ಮಹಿಳೆಯ ಸಲ್ವಾರ್ ತೆಗೆಯಲು ಯತ್ನಿಸುವುದು ಮತ್ತು ಆಕೆಯ ಎದೆಯನ್ನು ಅದುಮುವುದು ‘ಅತ್ಯಾಚಾರದ ಯತ್ನ’ ಎಂದು ಪರಿಗಣಿಸಲಾಗದು ಎಂದು ಪಾಟ್ನಾ ಹೈಕೋರ್ಟ್ ತೀರ್ಪು ನೀಡಿದೆ.
2008ರಲ್ಲಿ ಬಿಹಾರದ ಬಾಂಕಾ ಜಿಲ್ಲೆಯಲ್ಲಿ ನಡೆದಿದ್ದ ಘಟನೆಗೆ ಸಂಬಂಧಿಸಿದಂತೆ ಈ ತೀರ್ಪು ಹೊರಬಿದ್ದಿದೆ. ಮಹಿಳೆಯ ಮೇಲೆ ಅತ್ಯಾಚಾರ ಯತ್ನ ಮತ್ತು ಅಕ್ರಮ ಬಂಧನ ಆರೋಪದಡಿ (ಐಪಿಸಿ ಸೆಕ್ಷನ್ 376/511 ಮತ್ತು 342) ಛಾಯಾಚಿತ್ರ ಸ್ಟುಡಿಯೊ ಮಾಲೀಕ ಹಿಮಾಂಶು ಕುಮಾರ್ ಪಾಠಕ್ ಎಂಬಾತನಿಗೆ 2013ರಲ್ಲಿ ವಿಚಾರಣಾ ನ್ಯಾಯಾಲಯವು 3 ವರ್ಷಗಳ ಕಠಿಣ ಶಿಕ್ಷೆ ಹಾಗೂ 5,000 ರೂ. ದಂಡ ವಿಧಿಸಿತ್ತು. ಇದನ್ನು ಪ್ರಶ್ನಿಸಿ ಆರೋಪಿಯು ಹೈಕೋರ್ಟ್ ಮೆಟ್ಟಿಲೇರಿದ್ದನು.
ಪ್ರಕರಣದ ಮೇಲ್ಮನವಿ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಪೂರ್ಣೇಂದು ಸಿಂಗ್ ಅವರಿದ್ದ ಏಕಸದಸ್ಯ ಪೀಠವು, ಆರೋಪಿಯನ್ನು ಖುಲಾಸೆಗೊಳಿಸಿ ಆದೇಶ ಹೊರಡಿಸಿದೆ. “ಪ್ರಾಸಿಕ್ಯೂಷನ್ ಮುಂದಿಟ್ಟಿರುವ ಎಲ್ಲ ಆರೋಪಗಳನ್ನು ಒಪ್ಪಿಕೊಂಡರೂ, ಮಹಿಳೆಯ ಬಟ್ಟೆ ತೆಗೆಯಲು ಯತ್ನಿಸುವುದು ಮತ್ತು ಎದೆಯ ಮೇಲೆ ಕೈಹಾಕುವುದು ಐಪಿಸಿ ಸೆಕ್ಷನ್ 354 ರ ಅಡಿ ‘ಮಹಿಳೆಯ ಮೇಲಿನ ಮಾನಭಂಗ ಯತ್ನ’ ಎನಿಸಿಕೊಳ್ಳುತ್ತದೆಯೇ ಹೊರತು, ಐಪಿಸಿ ಸೆಕ್ಷನ್ 376 ಮತ್ತು 511ರ ಅಡಿ ‘ಅತ್ಯಾಚಾರದ ಯತ್ನ’ವಾಗುವುದಿಲ್ಲ” ಎಂದು ನ್ಯಾಯಾಲಯ ಸ್ಪಷ್ಟಪಡಿಸಿದೆ.
2008ರ ಜನವರಿ 19 ರಂದು ಸಂತ್ರಸ್ತೆ ತನ್ನ ತಂದೆಯೊಂದಿಗೆ ಅಮರ್‌ಪುರದಲ್ಲಿರುವ ಸ್ಟುಡಿಯೊಗೆ ಛಾಯಾಚಿತ್ರ (ಫೋಟೊ) ತೆಗೆಸಿಕೊಳ್ಳಲು ಹೋಗಿದ್ದಳು. ಈ ವೇಳೆ ಫೋಟೊವನ್ನು ಕಂಪ್ಯೂಟರ್‌ನಲ್ಲಿ ನೋಡುವುದಾಗಿ ಹೇಳಿ ಆಕೆಯ ತಂದೆಯನ್ನು ಹೊರಗಡೆ ಕಳುಹಿಸಿದ ಆರೋಪಿಯು, ಕೊಠಡಿಯ ಬಾಗಿಲು ಹಾಕಿಕೊಂಡಿದ್ದನು. ಬಳಿಕ ಆಕೆಯ ಸಲ್ವಾರ್ ಎಳೆದು, ಎದೆಗೆ ಕೈಹಾಕಿ ದೌರ್ಜನ್ಯ ಎಸಗಿದ್ದನು. ಆಕೆಯ ಕೂಗಾಟ ಕೇಳಿ ತಂದೆ ಬಾಗಿಲು ತಳ್ಳಿಕೊಂಡು ಒಳಬಂದಾಗ ಆರೋಪಿ ಪರಾರಿಯಾಗಿದ್ದನು ಎಂದು ಪ್ರಾಸಿಕ್ಯೂಷನ್ ತನ್ನ ವಾದ ಮಂಡಿಸಿತ್ತು.
ಸಾಕ್ಷ್ಯಗಳನ್ನು ಮರುಪರಿಶೀಲಿಸಿದ ಹೈಕೋರ್ಟ್, “ಪ್ರಕರಣದಲ್ಲಿ ಅತ್ಯಾಚಾರಕ್ಕೆ ಯತ್ನಿಸಿದ ಬಗ್ಗೆ ಯಾವುದೇ ವೈದ್ಯಕೀಯ ಪುರಾವೆಗಳಿಲ್ಲ. ಅಲ್ಲದೆ, ತನಿಖೆಯನ್ನು ಪೂರ್ಣಗೊಳಿಸಿದ ತನಿಖಾಧಿಕಾರಿಯ ವಿಚಾರಣೆಯೂ ನಡೆದಿಲ್ಲ ಮತ್ತು ವೈದ್ಯಕೀಯ ಸಾಕ್ಷ್ಯಗಳನ್ನು ಸಾಬೀತುಪಡಿಸಲು ವೈದ್ಯಾಧಿಕಾರಿಗಳನ್ನು ಹಾಜರುಪಡಿಸಿಲ್ಲ” ಎಂಬುದನ್ನು ಗಮನಿಸಿದೆ.
ಕೇವಲ ಸಂತ್ರಸ್ತೆ ಹಾಗೂ ಆಕೆಯ ಪೋಷಕರ ಹೇಳಿಕೆಗಳನ್ನು ಮಾತ್ರ ಆಧರಿಸಿ ಅತ್ಯಾಚಾರ ಯತ್ನದಂತಹ ಗಂಭೀರ ಆರೋಪವನ್ನು ಸಾಬೀತುಪಡಿಸಲು ಸಾಧ್ಯವಿಲ್ಲ ಎಂದು ತಿಳಿಸಿದ ನ್ಯಾಯಾಲಯವು, ವಿಚಾರಣಾ ನ್ಯಾಯಾಲಯದ ಆದೇಶವನ್ನು ರದ್ದುಗೊಳಿಸಿದೆ ಹಾಗೂ ಆರೋಪಿಯನ್ನು ಎಲ್ಲ ಆರೋಪಗಳಿಂದ ಮುಕ್ತಗೊಳಿಸಿ ಆತ ಕಟ್ಟಿದ್ದ ದಂಡದ ಮೊತ್ತವನ್ನು ಹಿಂತಿರುಗಿಸುವಂತೆ ಆದೇಶಿಸಿದೆ.
