ಬೆಳ್ಳಂದೂರಿನ ಭೋಗನಹಳ್ಳಿಯ ಕೋ-ಲಿವಿಂಗ್‌ ಪಿಜಿಯಲ್ಲಿ ಸ್ನಾನಗೃಹದಲ್ಲಿ ಫೋನ್‌ ಅಡಗಿಸಿಟ್ಟು ಮಹಿಳೆಯರ ಖಾಸಗಿ ದೃಶ್ಯಗಳನ್ನು ಸೆರೆಹಿಡಿಯುತ್ತಿದ್ದ ಆರೋಪ ಕೇಳಿ ಬಂದಿದೆ. ಪಿಜಿಯಲ್ಲಿ ವಾಸಿಸುತ್ತಿದ್ದ ಖಾಸಗಿ ಕಂಪನಿಯ ಮಹಿಳಾ ಉದ್ಯೋಗಿ ಈ ಕುರಿತು ಬೆಳ್ಳಂದೂರು ಠಾಣೆಯಲ್ಲಿ ದೂರು ನೀಡಿದ್ದಾರೆ.
ಎರಡು ತಿಂಗಳಿನಿಂದ ಕೋ-ಲಿವಿಂಗ್‌ ಪಿಜಿಯಲ್ಲಿ ವಾಸಿಸುತ್ತಿರುವ ಮಹಿಳೆ, ಜೂನ್‌ 14 ರ ಸಂಜೆ ಸ್ನಾನಕ್ಕೆ ತೆರಳಿದಾಗ ಸ್ನಾನಗೃಹದ ಕಿಟಕಿಯ ಮೇಲೆ ಬಿಳಿ ಬಣ್ಣದ ಐ ಫೋನ್‌ ಇರುವುದು ಗಮನಿಸಿದ್ದಾರೆ. ತಕ್ಷಣವೇ ಪಿಜಿ ಕೇರ್‌ ಟೇಕರ್‌ ಗಮನಕ್ಕೆ ವಿಷಯ ತರಲಾಗಿ, ದೂರುದಾರೆಯ ಕೋಣೆಯ ಪಕ್ಕದ ಕೋಣೆ ಬಾಗಿಲು ತಟ್ಟಿದಾದ ಪಿಜಿ ಕೇರ್‌ ಟೇಕರ್‌ ಹೊರಬಂದಿದ್ದಾನೆ. ಸಿಕ್ಕಿಬಿದ್ದ ಆರೋಪಿ ಮೊದಲು ಆರೋಪವನ್ನು ತಳ್ಳಿಹಾಕಿದ್ದು, ಗಂಭಿರವಾಗಿ ವಿಚಾರಿಸಿದಾಗ ಫೋನ್‌ ಕಿಟಕಿಯ ಮೇಲಿಟ್ಟಿರುವುದು ತಾನೇ ಎಂದು ಆತ ಒಪ್ಪಿಕೊಂಡಿದ್ದಾನೆ ಎಂದು ದೂರದಾರೆ ಪೊಲೀಸರಿಗೆ ತಿಳಿಸಿದ್ದಾರೆ.
ಆರೋಪಿಯನ್ನು ಬೆಳ್ಳಂದೂರು ಪೊಲೀಸ್‌ ಠಾಣೆಗೆ ವಿಚಾರಣೆಗೆ ಕರೆದೊಯ್ದು, ಫೋನ್‌ ಪರಿಶೀಲಿಸಿದಾಗ ದೂರುದಾರೆ ಮಹಿಳೆಯ ವಿಡಿಯೊ, ಫೋಟೊ ಪತ್ತೆಯಾಗಿರುವುದಿಲ್ಲ. ಆರೋಪಿ ಚಿತ್ರೀಕರಿಸುವ ಮುನ್ನ ಕೃತ್ಯ ಬೆಳಕಿಗೆ ಬಂದಿದೆ ಅಥವಾ ವಿಡಿಯೊ ಡಿಲೀಟ್‌ ಮಾಡಿರುವ ಶಂಕೆ ವ್ಯಕ್ತಪಡಿಸಿರುವ ಪೊಲೀಸರು ಹೆಚ್ಚಿನ ತನಿಖೆಗಾಗಿ ವಿಧಿವಿಜ್ಞಾನ ಪ್ರಯೋಗಾಲಯಕ್ಕೆ (FSI) ಫೋನ್‌ ಹಸ್ತಾಂತರಿಸಿದ್ದಾರೆ ಎಂಬ ಮಾಹಿತಿ ತಿಳಿದು ಬಂದಿದೆ.
