ಅಂತಿಮ ಎಸೆತದವರೆಗೂ ಅಭಿಮಾನಿಗಳನ್ನು ತುದಿಗಾಲಲ್ಲಿ ನಿಲ್ಲಿಸಿದ ಪಂದ್ಯದಲ್ಲಿ ಚೆನ್ನೈ ವಿರುದ್ಧ ಪಂಜಾಬ್‌ ಕಿಂಗ್ಸ್, 4 ವಿಕೆಟ್‌ಗಳ ವೀರೋಚಿತ ಜಯ ಸಾಧಿಸಿದೆ.
ಚೆನ್ನೈನ ಚೆಪಾಕ್‌ ಮೈದಾನದಲ್ಲಿ ನಡೆದ ಐಪಿಎಲ್‌ನ 16ನೇ ಆವೃತ್ತಿಯ 41ನೇ ಪಂದ್ಯದ ಫಲಿತಾಂಶಕ್ಕಾಗಿ ಇನ್ನಿಂಗ್ಸ್‌ನ ಕೊನೆಯ ಎಸೆತದವರೆಗೂ ಕಾಯಬೇಕಾಯಿತು.
ಟಾಸ್‌ ಗೆದ್ದು ಮೊದಲು ಬ್ಯಾಟಿಂಗ್‌ ಮಾಡಿದ್ದ ಆತಿಥೇಯ ಚೆನ್ನೈ ಸೂಪರ್‌ ಕಿಂಗ್ಸ್ ಡೆವೋನ್‌ ಕಾನ್ವೆ ಗಳಿಸಿದ ಅಜೇಯ 92 ರನ್‌ಗಳ ನೆರವಿನಿಂದ 4 ವಿಕೆಟ್‌ ನಷ್ಟದಲ್ಲಿ 200 ರನ್‌ ಗಳಿಸಿತ್ತು.
ಚೇಸಿಂಗ್‌ ವೇಳೆ ಪಂಜಾಬ್‌ ಕಿಂಗ್ಸ್ 19 ಓವರ್‌ಗಳಲ್ಲಿ 192 ರನ್‌ಗಳಿಸಿತ್ತು. ಉಳಿದ 6 ಎಸೆತಗಳಲ್ಲಿ 9 ರನ್‌ಗಳಿಸಬೇಕಾದ ಸುಲಭ ಗುರಿ ಪಂಜಾಬ್‌ ಮುಂದಿತ್ತು. ಆದರೆ ಅಂತಿಮ ಓವರ್‌ ಎಸೆದ ಯುವ ವೇಗಿ ಪತಿರಾನ ಮೊದಲ 5 ಎಸೆತಗಳಲ್ಲಿ 6 ರನ್‌ ಮಾತ್ರ ಬಿಟ್ಟು ಕೊಡುವ ಮೂಲಕ ಪಂದ್ಯವನ್ನು ರೋಚಕ ಘಟ್ಟಕ್ಕೆ ಕೊಂಡೊಯ್ದರು.
ಈ ಸುದ್ದಿ ಓದಿದ್ದೀರಾ?: ಐಪಿಎಲ್‌ 2023 | ಕೋಪದಲ್ಲಿ ಕಿರುಚಾಡಿದ ಕೂಲ್ ಕ್ಯಾಪ್ಟನ್‌ ಧೋನಿ!
ಅಂತಿಮ ಎಸೆತದಲ್ಲಿ ಪಂಜಾಬ್‌ ಗೆಲುವಿಗೆ 3 ರನ್‌ಗಳ ಅಗತ್ಯವಿತ್ತು. ಪತಿರಾನ ಎಸೆದ ಶಾರ್ಟ್‌ ಲೆಂತ್‌ ಚೆಂಡನ್ನು ಸ್ಕ್ವಾರ್‌ ಲೆಗ್‌ ಕಡೆಗೆ ಬಾರಿಸುವಲ್ಲಿ ಸ್ಟ್ರೈಕ್‌ನಲ್ಲಿದ್ದ ಸಿಖಂದರ್‌ ರಝಾ ಯಶಸ್ವಿಯಾದರು. ಬೌಂಡರಿ ಲೈನ್‌ ಬಳಿ ರವೀಂದ್ರ ಜಡೇಜಾ ಚೆಂಡನ್ನು ತಡೆದರಾದರೂ ಸಹ, ಈ ನಡುವೆ ರಝಾ-ಶಾರೂಖ್‌ ಖಾನ್‌ ಜೋಡಿ ಮೂರು ರನ್‌ಗಳ ಓಟವನ್ನು ಪೂರ್ತಿಗೊಳಿಸಿ ತಂಡಕ್ಕೆ ಸ್ಮರಣೀಯ ಗೆಲುವು ತಂದಿತ್ತರು.
