ಮೆಟಾ ಸಂಸ್ಥೆಯ ಜನಪ್ರಿಯ ಅಪ್ಲಿಕೇಶನ್ ವಾಟ್ಸಾಪ್, ಪ್ರತಿ ಬಾರಿಯೂ ಹೊಸ ಅಪ್ಡೇಟ್‌ಗಳೊಂದಿಗೆ ಬಳಕೆದಾರರಿಗೆ ಮತ್ತಷ್ಟು ಹತ್ತಿರವಾಗುತ್ತಿದೆ. ವಾಟ್ಸಾಪ್ ಬಳೆಕದಾರರಲ್ಲಿ ಹೆಚ್ಚಿನವರು ತಮ್ಮ ಕಂಪ್ಯೂಟರ್ ಅಥವಾ ಟ್ಯಾಬ್ಲೆಟ್‌ಗಳಲ್ಲೂ ಸಹ ಮೆಸೇಜಿಂಗ್‌ ಸೇವೆಯನ್ನು ಬಳಸುತ್ತಿದ್ದಾರೆ.
ಮೊಬೈಲ್ ಆ್ಯಪ್‌ನಂತೆ ಇದೀಗ ಡೆಸ್ಕ್‌ಟಾಪ್, ಮ್ಯಾಕ್ ಹಾಗೂ ವೆಬ್‌ಗೂ ಹೊಸ ವಾಟ್ಸಾಪ್ ಆ್ಯಪ್ ಪರಿಚಯಿಸಿದೆ. ಇದುವರಗೂ ಡೆಸ್ಕ್‌ಟಾಪ್‌ನಲ್ಲಿ ವಾಟ್ಸಾಪ್ ಬಳೆಸುವವರಿಗೆ ವೀಡಿಯೊ ಅಥವಾ ಆಡಿಯೋ ಕರೆ ಮಾಡುವ ಅವಕಾಶ ಇರಲಿಲ್ಲ. ಇದೀಗ ಹೊಸ ಅಪ್ಲಿಕೇಶನ್ ಪರಿಚಯಿಸಿರುವ ವಾಟ್ಸಾಪ್, ಗ್ರೂಪ್ ಆಡಿಯೋ ಮತ್ತು ವಿಡಿಯೋ ಕಾಲ್‌ ಮಾಡುವ ಫೀಚರ್‌ ಪರಿಚಯಿಸಿದೆ.
ವಿಂಡೋಸ್ ವಾಟ್ಸಾಪ್‌ನ ಗ್ರೂಪ್ ವೀಡಿಯೊ ಕರೆಗಳಲ್ಲಿ ಎಂಟು ಜನರು ಮತ್ತು ಆಡಿಯೊ ಕರೆಗಳಲ್ಲಿ32 ಜನರು ಏಕಕಾಲದಲ್ಲಿ ಮಾತನಾಡಲು ಸಾಧ್ಯವಾಗಲಿದೆ. ಭವಿಷ್ಯದಲ್ಲಿ ಗ್ರೂಪ್ ಕಾಲ್‌ಗಾಗಿ ಅನುಮತಿಸುವ ಬಳಕೆದಾರರ ಸಂಖ್ಯೆಯನ್ನು ಹೆಚ್ಚಿಸುವುದಾಗಿ ಕಂಪನಿ ತಿಳಿಸಿದೆ. ಮ್ಯಾಕ್ ಡೆಸ್ಕ್‌ಟಾಪ್ ಆವೃತ್ತಿಯು ಇನ್ನೂ ಬೀಟಾ ಪರೀಕ್ಷೆಯಲ್ಲಿದೆ. ವಿಂಡೋಸ್ ವಾಟ್ಸಾಪ್ ಅಪ್ಲಿಕೇಶನ್ ಮೊಬೈಲ್ ಆವೃತ್ತಿಯ ಇಂಟರ್‌ಫೇಸ್‌ನೊಂದಿಗೆ ಬರಲಿದೆ ಎಂದು ಮೆಟಾ ಹೇಳಿದೆ.
ಈ ಕುರಿತು ಇನ್‌ಸ್ಟಾಗ್ರಾಮ್‌ನಲ್ಲಿ ಮಾಹಿತಿ ನೀಡಿರುವ ಮಾರ್ಕ್ ಜುಕರ್‌ಬರ್ಗ್, ಹೊಸ ವಿಂಡೋಸ್ ಆ್ಯಪ್ ಎಂಡ್-ಟು-ಎಂಡ್ ಎನ್‌ಕ್ರಿಪ್ಟ್ ಮಾಡಿದ ಗುಂಪು ಕರೆಯನ್ನು ಸಕ್ರಿಯಗೊಳಿಸುತ್ತದೆ ಎಂದು ತಿಳಿಸಿದ್ದಾರೆ.
