ದೇಶದಲ್ಲಿ ಮಹಿಳಾ ಉದ್ಯೋಗಿ ಪಡೆ ಮತ್ತು ಕಾರ್ಮಿಕ ಕ್ಷೇತ್ರದಲ್ಲಿ ಮಹಿಳೆಯರ ಭಾಗವಹಿಸುವಿಕೆಯ ಪ್ರಮಾಣದಲ್ಲಿ ಕೊಂಚ ಚೇತರಿಕೆ ಕಂಡುಬಂದಿದೆ ಎಂದು ಕೇಂದ್ರ ಸಾಂಖ್ಯಿಕ ಮತ್ತು ಕಾರ್ಯಕ್ರಮ ಅನುಷ್ಠಾನ ಸಚಿವಾಲಯದ ‘ಸಾವಯವ ಕಾರ್ಮಿಕ ಪಡೆ ಸಮೀಕ್ಷೆ’ (PLFS) ಹೇಳಿದೆ.
ಇತ್ತೀಚಿನ ಪಿಎಲ್‌ಎಫ್‌ಎಸ್‌ ಮಾಸಿಕ ವರದಿ ಪ್ರಕಾರ, ಭಾರತದಲ್ಲಿ ಮಹಿಳಾ ಕಾರ್ಮಿಕರ ಭಾಗವಹಿಸುವಿಕೆ ಪ್ರಮಾಣವು 2026ರ ಸೆಪ್ಟೆಂಬರ್‌ನಲ್ಲಿ 34.6%ಗೆ ಏರಿಕೆಯಾಗಿದೆ. ಕಳೆದ ವರ್ಷದ ಇದೇ ಅವಧಿಯಲ್ಲಿ ಈ ಪ್ರಮಾಣವು 34.1% ಇತ್ತು. ವಿಶೇಷವಾಗಿ, ಗ್ರಾಮೀಣ ಭಾಗದಲ್ಲಿ ಮಹಿಳೆಯರ ಭಾಗವಹಿಸುವಿಕೆ ಪ್ರಮಾಣವು 38.9%ಗೆ ತಲುಪಿದ್ದು, ಕೃಷಿ ಮತ್ತು ಗ್ರಾಮೀಣ ಉದ್ಯೋಗಾವಕಾಶಗಳಲ್ಲಿ ಹೆಣ್ಣುಮಕ್ಕಳ ಸಕ್ರಿಯ ಪಾಲ್ಗೊಳ್ಳುವಿಕೆ ಹೆಚ್ಚಿದೆ ಎಂಬುದನ್ನು ಸೂಚಿಸಿದೆ. ಇನ್ನು ನಗರ ಪ್ರದೇಶಗಳಲ್ಲಿ ಮಹಿಳೆಯರ ಭಾಗವಹಿಸುವಿಕೆಯು ಕಳೆದ ಆಗಸ್ಟ್‌ನಲ್ಲಿ 25.4% ಇದ್ದದ್ದು, ಸೆಪ್ಟೆಂಬರ್ ವೇಳೆಗೆ 25.9%ಕ್ಕೆ ಏರಿಕೆ ಕಂಡಿದೆ.
ಕಾರ್ಮಿಕ ಪಡೆಯಲ್ಲಿ ಮಹಿಳೆಯರ ಸಂಖ್ಯೆ ಹೆಚ್ಚುತ್ತಿದ್ದರೂ, ಅವರು ನಿಜಕ್ಕೂ ಉತ್ತಮ ವೇತನ ದೊರೆಯುವ ಗುಣಮಟ್ಟದ ಉದ್ಯೋಗಗಳನ್ನು ಪಡೆಯುತ್ತಿದ್ದಾರೆಯೇ ಅಥವಾ ಕೇವಲ ಜೀವನೋಪಾಯಕ್ಕಾಗಿ ಕೆಲಸಕ್ಕೆ ಸೇರುತ್ತಿದ್ದಾರೆಯೇ ಎಂಬುದನ್ನು ವರದಿ ಸ್ಪಷ್ಟಪಡಿಸಿಲ್ಲ ಎಂದು ತಜ್ಞರು ವಿಶ್ಲೇಷಿಸಿದ್ದಾರೆ.
ಗಮನಾರ್ಹವಾಗಿ, ಉದ್ಯೋಗಿ ಮಹಿಳೆಯರ ವೇತನ ಹೆಚ್ಚಳದ ದರವು ಪುರುಷರಿಗಿಂತ ವೇಗವಾಗಿದ್ದರೂ, ಪುರುಷ ಮತ್ತು ಮಹಿಳೆಯರ ನಡುವಿನ ಆದಾಯದ ಅಂತರವು ಗಹನವಾಗಿದೆ ಎಂಬುದು ಸಮೀಕ್ಷೆಯಿಂದ ವ್ಯಕ್ತವಾಗಿದೆ. ಸಂಬಳ ಪಡೆಯುವ ಉದ್ಯೋಗಗಳಲ್ಲಿ ಮಹಿಳೆಯರ ವೇತನ 7.2%ರಷ್ಟು ಹೆಚ್ಚಳ ಕಂಡಿದ್ದರೆ, ಪುರುಷರ ವೇತನ 5.8% ರಷ್ಟು ಹೆಚ್ಚಾಗಿದೆ. ಸ್ವಯಂ ಉದ್ಯೋಗಿ ಮಹಿಳೆಯರ ಆದಾಯದಲ್ಲೂ 8.8%ರಷ್ಟು ಏರಿಕೆಯಾಗಿದೆ.
ಈ ಲೇಖನ ಓದಿದ್ದೀರಾ?: ಯೂರೋಪ್‌ | ಇಂಧನ ಬೆಲೆಯೇರಿಕೆ–ಬದುಕು ದುರ್ಭರ: ಜನಾಕ್ರೋಶಕ್ಕೆ ನಡುಗುತ್ತಿವೆ ಸರ್ಕಾರಗಳು!
ಆದಾಗ್ಯೂ, ಸಮಾನ ಕೆಲಸಕ್ಕೆ ದೊರೆಯುವ ವೇತನವನ್ನು ಹೋಲಿಸಿದರೆ, ಸಂಬಳ ಪಡೆಯುವ ಹುದ್ದೆಗಳಲ್ಲಿ ಪುರುಷರಿಗೆ ಸಿಗುವ ವೇತನದ ಕೇವಲ 76%ರಷ್ಟು ವೇತನ ಮಾತ್ರ ಮಹಿಳೆಯರಿಗೆ ದೊರೆಯುತ್ತಿದೆ. ಇನ್ನು ಸ್ವಯಂ ಉದ್ಯೋಗ ಕ್ಷೇತ್ರದಲ್ಲಿ ಈ ಅಂತರ ಭಾರೀ ಪ್ರಮಾಣದಲ್ಲಿದ್ದು, ಪುರುಷರ ಆದಾಯದ 36%ರಷ್ಟು (ಅರ್ಧಕ್ಕಿಂತ ಕಡಿಮೆ) ಮಾತ್ರವೇ ಮಾತ್ರ ಮಹಿಳೆಯರು ಗಳಿಸುತ್ತಿದ್ದಾರೆ.
ಉದ್ಯೋಗದ ಸ್ವರೂಪವನ್ನು ಗಮನಿಸಿದಾಗ, ಭಾರತೀಯ ಮಹಿಳೆಯರಿಗೆ ಇಂದಿಗೂ ‘ಸ್ವಯಂ ಉದ್ಯೋಗ’ವೇ ಅತಿ ದೊಡ್ಡ ಆಶ್ರಯತಾಣವಾಗಿದೆ. ಆದರೆ, ಇದರಲ್ಲಿ ಗಣನೀಯ ಪ್ರಮಾಣದ ಮಹಿಳೆಯರು ತಮ್ಮ ಕುಟುಂಬದ ಉದ್ಯಮಗಳಲ್ಲಿ ಅಥವಾ ಕೃಷಿಯಲ್ಲಿ ‘ವೇತನವಿಲ್ಲದ ಸಹಾಯಕ’ರಾಗಿ ದುಡಿಯುತ್ತಿದ್ದಾರೆ. ಗ್ರಾಮೀಣ ಭಾರತದಲ್ಲಿ 70.7% ಮಹಿಳೆಯರು ಸ್ವಯಂ ಉದ್ಯೋಗದಲ್ಲಿದ್ದರೆ, ಅದರಲ್ಲಿ 32.9% ರಷ್ಟು ಮಹಿಳೆಯರು ಯಾವುದೇ ವೇತನವಿಲ್ಲದೆ ಕುಟುಂಬದ ಕೆಲಸಗಳಲ್ಲಿ ತೊಡಗಿಸಿಕೊಂಡಿದ್ದಾರೆ. ನಗರ ಪ್ರದೇಶಗಳಲ್ಲಿ 50.9% ರಷ್ಟು ಮಹಿಳೆಯರು ಕಾಯಂ ಅಥವಾ ಸಂಬಳ ಸಿಗುವ ಉದ್ಯೋಗಗಳಲ್ಲಿದ್ದರೆ, ಗ್ರಾಮೀಣ ಭಾಗದಲ್ಲಿ ಇಂತಹ ಸುಭದ್ರ ಉದ್ಯೋಗ ಹೊಂದಿರುವ ಮಹಿಳೆಯರ ಪ್ರಮಾಣ ಕೇವಲ 9.3% ರಷ್ಟಿದೆ.
