ಅಹಮದಾಬಾದ್-ಮುಂಬೈ ಹೈ-ಸ್ಪೀಡ್ ರೈಲು ಕಾರಿಡಾರ್ (MAHSR) ಯೋಜನೆಗೆ 2026ರ ಮಾರ್ಚ್ವರೆಗೆ ನ್ಯಾಷನಲ್ ಹೈಸ್ಪೀಡ್ ರೈಲ್ ಕಾರ್ಪೊರೇಷನ್ ಲಿಮಿಟೆಡ್ (ಎನ್ಎಚ್ಎಸ್ಆರ್ಸಿಎಲ್) ₹92,761 ಕೋಟಿ ವೆಚ್ಚ ಮಾಡಿದೆ. ಆದರೆ, ಈ ಮಹತ್ವಾಕಾಂಕ್ಷೆಯ ಯೋಜನೆಯ ಒಟ್ಟು ವೆಚ್ಚವು ಇದೀಗ ಬಹುತೇಕ ದುಪ್ಪಟ್ಟಾಗಿದೆ ಎಂದು ಮಾಹಿತಿ ಹಕ್ಕು (ಆರ್ಟಿಐ) ಕಾಯ್ದೆಯಡಿ ಕೇಳಲಾದ ಪ್ರಶ್ನೆಗೆ ನೀಡಲಾದ ಉತ್ತರವೊಂದರಲ್ಲಿ ಬಹಿರಂಗವಾಗಿದೆ.
ಜನಪ್ರಿಯವಾಗಿ ‘ಬುಲೆಟ್ ರೈಲು’ ಯೋಜನೆ ಎಂದು ಕರೆಯಲ್ಪಡುವ ಈ ಯೋಜನೆಯ ಪರಿಷ್ಕೃತ ಅಂದಾಜು ವೆಚ್ಚ ಇದೀಗ ₹2,02,797 ಕೋಟಿಗೆ ಏರಿಕೆಯಾಗಿದೆ. ಇದು ಆರಂಭಿಕ ಅಂದಾಜು ವೆಚ್ಚವಾದ ₹1,08,000 ಕೋಟಿಗಿಂತ ಬಹುತೇಕ ದುಪ್ಪಟ್ಟಾಗಿದೆ. 508 ಕಿ.ಮೀ ಉದ್ದದ ಈ ಕಾರಿಡಾರ್ ಮಹಾರಾಷ್ಟ್ರ, ಗುಜರಾತ್ ಹಾಗೂ ದಾದ್ರಾ ಮತ್ತು ನಗರ ಹವೇಲಿ ಕೇಂದ್ರಾಡಳಿತ ಪ್ರದೇಶದ ಮೂಲಕ ಹಾದುಹೋಗುತ್ತದೆ. ಭೂಸ್ವಾಧೀನಕ್ಕೆ ಪರಿಹಾರ ವಿತರಣೆ ಸೇರಿದಂತೆ ವಿವಿಧ ಸಮಸ್ಯೆಗಳಿಂದಾಗಿ ಈ ಯೋಜನೆಯು ಗಣನೀಯವಾಗಿ ವಿಳಂಬವಾಗಿದೆ.
ಆರ್ಟಿಐ ಅರ್ಜಿಗೆ ಉತ್ತರಿಸಿರುವ ಎನ್ಎಚ್ಎಸ್ಆರ್ಸಿಎಲ್, ಯೋಜನೆಯನ್ನು ಮೂಲತಃ 2023ರ ವೇಳೆಗೆ ಪೂರ್ಣಗೊಳಿಸುವ ಗುರಿ ಹೊಂದಲಾಗಿತ್ತು ಎಂದು ತಿಳಿಸಿದೆ. ಯೋಜನೆಯು ಪೂರ್ಣಗೊಳ್ಳುವ ತಾತ್ಕಾಲಿಕ ಕಾಲಮಿತಿಯ ಬಗ್ಗೆ ಕೇಳಲಾದ ಪ್ರಶ್ನೆಗೆ ಉತ್ತರಿಸಿರುವ ಸಂಸ್ಥೆಯು, “ಎಲ್ಲಾ ಗುತ್ತಿಗೆ ಪ್ಯಾಕೇಜ್ಗಳನ್ನು ಹಂಚಿಕೆ ಮಾಡಿದ ನಂತರವಷ್ಟೇ ಯೋಜನೆ ಪೂರ್ಣಗೊಳ್ಳುವ ನಿಖರ ಸಮಯವನ್ನು ನಿರ್ಧರಿಸಬಹುದು,” ಎಂದು ಹೇಳಿದೆ.
ಜಪಾನ್ನ ಟ್ರ್ಯಾಕ್ ತಂತ್ರಜ್ಞಾನ, ಜಪಾನೇತರ ಸಿಗ್ನಲಿಂಗ್ ವ್ಯವಸ್ಥೆ ಮತ್ತು ಭಾರತದಲ್ಲಿ ನಿರ್ಮಿಸಲಾದ ರೈಲುಗಳ ಸಂಯೋಜನೆಯ ಪ್ರಸ್ತಾವನೆಯು ಯೋಜನೆಯ ಮೂಲ ವಿನ್ಯಾಸದ ಭಾಗವಾಗಿತ್ತೇ ಎಂಬ ಪ್ರಶ್ನೆಗೆ ಸಂಸ್ಥೆಯು ಉತ್ತರಿಸಿದೆ. “ಆರಂಭದಲ್ಲಿ ಜಪಾನ್ನ ‘ಶಿಂಕನ್ಸೆನ್ ರೋಲಿಂಗ್ ಸ್ಟಾಕ್’ ಬಳಸಿ ಕಾರ್ಯಾಚರಣೆ ಪ್ರಾರಂಭಿಸಲು ಯೋಜಿಸಲಾಗಿತ್ತು. ಆದರೆ, ಈಗ ಸ್ವದೇಶಿ ನಿರ್ಮಿತ ರೈಲುಗಳ ಮೂಲಕ ಕಾರ್ಯಾಚರಣೆ ಆರಂಭಿಸಲು ನಿರ್ಧರಿಸಲಾಗಿದೆ,” ಎಂದು ಅದು ಸ್ಪಷ್ಟಪಡಿಸಿದೆ.
ಸಿಗ್ನಲಿಂಗ್ ವ್ಯವಸ್ಥೆಗಳ ಖರೀದಿಗೆ ಸಂಬಂಧಿಸಿದಂತೆ ಭಾರತ ಮತ್ತು ಜಪಾನ್ ಸರ್ಕಾರಗಳ ನಡುವೆ ಭಿನ್ನಾಭಿಪ್ರಾಯಗಳಿವೆ ಎಂಬ ವರದಿಗಳ ಹಿನ್ನೆಲೆಯಲ್ಲಿ, ಉಭಯ ದೇಶಗಳ ನಡುವಿನ ಪತ್ರವ್ಯವಹಾರಗಳ ಪ್ರತಿಗಳನ್ನು ಒದಗಿಸುವಂತೆ ಕೇಳಲಾಗಿತ್ತು. ಆದರೆ, “ಈ ದಾಖಲೆಗಳನ್ನು ಹಂಚಿಕೊಳ್ಳುವುದು ಉಭಯ ಸರ್ಕಾರಗಳ ನಡುವಿನ ಗೌಪ್ಯತಾ ಒಪ್ಪಂದದ (ನಾನ್-ಡಿಸ್ಕ್ಲೋಸರ್ ಅಗ್ರಿಮೆಂಟ್) ಅಡಿಯಲ್ಲಿ ನಿರ್ಬಂಧಿತವಾಗಿರುವುದರಿಂದ, ಮಾಹಿತಿ ನೀಡಲು ಸಾಧ್ಯವಿಲ್ಲ,” ಎಂದು ತಿಳಿಸಿ ಮನವಿಯನ್ನು ನಿರಾಕರಿಸಲಾಗಿದೆ.
ರೈಲುಗಳ ವಿತರಣಾ ವೇಳಾಪಟ್ಟಿ ಮತ್ತು ಅವುಗಳ ಪರಿಷ್ಕೃತ ಸಮಯದ ಕುರಿತ ಪ್ರಶ್ನೆಗೆ ಉತ್ತರಿಸಿರುವ ಎನ್ಎಚ್ಎಸ್ಆರ್ಸಿಎಲ್, “ಬಿಇಎಂಎಲ್ ಲಿಮಿಟೆಡ್ನಿಂದ (BEML Ltd) ಮೊದಲ ಸ್ವದೇಶಿ ನಿರ್ಮಿತ ರೈಲು 2027ರ ಫೆಬ್ರವರಿಯಲ್ಲಿ ರವಾನೆಯಾಗುವ ನಿರೀಕ್ಷೆಯಿದೆ. ತದನಂತರ ಇತರ ರೈಲುಗಳು ಬರಲಿವೆ,” ಎಂದು ತಿಳಿಸಿದೆ.
ಭಾರತದಲ್ಲಿ ತಯಾರಿಸಿದ ರೈಲುಗಳ ಬಳಕೆಯನ್ನು ಜಪಾನ್ ಸರ್ಕಾರ ಅನುಮೋದಿಸಿದೆಯೇ ಅಥವಾ ಆಕ್ಷೇಪಿಸಿದೆಯೇ ಎಂಬ ಬಗ್ಗೆ ದಾಖಲೆಗಳನ್ನು ಒದಗಿಸಲೂ ಸಂಸ್ಥೆ ನಿರಾಕರಿಸಿದೆ. ಮಾಹಿತಿ ಹಕ್ಕು ಕಾಯ್ದೆಯ ಸೆಕ್ಷನ್ 9 (1) (ಎಫ್) ಪ್ರಕಾರ ಇಂತಹ ದಾಖಲೆಗಳನ್ನು ಒದಗಿಸಲು ಸಾಧ್ಯವಿಲ್ಲ ಎಂದು ಅದು ಹೇಳಿದೆ. ಈ ನಿಯಮವು ವಿದೇಶಿ ಸರ್ಕಾರದಿಂದ ಗೌಪ್ಯವಾಗಿ ಸ್ವೀಕರಿಸಲಾದ ಮಾಹಿತಿಯನ್ನು ಬಹಿರಂಗಪಡಿಸುವುದರಿಂದ ಸರ್ಕಾರಕ್ಕೆ ವಿನಾಯಿತಿ ನೀಡುತ್ತದೆ.



