ಇಂಗ್ಲಿಷ್‌ ಪ್ರೀಮಿಯರ್ ಲೀಗ್ ಚಾಂಪಿಯನ್‌ ಮ್ಯಾಂಚೆಸ್ಟರ್ ಸಿಟಿ, ಕ್ಲಬ್‌ನ ಇತಿಹಾಸದಲ್ಲೇ ಮೊದಲ ಬಾರಿಗೆ ಚಾಂಪಿಯನ್ಸ್ ಲೀಗ್ ಪ್ರಶಸ್ತಿ ಗೆದ್ದು ಬೀಗಿದೆ.
ಇಸ್ತಾನ್‌ಬುಲ್‌ನ ಅಟಾಟುರ್ಕ್ ಒಲಿಂಪಿಕ್ ಕ್ರೀಡಾಂಗಣದಲ್ಲಿ ನಡೆದ ಯುರೋಪ್‌ ಕ್ಲಬ್‌ ಫುಟ್‌ಬಾಲ್‌ನ ಅತ್ಯುನ್ನತ ಟೂರ್ನಿ ʻ ಯುಇಎಫ್‌ಎ ಚಾಂಪಿಯನ್ಸ್ ಲೀಗ್ʼನ ಫೈನಲ್‌ ಪಂದ್ಯದಲ್ಲಿ ಸಿಟಿ, ಇಟಾಲಿಯನ್‌ ಕ್ಲಬ್‌ ಇಂಟರ್‌ ಮಿಲಾನ್‌ ತಂಡವನ್ನು ಏಕೈಕ ಗೋಲಿನಿಂದ ರೋಚಕವಾಗಿ ಮಣಿಸಿತು.
68ನೇ ನಿಮಿಷದಲ್ಲಿ ರೋಡ್ರಿ ಗಳಿಸಿದ ಗೋಲು, ಮ್ಯಾಂಚೆಸ್ಟರ್ ಸಿಟಿ ತಂಡಕ್ಕೆ ಚೊಚ್ಚಲ ಚಾಂಪಿಯನ್ಸ್ ಲೀಗ್ ಕಿರೀಟ ಮುಡಿಸಿತು. 2020/21ರ ಋತುವಿನಲ್ಲಿ ಫೈನಲ್‌ನ ಪ್ರವೇಶಿಸಿದ್ದ ಸಿಟಿ, ಪ್ರೀಮಿಯರ್ ಲೀಗ್ ಪ್ರತಿಸ್ಪರ್ಧಿ ಚೆಲ್ಸಿಯಾ ವಿರುದ್ಧ 1-0 ಸೋಲು ಕಂಡಿತ್ತು.
ಐತಿಹಾಸಿಕ `ಟ್ರೆಬಲ್‌’ ಸಾಧನೆ!
ಹಾಲಿ ಋತುವುವಿನಲ್ಲಿ ಇಂಗ್ಲಿಷ್‌ ಪ್ರೀಮಿಯರ್ ಲೀಗ್ ಮತ್ತು ಎಫ್‌ಎ ಕಪ್‌ ಪ್ರಶಸ್ತಿ ಗೆದ್ದಿದ್ದ ಮ್ಯಾಂಚೆಸ್ಟರ್ ಸಿಟಿ, ಯುಸಿಎಲ್‌ ಗೆಲ್ಲುವ ಮೂಲಕ ಐತಿಹಾಸಿಕ ಟ್ರೆಬಲ್‌ (ಮೂರು ಪ್ರಮುಖ ಪ್ರಶಸ್ತಿ) ಸಾಧನೆ ಮಾಡಿದೆ. ಇದರೊಂದಿಗೆ ಒಂದೇ ಋತುವಿನಲ್ಲಿ ಮೂರು ಪ್ರತಿಷ್ಠಿತ ಪ್ರಶಸ್ತಿಗಳನ್ನು ಗೆದ್ದ ಮ್ಯಾಂಚೆಸ್ಟರ್ ಯುನೈಟೆಟ್‌ ಕ್ಲಬ್‌ನ ಸಾಧನೆಯನ್ನು ((1999) ಸರಿಗಟ್ಟಿದೆ.
ತಲಾ ಏಳು ಬಾರಿ ಇಂಗ್ಲಿಷ್‌ ಪ್ರೀಮಿಯರ್ ಲೀಗ್ ಮತ್ತು ಎಫ್‌ಎ ಕಪ್‌ ಪ್ರಶಸ್ತಿ ಗೆದ್ದಿರುವ ಮ್ಯಾಂಚೆಸ್ಟರ್ ಸಿಟಿ ತಂಡಕ್ಕೆ ʻಚಾಂಪಿಯನ್ಸ್ ಲೀಗ್ʼ ಪ್ರಶಸ್ತಿ ಇದುವರೆಗೂ ಮರೀಚಿಕೆಯಾಗಿಯೇ ಉಳಿದಿತ್ತು.
ಯುಇಎಫ್‌ಎ ಚಾಂಪಿಯನ್ಸ್ ಲೀಗ್ ಟೂರ್ನಿಯಲ್ಲಿ ಈಓ ಬಾರಿ ಸಿಟಿ, ಅಜೇಯವಾಗಿ ಫೈನಲ್‌ ಪ್ರವೇಶಿಸಿತ್ತು. ಫೈನಲ್‌ಗೂ ಮುನ್ನ ಆಡಿದ್ದ 12 ಪಂದ್ಯಗಳಲ್ಲಿ, 2 ಪಂದ್ಯಗಳಲ್ಲಿ ಗೋಲು ರಹಿತ ಡ್ರಾ ಸೇರಿದಂತೆ ಒಟ್ಟು 5 ಪಂದ್ಯಗಳಲ್ಲಿ ಡ್ರಾ ಫಲಿತಾಂಶ ಕಂಡಿತ್ತು. ಕೇವಲ 5 ಗೋಲುಗಳನ್ನಷ್ಟೇ ಎದುರಾಳಿ ತಂಡಗಳಿಗೆ ಬಿಟ್ಟುಕೊಟ್ಟಿತ್ತು,
