70ರ ದಶಕದ ಕ್ರಿಕೆಟ್ ಪ್ರಿಯರ ಆರಾಧ್ಯ ದೈವ ಜಿಆರ್‌ ವಿಶ್ವನಾಥ್‌ಗೆ 75ರ ಸಂಭ್ರಮ

Date:

ಇಂದು ಭಾರತದ ಕ್ರಿಕೆಟ್ ಆಟಗಾರ ಜಿಆರ್ ವಿಶ್ವನಾಥ್ ಜನ್ಮದಿನ. ಮಧ್ಯಮವರ್ಗದ ಕುಟುಂಬದಿಂದ ಬಂದು ಬಹು ಎತ್ತರಕ್ಕೇರಿದ, ಭಾರೀ ಅಭಿಮಾನಿಗಳನ್ನು ಹೊಂದಿದ್ದ, ಕ್ರಿಕೆಟ್ ಲೋಕದಲ್ಲಿ ಧ್ರುವತಾರೆಯಾಗಿ ಮಿಂಚಿದ ವಿಶ್ವನಾಥ್ ಅಪ್ಪಟ ಕನ್ನಡಿಗ. ಅವರ ಆಟ, ಹೊಡೆತಗಳ ಶೈಲಿ ಮತ್ತು ವ್ಯಕ್ತಿತ್ವ- ಅಸಾಧಾರಣ. 75ರ ಹರೆಯದ ವಿಶ್ವನಾಥ್‌ಗೆ ಶುಭ ಹಾರೈಕೆಗಳು…

ಶಿವಮೊಗ್ಗ ನಿಸರ್ಗದ ಮಡಿಲು ಭದ್ರಾವತಿಯ ಕೈಗಾರಿಕಾ ಪಟ್ಟಣದ ಮಧ್ಯಮವರ್ಗದ ಕುಟುಂಬದಲ್ಲಿ ಫೆ.12 1949ರಲ್ಲಿ ಜನಿಸಿದ 6 ವರ್ಷದ ಪುಟ್ಟ ಹುಡುಗನೊಬ್ಬ ತಂದೆಯ ಕೆಲಸದ ಕಾರಣದಿಂದ 1950ರ ದಶಕದಲ್ಲಿ ಬೆಂಗಳೂರಿಗೆ ಸ್ಥಳಾಂತರಗೊಳ್ಳುತ್ತಾನೆ. ಆಗಷ್ಟೆ ಜನಪ್ರಿಯವಾಗುತ್ತಿದ್ದ ಕ್ರಿಕೆಟ್ ಈ ಹುಡುಗನ ಮನೆಯಲ್ಲೂ ಇಷ್ಟದ ಕ್ರೀಡೆಯಾಗಿತ್ತು. ಈ ಬಾಲಕ ಮತ್ಯಾರು ಅಲ್ಲ ಒಂದು ಕಾಲದಲ್ಲಿ ಕ್ರಿಕೆಟ್‌ಅನ್ನು ಆಳಿದ ಗುಂಡಪ್ಪ ರಂಗನಾಥ್ ವಿಶ್ವನಾಥ್ ಅರ್ಥಾತ್ ಜಿ.ಆರ್. ವಿಶ್ವನಾಥ್.

ಜಿಆರ್‌ವಿ ಅವರಿಗೆ ಸಾಮಾನ್ಯ ಬದುಕು ಕಟ್ಟಿಕೊಳ್ಳಲು ತೊಂದರೆಯಿರಲಿಲ್ಲ. ತಂದೆ ಗುಂಡಪ್ಪ ರಂಗನಾಥ್ ಬೆಂಗಳೂರಿನ ರಾಜ್ಯ ವಿದ್ಯುತ್ ನಿಗಮ ಮಂಡಳಿಯಲ್ಲಿ ಸ್ಟೆನೋಗ್ರಾಫರ್ ಆಗಿದ್ದರು. ಏಳು ಮಕ್ಕಳಲ್ಲಿ ದೊಡ್ಡಣ್ಣ ಜಗನ್ನಾಥ್ ಕೂಡ ಕ್ರಿಕೆಟ್ ಪ್ರತಿಭೆ. ಅಂದಿನ ಕಾಲದಲ್ಲೇ ರಾಜ್ಯ ಕ್ರಿಕೆಟ್‌ನ ಕಿರಿಯರ ತಂಡವನ್ನು ಪ್ರತಿನಿಧಿಸಿದ್ದರು. ಇದು ಕ್ರಿಕೆಟ್‌ನ ಆಸೆ ಹೆಮ್ಮರವಾಗಲು ಕಾರಣವಾಯಿತು. ಈಗ ಈ ಕ್ರಿಕೆಟ್ ಸ್ಟಾರ್ ಆಟಗಾರನಿಗೆ 75ರ ಹರೆಯ.

ಪ್ರಾರಂಭದಲ್ಲಿ ಎಲ್ಲರಂತೆಯೇ ಟೆನಿಸ್ ಬಾಲ್‌ನಲ್ಲಿ ಕ್ರಿಕೆಟ್ ಆಡುತ್ತಿದ್ದರು. ಕಾಲಕ್ರಮೇಣ ಲೆದರ್ ಬಾಲ್‌ನಲ್ಲಿ ಆಡುವುದಕ್ಕೆ ಶುರು ಮಾಡಿಕೊಂಡರು. ಆರಂಭದಲ್ಲಿ ಜಿಆರ್‌ವಿ ಅವರಿಗೆ ಕ್ರಿಕೆಟ್‌ನ ಇಷ್ಟದ ಕ್ರಿಕೆಟಿಗನಾಗಿದ್ದು ಆಸ್ಟ್ರೇಲಿಯಾದ ನೀಲ್ ಹಾರ್ವೆ. ಬೆಂಗಳೂರಿಗೆ ಬಂದ ಸಮಯದಲ್ಲಿ ನೀಲ್‌ ಹಾರ್ವೆ ಸೆಂಟ್ರಲ್ ಕಾಲೇಜು ಮೈದಾನದಲ್ಲಿ ಭಾರತದ ವಿವಿಗಳ ವಿರುದ್ಧ ಆಡಿದ ಆಟ ವಿಶುಗೆ ಹುಚ್ಚು ಹಿಡಿಸಿತ್ತು. ಅಂತಾರಾಷ್ಟ್ರೀಯ ಮಟ್ಟದಲ್ಲಿ ತಮ್ಮ ಪಯಣ ಮುಂದುವರಿಸಲು ಈ ಆಟ ಪ್ರೇರಣೆಯಾಯಿತು.

ಸುದ್ದಿ ನಿರಂತರವಾಗಿ ಉಚಿತವೇ ಆಗಿರುವುದು ಹೇಗೆ ಸಾಧ್ಯ? ಅದಕ್ಕೆ ನಿಮ್ಮ ಬೆಂಬಲವೂ ನಿರಂತರವಾಗಿ ಇದ್ದಾಗ ಮಾತ್ರ ಸಾಧ್ಯ. ಚಂದಾದಾರರಾಗಿ – ಆ ಮೂಲಕ ಸತ್ಯ, ನ್ಯಾಯ, ಪ್ರೀತಿ ಮೌಲ್ಯಗಳನ್ನು ಎಲ್ಲರಿಗೂ ಹರಡಲು ಜೊತೆಯಾಗಿ.

ರಣಜಿ, ಟೆಸ್ಟ್ ಮೊದಲ ಪಂದ್ಯಗಳಲ್ಲೇ ಶತಕ

ಶಾಲಾ ಕಾಲೇಜು ದಿನಗಳ ಕ್ಲಬ್‌ ಪಂದ್ಯಗಳಲ್ಲಿ ಹೆಚ್ಚು ಗಮನಸೆಳೆದ ಕಾರಣ 20ರ ಹರೆಯದಲ್ಲಿಯೇ ಕರ್ನಾಟಕ ರಣಜಿ ತಂಡಕ್ಕೆ ಆಯ್ಕೆಯಾದರು. ಆಂಧ್ರಪ್ರದೇಶದ ವಿರುದ್ಧ ವಿಜಯವಾಡದಲ್ಲಿ ಆಡಿದ ಮೊದಲ ಪಂದ್ಯದಲ್ಲಿಯೇ ದ್ವಿಶತಕ(230) ಬಾರಿಸಿದರು. ಈ ಅದ್ಭುತ ಆಟ ಟೀಂ ಇಂಡಿಯಾ ಆಯ್ಕೆ ಮಂಡಳಿಯ ಗಮನ ಸೆಳೆಯಿತು.

ವಿಶಿ ಅವರ ಮತ್ತೊಂದು ಸಾಧನೆ ಏನೆಂದರೆ ರಣಜಿ ಮೊದಲ ಪಂದ್ಯದಂತೆಯೇ ಆಸ್ಟ್ರೇಲಿಯಾ ವಿರುದ್ಧ ಟೆಸ್ಟ್‌ ಕ್ರಿಕೆಟಿಗೆ ಕಾಲಿಟ್ಟ ಮೊದಲ ಟೆಸ್ಟ್ ಪಂದ್ಯದಲ್ಲಿಯೇ ಶತಕ ಬಾರಿಸಿದ್ದರು. 1969ರಲ್ಲಿ ಕಾನ್ಪುರದಲ್ಲಿ ಆಸ್ಟ್ರೇಲಿಯಾ ವಿರುದ್ಧದ ಟೆಸ್ಟ್‌ ಚೊಚ್ಚಲ ಪಂದ್ಯದ ಎರಡನೇ ಇನ್ನಿಂಗ್ಸ್‌ನಲ್ಲಿ 137 ರನ್ ಗಳಿಸಿ ದಾಖಲೆ ಬರೆದಿದ್ದರು.

ಜಿ ಆರ್ ವಿಶ್ವನಾಥ್
ಜಿ ಆರ್ ವಿಶ್ವನಾಥ್

ಉತ್ತರ ಪ್ರದೇಶದ ಕಾನ್ಪುರದ ಗ್ರೀನ್ ಪಾರ್ಕ್ ಕ್ರೀಡಾಂಗಣದಲ್ಲಿ ನಡೆದ ಮೊದಲ ಪಂದ್ಯದಲ್ಲಿ ಜಿಆರ್‌ವಿ ಶತಕ ದಾಖಲಿಸಿದ್ದರು. 1969ರ ನವೆಂಬರ್ 20ರಂದು ಅವರು ಶತಕ ಹೊಡೆದಿದ್ದರು. ನ15 ರಂದು ಆರಂಭವಾಗಿದ್ದ ಆಸ್ಟ್ರೇಲಿಯಾ ವಿರುದ್ಧದ ಆ ಟೆಸ್ಟ್ ಪಂದ್ಯದ ಮೊದಲ ಇನಿಂಗ್ಸ್‌ನಲ್ಲಿ ಅವರು ಶೂನ್ಯಕ್ಕೆ ಔಟಾಗಿದ್ದರು. ಅದರಿಂದ ತುಂಬಾ ಬೇಸರಗೊಂಡಿದ್ದರು. ಆದರೆ, ಎರಡನೇ ಇನಿಂಗ್ಸ್‌ನಲ್ಲಿ ವಿಶು ಬಾರಿಸಿದ ಶತಕ (137 ರನ್ 354ಎಸೆತ, 25 ಬೌಂಡರಿ) ಭಾರತ ತಂಡವನ್ನು ಸೋಲಿನಿಂದ ಪಾರುಮಾಡಿತ್ತು.

ಈ ಸುದ್ದಿ ಓದಿದ್ದೀರಾ? ಈ ದಿನ ಸಂಪಾದಕೀಯ | ಮಾತು ತಪ್ಪಿದ ಮೋದಿ; ಮತ್ತೆ ಎದ್ದು ನಿಂತ ಅನ್ನದಾತರು

ಅಂದಿನ ಪಂದ್ಯದಲ್ಲಿ ತಾಳ್ಮೆಯಿಂದ ಬೌಲರ್‌ಗಳನ್ನು ಎದುರಿಸಿ ನಿಂತರು. ದಿನದಾಟದ ಅಂತ್ಯಕ್ಕೆ ವಿಶಿ ಅರ್ಧ ಶತಕ ಗಳಿಸಿ ಕ್ರೀಸ್‌ನಲ್ಲಿ ಉಳಿದರು. ಜಿಆರ್‌ವಿ ಜೊತೆ ಏಕನಾಥ್ ಸೋಲ್ಕರ್ ಕೂಡ ಇನ್ನೊಂದು ಬದಿಯಲ್ಲಿ ಬ್ಯಾಟಿಂಗ್‌ ಮಾಡುತ್ತಿದ್ದರು. ಮರುದಿನ ಕಾನ್ಪುರ ತುಂಬ ವಿಶಿ ಆಟದ ಸುದ್ದಿ ಹರಡಿತ್ತು. ಸಾವಿರಾರು ಸಂಖ್ಯೆಯ ಅಭಿಮಾನಿಗಳು ಕ್ರೀಡಾಂಗಣಕ್ಕೆ ಆಗಮಿಸಿ ವಿಶಿ ಶತಕವನ್ನು ಕಣ್ತುಂಬಿಕೊಂಡರು.

ತಂಡದ ಸೋಲು ತಪ್ಪಿಸಿದ ಆಟಗಾರನಿಗೆ ಅಭಿಮಾನಿಗಳು ಜಯಘೋಷ ಕೂಗಿದರು. ಆ್ಯಷ್ಲೆ ಮೆಲೆಟ್ ಎಸೆತದಲ್ಲಿ ಎಲ್‌ಬಿ ಆಗಿ ಔಟಾದಾಗ ಮೈದಾನದಲ್ಲಿದ್ದ ಕ್ರೀಡಾಭಿಮಾನಿಗಳು ಎದ್ದು ನಿಂತು ವಿಶು ಅವರಿಗೆ ಗೌರವ ಸಲ್ಲಿಸಿದರು. ಆ ಪಂದ್ಯವು ಡ್ರಾ ಆಯಿತು. ಗ್ರೀನ್ ಪಾರ್ಕ್ ಮೈದಾನದಲ್ಲಿ ಅಂದು ನೋಡಿದ ವಿಶು ಅವರ ಆಟ ಇಂದು ಹಲವರ ಮನದಲ್ಲಿ ಅಚ್ಚಹಸಿರಾಗಿ ಉಳಿದಿದೆ.

14 ಶತಕ ಗಳಿಸಿದ 13 ರಲ್ಲಿ ಟೀಂ ಇಂಡಿಯಾ ಗೆಲುವು

ಜಿಆರ್‌ವಿ ಅವರು 1969-1983ರ ಅವಧಿಯಲ್ಲಿ, ಹದಿನಾಲ್ಕು ವರ್ಷಗಳ ಕಾಲ ಭಾರತೀಯ ಕ್ರಿಕೆಟ್ ತಂಡದ ಸೂಪರ್ ಸ್ಟಾರ್ ಆಟಗಾರ ಆಗಿದ್ದರು. ಆ ಅವಧಿಯಲ್ಲಿ 91 ಟೆಸ್ಟ್ ಪಂದ್ಯಗಳಲ್ಲಿ ಭಾರತದ ಪರವಾಗಿ ಆಡಿದರು. ಗಳಿಸಿದ ಒಟ್ಟು ರನ್ 6,080. ಇದರಲ್ಲಿ 14 ಶತಕಗಳು ಹಾಗೂ 35 ಅರ್ಧ ಶತಕಗಳನ್ನು ಪೇರಿಸಿದ್ದಾರೆ. ಅದ್ಭುತ ಏನೆಂದರೆ ಅವರು ಶತಕ ಸಿಡಿಸಿದ 14ರಲ್ಲಿ 13 ಟೆಸ್ಟ್ ಪಂದ್ಯಗಳಲ್ಲಿ ಕೂಡ ಭಾರತವೇ ಗೆದ್ದಿತ್ತು. ಅವರ ಅತ್ಯುತ್ತಮ ವೈಯಕ್ತಿಕ ಸ್ಕೋರ್ 222.

ಆಗ ತಾನೆ ಕಾಲಿಟ್ಟಿದ್ದ ಏಕದಿನ ಪಂದ್ಯಗಳಲ್ಲೂ ಜಿಆರ್‌ ವಿಶ್ವನಾಥ್ ಸಾಧನೆ ಮಾಡಿದ್ದಾರೆ. 25 ಪಂದ್ಯಗಳನ್ನು ಆಡಿರುವ ಇವರು 2 ಅರ್ಧ ಶತಕದೊಂದಿಗೆ 439 ರನ್‌ ಗಳಿಸಿದ್ದಾರೆ. ಇವರ ವೈಯಕ್ತಿಕ ಸ್ಕೋರ್ 75 ರನ್‌ ಆಗಿದೆ. ಇವರ ಕ್ರಿಕೆಟ್ ಸಾಧನೆಗೆ ಪದ್ಮಶ್ರೀ, ಅರ್ಜುನ, ಸಿಕೆ ನಾಯ್ಡು ಜೀವನ ಶ್ರೇಷ್ಠ ಸಾಧನೆ, ವಿಸ್ಡಮ್‌ ಇಂಡಿಯಾ ಹಾಲ್‌ ಆಫ್‌ ದಿ ಫೇಮ್ ಮುಂತಾದ ಹಲವು ಪ್ರಶಸ್ತಿಗಳು ದೊರಕಿವೆ.

ಅಭಿಮಾನಿಗಳಿಗೆ, ದೇವರಿಗೆ ಧನ್ಯವಾದ

ತಮ್ಮ 75ನೇ ಹುಟ್ಟುಹಬ್ಬದ ಪ್ರಯುಕ್ತ ಮಾತನಾಡಿರುವ ಜಿಆರ್ ವಿಶ್ವನಾಥ್ “ನಾವು ಯಾವಾಗಲೂ ಸಾಧನೆಯ ಮೈಲಿಗಲ್ಲುಗಳನ್ನು ಆಚರಿಸುತ್ತೇವೆ. ನನ್ನ 75ನೇ ವಯಸ್ಸಿನ ಈ ಸಂದರ್ಭದಲ್ಲಿ ಕ್ರಿಕೆಟ್ ಸಾಧನೆ ಮಾಡಲು ನೆರವಾಗಿದ್ದಕ್ಕೆ ನಾನು ಕೃತಜ್ಞನಾಗಿದ್ದೇನೆ ಮತ್ತು ದೇವರಿಗೆ ಧನ್ಯವಾದ ಹೇಳುತ್ತೇನೆ. ನೀವು 50 ಮತ್ತು ನಂತರ 75 ವಯಸ್ಸನ್ನು ತಲುಪಿದ ನಂತರ, ನೀವು ನೂರು ದಾಟಬೇಕು ಅಂದುಕೊಳ್ಳುತ್ತೀರಿ. ನಾನು ಕೂಡ ಯಾವಾಗಲೂ ಇದೇ ರೀತಿ ಭಾವಿಸುತ್ತೇನೆ. ಇದು ನಿಜವಾಗಿಯೂ ಕೆಲಸ ಮಾಡುವ ಸಮಯವಾಗಿದೆ. ಆ ಶತಕವನ್ನು ಪಡೆಯಲು ನಿಜವಾಗಿಯೂ ಕಷ್ಟ. ಆರೋಗ್ಯ, ಸಮಯ ಎಲ್ಲವೂ ಕೂಡಿ ಬಂದರೆ ಕ್ರಿಕೆಟ್ ಶತಕದಂತೆ ಆಯಸ್ಸು ಕಷ್ಟವೇನಲ್ಲ” ಎಂದು ಹೇಳುತ್ತಾರೆ.

”ತಮ್ಮ ಪೂರ್ವಜರನ್ನು ನೆನಪಿಸಿಕೊಳ್ಳುವ ಜಿಆರ್‌ವಿ, ನಮ್ಮ ಮುತ್ತಜ್ಜನ ಊರು ಗುಬ್ಬಿಯ ಲಕ್ಕೇನಹಳ್ಳಿ. 12ರ ವಯಸ್ಸಿನವರೆಗೂ ಬೇಸಿಗೆ ರಜೆಯನ್ನು ಕಳೆಯುವುದಕ್ಕಾಗಿ ನಾನಲ್ಲಿಗೆ ಹೋಗುತ್ತಿದ್ದೆ. ಅಲ್ಲಿಯೂ ಕೂಡ ನಮ್ಮ ಕುಟುಂಬದೊಂದಿಗೆ ಕ್ರಿಕೆಟ್ ಆಡುತ್ತಿದ್ದೆ. ನನ್ನ ನೆಚ್ಚಿನ ಆಟಗಾರ ಆಸ್ಟ್ರೇಲಿಯಾದ ನೀಲ್ ಹಾರ್ವೆ. ನನ್ನ ಕ್ರಿಕೆಟ್ ಸಾಧನೆಗೆ ನನ್ನ ಅಣ್ಣ ಜಗನ್ನಾಥ್ ಕೂಡ ಹಲವು ಸಹಾಯ ಮಾಡಿದ್ದಾನೆ. ಕುಟುಂಬ ಕೂಡ ಸಹಕರಿಸಿತು. ಕರ್ನಾಟಕ ತಂಡದಲ್ಲಿ ರಣಜಿ ಆಡುವ ಸಂದರ್ಭದಲ್ಲಿ ಜೊತೆಗಾರರಾದ ಇಎಎಸ್ ಪ್ರಸನ್ನ, ವಿ ಸುಬ್ರಮಣ್ಯ ಕೂಡ ನನ್ನನ್ನು ಪ್ರೋತ್ಸಾಹಿಸಿದ್ದಾರೆ. ನಾನು ಭಾರತ ತಂಡಕ್ಕೆ ಸೇರ್ಪಡೆಯಾದಾಗ ಮನ್ಸೂರ್‌ ಅಲಿ ಖಾನ್ ಪಟೌಡಿ ನಾಯಕರಾಗಿದ್ದರು. ಅವರು ಕೂಡ ನನ್ನ ಕ್ರಿಕೆಟ್ ಏಳಿಗೆಯಲ್ಲಿ ಹಲವು ಸಹಾಯ ಮಾಡಿದ್ದಾರೆ” ಎಂದು ವಿಶು 75ನೇ ಹುಟ್ಟುಹಬ್ಬದ ದಿನ ಸ್ಮರಣೆ ಮಾಡಿಕೊಳ್ಳುತ್ತಾರೆ.

ತಂಡದಿಂದ ಕೈ ಬಿಟ್ಟ ಬಗ್ಗೆ ಬೇಸರ

“ನಾನು ಟೆಸ್ಟ್ ಕ್ರಿಕೆಟ್‌ನಿಂದ ನಿವೃತ್ತಿಯಾಗಿಲ್ಲ, ನನ್ನನ್ನು ಕೈಬಿಡಲಾಯಿತು. 1987 ರವರೆಗೆ ನಾನು ರಾಜ್ಯಕ್ಕಾಗಿ ಆಡಿದ್ದೇನೆ. ನಿವೃತ್ತಿಯಾಗಿದ್ದರೆ  ನಾನು ಟೀಂ ಇಂಡಿಯಾ, ರಾಜ್ಯ ತಂಡಗಳ  ಡ್ರೆಸ್ಸಿಂಗ್ ರೂಮ್‌ಗೆ ಇನ್ನೂ ಹೋಗಬಹುದು. ಆದರೆ ಆಟಗಾರನಾಗಿ ಮತ್ತು ಮಾಜಿ ಆಟಗಾರನಾಗಿ ಅಲ್ಲಿಗೆ ಹೋಗುವುದು ವಿಭಿನ್ನವಾಗಿದೆ. ನಾನು ಕರ್ನಾಟಕ ತಂಡ ಹೆಚ್ಚು ಸದೃಢ ತಂಡವಾಗಬೇಕು ಎಂಬ ಕಾರಣಕ್ಕೆ ನಾನು 87ರವರೆಗೂ ರಣಜಿಯಲ್ಲಿ ಆಡುತ್ತಿದ್ದೆ. ಉತ್ತಮವಾಗಿ ಆಟವಾಡುವ ಎಲ್ಲ ತಂಡ ಕೂಡ ನನಗೆ ಇಷ್ಟ.”

ಗವಾಸ್ಕರ್-ವಿಶ್ವನಾಥ್
ಗವಾಸ್ಕರ್-ವಿಶ್ವನಾಥ್

ಅವರ ಸಮಕಾಲೀನ ಸ್ಟಾರ್ ಆಟಗಾರ ಸುನೀಲ್ ಗವಾಸ್ಕರ್ ಮತ್ತು ಜಿಆರ್ ವಿಶ್ವನಾಥ್ ಅವರು 14 ವರ್ಷಗಳ ಕಾಲ ಜೊತೆಗೆ ಇದ್ದವರು. ‘ಸುನೀಲ್ ಗವಾಸ್ಕರ್ ದಾಖಲೆಗಾಗಿ ಆಡುತ್ತಾರೆ, ಜಿಆರ್ ವಿಶ್ವನಾಥ್ ಭಾರತಕ್ಕಾಗಿ ಆಡುತ್ತಾರೆ’ ಎಂಬ ಮಾತು ಅಂದಿನ ದಿನಗಳಲ್ಲಿ ಕೇಳಿ ಬರುತ್ತಿತ್ತು. ಆದರೆ ಎಂದಿಗೂ ಗವಾಸ್ಕರ್ ಅವರನ್ನು ತೆಗಳುವುದನ್ನು ಜಿಆರ್‌ವಿ ಸಹಿಸುತ್ತಿರಲಿಲ್ಲ. ಇಬ್ಬರು ಸಂಬಂಧಿಕರಾದರು. ವಿಶು ಅವರ ಕ್ರಿಕೆಟ್ ಮೋಹ ನಿಜವಾದ ಪ್ರೀತಿಗೆ ತಿರುಗಿದ ಕಾರಣ ಗವಾಸ್ಕರ್ ಅವರ ತಂಗಿ ಕವಿತಾ ಅವರು ವಿಶ್ವನಾಥ್ ಅವರನ್ನು ಕೈ ಹಿಡಿದರು. ದಂಪತಿಗಳಿಗೆ ದೈವಿಕ್ ಎಂಬ ಮಗ ಕೂಡ ಇದ್ದಾನೆ.

ನಿವೃತ್ತಿ ನಂತರ ಜಿಆರ್‌ ಅವರು ಭಾರತೀಯ ಕ್ರಿಕೆಟ್ ತಂಡದ ಮೆಂಟರ್ ಆಗಿ, ಆಯ್ಕೆ ಮಂಡಳಿಯ ಅಧ್ಯಕ್ಷರಾಗಿ, ಭಾರತೀಯ ಕ್ರಿಕೆಟ್ ತಂಡದ ಮ್ಯಾನೇಜರ್ ಸೇವೆ ಸಲ್ಲಿಸಿದರು. ಸದ್ಯ 75ರ ಹರೆಯದಲ್ಲಿಯೂ ವಿಶ್ರಾಂತಿ ತೆಗೆದುಕೊಳ್ಳದೆ ಟೀಂ ಇಂಡಿಯಾದ ವೀಕ್ಷಕ ವಿವರಣೆಕಾರರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ.

+ posts

ಪೋಸ್ಟ್ ಹಂಚಿಕೊಳ್ಳಿ:

LEAVE A REPLY

Please enter your comment!
Please enter your name here

ಪೋಸ್ಟ್ ಹಂಚಿಕೊಳ್ಳಿ:

ಹೆಚ್ಚು ಓದಿಸಿಕೊಂಡ ಲೇಖನಗಳು

ವಿಡಿಯೋ

ಸುದ್ದಿ ನಿರಂತರವಾಗಿ ಉಚಿತವೇ ಆಗಿರುವುದು ಹೇಗೆ ಸಾಧ್ಯ? ಅದಕ್ಕೆ ನಿಮ್ಮ ಬೆಂಬಲವೂ ನಿರಂತರವಾಗಿ ಇದ್ದಾಗ ಮಾತ್ರ ಸಾಧ್ಯ. ಚಂದಾದಾರರಾಗಿ – ಆ ಮೂಲಕ ಸತ್ಯ, ನ್ಯಾಯ, ಪ್ರೀತಿ ಮೌಲ್ಯಗಳನ್ನು ಎಲ್ಲರಿಗೂ ಹರಡಲು ಜೊತೆಯಾಗಿ.
Related

ಇದೇ ರೀತಿಯ ಇನ್ನಷ್ಟು ಲೇಖನಗಳು
Related

4ನೇ ಟೆಸ್ಟ್‌ | ಇಂಗ್ಲೆಂಡ್‌ ಸ್ಪಿನ್‌ ದಾಳಿಗೆ ನಲುಗಿದ ಟೀಮ್ ಇಂಡಿಯಾ; ಯಶಸ್ವಿ ಜೈಸ್ವಾಲ್ ಹೊಸ ದಾಖಲೆ

ರಾಂಚಿಯ ಜೆಎಸ್‌ಸಿಎ ಅಂತಾರಾಷ್ಟ್ರೀಯ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ನಾಲ್ಕನೇ ಟೆಸ್ಟ್‌ನ ಎರಡನೇ ದಿನದಾಟದಲ್ಲಿ...

ನಾಲ್ಕನೇ ಟೆಸ್ಟ್ | ರೂಟ್ ಶತಕ, ಇಂಗ್ಲೆಂಡ್ 302/7; ಸ್ಪಿನ್ನರ್ ಅಶ್ವಿನ್ ಮತ್ತೊಂದು ಮೈಲಿಗಲ್ಲು

ರಾಂಚಿಯ ಜೆಎಸ್‌ಸಿಎ ಅಂತಾರಾಷ್ಟ್ರೀಯ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ನಾಲ್ಕನೇ ಟೆಸ್ಟ್‌ನಲ್ಲಿ ಪ್ರವಾಸಿ ಇಂಗ್ಲೆಂಡ್...

ನಾಲ್ಕನೇ ಟೆಸ್ಟ್ | ಚೊಚ್ಚಲ ಪಂದ್ಯದಲ್ಲೇ ಆಕಾಶ್‌ ದೀಪ್‌ಗೆ 3 ವಿಕೆಟ್: ಇಂಗ್ಲೆಂಡ್‌ನ 5 ವಿಕೆಟ್ ಪತನ

ಭಾರತ - ಇಂಗ್ಲೆಂಡ್ ನಡುವಿನ ನಾಲ್ಕನೇ ಟೆಸ್ಟ್‌ ಪಂದ್ಯ ರಾಂಚಿಯ ಜೆಎಸ್‌ಸಿಎ...