ವಿಶ್ವದ ಬಹುತೇಕ ರಾಷ್ಟ್ರಗಳು ಕೂಡ ಜಾತಿ, ಧರ್ಮ ಸೇರಿದಂತೆ ವಿವಿಧ ರೀತಿಯಲ್ಲಿ ಗುಲಾಮಗಿರಿ ವ್ಯವಸ್ಥೆಗೆ ನಲುಗಿವೆ. ಹಲವು ಶತಮಾನಗಳ ಹಿಂದೆ ಉಳ್ಳವರು, ಪ್ರಬಲರು, ಅಧಿಕಾರಸ್ಥರು ಶಕ್ತಿ ಹೀನರನ್ನು ಗುಲಾಮರನ್ನಾಗಿ ಬಳಸಿಕೊಳ್ಳುತ್ತಿದ್ದರು. ಅಮೆರಿಕ ದೇಶದಲ್ಲೂ ಗುಲಾಮಗಿರಿ ವ್ಯವಸ್ಥೆ ಹೆಚ್ಚಾಗಿತ್ತು. ಕಪ್ಪು ವರ್ಣೀಯ ಜನರನ್ನು ಬಿಳಿಯ ಜನರು ಆಳುತ್ತಿದ್ದರು. ಈ ವ್ಯವಸ್ಥೆ 1865ರಲ್ಲಿ ಅಂತರ್‌ಯುದ್ಧದೊಂದಿಗೆ ಹೊಸ ಸಂವಿಧಾನ ರಚನೆಗೊಂಡು ಕೊನೆಗೊಂಡಿತು.
ಮಾಧ್ಯಮ ಸಂಸ್ಥೆಯೊಂದು ತನಿಖೆ ನಡೆಸಿರುವ ವರದಿಯಂತೆ ಅಮೆರಿಕವನ್ನು ಆಳ್ವಿಕೆ ನಡೆಸಿದ 46 ಅಧ್ಯಕ್ಷರಲ್ಲಿ ಕಳೆದ ಬಾರಿ ಅಧಿಕಾರ ನಡೆಸಿದ್ದ ಡೊನಾಲ್ಡ್‌ ಟ್ರಂಪ್‌ ಹೊರತು ಪಡಿಸಿ ಉಳಿದ ಮಾಜಿ ಅಧ್ಯಕ್ಷರೆಲ್ಲ ಕಪ್ಪು ವರ್ಣದ ಜನರನ್ನು ಗುಲಾಮರನ್ನಾಗಿ ಮಾಡಿದ ಅಥವಾ ಪ್ರೋತ್ಸಾಹಿಸಿದ ಪೂರ್ವಜರಿಗೆ ನೇರ ಸಂಬಂಧ ಹೊಂದಿದ್ದಾರೆ.
ಇವರಲ್ಲಿ ಹಾಲಿ ಅಧ್ಯಕ್ಷ ಜೋ ಬೈಡನ್‌ ಹಾಗೂ ಈಗ ಜೀವಂತವಿರುವ ಮಾಜಿ ಅಧ್ಯಕ್ಷರಾದ ಬರಾಕ್ ಒಬಾಮ, ಜಾರ್ಜ್ ಬುಷ್, ಜಾರ್ಜ್ ಬುಷ್, ಜಿಮ್ಮಿ ಕಾರ್ಟರ್ ಹಾಗೂ ಬಿಲ್ ಕ್ಲಿಂಟನ್ ಕೂಡ ಕಪ್ಪು ಜನರನ್ನು ಗುಲಾಮರನ್ನಾಗಿ ಆಳಿದ ವಂಶಕ್ಕೆ ಸೇರಿದವರಾಗಿದ್ದಾರೆ. ಇವರಲ್ಲಿ ಕೆಲವು ಅಧ್ಯಕ್ಷರ ವಂಶಸ್ಥರು ಒಬ್ಬರನ್ನು ಗುಲಾಮರನ್ನಾಗಿ ಇಟ್ಟುಕೊಂಡಿದ್ದರೆ, ಮತ್ತು ಹಲವರು ಐವತ್ತಕ್ಕೂ ಹೆಚ್ಚು ಜನರನ್ನು ಗುಲಾಮರನ್ನಾಗಿ ಮಾಡಿಕೊಂಡಿದ್ದರು ಎಂದು ವರದಿ ತಿಳಿಸಿದೆ.
ಈ ಸುದ್ದಿ ಓದಿದ್ದೀರಾ? ಸ್ಪ್ಯಾನರ್‌ ಹಿಡಿದು ಮೆಕ್ಯಾನಿಕ್‌ಗಳೊಂದಿಗೆ ಬೈಕ್‌ ರಿಪೇರಿ ಮಾಡಿದ ರಾಹುಲ್ ಗಾಂಧಿ
ಡೊನಾಲ್ಡ್‌ ಟ್ರಂಪ್‌ ವಂಶಸ್ಥರು ಏಕೆ ಗುಲಾಮಗಿರಿಗೆ ಪ್ರೋತ್ಸಾಹಿಸಲಿಲ್ಲ ಅಥವಾ ಗುಲಾಮರನ್ನಾಗಿ ಇಟ್ಟುಕೊಂಡಿಲ್ಲ ಎಂದು ಕಾರಣ ಹುಡುಕಿದರೆ, ಅವರ ಪೂರ್ವಜರು ಗುಲಾಮಗಿರಿ ವ್ಯವಸ್ಥೆ ಪೂರ್ಣಗೊಂಡ 1865ರ ನಂತರ ಅಮೆರಿಕಕ್ಕೆ ವಲಸೆ ಬಂದವರು. ಟ್ರಂಪ್‌ ಅವರ ಅಜ್ಜಿಯರು ಅಮೆರಿಕದಲ್ಲಿ ಜನಿಸಿದವರಲ್ಲ. ಅವರ ತಂದೆಯ ಅಜ್ಜಿಯರು ನೈಋತ್ಯ ಜರ್ಮನಿಯ ಸಣ್ಣ ಪಟ್ಟಣವಾದ ಕಾಲ್‌ಸ್ಟಾಡ್‌ನಲ್ಲಿ ಜನಿಸಿದರು ಮತ್ತು 1900ರ ದಶಕದ ಆರಂಭದಲ್ಲಿ ಅಮೆರಿಕಕ್ಕೆ ವಲಸೆ ಬಂದರು ಎಂದು ತನಿಖಾ ವರದಿ ತಿಳಿಸಿದೆ.
ಅಮೆರಿಕದ ಜನಗಣತಿ ದಾಖಲೆಗಳು, ತೆರಿಗೆ ದಾಖಲೆಗಳು, ವೃತ್ತಪತ್ರಿಕೆ ದಾಖಲೆಗಳು, ಎಸ್ಟೇಟ್ ದಾಖಲೆಗಳು ಮತ್ತು ಜನನ ಮತ್ತು ಮರಣ ಪ್ರಮಾಣಪತ್ರಗಳನ್ನು ಪರಿಶೀಲಿಸುವುದರ ಮೂಲಕ ಮಾಧ್ಯಮ ಸಂಸ್ಥೆಯು ಸಂಶೋಧನೆ ನಡೆಸಿದೆ. ಸಂಶೋಧನೆಯ ನಂತರ ರಾಜಕಾರಣಿಗಳು ಮತ್ತು ಅವರ ಪೂರ್ವಜರ ಗುಲಾಮಗಿರಿಯ ಸಂಬಂಧಗಳನ್ನು ಪತ್ತೆಹಚ್ಚಲು ಮಂಡಳಿಯಿಂದ ಪ್ರಮಾಣೀಕರಿಸಿದ ವಂಶಾವಳಿಯ ತಜ್ಞರು ದಾಖಲೆಗಳನ್ನು ಪರಿಶೀಲಿಸಿ ವರದಿ ಸಿದ್ಧಪಡಿಸಿದ್ದಾರೆ.
ಆರಂಭದಲ್ಲಿ ಅಮೆರಿಕದ ಉತ್ತರದ ರಾಜ್ಯಗಳಲ್ಲಿ ಬಿಳಿ ಜನರು ಕಪ್ಪು ಜನರನ್ನು ಗುಲಾಮರನ್ನಾಗಿ ಮಾಡಿದರು. ಪಿಡುಗು ಶುರುವಾದ ನಂತರ ಅಮೆರಿಕದ ದಕ್ಷಿಣ ರಾಜ್ಯಗಳಲ್ಲಿ ಗುಲಾಮಗಿರಿ ವ್ಯವಸ್ಥೆ ಪ್ರಬಲವಾಗುತ್ತಾ ಹೋಯಿತು ಎಂದು ವರದಿಯಲ್ಲಿ ತಿಳಿಸಲಾಗಿದೆ.
ಈ ಸುದ್ದಿ ಓದಿದ್ದೀರಾ? ಪುಟಿನ್ ಬಾಣಸಿಗ ಪ್ರಿಗೋಷಿನ್ ಯಾರು? ಪುಟಿನ್ ವಿರುದ್ಧವೇ ಬಂಡಾಯವೆದ್ದಿದ್ದೇಕೆ?
ಇಬ್ಬರು ಹಾಲಿ ಸುಪ್ರೀಂ ಕೋರ್ಟ್ ನ್ಯಾಯಮೂರ್ತಿಗಳು
ಅಮೆರಿಕದ ಸುಪ್ರೀಂ ಕೋರ್ಟ್‌ನಲ್ಲಿ ನ್ಯಾಯಾಧೀಶರಾಗಿರುವ ಇಬ್ಬರು ಕೂಡ ಗುಲಾಮಗಿರಿ ಪ್ರೋತ್ಸಾಹಿಸಿದ ಪೂರ್ವಜರನ್ನು ಹೊಂದಿದ್ದಾರೆ. ಯುಎಸ್‌ಎ ಸಂಸತ್ತನ್ನು ಪ್ರತಿನಿಧಿಸುವ ಸುಮಾರು ಶೇಕಡಾ 8ರಷ್ಟು ಡೆಮಾಕ್ರಾಟಿಕ್‌ಗಳು ಮತ್ತು ಶೇ 28 ರಷ್ಟು ರಿಪಬ್ಲಿಕನ್ ಸಂಸದರು ಕೂಡ ಗುಲಮಗಿರಿ ಪೂರ್ವಜರ ಸಂಬಂಧ ಹೊಂದಿದ್ದಾರೆ. ಇನ್ನುಳಿದಂತೆ ವಿವಿಧ ರಾಜ್ಯದ 11 ಗವರ್ನರ್‌ಗಳು, 11 ರಾಜ್ಯಗಳ ಎಂಟು ಮುಖ್ಯ ಕಾರ್ಯನಿರ್ವಾಹಕರು ಕಪ್ಪು ಜನರನ್ನು ಆಳಿದ ವಂಶಕ್ಕೆ ಸೇರಿದ್ದಾರೆ.
ಸೆನೆಟ್‌ನ ಅಲ್ಪಸಂಖ್ಯಾತ ನಾಯಕ ಮಿಚ್ ಮೆಕ್‌ಕಾನ್ನೆಲ್, ರಿಪಬ್ಲಿಕನ್ ಸೆನೆಟರ್‌ಗಳಾದ ಮಿಚ್ ಮೆಕ್‌ಕಾನ್ನೆಲ್, ಲಿಂಡ್ಸೆ ಗ್ರಹಾಂ, ಟಾಮ್ ಕಾಟನ್ ಮತ್ತು ಜೇಮ್ಸ್ ಲ್ಯಾಂಕ್‌ಫೋರ್ಡ್, ಡೆಮಾಕ್ರಾಟಿಕ್‌ಗಳಾದ ಎಲಿಜಬೆತ್ ವಾರೆನ್, ಟ್ಯಾಮಿ ಡಕ್‌ವರ್ತ್, ಜೀನ್ ಶಾಹೀನ್ ಮತ್ತು ಮ್ಯಾಗಿ ಹಸನ್ ಸೇರಿದಂತೆ ಅಮೆರಿಕದ ಕೆಲವು ಪ್ರಭಾವಶಾಲಿ ರಾಜಕಾರಣಿಗಳು ಗುಲಾಮಗಿರಿ ವ್ಯವಸ್ಥೆ ಪ್ರೋತ್ಸಾಹಿಸಿದ ಪೂರ್ವಜರ ನಂಟನ್ನು ಹೊಂದಿದ್ದಾರೆ.
