ಈಗಾಗಲೇ ಮುಖ್ಯ ಚುನಾವಣಾ ಆಯುಕ್ತ ಗ್ಯಾನೇಶ್ ಕುಮಾರ್ ಅವರು ಇನ್ನಿಬ್ಬರು ಆಯುಕ್ತರ ಅಭಿಪ್ರಾಯವನ್ನು ಪರಿಗಣಿಸದೆ ಏಕಪಕ್ಷೀಯ ನಿರ್ಧಾರವನ್ನು ಕೈಗೊಂಡಿದ್ದಾರೆ ಎಂಬುದು ತನಿಖಾ ವರದಿಯ ಮೂಲಕ ಬಹಿರಂಗವಾಗಿದೆ. ಇದೀಗ ಭಾರತೀಯ ಚುನಾವಣಾ ಆಯೋಗದ (ಇಸಿಐ) ಆಂತರಿಕ ಆಡಳಿತ ಮತ್ತು ಕಾರ್ಯವೈಖರಿಯ ಕುರಿತು ಉನ್ನತ ಮಟ್ಟದಲ್ಲಿ ನಡೆಯುತ್ತಿರುವ ಶೀತಲ ಸಮರಕ್ಕೆ ಸಂಬಂಧಿಸಿದಂತೆ ಮಹತ್ವದ ಮಾಹಿತಿಯೊಂದು ಹೊರಬಿದ್ದಿದೆ.
ಆಯೋಗದ ಇಬ್ಬರು ಹಿರಿಯ ಚುನಾವಣಾ ಆಯುಕ್ತರು ಅಂದಿನ ಆಡಳಿತಾತ್ಮಕ ಬದಲಾವಣೆಗಳ ವಿರುದ್ಧ ಕೇಂದ್ರದ ಪ್ರಧಾನಿ ನರೇಂದ್ರ ಮೋದಿ ಸರ್ಕಾರದ ಸಂಸತ್ತು ಕಾರ್ಯದರ್ಶಿಗೆ ಪತ್ರ ಬರೆದಿದ್ದರು. ಆದರೆ ದೂರು ಪತ್ರಗಳ ಮೇಲೆ ಸರ್ಕಾರ ಯಾವುದೇ ನೇರ ಕ್ರಮ ಜರುಗಿಸದೆ, ಆ ಪತ್ರಗಳನ್ನು ಮುಖ್ಯ ಚುನಾವಣಾ ಆಯುಕ್ತರ (ಸಿಇಸಿ) ಕಚೇರಿಗೆ ರವಾಯಿಸಿದೆ ಎಂಬ ಅಂಶವು ಮಾಹಿತಿ ಹಕ್ಕು (ಆರ್‌ಟಿಐ) ಕಾಯ್ದೆಯಡಿ ಲಭ್ಯವಾದ ದಾಖಲೆಗಳಿಂದ ಅಧಿಕೃತವಾಗಿ ಬಹಿರಂಗಗೊಂಡಿದೆ.
ಇದನ್ನೂ ಓದಿ: ಮೋದಿ ಪರವಿದ್ದ ಯುವಜನರು ತಿರುಗಿಬಿದ್ದಿದ್ದು ಹೇಗೆ?
ದೇಶದ ಹಿರಿಯ ಆರ್‌ಟಿಐ ಕಾರ್ಯಕರ್ತ ಮತ್ತು ನಿವೃತ್ತ ಕಮೋಡೋರ್ ಲೋಕೇಶ್ ಬಾತ್ರಾ ಅವರು ಸಲ್ಲಿಸಿದ್ದ ಮಾಹಿತಿ ಹಕ್ಕು ಅರ್ಜಿಗೆ ಸಚಿವಾಲಯ ಪ್ರತಿಕ್ರಿಯಿಸಿದೆ. ಚುನಾವಣಾ ಆಯುಕ್ತರಾದ ವಿವೇಕ್ ಜೋಶಿ ಮತ್ತು ಸುಖ್‌ಬೀರ್ ಸಿಂಗ್ ಸಂಧು ಅವರು ಕಳೆದ ವರ್ಷದ ಜುಲೈ 29ರಂದು ಸಂಸತ್ತು ಕಾರ್ಯದರ್ಶಿ ಟಿ.ವಿ. ಸೋಮನಾಥನ್ ಅವರಿಗೆ ಪ್ರತ್ಯೇಕವಾಗಿ ಗಂಭೀರ ವಿಚಾರಗಳ ಬಗ್ಗೆ ಪತ್ರಗಳನ್ನು ಬರೆದಿದ್ದರು. ಹಿರಿಯ ಉಪ ಚುನಾವಣಾ ಆಯುಕ್ತರಾದ (ಹಿರಿಯ ಡಿಇಸಿ) ಮನೀಶ್ ಗಾರ್ಗ್ ಅವರು ಜುಲೈ 28ರಂದು ಹೊರಡಿಸಿದ್ದ ಆಡಳಿತಾತ್ಮಕ ಕೆಲಸದ ಮರುಹಂಚಿಕೆ ಆದೇಶದ ಕುರಿತು ಆಯುಕ್ತರು ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ್ದರು.
ಆಯೋಗದ ಇತರೆ ಸದಸ್ಯರ ಅಥವಾ ಚುನಾವಣಾ ಆಯುಕ್ತರ ಮುಂಚಿತ ಒಪ್ಪಿಗೆಯಿಲ್ಲದೆ ಅಥವಾ ಯಾವುದೇ ಚರ್ಚೆ ನಡೆಸದೆ ಹಿರಿಯ ಅಧಿಕಾರಿ ಮನೀಶ್ ಗಾರ್ಗ್ ಅವರು ತಮ್ಮ ಜವಾಬ್ದಾರಿಯ ಮಿತಿಯನ್ನು ಮೀರಿ ಕೆಲಸದ ಹಂಚಿಕೆ ಮಾಡಿಕೊಂಡಿದ್ದಾರೆ ಎಂಬುದು ಇಬ್ಬರ ಪ್ರಮುಖ ಆರೋಪವಾಗಿತ್ತು.
ಇದು 2023ರ ಮುಖ್ಯ ಚುನಾವಣಾ ಆಯುಕ್ತ ಮತ್ತು ಇತರೆ ಚುನಾವಣಾ ಆಯುಕ್ತರ (ನಿಯುಕ್ತಿ, ಸೇವಾ ಷರತ್ತುಗಳು ಮತ್ತು ಅಧಿಕಾರಾವಧಿ) ಕಾಯ್ದೆಯ ಸೆಕ್ಷನ್ 18(1) ಮತ್ತು 18(2) ರ ಸ್ಪಷ್ಟ ಉಲ್ಲಂಘನೆಯಾಗಿದೆ ಎಂದು ಆಯುಕ್ತರು ತಮ್ಮ ಪತ್ರದಲ್ಲಿ ಬಲವಾಗಿ ಪ್ರತಿಪಾದಿಸಿದ್ದರು. ಅಲ್ಲದೆ, ಆಡಳಿತ ವಿಭಾಗದಿಂದ ತಮಗೆ ಅಗತ್ಯವಿರುವ ಅಧಿಕೃತ ಕಡತಗಳನ್ನು ಕೇಳಿದರೂ ನೀಡದೆ ತಡೆಯಲಾಗಿದೆ ಎಂದು ವಿವೇಕ್ ಜೋಶಿ ದೂರಿದ್ದರು.
ಸಂಸತ್ತಿನ ಸಚಿವಾಲಯವು ಹೇಳಿದ್ದೇನು?
ಈ ದೂರುಗಳನ್ನು ಸ್ವೀಕರಿಸಿ ಕಡತದಲ್ಲಿ ಕೆಲವು ಸಂಸತ್ತಿನ ಸಚಿವಾಲಯವು ಅಭಿಪ್ರಾಯಗಳನ್ನು ದಾಖಲಿಸಿದೆ. ಚುನಾವಣಾ ಆಯುಕ್ತರು ಬರೆದಿರುವ ಈ ಪತ್ರಗಳು ಇಡೀ ಆಯೋಗದ ಅಧಿಕೃತ ನಿರ್ಣಯವಾಗಿರದೆ, ಅವರ ‘ವೈಯಕ್ತಿಕ ಸಾಮರ್ಥ್ಯದಲ್ಲಿ’ ಬರೆದ ಪತ್ರಗಳಾಗಿವೆ ಎಂದು ಸಚಿವಾಲಯ ಅಭಿಪ್ರಾಯಪಟ್ಟಿದೆ.
ಇದನ್ನೂ ಓದಿ: ʼವೋಟ್‌ ಚೋರಿʼ ಆರೋಪಕ್ಕೆ ಪುರಾವೆ ಅಗತ್ಯʼ: ಚುನಾವಣಾ ಆಯೋಗದ ಪರ 124 ನಿವೃತ್ತ ಅಧಿಕಾರಿಗಳ ಪತ್ರ
ಭಾರತೀಯ ಚುನಾವಣಾ ಆಯೋಗವು ಒಂದು ಸ್ವಾಯತ್ತ ಸಾಂವಿಧಾನಿಕ ಸಂಸ್ಥೆಯಾಗಿದ್ದು, ಇದರ ಆಂತರಿಕ ವಿಷಯಗಳಲ್ಲಿ ಅಥವಾ ಅಧಿಕಾರಿಗಳ ಮೇಲಿನ ಆಡಳಿತಾತ್ಮಕ ದೂರುಗಳಲ್ಲಿ ಕಾರ್ಯಾಂಗವು (ಸರ್ಕಾರ) ನೇರವಾಗಿ ಹಸ್ತಕ್ಷೇಪ ಮಾಡುವುದು ಸರಿಯಲ್ಲ. ಇದು ಸಂಸ್ಥೆಯ ಸ್ವಾಯತ್ತತೆಗೆ ಧಕ್ಕೆ ತಂದಂತೆ ಬಿಂಬಿತವಾಗಬಹುದು ಎಂದೂ ಹೇಳಿಕೊಂಡಿದೆ. ಆದರೆ ಚುನಾವಣಾ ಆಯೋಗವೇ ಕೇಂದ್ರ ಸರ್ಕಾರದ ಕೈಗೊಂಬೆಯಾಗಿರುವಾಗ ಅಧಿಕಾರಿಗಳು ಮಾಡುವುದೇನು ಎಂಬ ಪ್ರಶ್ನೆ ಈಗ ಸಾಮಾಜಿಕ ಜಾಲತಾಣದಲ್ಲಿ ಚರ್ಚೆಯಾಗುತ್ತಿವೆ.
ಕಾನೂನಿನ ಪ್ರಕಾರ ಸಿಇಸಿ ಮತ್ತು ಚುನಾವಣಾ ಆಯುಕ್ತರು ಸಮಾನರಾಗಿದ್ದು, ಯಾವುದೇ ನಿರ್ಧಾರಗಳನ್ನು ಕಾಯ್ದೆಯ ನಿಯಮಾನುಸಾರ ಬಹುಮತ ಅಥವಾ ಸರ್ವಸಮ್ಮತಿಯಿಂದ ಕೈಗೊಳ್ಳಬೇಕೇ ಹೊರತು ನೇರ ಸರ್ಕಾರಿ ಮಧ್ಯಸ್ಥಿಕೆಯಿಂದಲ್ಲ ಎಂದೂ ಹೇಳಿದೆ.
ಈ ಎಲ್ಲಾ ಅಂಶಗಳನ್ನು ಪರಿಗಣಿಸಿ, ಕ್ಯಾಬಿನೆಟ್ ಕಾರ್ಯದರ್ಶಿಯವರು ಆ ಪತ್ರಗಳ ಮೇಲೆ ನೇರ ಶಿಸ್ತು ಕ್ರಮ ಜರುಗಿಸುವುದನ್ನು ತಪ್ಪಿಸಿದರು. ಬದಲಾಗಿ, ಆ ಪತ್ರಗಳ ಪ್ರತಿಗಳನ್ನು ಮುಖ್ಯ ಚುನಾವಣಾ ಆಯುಕ್ತರ (ಸಿಇಸಿ) ಕಚೇರಿಯ ಮಾಹಿತಿಗಾಗಿ ರವಾನಿಸಲಾಗಿದೆ. ಇದರೊಂದಿಗೆ, ಹಿರಿಯ ಅಧಿಕಾರಿ ಮನೀಶ್ ಗಾರ್ಗ್ ಅವರು ಐಎಎಸ್ ಅಧಿಕಾರಿಯಾಗಿರುವುದರಿಂದ ಅವರ ಸೇವಾ ದಾಖಲೆ ಮತ್ತು ಮುಂದಿನ ಆಡಳಿತಾತ್ಮಕ ನಿರ್ಧಾರಗಳ ದೃಷ್ಟಿಯಿಂದ ಈ ಪತ್ರಗಳ ಒಂದು ಪ್ರತಿಯನ್ನು ಸಿಬ್ಬಂದಿ ಮತ್ತು ತರಬೇತಿ ಇಲಾಖೆಗೆ (DoPT) ದಾಖಲೆಗಾಗಿ ಕಳುಹಿಸಿಕೊಡಲಾಯಿತು.
ಈ ಆರ್‌ಟಿಐ ಬಹಿರಂಗಪಡಿಸುವಿಕೆಯು ಚುನಾವಣಾ ಆಯೋಗದ ಉನ್ನತ ವಲಯದಲ್ಲಿ ನಡೆಯುತ್ತಿರುವ ಆಡಳಿತಾತ್ಮಕ ಸಂಘರ್ಷಗಳನ್ನು ಹೊರಹಾಕಿದೆ. ಚುನಾವಣಾ ಪ್ರಕ್ರಿಯೆ ಮತ್ತು ಸಾಂವಿಧಾನಿಕ ಸಂಸ್ಥೆಗಳ ಒಳಗಿನ ಪಾರದರ್ಶಕತೆ, ಜವಾಬ್ದಾರಿ, ಮೇಲ್ವಿಚಾರಣೆಯ ಕುರಿತು ಈ ಬೆಳವಣಿಗೆಯು ರಾಜಕೀಯ ಹಾಗೂ ಕಾನೂನು ವಲಯದಲ್ಲಿ ವ್ಯಾಪಕ ಚರ್ಚೆಗೆ ಗ್ರಾಸವಾಗಿದೆ.
