ದೇಶದ ಆರ್ಥಿಕತೆ ಸಂಕಷ್ಟದಲ್ಲಿದೆ, ಆದರೆ ಬಿಜೆಪಿ ಶ್ರೀಮಂತವಾಗುತ್ತಿದೆ. ಪಕ್ಷ ತಾನೇ ಹೇಳಿಕೊಂಡಿರುವ ಹಾಗೆ ತಾನು ಸಂಗ್ರಹಿಸಿರುವ ಹಣದ ಮೊತ್ತ ಹಾಗೂ ನೂರಾರು ಐಷಾರಾಮಿ ಕಚೇರಿಗಳನ್ನು ನಿರ್ಮಿಸಲು ಮತ್ತು ಚುನಾವಣೆಗಳಲ್ಲಿ ವಿಪಕ್ಷಗಳನ್ನು ಹಣಿಯಲು ಮಾಡುತ್ತಿರುವ ಖರ್ಚಿನ ನಡುವೆ ಇರುವ ಅಂತರದ ಕುರಿತು ವಿವರಣೆ ನೀಡಬೇಕಿದೆ.
ವಾಯುವ್ಯ ತಮಿಳುನಾಡಿನ ಕೃಷ್ಣಗಿರಿ ಪಟ್ಟಣದಿಂದ ಮೂರು ಕಿಲೋಮೀಟರ್ ದೂರದಲ್ಲಿರುವ ಬೆಂಗಳೂರು ಮತ್ತು ಚೆನ್ನೈ ನಡುವಿನ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಹೊಳೆಯುವ ಹೊಸದಾದ ಕಟ್ಟಡವಿದೆ.
ಕಳೆದ ವರ್ಷವಷ್ಟೇ ಉದ್ಘಾಟನೆಗೊಂಡ ಈ ಐದು ಅಂತಸ್ತಿನ ಕಟ್ಟಡ – ಸರಿಸುಮಾರು 12 ಮೀಟರ್ ಅಗಲ ಮತ್ತು 16 ಮೀಟರ್ ಉದ್ದ; ಕಿತ್ತಳೆ ಬಣ್ಣದ ಹೈಲೈಟ್ ಗಳೊಂದಿಗೆ ಪೇಂಟ್ ಮಾಡಿದ ಕ್ರೀಮ್ ಮತ್ತು ಬಿಳಿ ಬಣ್ಣದ ವಸತಿ ಅಪಾರ್ಟ್ಮೆಂಟ್ ನಂತೆ ಕಂಡರೂ, ಈ ಕೆಳಗಿನ ಎರಡು ಕಾರಣಗಳಿಂದ ಅಸಹಜವೆನಿಸುವಂತೆ ಭಾಸವಾಗುತ್ತದೆ.
ಮೊದಲನೆಯದಾಗಿ, ಮುಂಭಾಗದಲ್ಲಿ ಪಾರ್ಕಿಂಗ್ ಸ್ಥಳವು ಅಸಹಜವಾಗಿ ಸುಮಾರು ಮೂರು ಪಟ್ಟು ದೊಡ್ಡದಾಗಿದೆ. ಎರಡನೆಯದಾಗಿ, ಕಟ್ಟಡದ ಮೇಲೆ ಬಿಜೆಪಿಯ ಬಣ್ಣವಾದ ಕೇಸರಿ ಬಣ್ಣದ ದಳ ಮತ್ತು ಹಸಿರು ಎಲೆಯ ಕಮಲದ ಚಿತ್ರವನ್ನು ಬರೆಯಲಾಗಿದೆ.
ಇದು ತಮಿಳುನಾಡಿನ ಕೃಷ್ಣಗಿರಿ ಜಿಲ್ಲೆಯಲ್ಲಿ ಬಿಜೆಪಿಯ ಹೊಸ ಪಕ್ಷದ ಕಚೇರಿಯಾಗಿದೆ. ಪ್ರಧಾನಿ ನರೇಂದ್ರ ಮೋದಿಯವರು ಆಗಸ್ಟ್ 201 ರಲ್ಲಿ ಮಾಡಿದ ಘೋಷಣೆಯಂತೆ ಇದು ನಿರ್ಮಾಣಗೊಂಡಿದೆ. ʻʻಪಕ್ಷವು ಎಲ್ಲಾ ರಾಜ್ಯಗಳ ಎಲ್ಲಾ ಜಿಲ್ಲೆಗಳಲ್ಲಿ ಕಚೇರಿಗಳನ್ನು ಹೊಂದಿರಬೇಕು, ಪ್ರತಿಯೊಂದೂ “ಎಲ್ಲಾ ಆಧುನಿಕ ಸಂವಹನ ಸೌಲಭ್ಯಗಳನ್ನು ಹೊಂದಿರಬೇಕು” ಎಂದು ತಮ್ಮ ಭಾಷಣದಲ್ಲಿ ಅವರು ಹೇಳಿದ್ದರು. ಇದಾದ ಒಂದು ವರ್ಷದಲ್ಲೇ ದೇಶದ 694 ಜಿಲ್ಲೆಗಳ ಪೈಕಿ 635 ಜಿಲ್ಲೆಗಳಲ್ಲಿ ಹೊಸ ಕಚೇರಿಗಳನ್ನು ನಿರ್ಮಿಸಲು ಬಿಜೆಪಿ ನಿರ್ಧರಿಸಿತು. ಮಾರ್ಚ್ 2023 ರ ಹೊತ್ತಿಗೆ, ಈ ಗುರಿಯನ್ನು ಹೆಚ್ಚಿಸಿ 887 ಜಿಲ್ಲೆಗಳಲ್ಲಿ ಪಕ್ಷದ ಕಚೇರಿಗೆ ಕಟ್ಟಡ ನಿರ್ಮಿಸಲು ಉದ್ದೇಶಿಸಲಾಯಿತು.
ಪಕ್ಷದ ಈ ನಿಲುವೇ ಸರಿಸಾಗಿಲ್ಲ, 2020ರಲ್ಲಿ ಬಿಜೆಪಿ ಪ್ರಧಾನ ಕಾರ್ಯದರ್ಶಿ ಅರುಣ್ ಸಿಂಗ್ ಅವರು ಎಕನಾಮಿಕ್ ಟೈಮ್ಸ್ಗೆ ನೀಡಿದ ಸಂದರ್ಶನದಲ್ಲಿ, “ಇದುವರೆಗೆ ಸ್ಥಳೀಯ ಶಾಸಕ ಅಥವಾ ಸ್ಥಳೀಯ ನಾಯಕ (ನಾಯಕರು) ತಮ್ಮ ಸ್ವಂತ ಜಾಗದಲ್ಲಿ ಕಚೇರಿಯನ್ನು ತೆರೆಯುತ್ತಿದ್ದರು. ಇದರಿಂದಾಗಿ ಪಕ್ಷದ ಹಲವು ಮುಖಂಡರು ಕಚೇರಿಗೆ ಬರುತ್ತಿರಲಿಲ್ಲ. ಈಗ ಪಕ್ಷವು ಬೆಳೆದಿರುವುದರಿಂದ, ಗ್ರಂಥಾಲಯ, ಕಾನ್ಫರೆನ್ಸ್ ಹಾಲ್ ಮತ್ತು ವಿಡಿಯೋ ಮತ್ತು ಆಡಿಯೊ ಕಾನ್ಫರೆನ್ಸಿಂಗ್ ಕೊಠಡಿಯಂತಹ ಎಲ್ಲಾ ಸೌಲಭ್ಯಗಳನ್ನು ಹೊಂದಿರುವ ತನ್ನದೇ ಆದ ಕಚೇರಿಗಳನ್ನು ಹೊಂದಿದಬೇಕಿದೆ.” ಎಂದು ಹೇಳಿದ್ದರು.
ಮಾರ್ಚ್ 2023 ರಲ್ಲಿ, ಕೃಷ್ಣಗಿರಿ ಕಚೇರಿಯನ್ನು ವಿಡಿಯೋ ಕಾನ್ಫರೆನ್ಸಿಂಗ್ನಲ್ಲಿ ಉದ್ಘಾಟಿಸಿದ ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಜೆ.ಪಿ.ನಡ್ಡಾ ಮಾತನಾಡಿ, ದೇಶದಲ್ಲಿ 290 ಜಿಲ್ಲೆಗಳಲ್ಲಿ ಕಚೇರಿಗಳ ನಿರ್ಮಾಣ ಕೆಲಸ ಪೂರ್ಣಗೊಂಡಿದೆ, ಇನ್ನುಳಿದ ಸ್ಥಳಗಳಲ್ಲಿ ಕಾಮಗಾರಿ ನಡೆಯುತ್ತಿದೆ ಎಂದು ಸುದ್ದಿಗಾರರಿಗೆ ತಿಳಿಸಿದ್ದರು. ಈ ಸಂದರ್ಭದಲ್ಲಿ ತಮಿಳುನಾಡಿನ ಇತರ ಒಂಬತ್ತು ಮಂದಿ ವಿಡಿಯೋ ಕಾನ್ಫರೆನ್ಸಿಂಗ್ ನಲ್ಲಿಇದ್ದರು
ಬಿಜೆಪಿಯ ಈ ಕಚೇರಿಗಳ ಕಟ್ಟಡ ನಿರ್ಮಾಣ ವಿಷಯ ಸರಿಯಾಗಿ ಸುದ್ದಿಯಾಗಲೇ ಇಲ್ಲ.
ಬಿಜೆಪಿಯ ಬಿರುಸಿನ ಕಾಮಗಾರಿ
ಗಾತ್ರದ ದೃಷ್ಟಿಯಿಂದ ಕೃಷ್ಣಗಿರಿಯಲ್ಲಿರುವ ಪಕ್ಷದ ಕಚೇರಿಯು ಕಡಿಮೆಯೇನೂ ಇಲ್ಲ, 2016 ರಲ್ಲಿ ʻಟೈಮ್ಸ್ ಆಫ್ ಇಂಡಿಯಾʼ ವರದಿ ಮಾಡಿರುವಂತೆ ಒಡಿಶಾದಲ್ಲಿಯೂ ಸಹ, ಬಿಜೆಪಿಯ ಹೊಸ ಜಿಲ್ಲಾ ಕಚೇರಿಗಳು ಸುಮಾರು 10,000 ಚದರ ಅಡಿ ನಿರ್ಮಾಣ ಪ್ರದೇಶ, ವಿಸ್ತಾರವಾದ ಪಾರ್ಕಿಂಗ್ ಸ್ಥಳ ಮತ್ತು 250-300 ಜನರಿಗೆ ಆಸನ ಸಾಮರ್ಥ್ಯದ ಕಾನ್ಫರೆನ್ಸ್ ಹಾಲ್ ಅನ್ನು ಹೊಂದಿವೆ. ಇತರ ಜಿಲ್ಲಾ ಕಚೇರಿಗಳು – ಮಣಿಪುರದಲ್ಲಿರಬಹುದು (ಇತ್ತೀಚೆಗೆ ಥೌಬಲ್ನಲ್ಲಿ ಸುಟ್ಟುಹೋದ ಪಕ್ಷದ ಕಚೇರಿ), ಕೇರಳ (ಕಣ್ಣೂರು) ಅಥವಾ ಹಿಮಾಚಲ ಪ್ರದೇಶಗಳಲ್ಲಿಯೂ (ಉನಾ) ಕಚೇರಿಗಳು ದೊಡ್ಡದಾಗಿವೆ.
ಈ 290 ಜಿಲ್ಲಾ ಕಚೇರಿಗಳ ನಿರ್ಮಾಣವು ಇನ್ನು ಆರಂಭವಷ್ಟೆ. ದೊಡ್ಡ ನಗರಗಳಲ್ಲಿಯೂ ಬಿಜೆಪಿ ತನ್ನ ಪಕ್ಷದ ಕಚೇರಿಗಳನ್ನು ನಿರ್ಮಿಸುತ್ತಿದೆ. ಇವುಗಳಲ್ಲಿ ಹಲವಾರು ದೊಡ್ಡದಾಗಿದೆ, ಸುಸಜ್ಜಿತವಾಗಿವೆ ಮತ್ತು ಪ್ರಮುಖವಾದ ಪ್ರದೇಶದಲ್ಲಿವೆ.
ಉದಾಹರಣೆಗೆ, 2018 ರಲ್ಲಿ, ಪಕ್ಷವು ತನ್ನ ಹೊಸ 170,000 ಚದರ ಅಡಿ ಪ್ರಧಾನ ಕಚೇರಿಯನ್ನು ಕೇಂದ್ರ ದೆಹಲಿಯ ದೀನ್ ದಯಾಳ್ ಉಪಾಧ್ಯಾಯ ಮಾರ್ಗದಲ್ಲಿ ಆರಂಭಿಸಿತು. ಇದು ನಗರದ ಕನ್ನಾಟ್ ಪ್ಲೇಸ್ ಶಾಪಿಂಗ್ ಆವರಣದಿಂದ ಒಂದು ಕಿಲೋಮೀಟರ್ಗಿಂತ ಹೆಚ್ಚಿಲ್ಲ. ಅದರ ಹಿಂದಿನ ಮುಖ್ಯ11ನೇ ಅಶೋಕ ರಸ್ತೆಯಲ್ಲಿತ್ತು. ಆ ಕಚೇರಿಗೂ ಈ ಹೊಸ ಕಚೇರಿಗೂ ಹೋಲಿಸಲಾಗುವುದೇ ಇಲ್ಲ. ಉದ್ಘಾಟನಾ ಸಮಾರಂಭದಲ್ಲಿ, ಪಕ್ಷದ ಅಧ್ಯಕ್ಷ ಅಮಿತ್ ಶಾ ಅವರು ಹೊಸ ಕಚೇರಿ ವಿಶ್ವದ ಯಾವುದೇ ರಾಜಕೀಯ ಪಕ್ಷದ ಕಚೇರಿಗಿಂತ ದೊಡ್ಡದಾಗಿದೆ ಎಂದು ಹೇಳಿದರು. ಇಲ್ಲಿ ಗಮನಿಸಬೇಕಾದ ಅಂಶವೆಂದರೆ, ಬಿಜೆಪಿ ಇನ್ನೂ 11ನೇ ಅಶೋಕ ರಸ್ತೆಯಲ್ಲಿನ ಕಚೇರಿಯನ್ನು ತನ್ನ ಐಟಿ ಸೆಲ್ನ ಪ್ರಧಾನ ಕಚೇರಿ ಮತ್ತು ಅದರ ಚುನಾವಣಾ ‘ವಾರ್ ರೂಂ’ ಆಗಿ ಬಳಸುತ್ತಿದೆ.
ಇನ್ನೊಂದು ಉದಾಹರಣೆಯನ್ನು ತೆಗೆದುಕೊಳ್ಳುವುದಾದರೆ, ದೆಹಲಿ-ಜೈಪುರ ಎಕ್ಸ್ಪ್ರೆಸ್ವೇನಲ್ಲಿ ಸಿಗ್ನೇಚರ್ ಟವರ್ ಕ್ರಾಸಿಂಗ್ನಲ್ಲಿ ಗುರ್ಗಾಂವ್ ನ ಪಕ್ಷದ ಹೊಸ ಕಚೇರಿಯನ್ನು 2021ರಲ್ಲಿ ಆರಂಭಿಸಲಾಯಿತು. ಈ ಕಚೇರಿಯ ಬಗ್ಗೆ ವರದಿ ಮಾಡಿರುವ ಹಿಂದೂಸ್ತಾನ್ ಟೈಮ್ಸ್, “ಸುಮಾರು 100,000 ಚದರ ಅಡಿ ಪ್ರದೇಶದಲ್ಲಿಈ ಕಚೇರಿ ಇದೆ … ಗ್ರಂಥಾಲಯ, ಮಾಧ್ಯಮ ಕೊಠಡಿ, ಐಟಿ ಕೊಠಡಿ ಮತ್ತು ವಿವಿಧ ಪಕ್ಷದ ಕೋಶಗಳಿಗೆ ಪ್ರತ್ಯೇಕ ಆವರಣಗಳನ್ನು ಹೊಂದಿದೆ” ಎಂದು ಹೇಳಿದೆ. ಇದು ನೆಲಮಾಳಿಗೆಯ ಪಾರ್ಕಿಂಗ್ ಎರಡು ಹಂತಗಳು, 600-700 ಜನರಿಗೆ ಅವಕಾಶ ಕಲ್ಪಿಸಬಹುದಾದ ಸಭಾಂಗಣ; ಎರಡು ದೊಡ್ಡ ಸಮ್ಮೇಳನ ಕೊಠಡಿಗಳು; ಮತ್ತು ಇತರ ಜಿಲ್ಲೆಗಳು ಮತ್ತು ರಾಜ್ಯಗಳಿಂದ ಭೇಟಿ ನೀಡುವ ಪಕ್ಷದ ಕಾರ್ಯಕರ್ತರು ಮತ್ತು ಮುಖಂಡರಿಗೆ ವಸತಿ ಸ್ಥಳವನ್ನು ಹೊಂದಿದೆ. ಇದರ ಮೌಲ್ಯ ಎಷ್ಟೆಂದು ಮಾಹಿತಿ ಲಭ್ಯವಿಲ್ಲ.
ಎರಡು ವರ್ಷಗಳ ನಂತರ, ಬಿಜೆಪಿಯ ಹೊಸ ಪ್ರಧಾನ ಕಚೇರಿಯ ಸಮೀಪ ರ್ಮಿಸಲಾದ ವಸತಿ-ಕಮ್-ಆಡಿಟೋರಿಯಂ ಸಂಕೀರ್ಣವನ್ನು ಮೋದಿ ಉದ್ಘಾಟಿಸಿದರು. ಇದನ್ನು ಪಕ್ಷದ ಪ್ರಧಾನ ಕಾರ್ಯದರ್ಶಿ/ಸಚಿವ ಮಟ್ಟದ ನಾಯಕರು ಮತ್ತು ಪಕ್ಷದ ದೊಡ್ಡ ಸಭೆಗಳಿಗೆ ಬಳಸುತ್ತಾರೆ ಎಂದು ಮಾಧ್ಯಮಗಳು ವರದಿ ಮಾಡಿವೆ.
ತಿರುವನಂತಪುರಂ ಮತ್ತು ಥಾಣೆಯಂತಹ ನಗರ ಭಾರತದಲ್ಲಿ ಬೇರೆಡೆಯಲ್ಲಿಯೂ ಸಹ ಹೊಸ ಕಚೇರಿಗಳನ್ನು ಕಟ್ಟಲಾಗಿದೆ. ಪಕ್ಷವು ದೆಹಲಿ ಬಿಜೆಪಿ ಘಟಕದ ಮತ್ತು ಮಧ್ಯಪ್ರದೇಶ ಬಿಜೆಪಿಯ ಹೊಸ ಕಚೇರಿಗಳನ್ನು ನಿರ್ಮಿಸುತ್ತಿದೆ.
2023 ರಲ್ಲಿ ಎಕನಾಮಿಕ್ ಟೈಮ್ಸ್ ಮಾಡಿರುವ ವರದಿ ಪ್ರಕಾರ ದೆಹಲಿ ಬಿಜೆಪಿಯ ಕಚೇರಿಯು ದಕ್ಷಿಣ ಭಾರತದ ದೇವಾಲಯದ ವಾಸ್ತುಶಿಲ್ಪದ ವಿನ್ಯಾಸ ಹೊಂದಿರಲಿದೆ. ಇದು ಮಧ್ಯ ದೆಹಲಿಯಲ್ಲಿ 825 ಚದರ ಮೀಟರ್ ಪ್ರದೇಶದಲ್ಲಿ ನಿರ್ಮಾಣವಾಗುತ್ತಿದೆ; ಇದು 30,000 ಚದರ ಅಡಿಗಳ ನಿರ್ಮಾಣ ಪ್ರದೇಶವನ್ನು ಹೊಂದಿದೆ. “ಕಟ್ಟಡವು 50 ವಾಹನಗಳ ನಿಲುಗಡೆಗೆ ಎರಡು ನೆಲಮಾಳಿಗೆಗಳನ್ನು ಹೊಂದಿರುತ್ತದೆ” ಎಂದು ದೆಹಲಿ ಬಿಜೆಪಿ ಖಜಾಂಚಿ ವಿಷ್ಣು ಮಿತ್ತಲ್ ಈ ಪತ್ರಿಕೆಗೆ ತಿಳಿಸಿದ್ದಾರೆ.
ಇದರ ನೆಲ ಮಹಡಿಯಲ್ಲಿ ಮಿತ್ತಲ್ ದಿನಪತ್ರಿಕೆಗೆ ತಿಳಿಸಿರುವಂತೆ ಪತ್ರಿಕಾಗೋಷ್ಠಿ ಕೊಠಡಿ, ರಿಸೆಪ್ಷನ್ ಮತ್ತು ಕ್ಯಾಂಟೀನ್ ಇರುತ್ತದೆ. ಮೊದಲ ಮಹಡಿಯಲ್ಲಿ, 300 ಜನರು ಕುಳಿತುಕೊಳ್ಳುವ ಸಾಮರ್ಥ್ಯವಿರುವ ಸಭಾಂಗಣ. ಎರಡನೇ ಮಹಡಿಯಲ್ಲಿ, ದೆಹಲಿ ಬಿಜೆಪಿಯ ಸೆಲ್ಗಳ ಕಚೇರಿಗಳು ಮತ್ತು ಸಿಬ್ಬಂದಿ ಕಚೇರಿಗಳು. ಮೂರನೇ ಮಹಡಿಯಲ್ಲಿ ಪಕ್ಷದ ಉಪಾಧ್ಯಕ್ಷರು, ಪ್ರಧಾನ ಕಾರ್ಯದರ್ಶಿಗಳು ಮತ್ತು ಕಾರ್ಯದರ್ಶಿಗಳ ಕಚೇರಿಗಳು. ಮತ್ತು, ಮೇಲಿನ ಮಹಡಿಯಲ್ಲಿ, ದೆಹಲಿ ಬಿಜೆಪಿ ಅಧ್ಯಕ್ಷ ಮತ್ತು ಪ್ರಧಾನ ಕಾರ್ಯದರ್ಶಿ (ಸಂಘಟನೆ) ಕಚೇರಿಗಳ ಜೊತೆಗೆ ದೆಹಲಿ ಸಂಸದರು ಮತ್ತು ರಾಜ್ಯ ಘಟಕದ ಉಸ್ತುವಾರಿಗಳಿಗೆ ಕೊಠಡಿಗಳಿವೆ.
ಈ ಎಲ್ಲಾ ಕಟ್ಟಡಗಳ ಮೌಲ್ಯ ತಿಳಿದಿಲ್ಲವಾದರೂ, ಮತ್ತೊಂದು ಕಟ್ಟಡವು ಬರುತ್ತಿದೆ – ಮಧ್ಯಪ್ರದೇಶ ಬಿಜೆಪಿಯ ಹೊಸ ಕಚೇರಿ ಭೋಪಾಲ್ನಲ್ಲಿ ತಲೆಎತ್ತಲಿದ್ದು ಸುಮಾರು 100 ಕೋಟಿ ವೆಚ್ಚವಾಗಲಿದೆ ಎಂದು ಅಂದಾಜಿಸಲಾಗಿದೆ. ಇನ್ನೂ ಒಂದು ಪಕ್ಷದ ಕಚೇರಿ – ಅಸ್ಸಾಂ ಬಿಜೆಪಿಗೆ – ಒಂದು ಲಕ್ಷ ಚದರ ಅಡಿಗಳಷ್ಟು ನಿರ್ಮಿಸಲಾಗಿದೆ, ಅತಿಥಿ ಗೃಹ, ಆಧುನಿಕ ಮಾಧ್ಯಮ ಕೇಂದ್ರ, ಐದು ಸಭೆ ಸಭಾಂಗಣಗಳು ಮತ್ತು 350 ಆಸನಗಳ ಸಭಾಂಗಣ – 5,000 ಜನರಿಗೆ ಅವಕಾಶ ಕಲ್ಪಿಸುವ ಸಾಮರ್ಥ್ಯವಿದೆ ಮತ್ತು 25 ಕೋಟಿ ಮೌಲ್ಯದ ಮೌಲ್ಯವನ್ನು ಹೊಂದಿದೆ.
ಒಟ್ಟಾರೆಯಾಗಿ, ಈ ರಚನೆಯ ಪೂರ್ಣ ಪ್ರಮಾಣದ ತಿಳಿದಿಲ್ಲ. ಈ ಹಿಂದೆ, ನಡ್ಡಾ ಅವರು 900 ಪಕ್ಷದ ಹೊಸ ಕಚೇರಿಗಳ ನಿರ್ಮಾಣದ ಗುರಿಯನ್ನು ನಿಗದಿಪಡಿಸಿದ್ದರು. ಆದಾಗ್ಯೂ, ಇವುಗಳಲ್ಲಿ ಎಷ್ಟು ಪಟ್ಟಣಗಳು ಮತ್ತು ನಗರಗಳಲ್ಲಿ ನಿರ್ಮಾಣವಾಗಲಿವೆ ಎಂಬುದು ಸ್ಪಷ್ಟವಾಗಿಲ್ಲ. ಈ ಎಲ್ಲ ಕಟ್ಟಡಗಳ ನಿರ್ಮಾಣ ಹೇಗೆ ಸಾಧ್ಯವಾಗುತ್ತಿದೆ ಇದು ದೊಡ್ಡ ಪ್ರಶ್ನೆಯಾಗಿದೆ.
ಕುತೂಹಲಕಾರಿಯಾಗಿರುವ ವಿರೋಧಾಭಾಸದ ಕಥೆ
ಈ ಲೇಖನವು ಪತ್ರಿಕೆಗೆ ಹೋಗುವಷ್ಟರಲ್ಲಿ, 2024 ರ ಚುನಾವಣೆಯ ಮೊದಲ ಎರಡು ಹಂತಗಳು ಮುಗಿದಿವೆ.
ಈ ಬಾರಿ ಚುನಾವಣೆ ಹಿಂದೆಂದಿಗಿಂತಲೂ ಹೆಚ್ಚು ನೀರಸವಾಗಿದೆ. ಬಲವಾದ ವಿರೋಧವನ್ನು ಒಡ್ಡುವಂತಹ ಪಕ್ಷಗಳಲ್ಲಿ; ಪ್ರಸ್ತುತವಾಗಿ ಇರುವ ಸಮಸ್ಯೆಗಳಿಲ್ಲದ ಚುನಾವಣೆ ಇದು; ನೋಟು ಅಮಾನ್ಯೀಕರಣ ಮತ್ತು ಜಿಎಸ್ಟಿಯ ಆರ್ಥಿಕ ಆಘಾತಗಳಿಂದ ಚೇತರಿಸಿಕೊಳ್ಳುವ ಮೊದಲೇ ಭಾರತೀಯರು ಕೋವಿಡ್ ಮತ್ತು ಅದರ ನಂತರ ಸರ್ಕಾರದ ಕ್ರಮಗಳಿಂದಾಗಿ ಸಂಕಷ್ಟಕ್ಕೀಡಾಗಿದ್ದರು. ಇದರ ಪರಿಣಾಮವಾಗಿ ಚೇತರಿ ದಿಕ್ಕು ತಪ್ಪಿರುವುದು ಕಂಡುಬಂದಿದೆ, ಇದು ಶ್ರೀಮಂತರಿಗೆ ಲಾಭವನ್ನು ತಂದುಕೊಟ್ಟಿದೆ ಮತ್ತು ದೇಶದ ಉಳಿದ ಭಾಗಗಳ ಜನರು ನಿರುದ್ಯೋಗದಲ್ಲಿ ಮುಳುಗುವಂತೆ ಮಾಡಿದೆ. ಆದಾಯದ ಅಸಮಾನತೆಯು 100 ವರ್ಷಗಳಲ್ಲಿಯೇ ಹೆಚ್ಚಿರುವ ಸಮಯ ಇದು. ಜನರಿಗೆ ಮೊದಲಿನಂತೆ ಇರಲು ಸಾಧ್ಯವಾಗದೇ ಇರುವ ಪರಿಸ್ಥಿತಿ.
ಆದರೆ ಭಾರತೀಯರು ಹೆಣಗಾಡುತ್ತಿರುವಾಗ, ಬಿಜೆಪಿಯ ಹಣಕಾಸಿನ ಸ್ಥಿತಿ ಮಾತ್ರ ನಾಟಕೀಯ ಸುಧಾರಣೆಯನ್ನು ಕಂಡಿದೆ. ಇದು ಚುನಾವಣೆಯಲ್ಲಿ ಪ್ರತಿಸ್ಪರ್ಧಿಗಳನ್ನು ಮೀರಿಸುವುದಲ್ಲದೆ, ಮಾರ್ಚ್ 2023 ರ ವೇಳೆಗೆ 5,400 ಕೋಟಿ ರೂ.ಗಳ ಹಣ ಉಳಿಸಿಕೊಳ್ಳೊವುದರೊಂದಿಗೆ ರಿಯಲ್ ಎಸ್ಟೇಟ್ ಆಸ್ತಿಗಳನ್ನು (ಸ್ಥಿರಾಸ್ತಿ) ಕೂಡ ಹೊಂದಿರುತ್ತದೆ!
ಇಲ್ಲಿ ಒಂದು ಕೇಳಬೇಕಾಗಿರುವ ಪ್ರಶ್ನೆ ಮರೆಯಾಗಿದೆ.
ಕಟ್ಟಡಗಳು ಪಕ್ಷದ ಹೂಡಿಕೆಗಳಲ್ಲಿ ಹೆಚ್ಚು ಗೋಚರಿಸುವ ಭಾಗವಾಗಿದೆ. 2019 ರ ಚುನಾವಣೆಗಳಲ್ಲಿ ಮತ್ತು ಪ್ರಸ್ತುತ ಚುನಾವಣೆಗಳಲ್ಲಿ – ಇದು ರಾಜ್ಯ ಮತ್ತು ರಾಷ್ಟ್ರೀಯ ಚುನಾವಣೆಗಳಲ್ಲಿ ತನ್ನ ರಾಜಕೀಯ ಪ್ರತಿಸ್ಪರ್ಧಿಗಳನ್ನು ಸಹ ಅಪಾರವಾಗಿ ಮೀರಿಸಿದೆ. ಅಧಿಕಾರವನ್ನು ಉಳಿಸಿಕೊಳ್ಳಲು ಪ್ರತಿಸ್ಪರ್ಧಿ ಪಕ್ಷಗಳಲ್ಲಿನ ಪಕ್ಷಾಂತರಗಳನ್ನು ಪದೇ ಪದೇ ಉತ್ತೇಜಿಸಲಾಗಿದೆ ಮತ್ತು ಪ್ರತಿಪಕ್ಷ ನಾಯಕರು ಮತ್ತು ಪ್ರಮುಖ ನಾಗರಿಕರ ಮೇಲೆ ನಿಗಾ ಇಡಲು ಪೆಗಾಸಸ್ ಮತ್ತು ಹೊಸ ರೂಪಾಂತರಗಳಂತಹ ದುಬಾರಿ ಹೈಟೆಕ್ ಸ್ಪೈವೇರ್ಗಳ ಸರ್ಕಾರದ ಬಳಕೆಯಿಂದ ಇದು ಲಾಭ ಪಡೆದಿದೆ ಎಂದು ಆರೋಪಿಸಲಾಗುತ್ತಿದೆ.
ಹಾಗಾದರೆ ಬಿಜೆಪಿ ಬಳಿ ಎಷ್ಟು ಹಣವಿದೆ?
ಭಾರತದ ರಾಜಕೀಯ ಪಕ್ಷಗಳು ತಮ್ಮ ಹಣಕಾಸು ವರದಿಗಳನ್ನು ಚುನಾವಣಾ ಆಯೋಗಕ್ಕೆ ಅತ್ಯಂತ ಕುಖ್ಯಾತ ಸ್ವರೂಪದಲ್ಲಿ ಪ್ರಸ್ತುತಪಡಿಸುತ್ತವೆ ಎಂದು ವ್ಯಾಪಕವಾಗಿ ತಿಳಿದಿದ್ದರೂ ಈ ಪ್ರಶ್ನೆಯು ಅಷ್ಟಾಗಿ ಎಲ್ಲರ ಗಮನವನ್ನು ಸೆಳೆಯುತ್ತಿಲ್ಲ. ಸಾಮಾನ್ಯವಾಗಿ ರಾಜಕೀಯ ಪಕ್ಷಗಳು ತಮ್ಮ ಸಂಪೂರ್ಣ ಆದಾಯವನ್ನು ವರದಿ ಮಾಡುವುದಿಲ್ಲ. ಅವರು ಅಧಿಕಾರಕ್ಕೆ ಬರುವ ವಿಧಾನಗಳ ಮೇಲಿನ ಅವರ ಅತ್ಯಂತ ಪರಿಣಾಮಕಾರಿ ವೆಚ್ಚವನ್ನು ಬಹಿರಂಗಪಡಿಸಲಾಗಿಲ್ಲ ಅಥವಾ ನಿಖರವಾಗಿ ವರದಿ ಮಾಡಲಾಗಿಲ್ಲ.
ವಿಶೇಷವಾಗಿ ಬಿಜೆಪಿಯ ವಿಷಯದಲ್ಲಿ, ಇದೊಂದು ವಿಚಿತ್ರವಾದ ಪ್ರಕರಣವಾಗಿದೆ. “ಬಿಜೆಪಿಯ ಚುನಾವಣಾ ಪ್ರಾಬಲ್ಯವು ಅದರ ಹಣಕಾಸಿನ ಪ್ರಾಬಲ್ಯದಿಂದ ಹೊರಬರುತ್ತದೆ” ಎಂದು ರಾಯ್ಪುರ ಮೂಲದ ರಾಜಕೀಯ ವಿಶ್ಲೇಷಕರೊಬ್ಬರು ದಿ ವೈರ್ಗೆ ಹೇಳಿದ್ದಾರೆ. ಆದರೂ ಪಕ್ಷದ ಖಚ್ಚುವೆಚ್ಚಗಳು, ಹಣಕಾಸಿನ ಮೂಲಗಳು ಅಂದಾಜಿಗೂ ದಕ್ಕುತ್ತಿಲ್ಲ.
ಮತ್ತು ಇನ್ನೂ, ದೇಶದ ರಾಜಕೀಯ ವ್ಯಾಖ್ಯಾನಕಾರರು, ಬಿಜೆಪಿಯ ಗೆಲುವಿನ ಸಾಮರ್ಥ್ಯದ ಬಗ್ಗೆ ಪತ್ರಿಕೆಗಳಲ್ಲಿನ ಅಭಿಪ್ರಾಯದ ಅಂಕಣ ಮತ್ತು ಪುಸ್ತಕಗಳನ್ನು ಬರೆಯುವಾಗ, ಪಕ್ಷದ ಹಣಕಾಸಿನ ಸ್ಥಿತಿಗತಿಯನ್ನು ಉಲ್ಲೇಖಿಸುತ್ತಿಲ್ಲ.
ಈ ಉದ್ದೇಶಪೂರ್ವಕ ಕುರುಡುತನದ ಪರಿಸ್ಥಿತಿಯನ್ನು ಗಂಭೀರವಾಗಿಸಿದೆ. ಬಿಜೆಪಿ ಅಧಿಕಾರಕ್ಕೆ ಬಂದು ಹತ್ತು ವರ್ಷಗಳ ನಂತರ, ಪಕ್ಷದ ಜೇಬು ಎಷ್ಟು ದೊಡ್ಡದಾಗಿದೆ ಅಥವಾ ಈ ಹಣಕಾಸು ಮೀಸಲು ಹೇಗೆ ನಿರ್ಮಿಸಲಾಗಿದೆ ಎಂದು ಭಾರತೀಯರಿಗೆ ತಿಳಿದಿಲ್ಲ.
ಆದಾಗ್ಯೂ, ಪಕ್ಷದ ಎರಡು ಪ್ರಮುಖ ವೆಚ್ಚಗಳ ಒಂದು ನೋಟ – ಅದರ ನಿರ್ಮಾಣದ ಕಾರ್ಯ, ಮತ್ತು ಅದರ ಪ್ರಚಾರ ವೆಚ್ಚ – ಕೆಲವು ಸೂಚಕ ಸಂಖ್ಯೆಗಳನ್ನು ತಿಳಿಸುತ್ತದೆ. ಮತ್ತು 2014 ಮತ್ತು 2023ರ ನಡುವೆ ಅದರ ಅಧಿಕೃತವಾಗಿ ಘೋಷಿಸಲಾದ ಆದಾಯ 14,663 ಕೋಟಿ ರೂ.ಗಳಷ್ಟಿದೆ
1. ಬಿಜೆಪಿ ತನ್ನ ಹೊಸ ಕಟ್ಟಡಗಳಿಗೆ ಯಾವುದನ್ನು ಖರ್ಚು ಮಾಡುತ್ತಿದೆ?
ಪಕ್ಷದ ವೆಚ್ಚವನ್ನು ಪತ್ತೆ ಮಾಡುವುದು ಆ ಪ್ರಶ್ನೆಗೆ ಉತ್ತರಿಸಲು ಒಂದು ಮಾರ್ಗವಾಗಿದೆ.
ನಾವು ಕಟ್ಟಡಗಳೊಂದಿಗೆ ಪ್ರಾರಂಭಿಸೋಣ. 2014-15 ಮತ್ತು 2022-23ರ ನಡುವಿನ ವಾರ್ಷಿಕ ವರದಿಗಳ ಪ್ರಕಾರ, ಬಿಜೆಪಿ ಭೂಮಿ ಮತ್ತು ಕಟ್ಟಡಗಳಿಗೆ 1,124 ಕೋಟಿ ರೂ. ವ್ಯಯಿಸಿದೆ.
ಟೈಮ್ಸ್ ಆಫ್ ಇಂಡಿಯಾದ ವರದಿಯ ಪ್ರಕಾರ 2016 ರಲ್ಲಿ ಒಡಿಶಾದಲ್ಲಿ ನಿರ್ಮಿಸಲಾಗುವ ಪ್ರತಿ ಜಿಲ್ಲಾ ಕಚೇರಿಗೆ 2 ಕೋಟಿಯಿಂದ 3 ಕೋಟಿ ರೂಪಾಯಿಗಳವರೆಗೆ ವೆಚ್ಚವಾಗುತ್ತಿದ್ದು ಒಟ್ಟು 36 ಕಚೇರಿಗಳಿಗೆ ಒಟ್ಟು 80 ಕೋಟಿ ರೂ. ತಗುಲಲಿದೆ.
ಅದು ಸುಮಾರು ಎಂಟು ವರ್ಷಗಳ ಹಿಂದಿನ ಮಾತು. ಭೂಮಿಯ ದರಗಳು ಮತ್ತು ನಿರ್ಮಾಣ ವೆಚ್ಚದಲ್ಲಿನ ಏರಿಕೆಯನ್ನು ಗಮನಿಸಿದರೆ, ಇತ್ತೀಚಿನ ರಚನೆಗಳು ಹೆಚ್ಚು ವೆಚ್ಚವನ್ನು ಹೊಂದಿರಬಹುದು. ಉದಾಹರಣೆಗೆ, ಕೃಷ್ಣಗಿರಿ ಕಚೇರಿಯು ಚೆನ್ನೈ-ಬೆಂಗಳೂರು ಹೆದ್ದಾರಿಯಲ್ಲಿ, ವೇಗವಾಗಿ ಕೈಗಾರಿಕೀಕರಣಗೊಳ್ಳುತ್ತಿರುವ ಹೊಸೂರಿನ ಕ್ಲಸ್ಟರ್ನಿಂದ ಕೇವಲ ಮೂವತ್ತು ನಿಮಿಷಗಳ ದೂರದಲ್ಲಿದೆ.
ಇಲ್ಲಿನ ಜಮೀನಿನ ದರ ಪ್ರತಿ ಚದರ ಅಡಿಗೆ 5,000 ರೂ. ಎಂದು ಸ್ಥಳೀಯ ಬಿಲ್ಡರ್ ಒಬ್ಬರು ದಿ ವೈರ್ಗೆ ತಿಳಿಸಿದರು – ಪ್ಲಾಟ್ಗೆ ಸರಿಸುಮಾರು 5 ಕೋಟಿ ರೂ.ಗಳಷ್ಟು. ಮೂಲ ನಿರ್ಮಾಣಕ್ಕೆ ಪ್ರತಿ ಚದರ ಅಡಿಗೆ 1,500 ರೂಪಾಯಿ ವೆಚ್ಚವಾಗಲಿದೆ ಎಂದು ಅವರು ಹೇಳಿದರು. ಇದು ಪ್ರತಿ ಚದರ ಅಡಿಗೆ 3,000 ರೂ. ಒಟ್ಟಾರೆಯಾಗಿ, ಅವರು ನಿರ್ಮಾಣದ ಸಂಭವನೀಯ ವೆಚ್ಚವನ್ನು ಕನಿಷ್ಠ 1.5 ಕೋಟಿ ರೂ. ಸುಸಜ್ಜಿತ ಕಟ್ಟಡಕ್ಕೆ ಸುಮಾರು 3 ಕೋಟಿ ವೆಚ್ಚವಾಗಲಿದೆ ಎಂದು ಅವರು ಹೇಳಿದರು.
ಮಾರ್ಚ್ 2023 ರಲ್ಲಿ, ನಡ್ಡಾ ಅವರು 290 ಪಕ್ಷದ ಕಚೇರಿಗಳನ್ನು ಪೂರ್ಣಗೊಳಿಸಿದ್ದಾರೆ ಎಂದು ಹೇಳಿದರು. ಈ ಕಟ್ಟಡಗಳ (ಭೂಮಿ ಮತ್ತು ಕಟ್ಟಡದ ವ್ಯಾಪಿಸಿರುವ) ವೆಚ್ಚವು ಕಳೆದ ಎಂಟು ವರ್ಷಗಳಲ್ಲಿ 3 ಕೋಟಿ ರೂ.ಗಳಲ್ಲಿ ಅಷ್ಟೇ ಇದೆ ಎಂದು ಊಹಿಸಿದರೂ ಸಹ – ಪಕ್ಷದ ವೆಚ್ಚವು ಕೇವಲ ಜಿಲ್ಲಾ ಕಚೇರಿಗಳ ಮೇಲೆ 870 ಕೋಟಿ ರೂ.ಗಳಷ್ಟಿದೆ. ಎಲ್ಲಾ 887 ಜಿಲ್ಲಾ ಕಚೇರಿಗಳಿಗೆ, ಪಕ್ಷದ ಯೋಜಿತ ವೆಚ್ಚವು 2,661 ಕೋಟಿ ರೂ.ಗಳಷ್ಟಿದೆ.
ಪಕ್ಷವು ದೊಡ್ಡ ನಗರಗಳಲ್ಲಿ ದೊಡ್ಡ ಕಚೇರಿಗಳನ್ನು ನಿರ್ಮಿಸುತ್ತಿದೆ. ಈ ಲೇಖನವು ಮೇಲೆ ಹೇಳಿದಂತೆ, ಅದರ ಗುವಾಹಟಿ ಕಚೇರಿಗೆ 25 ಕೋಟಿ ರೂ ಮತ್ತು ಭೋಪಾಲ್ ಕಚೇರಿಗೆ 100 ಕೋಟಿ ರೂ ವೆಚ್ಚವಾಗುವ ನಿರೀಕ್ಷೆಯಿದೆ. ಪ್ರತಿ ರಾಜ್ಯ ಮತ್ತು ಕೇಂದ್ರಾಡಳಿತ ಪ್ರದೇಶಕ್ಕೆ ತಲಾ 25 ಕೋಟಿ ರೂ.ಗಳಂತೆ ಒಂದು ದೊಡ್ಡ ಕಚೇರಿಯನ್ನು ಊಹಿಸಿದರೆ ಒಟ್ಟು 900 ಕೋಟಿ ರೂ. ಆಗಲಿದೆ. ಅಂದರೆ 3,500 ಕೋಟಿ ರೂ.ಗೆ ಏರುತ್ತದೆ
ಆ ಸಂಖ್ಯೆ ಹೆಚ್ಚಿರಬಹುದು. ಜಿಲ್ಲಾ ಕಚೇರಿಗಳಿಗೆ 3 ಕೋಟಿ ರೂ.ಗಿಂತ ಹೆಚ್ಚು ವೆಚ್ಚವಾಗಬಹುದು. ಉದಾಹರಣೆಗೆ, ಒಡಿಶಾದಲ್ಲಿ, ಭೂಮಿಯ ಮಾರುಕಟ್ಟೆ ಬೆಲೆಯು ಮಾರಾಟ ಪತ್ರದಲ್ಲಿ ನಮೂದಿಸಿರುವ ಬೆಲೆಗಿಂತ ಹೆಚ್ಚಾಗಿದೆ ಎಂದು ಹೇಳಲಾಗುತ್ತದೆ. ಪ್ರತಿ ರಾಜ್ಯದಲ್ಲಿ ಪಕ್ಷವು ಒಂದಕ್ಕಿಂತ ಹೆಚ್ಚು ದೊಡ್ಡ ಕಚೇರಿಗಳನ್ನು ನಿರ್ಮಿಸಬಹುದು. ಅಲ್ಲದೆ, ವರದಿಗಳ ಪ್ರಕಾರ, ಕಾಂಗ್ರೆಸ್ ನಾಯಕ ಕಮಲ್ ನಾಥ್ ಬಿಜೆಪಿ ತನ್ನ ದೆಹಲಿ ಪ್ರಧಾನ ಕಚೇರಿಗೆ ಮಾತ್ರ 700 ಕೋಟಿ ರೂಪಾಯಿ ಖರ್ಚು ಮಾಡಿದೆ ಎಂದು ಆರೋಪಿಸಿದ್ದಾರೆ.
ಬಿಜೆಪಿಯ ರಾಷ್ಟ್ರೀಯ ಖಜಾಂಚಿ ರಾಜೇಶ್ ಅಗರ್ವಾಲ್ ಅವರಿಗೆ ಪಕ್ಷದ ನಿರ್ಮಾಣ ಯೋಜನೆಗಳು ಮತ್ತು ಬಜೆಟ್ಗಳ ವಿವರ ನೀಡುವಂತೆ ʻದಿ ವೈರ್ʼ ಇಮೇಲ್ ಮಾಡಿತ್ತು. ಪಕ್ಷದ ಜಂಟಿ ಖಜಾಂಚಿ ನರೇಶ್ ಬನ್ಸಾಲ್ ಅವರಿಗೂ ಪ್ರಶ್ನೆಗಳನ್ನು ಇಮೇಲ್ ಮಾಡಲಾಗಿದೆ. ನಂತರ, ವಾಟ್ಸಾಪ್ನಲ್ಲಿ ಈ ಇಮೇಲ್ಗಳ ಬಗ್ಗೆ ಇಬ್ಬರಿಗೂ ತಿಳಿಸಲಾಗಿದೆ. ಅವರು ಪ್ರತಿಕ್ರಿಯಿಸಿದಾಗ ಈ ಲೇಖನವನ್ನು ಅಪ್ಡೇಟ್ ಮಾಡಲಾಗುತ್ತದೆ.
2. ಚುನಾವಣಾ ಪ್ರಚಾರಕ್ಕಾಗಿ ಬಿಜೆಪಿ ಎಷ್ಟು ಖರ್ಚು ಮಾಡುತ್ತಿದೆ?
ಬಿಜೆಪಿಯ ವಾರ್ಷಿಕ ವರದಿಗಳ ಪ್ರಕಾರ 2015-16 ಮತ್ತು 2022-23 ರ ನಡುವಿನ ಹಣಕಾಸು ವರ್ಷಗಳಲ್ಲಿ, ಪಕ್ಷವು ಚುನಾವಣೆ ಅಥವಾ ಸಾಮಾನ್ಯ ಪ್ರಚಾರಕ್ಕಾಗಿ ಒಟ್ಟು 5,744 ಕೋಟಿ ರೂ.ಗಳನ್ನು ಖರ್ಚು ಮಾಡಿದೆ. ಆದಾಗ್ಯೂ, ಸೆಂಟರ್ ಫಾರ್ ಮೀಡಿಯಾ ಸ್ಟಡೀಸ್ (CMS) ನಂತಹ ಸ್ವತಂತ್ರ ಅಧ್ಯಯನಗಳ ಪ್ರಕಾರ, 2019ರ ಚುನಾವಣೆಯೊಂದರಲ್ಲೇ ಬಿಜೆಪಿ ಒಟ್ಟು 27,000 ಕೋಟಿ ರೂ.ಗಳನ್ನು ಖರ್ಚು ಮಾಡಿದೆ. ಇದಲ್ಲದೇ, ಪಕ್ಷದ ಅಭ್ಯರ್ಥಿಗಳ ಚುನಾವಣಾ ವೆಚ್ಚ ಚುನಾವಣಾ ಆಯೋಗ ಪ್ರತಿ ಕ್ಷೇತ್ರಕ್ಕೆ ನೀಡುವ 1 ಕೋಟಿಗಿಂತ ರೂ.ಗಿಂತ ಅಧಿಕವಾಗಿದೆ ಎಂದು ಹೇಳುತ್ತದೆ.
ಇಲ್ಲಿ ಇನ್ನೊಂದು ದೊಡ್ಡ ಪ್ರಶ್ನೆ ಉದ್ಭವಿಸುತ್ತದೆ. CMS ಪ್ರಕಾರ, 2019ರ ಚುನಾವಣೆಯಲ್ಲಿ ರಾಜಕೀಯ ಪಕ್ಷಗಳ ಒಟ್ಟು ವೆಚ್ಚದ ಸುಮಾರು 45% ಅಂದರೆ 60,000 ಕೋಟಿ ರೂ.ಯನ್ನು ಬಿಜೆಪಿ ವಿನಿಯೋಗಿಸಿತ್ತು. 1998 ರಲ್ಲಿ, ಒಟ್ಟು ವೆಚ್ಚದಲ್ಲಿ ಬಿಜೆಪಿಯ ಪಾಲು 20% ರಷ್ಟಿತ್ತು. 2024 ರ ಚುನಾವಣೆಯಲ್ಲಿ ಈ ವೆಚ್ಚ ದ್ವಿಗುಣವಾಗಲಿದೆ ಅಂದರೆ 1,35,000 ಕೋಟಿ ರೂ. ಆಗುತ್ತದೆ.
ಪಕ್ಷದ ಖರ್ಚಿನ ಪಾಲು 2019 ರಂತೆಯೇ ಇದ್ದರೆ, 60,750 ಕೋಟಿ ರೂ. ಚುನಾವಣಾ ಖರ್ಚು ಆಗುತ್ತದೆ.
ಈ ಎರಡು ಲೋಕಸಭಾ ಚುನಾವಣೆಗಳ ನಡುವೆ ಒಟ್ಟು ಖರ್ಚು 87,750 ಕೋಟಿ ರೂ. ಆಗಿತ್ತು. ಇನ್ನೊಂದೆಡೆ 2024ರಲ್ಲೂ 27 ಸಾವಿರ ಕೋಟಿ ಖರ್ಚು ಮಾಡಿದರೆ ಅಲ್ಲಿಗೆ ಒಟ್ಟು 54 ಸಾವಿರ ಕೋಟಿ ಖರ್ಚು ಮಾಡಿದಂತಾಗುತ್ತದೆ.
ಇನ್ನು ರಾಜ್ಯದ ಚುನಾವಣೆಗಳನ್ನು ನೋಡುವುದಾದರೆ, ಇಲ್ಲಿಯೂ ಸಹ, ಚುನಾವಣಾ ಖರ್ಚಿನಲ್ಲಿ ಬಿಜೆಪಿ ತನ್ನ ಪ್ರತಿಸ್ಪರ್ಧಿಗಳನ್ನು ಮೀರಿಸಿದೆ. ರಾಯ್ಪುರ ಮೂಲದ ರಾಜಕೀಯ ವಿಶ್ಲೇಷಕರೊಬ್ಬರ ಆರೋಪದಂತೆ, ಛತ್ತೀಸ್ಗಢದ ರಾಜ್ಯ ಚುನಾವಣೆಯಲ್ಲಿ ಪಕ್ಷವು ಪ್ರತಿ ಅಭ್ಯರ್ಥಿಗೆ 3 ರಿಂದ 4 ಕೋಟಿ ರೂ ಖರ್ಚು ಮಾಡಿದೆ. “ಇದು ಅಭ್ಯರ್ಥಿಗಳಿಗೆ ನೇರವಾಗಿ ಕೊಟ್ಟ ನಗದು, ಪಕ್ಷವು ಸಾಮಾಜಿಕ ಜಾಲತಾಣಗಳಲ್ಲಿ ಮತ್ತೆ ಇತರೆ ಜಾಹಿರಾತು ಮೂಲಕ ಪ್ರಚಾರಕ್ಕಾಗಿ ಖರ್ಚು ಮಾಡಿರುವ ಹಣ ಇದರಲ್ಲಿ ಒಳಗೊಂಡಿಲ್ಲ.” ಎಂದು ಮಾಹಿತಿ ನೀಡುತ್ತಾರೆ.
ಈ ಹಿನ್ನಲೆಯಲ್ಲಿ ಹೇಳುವುದಾದರೆ, ವಿಧಾನಸಭಾ ಚುನಾವಣೆಯಲ್ಲಿ ಒಬ್ಬ ಅಭ್ಯರ್ಥಿಗೆ ಕನಿಷ್ಟ 40 ಲಕ್ಷ ರೂ. ಆದರೂ ಖರ್ಚಾಗುತ್ತದೆ.
ಭಾರತದಲ್ಲಿ ಒಟ್ಟು 4,123 ರಾಜ್ಯ ಮಟ್ಟದ ಕ್ಷೇತ್ರಗಳಿವೆ. ಕಳೆದ ಹತ್ತು ವರ್ಷಗಳಲ್ಲಿ ಪ್ರತಿ ಅಭ್ಯರ್ಥಿಯೂ ಎರಡು ಬಾರಿ ಚುನಾವಣೆಗೆ ಸ್ಪರ್ಧಿಸಿದ್ದಾರೆ. ಹಾಗಾದ್ರೆ ಪ್ರತಿ ಚುನಾವಣೆಗೂ ಸರಾಸರಿ 2 ಕೋಟಿ ರೂ.ಗಳ ವೆಚ್ಚ ಆಗಿರಬಹುದು ಎಂದು ಅಂದಾಜಿಸಿದರೂ, ವಿಧಾನಸಭಾ ಚುನಾವಣೆಯೊಂದಕ್ಕೇ ಆಗುವ ಖರ್ಚುವೆಚ್ಚ ಸುಮಾರು 16,492 ಕೋಟಿ ರೂ.ಗಳು.
CMS ನ ಅಧ್ಯಯನ, ಛತ್ತೀಸ್ಗಢದಲ್ಲಿ ಬಿಜೆಪಿ ಪಕ್ಷದ ಖರ್ಚುವೆಚ್ಚಗಳ ಕುರಿತಾದ ಆರೋಪಗಳು ಮತ್ತು ದಿ ವೈರ್ನ ಲೆಕ್ಕಾಚಾರಗಳ ಬಗ್ಗೆ ದಿ ವೈರ್ ಸುದ್ದಿಸಂಸ್ಥೆ ಅಗರ್ವಾಲ್ ಮತ್ತು ಬನ್ಸಾಲ್ ಅವರ ಅಭಿಪ್ರಾಯವನ್ನು ಕೇಳಿದೆ. ಅವರು ಪ್ರತಿಕ್ರಿಯಿಸಿದಾಗ ಈ ಲೇಖನವನ್ನು ಅಪ್ಡೇಟ್ ಮಾಡುತ್ತೇವೆ.
3. ಬಿಜೆಪಿಯ ಹಣದ ತಿಜೋರಿಯ ಕೀಲಿಕೈ ಎಲ್ಲಿದೆ?
ಬಿಜೆಪಿ ತನ್ನ ಪ್ರಚಾರಕ್ಕಾಗಿ ಹಾಗೂ ಕಟ್ಟಡ ನಿರ್ಮಾಣಕ್ಕಾಗಿ ಬಳಸಿಕೊಂಡ ಹಣವನ್ನು ಲೆಕ್ಕ ಮಾಡುತ್ತಾ ಹೋದರೆ, ಆಘಾತಕಾರಿಯಾದ ಅಂಶಗಳು ಹೊರಬೀಳುತ್ತಾ ಹೋಗುತ್ತದೆ. 2014-15 ಮತ್ತು 2022-23 ರ ನಡುವೆ ಪಕ್ಷದ ಘೋಷಿತ ಆದಾಯ 14,663 ಕೋಟಿ. ಆದರೆ ವಿಪರ್ಯಾಸವೆಂದರೆ ಈ ಆದಾಯ ಏನು ಘೋಷಿಸಿದೆ ಅದರ ಐದರಿಂದ ಏಳು ಪಟ್ಟು ಹೆಚ್ಚು ಚುನಾವಣಾ ಖರ್ಚು ವೆಚ್ಚಗಳು ಬರುತ್ತದೆ. ಚುನಾವಣಾ ಬಾಂಡ್ಗಳಿಂದ ಈಗ ಏನು ಬಿಜೆಪಿ ಮುಖಭಂಗ ಅನುಭವಿಸುತ್ತಿದೆ, ಅದು ಈ ಲೆಕ್ಕಾಚಾರದ 10% ಕೂಡ ಇಲ್ಲ.
ಬಿಜೆಪಿಯ ಖರ್ಚು ವೆಚ್ಚಗಳ ಒಂದು ಪಟ್ಟಿ ಇಲ್ಲಿದೆ ನೋಡಿ.
ಜಿಲ್ಲಾ ಕಚೇರಿಗಳ ನಿರ್ಮಾಣ: 2,661 ಕೋಟಿ ರೂ
ಇತರೆ ಕಟ್ಟಡಗಳು: 900 ಕೋಟಿ ರೂ
ರಾಜ್ಯ ಚುನಾವಣೆ: 16,492 ಕೋಟಿ ರೂ
ಲೋಕಸಭಾ ಚುನಾವಣೆ: 54,000 – 87,750 ಕೋಟಿ ರೂ.
ಇಲ್ಲಿ ನಾಲ್ಕು ಅಂಶಗಳ ಕಡೆ ಬೆಳಕು ಚೆಲ್ಲಬೇಕಾಗಿದೆ.
1. ಸಮರ್ಪಕ ಮಾಹಿತಿ ಇಲ್ಲದೇ, ಬಿಜೆಪಿಯ ಆರ್ಥಿಕತೆಯನ್ನು, ಖರ್ಚುವೆಚ್ಚಗಳನ್ನು ಅರ್ಥಮಾಡಿಕೊಳ್ಳುತ್ತೇವೆ ಎಂದು ಹೊರಟರೆ ಅವರು ಕೊಡುವ ಕಾಗದದ ಮೇಲಿನ ಲೆಕ್ಕಾಚಾರಗಳನ್ನು ಮಾತ್ರ ನಂಬಿಕೊಂಡು ಇರಬೇಕಾಗುತ್ತದೆ.
2. ಕಟ್ಟಡ ನಿರ್ಮಾಣ ಮತ್ತು ಚುನಾವಣಾ ಪ್ರಚಾರ ವೆಚ್ಚಗಳು ಬಿಜೆಪಿ ಪಕ್ಷದ ತಿಜೋರಿಯ ಮೇಲ್ನೋಟಕ್ಕೆ ಹೆಚ್ಚು ಸುಲಭವಾಗಿ ಸಿಗುವ ಎರಡು ನಿದರ್ಶನಗಳಾಗಿವೆ. ಈ ಪಟ್ಟಿಗೆ ಇನ್ನೂ ಹೆಚ್ಚು ಅಂಶಗಳನ್ನು ಸೇರಿಸಬಹುದು. ಉದಾಹರಣೆಗೆ, ಕಳೆದ ಹತ್ತು ವರ್ಷಗಳಲ್ಲಿ, ಪಕ್ಷವು ಪದೇ ಪದೇ ಸರ್ಕಾರಗಳನ್ನು ಉರುಳಿಸಲು ರಾಜಕೀಯ ಪಕ್ಷಾಂತರಗಳನ್ನು ಒಂದು ಟ್ರಂಪ್ ಕಾರ್ಡ್ ಆಗಿ ಬಳಸುತ್ತಿದೆ. ಅಸೋಸಿಯೇಷನ್ ಫಾರ್ ಡೆಮಾಕ್ರಟಿಕ್ ರಿಫಾರ್ಮ್ಸ್ ವರದಿ ಮಾಡಿದಂತೆ, ಮಾರ್ಚ್ 2021ರಲ್ಲಿ, 182 ಶಾಸಕರು ಬಿಜೆಪಿಗೆ ಪಕ್ಷಾಂತರವಾಗಿದ್ದಾರೆ. ಪತ್ರಕರ್ತೆ ಸುನೇತ್ರಾ ಚೌಧರಿ ಅವರ ಪ್ರಕಾರ, ಮಾರ್ಚ್ 2024ರ ವೇಳೆಗೆ ಆ ಸಂಖ್ಯೆ 444 ಶಾಸಕರಿಗೆ ಏರಿದೆ.
ಕೆಲವು ಸಂದರ್ಭಗಳಲ್ಲಿ, ದೇಶದ ತನಿಖಾ ಸಂಸ್ಥೆಗಳು ತಮ್ಮ ಮೇಲೆ ಕಣ್ಣಿಟ್ಟ ನಂತರ ಪ್ರತಿಸ್ಪರ್ಧಿ ಶಾಸಕರು ಬಿಜೆಪಿಗೆ ಸೇರ್ಪಡೆಯಾಗಿದ್ದಾರೆ. ಇನ್ನೂ ಕೆಲವೆಡೆ ಬಿಜೆಪಿಯು ಪ್ರತಿಸ್ಪರ್ಧಿ ರಾಜಕಾರಣಿಗಳಿಗೆ ನಗದು ಆಮಿಷ ಒಡ್ಡಿದೆ ಎಂಬ ಆರೋಪವಿದೆ. ಇದೇ ವರ್ಷದ ಮಾರ್ಚ್ ತಿಂಗಳಿನಲ್ಲಿ 7 ಆಪ್ ಶಾಸಕರಿಗೆ ಬಿಜೆಪಿ ತಲಾ 25 ಕೋಟಿ ರೂ. ಆಫರ್ ಕೊಟ್ಟಿತ್ತು ಎಂದು ಅರವಿಂದ್ ಕೇಜ್ರಿವಾಲ್ ಅವರು ಹೇಳಿದ್ದಾರೆ. ಏಪ್ರಿಲ್ನಲ್ಲಿ ಕಾಂಗ್ರೆಸ್ ಶಾಸಕರಿಗೆ ಬಿಜೆಪಿ 50 ಕೋಟಿ ರೂ. ಆಫರನ್ನು ಕೊಟ್ಟಿತ್ತು ಎಂದು ಕರ್ನಾಟಕದ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಆರೋಪಿಸಿದ್ದಾರೆ.
ಇದಕ್ಕೆ ಮೊದಲು, ಅಂದರೆ 2022 ರಲ್ಲಿ, ಗೋವಾದ ಎಂಟು ಮಂದಿ ಶಾಸಕರಿಗೆ ಬಿಜೆಪಿಗೆ ಪಕ್ಷಾಂತರಗೊಳ್ಳಲು 40 ರಿಂದ 50 ಕೋಟಿ ರೂಪಾಯಿಗಳಷ್ಟು ಹಣದ ಆಮಿಷವನ್ನು ಒಡ್ಡಿದೆ ಎಂದು ಗೋವಾ ಪ್ರದೇಶ ಕಾಂಗ್ರೆಸ್ ಸಮಿತಿ ಅಧ್ಯಕ್ಷ ಅಮಿತ್ ಪಾಟ್ಕರ್ ಹೇಳಿದ್ದರು. ತೆಲಂಗಾಣದಲ್ಲಿ, ನಾಲ್ವರು ಬಿಆರ್ಎಸ್ ಶಾಸಕರು ಬಿಜೆಪಿಗೆ ಪಕ್ಷಾಂತರಗೊಳ್ಳಲು 50 ರಿಂದ 100 ಕೋಟಿ ರೂ.ಗಳ ಮೊತ್ತವನ್ನು ಆಫರ್ ಮಾಡಲಾಗಿದೆ ಎಂದು ಹೇಳಿದ್ದು, ಈ ಕ್ರಿಮಿನಲ್ ಪ್ರಕರಣವನ್ನು ಸಿಬಿಐ ಅಧಿಕೃತವಾಗಿ ತನಿಖೆ ನಡೆಸುತ್ತಿದೆ.
ಆದಾಗ್ಯೂ, ಈ ಆರೋಪಗಳು ಊಹಾಪೋಹವಾಗಿಯೇ ಉಳಿದಿವೆ. ಇದಕ್ಕೆ ಮುಖ್ಯ ಕಾರಣ, ಈ ಆರೋಪಗಳ ಬಗ್ಗೆ ತನಿಖಾ ಕ್ರಮಗಳನ್ನು ಕೈಗೊಳ್ಳಬೇಕಾದ ತನಿಖಾ ಸಂಸ್ಥೆಗಳು, ಚುನಾವಣಾ ಆಯೋಗ ಅಥವಾ ದೇಶದ ರಾಜಕೀಯ ವಿಶ್ಲೇಷಕರು ಮೌನ ವಹಿಸಿರುವುದು.
ಬಿಜೆಪಿ ತನ್ನ ಪಕ್ಷದ ರಾಜಕೀಯ ಪ್ರತಿಸ್ಪರ್ಧಿಗಳು ಮತ್ತು ವರದಿಗಾರರ ಮೇಲೆ ಗೂಢಾಚಾರಿಕೆ ಮಾಡುತ್ತಿರುವ ಆರೋಪ ನಿನ್ನೆ ಮೊನ್ನೆಯದಲ್ಲ. ದೇಶದಲ್ಲಿ ಅತಿ ಹೆಚ್ಚು ಸದ್ದು ಮಾಡಿದ್ದ, ಪೆಗಾಸಸ್ ಸ್ಪೈವೇರ್ ರಾಜಕೀಯ ತಂತ್ರಗಾರ ಪ್ರಶಾಂತ್ ಕಿಶೋರ್ ಅವರ ಐಫೋನಿನಲ್ಲಿ ಆಕ್ಟಿವೇಟ್ ಆಗಿರುವುದು ಫೋರೆನ್ಸಿಕ್ ಪರೀಕ್ಷೆಗಳಲ್ಲಿ ಕಂಡುಬಂದಿತ್ತು. 2021ರ ಪಶ್ಚಿಮ ಬಂಗಾಳದ ವಿಧಾನಸಭಾ ಚುನಾವಣೆಯ ಸಂದರ್ಭದಲ್ಲಿಯೂ ತೃಣಮೂಲ ಕಾಂಗ್ರೆಸ್ ಪಕ್ಷದ ಹಲವರಿಗೆ ಪೆಗಾಸಸ್ ಸ್ಪೈವೇರ್ ಆಕ್ಟಿವೇಟ್ ಮಾಡಲಾಗಿದೆ.
ಸರ್ಕಾರಿ ಇಲಾಖೆಗಳೇ ಇದನ್ನು ಮಾಡಿದ್ದರೆ ಅದು ಸಾರ್ವಜನಿಕ ನಿಧಿಯ ದುರ್ಬಳಕೆಯಾಗುತ್ತದೆ. ಇನ್ನೊಂದು ಕಡೆ ಬಿಜೆಪಿ ಈ ಕೆಲಸವನ್ನು ಮಾಡಿಸಿದ್ದರೆ, ಪಕ್ಷಕ್ಕೆ ಅಷ್ಟು ದುಡ್ದು ಎಲ್ಲಿಂದ ಬಂತು ಎಂಬ ಪ್ರಶ್ನೆ ಹುಟ್ಟುತ್ತದೆ. ಯಾಕೆಂದರೆ ಪೆಗಾಸಸ್ ನಂತಹ ಸ್ಪೈವೇರ್ ಬಹಳ ದುಬಾರಿಯಾಗಿದೆ. ಪ್ರತಿ ಫೋನ್ಗೂ ಒಂದು ಬಾರಿ ವೈರಸ್ ಹಾಕುವುದಿಕ್ಕೆ 3.7 ಕೋಟಿ ರೂ. ವೆಚ್ಚವಾಗುತ್ತದೆ ಹಾಗೇ 10 ಫೋನ್ಗಳಿಗೆ 4.8 ಕೋಟಿ ಹೆಚ್ಚುವರಿ ದರ ಬೇರೆ.
ಸಂಘಪರಿವಾರದ ಸದಸ್ಯ ಬಿಜೆಪಿ ಮಾತ್ರವಲ್ಲ ಒಂದರ ಮೇಲೊಂದರಂತೆ ಕಟ್ಟಡಗಳನ್ನು ಕಟ್ಟುತ್ತಿರುವುದು. ಆರ್ಎಸ್ಎಸ್ ಕೂಡ ದೆಹಲಿಯ ಹೃದಯಭಾಗದಲ್ಲಿ 12 ಮಹಡಿಗಳ 3.5 ಲಕ್ಷ ಚದರ ಅಡಿ ವಿಸ್ತೀರ್ಣದಲ್ಲಿ ಹೊಚ್ಚ ಹೊಸ ಕಚೇರಿಯನ್ನು ನಿರ್ಮಿಸುತ್ತಿದೆ. ಇತರ ನಗರಗಳಲ್ಲಿಯೂ ಹೊಸ ಕಟ್ಟಡಗಳು ತಲೆ ಎತ್ತುತ್ತಿವೆ.
3. ಬಿಜೆಪಿ ಜನರ ಮುಂದೆ ಇಡುತ್ತಿರುವ ಹಲವಾರು ಲೆಕ್ಕಾಚಾರಗಳು ಗಾಳಿಯಲ್ಲಿ ಗುಂಡು ಹೊಡೆದ ಹಾಗೆ ಇರುತ್ತದೆ. 2014ರಲ್ಲಿ ನರೇಂದ್ರ ಮೋದಿ ಮತ್ತು ಬಿಜೆಪಿ ಪಕ್ಷದ ಅನೇಕರು ರಾಜಕೀಯ ಭ್ರಷ್ಟಾಚಾರವನ್ನು ಕೊನೆಗಾಣಿಸುವುದಾಗಿ ಭರವಸೆ ನೀಡಿ ಅಧಿಕಾರಕ್ಕೆ ಬಂದರು. 2017ರಲ್ಲಿ, ಆ ಭರವಸೆಯನ್ನು ಇನ್ನಷ್ಟು ಹೆಚ್ಚಿಸುವಂತೆ ಬಿಜೆಪಿ ಚುನಾವಣಾ ಬಾಂಡ್ಗಳನ್ನು ಪರಿಚಯಿಸಿತು. ಕಪ್ಪು ಹಣವನ್ನು ಬಿಳಿಯಾಗಿಸುತ್ತೇವೆ ಎಂದು ಹೇಳಿ ಜನರನ್ನು ನಂಬಿಸಿತು.
ಆದರೆ ಕಳೆದ ಎರಡು ತಿಂಗಳಿನಿಂದ ಮೋದಿ ಮತ್ತು ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಇಬ್ಬರೂ ʻಜಟ್ಟಿ ಬಿದ್ದರೂ ಮೀಸೆ ಮಣ್ಣಾಗಲಿಲ್ಲʼ ಎಂಬಂತೆ ವರ್ತಿಸುತ್ತಿದ್ದಾರೆ. ʻಚುನಾವಣಾ ಫಂಡಿಂಗ್ಗಳನ್ನು ಪಾರದರ್ಶಕವಾಗಿಸಲು ಚುನಾವಣಾ ಬಾಂಡ್ನ್ನು ತಂದಿದ್ದೇವೆʼ ಎಂದು ಹೇಳಿದ್ದು, ಈಗ ಅದರ ಬಗ್ಗೆ ಹಲವಾರು ಸಂಶಯಗಳು ತಲೆ ಎತ್ತಿವೆ. ಹಾಗಾದ್ರೆ ಬಿಜೆಪಿ ತನ್ನ ಪಕ್ಷದ ವಾರ್ಷಿಕ ವರದಿಗಳಲ್ಲಿ ಈ ಖರ್ಚು ವೆಚ್ಚಗಳನ್ನೂ ನಮೂದಿಸಿದೆಯೇ?
ಈ ಹಿಂದೆ, ಬಿಜೆಪಿ ತನ್ನ ಕಟ್ಟಡ ನಿರ್ಮಾಣಕ್ಕೆ ಪಕ್ಷದ ಕಾರ್ಯಕರ್ತರ ದೇಣಿಗೆಯಿಂದ ಮತ್ತು ಸ್ವಯಂಪ್ರೇರಿತ ಕೊಡುಗೆಗಳಿಂದ ಹಣವನ್ನು ಸಂಗ್ರಹಿಸುತ್ತಿದೆ ಎಂದು ಪದೇ ಪದೇ ಹೇಳುತ್ತಿದೆ. ಪಕ್ಷದ ವಾರ್ಷಿಕ ವರದಿಗಳಲ್ಲಿ ʻಸ್ವಯಂಪ್ರೇರಿತ ಕೊಡುಗೆಗಳʼ ಅಡಿಯಲ್ಲಿ ಈಗಾಗಲೇ ಇದನ್ನು ಸೇರಿಸಲಾಗಿದೆ. ಹಾಗಾದರೆ ಉಳಿಕೆ ಹಣದ ವಿವರಗಳು ಎಲ್ಲಿ ಹೋಯಿತು?
ದಿ ವೈರ್ ಸಂಸ್ಥೆಯು ಅಗರ್ವಾಲ್ ಮತ್ತು ಬನ್ಸಾಲ್ ಅವರನ್ನು ಈ ಬಗ್ಗೆ ಕೇಳಿದಾಗ…
4. ಅಕ್ರಮ ಹಣದ ಹರಿವುಗಳು ಭಾರತದ ರಾಜಕೀಯ ಪಕ್ಷಗಳ ಹಣಕಾಸಿನ ಪ್ರಮುಖ ಮೂಲವಾಗಿದೆ. 40% ಕಮಿಷನ್ ಬಗ್ಗೆ ದೂರು ನೀಡಿದ ಕರ್ನಾಟಕದ ಗುತ್ತಿಗೆದಾರರ ದೂರಾಗಿರಬಹುದು, ಟೆಂಡರ್ ಪ್ರಕ್ರಿಯೆಯಲ್ಲಿ ನಡೆಯುತ್ತಿರುವ ಸ್ವಜನ ಪಕ್ಷಪಾತ ಅಥವಾ ರಾಜಕೀಯವಾಗಿ ಸಂಪರ್ಕ ಹೊಂದಿರುವ ಖಾಸಗಿ ಸಂಸ್ಥೆಗಳ ಕೈವಾಡವಾಗಿರಬಹುದು, ಮದ್ಯ ಹಾಗೂ ಮರಳು ಮಾಫಿಯಾ, ಸಾಗರೋತ್ತರ ಅಕ್ರಮ ವ್ಯವಹಾರಗಳಾಗಿರಬಹುದು ಇವೆಲ್ಲಾ ಬಿಜೆಪಿಯ ಕತ್ತಿಗೆ ಉರುಳಾಗಿದೆ.
ಇದಕ್ಕೆಲ್ಲಾ ಹಣ ಹೋಗುತ್ತಿರುವುದು ದೇಶದ ಪ್ರಜೆಗಳು ಪಾವತಿಸಿರುವ ತೆರಿಗೆಯಿಂದಲೇ ಅಲ್ವಾ? ರಸ್ತೆಗಳನ್ನು ಕಳಪೆಯಾಗಿ ನಿರ್ಮಿಸಿದಾಗ, ಮೈಲೇಜ್ ಕಡಿಮೆಯಾಗುತ್ತದೆ ಮತ್ತು ಜನರು ಪೆಟ್ರೋಲ್ ಮತ್ತು ಡೀಸೆಲ್ಗೆ ಹೆಚ್ಚು ಪಾವತಿಸುತ್ತಾರೆ. ರಾಜಕೀಯವಾಗಿ ಸಂಪರ್ಕ ಹೊಂದಿದ ಸಂಸ್ಥೆಗಳು ಒಲವು ಪಡೆದಾಗ, ಇತರ ಸಂಸ್ಥೆಗಳ ಹೂಡಿಕೆಯು ಕುಂಠಿತವಾಗುತ್ತದೆ. ದೇಶದಲ್ಲಿ ನಿರುದ್ಯೋಗ ಇನ್ನಷ್ಟು ಹೆಚ್ಚಾಗುತ್ತದೆ. ರಾಜಕಾರಣಿಗಳು ಮರಳು ಮತ್ತು ಮದ್ಯದಂತಹ ವ್ಯವಹಾರಗಳನ್ನು ಸ್ವಾಧೀನಪಡಿಸಿಕೊಂಡಾಗ, ರಾಜ್ಯದ ಆದಾಯವು ಕುಸಿಯುತ್ತದೆ. ಸರ್ಕಾರಿ ಇಲಾಖೆಗಳಿಗೆ ಅಭಿವೃದ್ಧಿಗೆ ಸಿಗುವ ಹಣ ಕಡಿಮೆಯಾದಾಗ – ಆರೋಗ್ಯ ಮತ್ತು ಶಿಕ್ಷಣದ ಮೇಲಿನ ವೆಚ್ಚವು ಹೆಚ್ಚಾಗುತ್ತದೆ. ಸಾಗರೋತ್ತರ ಒಪ್ಪಂದಗಳನ್ನು ಮಾಡುವಾಗ ಪಾವತಿಸಬೇಕಾದ ಹಣ ಗಗನಕ್ಕೇರುತ್ತದೆ. ಅಗತ್ಯ ಖರ್ಚುಗಳಿಗಿಂತ ಅನಗತ್ಯ ಖರ್ಚುಗಳೇ ಹೆಚ್ಚಾಗುತ್ತದೆ.
ಯಾರೂ ಪ್ರಜಾಪ್ರಭುತ್ವದ ಬಗ್ಗೆ ಹಾಗೂ ಅದು ಪೊರೆಯುತ್ತಿರುವ 80 ಕೋಟಿ ಜನಸಂಖ್ಯೆಯ ಬಗ್ಗೆ ಮಾತೇ ಆಡುವುದಿಲ್ಲ. ಒಂದೆಡೆ ಪಕ್ಷಗಳು ಜನರ ದುಡ್ಡು ತಿಂದು ತೇಗುತ್ತಿದೆ, ಇನ್ನೊಂದು ಕಡೆ ಒಪ್ಪೊತ್ತಿನ ಊಟಕ್ಕೂ ಗತಿ ಇಲ್ಲದೇ ಇರುವ ಅದೆಷ್ಟೋ ಮಂದಿ ಈ ದೇಶದಲ್ಲಿದ್ದಾರೆ. ಇದು ಈ ದೇಶದ ವಿಪರ್ಯಾಸವಲ್ಲದೇ ಇನ್ನೇನು ?
ಕೃಪೆ: ದಿ ವೈರ್
ಈ ಇಂಗ್ಲಿಷ್ ಲೇಖನದ ಲಿಂಕ್ 👇
https://m.thewire.in/article/politics/the-rs-60000-crore-question-the-bjp-needs-to-answer-about-its-financials
