ಅತ್ಯಾಚಾರ ಸಂತ್ರಸ್ತರನ್ನು ‘ಟು ಫಿಂಗರ್ ಟೆಸ್ಟ್’ಗೆ ಒಳಪಡಿಸುವುದನ್ನು ಜಾರ್ಖಂಡ್ ಹೈಕೋರ್ಟ್ ನಿಷೇಧಿಸಿದೆ. ಎಲ್ಲ ಆಸ್ಪತ್ರೆಗಳಲ್ಲಿ ವಿವಾದಾತ್ಮಕ ಎರಡು ಬೆರಳುಗಳ ಪರೀಕ್ಷೆಯನ್ನು ಸಂಪೂರ್ಣವಾಗಿ ನಿಷೇಧಿಸುವಂತೆ ಜಾರ್ಖಂಡ್ ಹೈಕೋರ್ಟ್ ರಾಜ್ಯ ಸರ್ಕಾರಕ್ಕೆ ನಿರ್ದೇಶನ ನೀಡಿದೆ. ಹಾಗೆಯೇ ಇದು ಅತ್ಯಾಚಾರ ಸಂತ್ರಸ್ತರಿಗಿರುವ ಗೌಪ್ಯತೆ, ಘನತೆಯ ನಿಯಮ ಉಲ್ಲಂಘನೆಯಾಗಿದೆ ಎಂದು ಹೈಕೋರ್ಟ್ ತಿಳಿಸಿದೆ.
ಅತ್ಯಾಚಾರ ಸಂತ್ರಸ್ತೆಯೊಬ್ಬರ ರಕ್ಷಣೆ ಮತ್ತು ಪುನರ್ವಸತಿಗೆ ಸಂಬಂಧಿಸಿದಂತೆ ಸ್ವಯಂಪ್ರೇರಿತ ಪಿಐಎಲ್ ಅನ್ನು ವಿಚಾರಣೆ ನಡೆಸಿದ ಜಾರ್ಖಂಡ್ ಹೈಕೋರ್ಟ್‌ನ ಮುಖ್ಯ ನ್ಯಾಯಮೂರ್ತಿ ಎಂ ಎಸ್ ಸೋನಕ್ ಮತ್ತು ನ್ಯಾಯಮೂರ್ತಿ ರಾಜೇಶ್ ಶಂಕರ್ ಅವರ ವಿಭಾಗೀಯ ಪೀಠವು ಈ ಆದೇಶವನ್ನು ನೀಡಿದೆ.
ಇದನ್ನು ಓದಿದ್ದೀರಾ? ಅತ್ಯಾಚಾರ ಸಂತ್ರಸ್ತೆಯ ಮಾಹಿತಿ ಬಹಿರಂಗ; ಬಿಜೆಪಿ ಮಾಜಿ ಸಂಸದೆಗೆ ಸಮನ್ಸ್
ಈ ಸಂಬಂಧ ಎಲ್ಲ ವೈದ್ಯಕೀಯ ಸಂಸ್ಥೆಗಳಿಗೆ ಸುತ್ತೋಲೆಯನ್ನು ಹೊರಡಿಸಲು ಜಾರ್ಖಂಡ್ ಸರ್ಕಾರಕ್ಕೆ ಸೂಚಿಸಿದೆ. ಇನ್ನು ಈ ಆದೇಶದ ಉಲ್ಲಂಘನೆ ಮಾಡಿದರೆ ಕಾನೂನು ಕ್ರಮಕೈಗೊಳ್ಳುವಂತೆ ಸೂಚಿಸಲಾಗಿದೆ.
ಏನಿದು ಟು ಫಿಂಗರ್ ಟೆಸ್ಟ್?
ಟು ಫಿಂಗರ್ ಟೆಸ್ಟ್ (ಎರಡು ಬೆರಳುಗಳ ಪರೀಕ್ಷೆ-Two-Finger Test) ಎಂಬುದು ಅತ್ಯಾಚಾರಕ್ಕೆ ಒಳಗಾದ ಮಹಿಳೆಯರು ಲೈಂಗಿಕವಾಗಿ ಸಕ್ರಿಯವಾಗಿದ್ದಾರೆಯೇ ಅಥವಾ ಲೈಂಗಿಕವಾಗಿ ಸಹಕರಿಸಿದ್ದಾಳೆಯೇ ಎಂದು ಪತ್ತೆಹಚ್ಚಲು ಈ ಹಿಂದೆ ಬಳಸಲಾಗುತ್ತಿದ್ದ ಅವೈಜ್ಞಾನಿಕ ಮತ್ತು ಆಕ್ರಮಣಕಾರಿ ವೈದ್ಯಕೀಯ ವಿಧಾನ. ಈ ಪರೀಕ್ಷೆಯಲ್ಲಿ ವೈದ್ಯರು ಮಹಿಳೆಯ ಯೋನಿಯೊಳಗೆ ಎರಡು ಬೆರಳುಗಳನ್ನು ಸೇರಿಸಿ, ಕನ್ಯಾಪೊರೆ (Hymen) ಹರಿದಿದೆಯೇ ಮತ್ತು ಯೋನಿ ಸ್ನಾಯುಗಳು ಸಡಿಲವಾಗಿವೆಯೇ ಎಂಬುದನ್ನು ತಪಾಸಣೆ ಮಾಡುತ್ತಿದ್ದರು.
ಮಹಿಳೆಯು ಲೈಂಗಿಕ ಸಂಪರ್ಕಕ್ಕೆ ಒಗ್ಗಿಕೊಂಡಿದ್ದಾಳೆಯೇ ಎಂದು ನಿರ್ಧರಿಸಲು ಇದನ್ನು ಬಳಸಲಾಗುತ್ತಿತ್ತು. ಮಹಿಳೆ ಲೈಂಗಿಕವಾಗಿ ಸಕ್ರಿಯಳಾಗಿದ್ದರೆ ಆಕೆಯ ಮೇಲೆ ಅತ್ಯಾಚಾರ ನಡೆದಿರಲು ಸಾಧ್ಯವಿಲ್ಲ ಅಥವಾ ಆಕೆ ಸುಳ್ಳು ಹೇಳುತ್ತಿದ್ದಾಳೆ ಎಂಬ ಪಿತೃಪ್ರಧಾನ ಮತ್ತು ತಪ್ಪು ಆಧಾರದ ಮೇಲೆ ಈ ಪರೀಕ್ಷೆಯನ್ನು ನಡೆಸಲಾಗುತ್ತಿತ್ತು. ಸದ್ಯ ದೇಶದಲ್ಲಿ ಈ ಪರೀಕ್ಷೆಯನ್ನು ಸಂಪೂರ್ಣವಾಗಿ ನಿಷೇಧಿಸಲಾಗಿದೆ. ಆದರೆ ಇಂದಿಗೂ ಕೆಲವೆಡೆ ಈ ವಿಧಾನವನ್ನೇ ಬಳಸಿ ಮಹಿಳೆಯ ಚಾರಿತ್ರ್ಯಹರಣ ಮಾಡಲಾಗುತ್ತಿದೆ.
ವಿಶ್ವ ಆರೋಗ್ಯ ಸಂಸ್ಥೆ (WHO) ಪ್ರಕಾರ, ಕನ್ಯತ್ವವನ್ನು ಸಾಬೀತುಪಡಿಸಲು ಈ ಪರೀಕ್ಷೆಗೆ ಯಾವುದೇ ವೈಜ್ಞಾನಿಕ ಸಿಂಧುತ್ವ ಅಥವಾ ವೈದ್ಯಕೀಯ ಆಧಾರವಿಲ್ಲ. ದೈಹಿಕ ವ್ಯಾಯಾಮ, ಕ್ರೀಡೆ ಅಥವಾ ಇತರ ನೈಸರ್ಗಿಕ ಕಾರಣಗಳಿಂದಲೂ ಕನ್ಯಾಪೊರೆ ಹರಿಯಬಹುದು.
