ಕಲ್ಪತರು ನಾಡು ತುಮಕೂರಿನ ರೈತರ ಆದಾಯದ ಮೂಲ ಉಂಡೆ ಕೊಬ್ಬರಿ ದಾಖಲೆ ಬೆಲೆ ನಿರ್ಮಿಸಿದೆ. ಆದರೆ ಇಳುವರಿ ಕಡಿಮೆ ಕ್ಷೀಣವಾದರಿಂದ ರೈತರಿಗೆ ನಿರೀಕ್ಷಿತ ಲಾಭ ದೊರೆಯುತ್ತಿಲ್ಲ. ಬೆಲೆ ಕುಸಿತದಿಂದ ಹಲವು ವರ್ಷಗಳಿಂದ ಸೊರಗಿದ್ದ ತೆಂಗು ಬೆಳೆಗಾರರಿಗೆ ಉಂಡೆ ಕೊಬ್ಬರಿ ಬೆಲೆ ಏರಿಕೆ ರೈತರ ಸಂತಸಕ್ಕೆ ಕಾರಣವಾದರೂ, ಅಟ್ಟದಲ್ಲಿ ಕೊಬ್ಬರಿ ಇಲ್ಲದೆ ಇಷ್ಟು ವರ್ಷದ ನಷ್ಟ ತುಂಬಿಸಿಕೊಳ್ಳಲು ಸಾಧ್ಯವಾಗುತ್ತಿಲ್ಲ.
ರೋಗ ಭಾದೆ, ಮಳೆ ಕೊರತೆಯಿಂದ ತೆಂಗು ಇಳುವರಿ ನಿರಂತರವಾಗಿ ಕುಸಿಯುತ್ತಲೇ ಸಾಗುತ್ತಿದೆ. ಉತ್ತಮ ಬೆಲೆ ಬಂದರು, ಇರುವ ಕೊಬ್ಬರಿ ಮಾರಿ ತೋಟ ನಿರ್ವಹಣೆ ಮಾಡಲು ರೈತರು ಹೆಣಗಾಡುತ್ತಿದ್ದಾರೆ. ತೆಂಗಿನ ಮರಗಳ ರಕ್ಷಣೆಗೆ ಪಣತೊಟ್ಟಿದ್ದಾರೆ. ಮಕ್ಕಳಂತೆ ಸಾಕಿ ಸಲುಹಿದ ಮರಗಳು ಕಣ್ಣ ಮುಂದೆ ರೋಗ ಬಾದೆಯಿಂದ ನೆಲಕ್ಕುರುಳುತ್ತಿವೆ.
ರೈತರು ಎಳನೀರು ಮಾರಾಟಕ್ಕೆ ಒತ್ತು ಕೊಡುತ್ತಿರುವುದು ಕೊಬ್ಬರಿ ಆವಕ ಕಡಿಮೆಯಾಗಲು ಕಾರಣ. “ಕಾಯಿಯನ್ನು ಅಟ್ಟಕ್ಕೆ ಹಾಕಿ ವರ್ಷಗಟ್ಟಲೆ ಕಾದು ಕೊಬ್ಬರಿ ಮಾರುವಾಗಲೂ ನಿರೀಕ್ಷಿತ ಬೆಲೆ ಸಿಗುವ ಗ್ಯಾರಂಟಿಯಿಲ್ಲ” ಎನ್ನುತ್ತಾರೆ ರೈತರು.
“ಮಾರುಕಟ್ಟೆಯಲ್ಲಿ ಆವಕ ಸಾಕಷ್ಟು ಪ್ರಮಾಣದಲ್ಲಿ ಕುಸಿತ ಕಂಡಿದೆ. ಕೊಬ್ಬರಿ ಮಂಡಿಗಳಿಗೆ ನಿರೀಕ್ಷಿಸಿದಷ್ಟು ಮಾಲು ಬರುತ್ತಿಲ್ಲ. ಹಾಗಾಗಿ ಈ ಮಟ್ಟಕ್ಕೆ ಬೆಲೆ ಏರಿಕೆಯಾಗಿದೆ” ಎಂದು ವರ್ತಕರು ಹೇಳುತ್ತಿದ್ದಾರೆ.
ಇದನ್ನೂ ಓದಿ>ತುಮಕೂರು | ಎಸ್ಐಆರ್ ತಿರಸ್ಕರಿಸಲು ಒತ್ತಾಯಿಸಿ ಪ್ರಗತಿಪರ ಸಂಘಟನೆಗಳಿಂದ ಪ್ರತಿಭಟನೆ
“ಉಂಡೆ ಕೊಬ್ಬರಿ ಧಾರಣೆ ದಿನದಿಂದ ದಿನಕ್ಕೆ ಜಿಗಿತ ಕಂಡಿದ್ದು, ಸೋಮವಾರ ತಿಪಟೂರು ಎಪಿಎಂಸಿ ಮಾರುಕಟ್ಟೆಯಲ್ಲಿ ಕ್ವಿಂಟಲ್ ₹38 ಸಾವಿರಕ್ಕೆ ಮಾರಾಟವಾಗುವ ಮೂಲಕ ಮತ್ತೊಂದು ದಾಖಲೆ ನಿರ್ಮಿಸಿದೆ. ಏ.9ರಂದು ನಡೆದ ಹರಾಜಿನಲ್ಲಿ ಕ್ವಿಂಟಲ್ ₹36,006ಕ್ಕೆ ಮಾರಾಟವಾಗಿತ್ತು. ಸೋಮವಾರ ಗರಿಷ್ಠ ₹38 ಸಾವಿರ, ಮಾದರಿ ₹36,711, ಕನಿಷ್ಠ ₹32,500ಕ್ಕೆ ಮಾರಾಟವಾಗಿದೆ. ತಿಪಟೂರು ಮಾರುಕಟ್ಟೆಗೆ ಕೇವಲ 1,705 ಕ್ವಿಂಟಲ್ (ಚೀಲ 3,989) ಕೊಬ್ಬರಿ ಆವಕವಾಗಿದೆ” ಎಂದು ರೈತ ಸಿ ಕೆ ಪ್ರಕಾಶ್ ಮಾಹಿತಿ ನೀಡಿದರು.
ಒಟ್ಟಾರೆ ತೆಂಗು ಬೆಳೆ ಉಳಿವಿಗೆ ಸರ್ಕಾರ ಹೆಚ್ಚಿನ ಉತ್ತೇಜನ ನೀಡಬೇಕು. ರೈತರು ಮಕ್ಕಳಂತೆ ಸಾಕಿರುವ ಮರಗಳನ್ನು ಉಳಿಸಲು ಸರ್ಕಾರ ನೆರವಾಗಬೇಕು. ಉಂಡೆ ಕೊಬ್ಬರಿಗೆ ಬೆಲೆ ಹೆಚ್ಚಾದರೆ ಸಾಲದು, ಇಳುವರಿಯೂ ಹೆಚ್ಚಾಗಲು ಕ್ರಮಕೈಗೊಳ್ಳುವ ಅನಿವಾರ್ಯವಿದೆ.
