ಮಣಿಪುರದ ಚುರಾಚಂದ್‌ಪುರ ಜಿಲ್ಲೆಯಲ್ಲಿ ಭಾರತೀಯ ಸೇನೆ ಮತ್ತು ಅಸ್ಸಾಂ ರೈಫಲ್ಸ್ ಪಡೆಗಳು ನಡೆಸಿದ ಜಂಟಿ ಕಾರ್ಯಾಚರಣೆಯಲ್ಲಿ UKNA ಸಂಘಟನೆಯ ಇಬ್ಬರು ಕೆಡರ್‌ಗಳು ಹತರಾಗಿದ್ದು, ಇಬ್ಬರು ತೀವ್ರವಾಗಿ ಗಾಯಗೊಂಡಿದ್ದಾರೆ.
ನಿಖರವಾದ ಗುಪ್ತಚರ ಮಾಹಿತಿಯ ಆಧಾರದ ಮೇಲೆ ಸೇನೆ ಹಾಗೂ ಅಸ್ಸಾಂ ರೈಫಲ್ಸ್ ಸಿಬ್ಬಂದಿ ಹೆಂಗ್ಲೆಪ್ ಸಬ್-ಡಿವಿಷನ್‌ನ ಫೈಬಾಂಗ್ ಗ್ರಾಮದ ಅರಣ್ಯ ಪ್ರದೇಶದಲ್ಲಿದ್ದ ‘ಯುನೈಟೆಡ್ ಕುಕಿ ನ್ಯಾಷನಲ್ ಆರ್ಮಿ’ (UKNA) ಯಿನ್ ಸಶಸ್ತ್ರ ಪಡೆಗಳ ಶಿಬಿರದ ಮೇಲೆ ದಾಳಿ ನಡೆಸಿದ್ದರು.
ಇದನ್ನೂ ಓದಿ: ಅಶಾಂತಿಯ ಕಣಿವೆಯಲ್ಲಿ ನಿಲ್ಲದ ಸಂಘರ್ಷ: ಮಣಿಪುರದ ಪ್ರಜಾಪ್ರಭುತ್ವಕ್ಕೆ ಸವಾಲಾದ ಜನಾಂಗೀಯ ಸಮರ
ಭದ್ರತಾ ಪಡೆಗಳು ಸ್ಥಳವನ್ನು ತಲುಪುತ್ತಿದ್ದಂತೆ ಸಶಸ್ತ್ರ ಪಡೆಗಳು ಸ್ವಯಂಚಾಲಿತ ಶಸ್ತ್ರಾಸ್ತ್ರಗಳಿಂದ ಗುಂಡಿನ ದಾಳಿ ನಡೆಸಿದರು. ತಕ್ಷಣವೇ ಕಾರ್ಯಪ್ರವೃತ್ತರಾದ ಯೋಧರು ನಡೆಸಿದ ಮರುದಾಳಿಯಲ್ಲಿ ಯುಕೆಎನ್‌ಎ ಸಂಘಟನೆಯ ಇಬ್ಬರು ಮೃತಪಟ್ಟು, ಇಬ್ಬರು ಗಾಯಗೊಂಡರು. ದಾಳಿಯ ನಂತರ ಉಳಿದವರು ಕಾಡಿನೊಳಗೆ ಓಡಿಹೋಗಿದ್ದಾರೆ ಎಂದು ವರದಿಯಾಗಿದೆ.
ಕಾರ್ಯಾಚರಣೆ ಮುಗಿದ ಬಳಿಕ ಘಟನಾ ಸ್ಥಳದಿಂದ 2 ಎಂಎ (MA) ರೈಫಲ್‌ಗಳು, 1 ಎಕೆ-56 (AK-56) ರೈಫಲ್, 1 ಲಾಥೋಡ್ ಗನ್ (40mm Lathode launcher), ಗ್ರೆನೇಡ್‌ಗಳು, ನೂರಾರು ಸುತ್ತು ಜೀವಂತ ಗುಂಡುಗಳು ಹಾಗೂ ಸೇನಾ ತರಹದ ಸಮವಸ್ತ್ರಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಈ ಭಾಗದಲ್ಲಿ ಓಡಿಹೋದ ಉಗ್ರರಿಗಾಗಿ ಶೋಧ ಕಾರ್ಯ ತೀವ್ರಗೊಳಿಸಲಾಗಿದೆ.
