಪೊಲೀಸ್ ಸಿಬ್ಬಂದಿ ಧಾವಿಸಿ, ಗೋರಿಯಿಂದ ಹೊರಬಂದು ನೀರಿನಲ್ಲಿ ತೇಲುತ್ತಿದ್ದ ಮೃತದೇಹಗಳನ್ನು ಸ್ಮಶಾನದ ಸುರಕ್ಷಿತ ಹಾಗೂ ಎತ್ತರವಾದ ಜಾಗಕ್ಕೆ ಸ್ಥಳಾಂತರಿಸಿದ್ದಾರೆ. ಧಾರ್ಮಿಕ ವಿಧಿವಿಧಾನಗಳೊಂದಿಗೆ ಅತ್ಯಂತ ಗೌರವದಿಂದ ಮರುಸಂಸ್ಕಾರ ಮಾಡಲಾಗಿದೆ.
ಇದನ್ನೂ ಓದಿ: ದೆಹಲಿ | ಭಾರೀ ಮಳೆಯಿಂದಾಗಿ ರಸ್ತೆಗಳು ಜಲಾವೃತ; ಸಂಚಾರ ಅಸ್ತವ್ಯಸ್ತ
ಈ ನಡುವೆ ಸರಿಯಾಗಿ ಹೂಳದ ಕಾರಣ ನೀರು ತುಂಬುತ್ತಿದ್ದಂತೆ ಮೃತದೇಹಗಳು ಕೊಚ್ಚಿ ಬಂದಿವೆಯೇ ಎಂಬ ಪ್ರಶ್ನೆಯೂ ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆ ಹುಟ್ಟಿಸಿದೆ. ಆದರೆ ಸ್ಥಳೀಯ ಪ್ರಕಾರ ಇಲ್ಲಿ ಹೂಳಲಾದ ಮೃತದೇಹಗಳನ್ನು ಸಂಪ್ರದಾಯದಂತೆ ಸರಿಯಾಗಿಯೇ ಸಂಸ್ಕಾರ ಮಾಡಲಾಗಿತ್ತು. ಆದರೆ, ಇತ್ತೀಚಿನ ದಿನಗಳಲ್ಲಿ ಸುರಿದ ಭಾರೀ ಮಳೆಯಿಂದಾಗಿ ಮಣ್ಣು ಸಂಪೂರ್ಣವಾಗಿ ಸಡಿಲಗೊಂಡಿದೆ.
ಇನ್ನು ಗ್ರಾಮಸ್ಥರ ಪ್ರಕಾರ ಈ ದುರಂತಕ್ಕೆ ಕೇವಲ ಮಳೆಯೊಂದೇ ಕಾರಣವಲ್ಲ. ಆ ಭಾಗದಲ್ಲಿ ಮಳೆನೀರು ಸರಾಗವಾಗಿ ಹರಿದು ಹೋಗುತ್ತಿದ್ದ ನೈಸರ್ಗಿಕ ಕಾಲುವೆಗಳನ್ನು ಹೂತುಹಾಕಲಾಗಿತ್ತು ಮತ್ತು ಒತ್ತುವರಿ ಮಾಡಲಾಗಿತ್ತು. ಇದರಿಂದಾಗಿ ಹರಿಯಬೇಕಿದ್ದ ನೀರು ದಿಕ್ಕು ಬದಲಿಸಿ ನೇರವಾಗಿ ಸ್ಮಶಾನ ಹಾಗೂ ಹಳ್ಳಿಯೊಳಗೆ ನುಗ್ಗಿದೆ.
ಇನ್ನು ಸ್ಮಶಾನದ ಹಿಂಭಾಗದಲ್ಲಿದ್ದ ಹಿಂಡನ್ ನದಿಯ ಹರಿವಿನ ಮಾರ್ಗದಲ್ಲಿ ಹೂಳು ತುಂಬಿ ದಿನಕಳೆದಂತೆ ಕಿರಿದಾಗುತ್ತಾ ಬಂದಿದೆ. ಹೀಗಾಗಿ ನೀರು ಹೊರಹೋಗಲು ದಾರಿಯಿಲ್ಲದೆ ಸ್ಮಶಾನದಲ್ಲಿ ಭಾರೀ ಪ್ರಮಾಣದಲ್ಲಿ ನೀರು ನಿಂತು ತೀವ್ರ ಮಣ್ಣಿನ ಸವೆತ ಉಂಟಾಗಿದೆ.
