ಯುವಜನರಲ್ಲಿ ರಾಜಕೀಯ ಅರಿವು, ನಾಯಕತ್ವ ಗುಣ ಹಾಗೂ ಸಾಮಾಜಿಕ ಬದ್ಧತೆಯನ್ನು ಉತ್ತೇಜಿಸುವ ಉದ್ದೇಶದಿಂದ ಜಾಗೃತ ಕರ್ನಾಟಕ ಸಂಘಟನೆಯು ಮೈಸೂರಿನಲ್ಲಿ ಭಾಷಣ ಹಾಗೂ ಪ್ರಬಂಧ ಸ್ಪರ್ಧೆಯನ್ನು ಆಯೋಜಿಸಿದ್ದು, ನಗರದ ಎನ್ ಆರ್ ಮೊಹಲ್ಲಾದಲ್ಲಿರುವ ಮೆಸ್ಕೊ(MESCO) ಶಿಕ್ಷಣ ಸಂಸ್ಥೆ ಆವರಣದಲ್ಲಿ ಇದೇ ಏಪ್ರಿಲ್ 20ರಂದು ಕಾರ್ಯಕ್ರಮ ನಡೆಯಲಿದೆ.
ಈ ಸ್ಪರ್ಧೆಯಲ್ಲಿ ಮೈಸೂರು, ಮಂಡ್ಯ, ಚಾಮರಾಜನಗರ, ಹಾಸನ ಮತ್ತು ಕೊಡಗು ಜಿಲ್ಲೆಗಳ ಯುವಜನರು ಭಾಗವಹಿಸಲಿದ್ದಾರೆ. ದೇಶದ ಅಭಿವೃದ್ಧಿಗೆ ರಾಜಕೀಯ ಅಧಿಕಾರ ಪ್ರಮುಖ ಸಾಧನವಾಗಿದ್ದು, ಯುವಜನರು ರಾಜಕೀಯದತ್ತ ಆಸಕ್ತಿ ತೋರಿಸಿ ಸಮಾಜ ಹಾಗೂ ರಾಷ್ಟ್ರದ ಉನ್ನತಿಗೆ ಕೈಜೋಡಿಸುವ ಅಗತ್ಯತೆ ಇದೆ ಎಂದು ಸಂಘಟನೆ ಅಭಿಪ್ರಾಯಪಟ್ಟಿದೆ.
ದೇಶದ ಅಭಿವೃದ್ಧಿಗೆ ರಾಜಕೀಯ ಅಧಿಕಾರ ಬಹು ಮುಖ್ಯವಾದ ಅಸ್ತ್ರ. ಯುವಜನತೆ ರಾಜಕೀಯ ಆಸಕ್ತಿಯತ್ತ ಧಾವಿಸುವುದು ಪ್ರಸ್ತುತ ಕಾಲಘಟ್ಟದ ಅಗತ್ಯತೆ. ವಿದ್ಯಾರ್ಥಿ ಜೀವನದ ದಿಸೆಯಿಂದಲೇ ನಾಯಕತ್ವದ ಗುಣ, ಸಾಮಾಜಿಕ ಹೋರಾಟ, ಸಂಘಟಿತ ಮನೋಭಾವ ಬೆಳೆಸಿಕೊಂಡು ರಾಜಕೀಯ ಅಧಿಕಾರ ಪಡೆಯುವ ಮೂಲಕ ಸಮಾಜದ, ದೇಶದ ಉನ್ನತಿಗೆ ಕೊಡುಗೆ ನೀಡಬೇಕಿದೆ. ಓದು, ಜೀವನದ ಜೊತೆಗೆ ರಾಜಕೀಯದ ಅಗತ್ಯತೆಯ ಅರಿವು, ದೇಶದ ಆಗುಹೋಗುಗಳ ಮೇಲೆ ಯುವಜನರ ಪ್ರಭಾವದ ಮಹತ್ವ ಅರಿತು, ಪ್ರಜಾಪ್ರಭುತ್ವ ವ್ಯವಸ್ಥೆಯಲ್ಲಿ ಸಂವಿಧಾನದ ಆಶಯದಂತೆ ರಾಜಕೀಯವಾಗಿ ಒಗ್ಗಿಸಿಕೊಳ್ಳುವ ಮನೋಸ್ಥೈರ್ಯ ಮೂಡಬೇಕಿದೆ.
ಭಾಷಣ ಸ್ಪರ್ಧೆಯ ವಿಷಯವಾಗಿ ‘ಉತ್ತಮ ವ್ಯಕ್ತಿಗಳು ಯುವಜನರು ರಾಜಕೀಯದಿಂದ ದೂರ ಇರಬೇಕೇ? ಅಥವಾ ರಾಜಕೀಯಕ್ಕೆ ಸೇರಿ ಬದಲಾವಣೆ ತರಬೇಕೇ?’ ಎಂಬ ಪ್ರಶ್ನೆಯನ್ನು ನೀಡಲಾಗಿದೆ. ಪ್ರಬಂಧ ಸ್ಪರ್ಧೆಯ ವಿಷಯವಾಗಿ ‘ಕಾಲೇಜು ಕ್ಯಾಂಪಸ್ಸುಗಳಲ್ಲಿ ವಿದ್ಯಾರ್ಥಿ ಸಂಘದ ಚುನಾವಣೆಗಳು ಸರಿಯೇ? ತಪ್ಪೇ?’ ಎಂಬ ವಿಚಾರವನ್ನು ಆಯ್ಕೆ ಮಾಡಲಾಗಿದೆ.
ಕನ್ನಡ ಹಾಗೂ ಆಂಗ್ಲ ಭಾಷೆಗಳಲ್ಲಿ ಸ್ಪರ್ಧಿಸಲು ಅವಕಾಶವಿದ್ದು, ಭಾಷಣಕ್ಕೆ 6ರಿಂದ 8 ನಿಮಿಷಗಳ ಕಾಲಾವಕಾಶ ನೀಡಲಾಗಿದೆ. ಪ್ರಬಂಧವನ್ನು 1 ಗಂಟೆಯೊಳಗೆ 1000ರಿಂದ 1200 ಪದಗಳ ಮಿತಿಯಲ್ಲಿ ಬರೆಯಬೇಕಿದ್ದು, ಅಗತ್ಯ ಪೆನ್ನು ಹಾಗೂ ಹಾಳೆಗಳನ್ನು ಆಯೋಜಕರೇ ಒದಗಿಸಲಿದ್ದಾರೆ.
ಈ ಸುದ್ದಿ ಓದಿದ್ದೀರಾ? ಬೆಂಗಳೂರು | ಸಮಾನ ಸಮಾಜ ನಿರ್ಮಾಣಕ್ಕೆ ಆರ್ಥಿಕ-ಸಾಮಾಜಿಕ ಶಕ್ತಿ ಅಗತ್ಯ: ಸಿಎಂ ಸಿದ್ದರಾಮಯ್ಯ
ವಿಜೇತರಿಗೆ ಪ್ರಥಮ ಬಹುಮಾನವಾಗಿ ₹10,000, ದ್ವಿತೀಯ ಬಹುಮಾನವಾಗಿ ₹5,000 ಹಾಗೂ ತೃತೀಯ ಬಹುಮಾನವಾಗಿ ₹3,000 ನೀಡಲಾಗುತ್ತದೆ. ಜೊತೆಗೆ ಮೂವರು ಉತ್ತಮ ಸ್ಪರ್ಧಾರ್ಥಿಗಳಿಗೆ ತಲಾ ₹1,000 ಸಮಾಧಾನಕರ ಬಹುಮಾನ ನೀಡಲಾಗುತ್ತದೆ.
ಈ ಸುದ್ದಿ ಓದಿದ್ದೀರಾ? ಮೈಸೂರು | ಇಲವಾಲದಲ್ಲಿ ಅಂಬೇಡ್ಕರ್ ಥೀಮ್ ಪಾರ್ಕ್ ನಿರ್ಮಾಣ: ಸಚಿವ ಡಾ. ಹೆಚ್.ಸಿ. ಮಹದೇವಪ್ಪ
18ರಿಂದ 30 ವರ್ಷ ವಯಸ್ಸಿನ ಯುವಜನರು ಮಾತ್ರ ಸ್ಪರ್ಧೆಯಲ್ಲಿ ಭಾಗವಹಿಸಲು ಅರ್ಹರಾಗಿರುತ್ತಾರೆ.
ಲಿಂಕ್ ಮೂಲಕ ನೋಂದಣಿ ಮಾಡಿಕೊಳ್ಳಿ : https://forms.gle/iMvEratxjVn1sd5E8
ಹೆಚ್ಚಿನ ಮಾಹಿತಿಗಾಗಿ 9844474816, 9844598474 ಹಾಗೂ 9743461424 ಸಂಖ್ಯೆಗಳ ಸಂಪರ್ಕಿಸಬಹುದು ಎಂದು ಪ್ರಕಟಣೆ ತಿಳಿಸಿದೆ.
