ಅಲ್ಲಮ ತನ್ನ ವಚನಗಳಲ್ಲಿ ಬಳಸಿರುವ ವಿಶಿಷ್ಟವಾದ 101 ಪದಗಳನ್ನು ಗುರುತಿಸಿ, ಪ್ರತಿ ಪದದ ಬಗ್ಗೆ ಈ ಕೆಳಗಿನ ಮಾದರಿಯಲ್ಲಿ ವಿವರಿಸಲಾಗುವುದು. ಈದಿನ ಓದುಗರಿಗಾಗಿ ಅಲ್ಲಮನ ಅರಿವು…
ನನ್ನಿಯ ನುಡಿ
ಅನ್ನವನಿಕ್ಕಿ ನನ್ನಿಯ ನುಡಿದು
ಅರವಟ್ಟಿಗೆಯನಿಕ್ಕಿ ಕೆರೆಯ ಕಟ್ಟಿಸಿದಡೆ
ಮರಣದಿಂದ ಮೇಲೆ ಸ್ವರ್ಗ ಉಂಟಲ್ಲದೆ
ಶಿವನ ನಿಜವು ಸಾಧ್ಯವಾಗದು. ಗುಹೇಶ್ವರನನರಿದ ಶರಣಂಗೆ
ಆವ ಫಲವೂ ಇಲ್ಲ
ಪದಾರ್ಥ:
ನನ್ನಿ = ಪ್ರೀತಿ, ಸತ್ಯ
ಅರವಟ್ಟಿಗೆ = ನೀರು ಪಾನಕ ಕೊಡುವ ಸ್ಥಳ
ವಚನಾರ್ಥ:
ಮರಣದ ನಂತರ ನಮಗೆ ಸ್ವರ್ಗ ಪ್ರಾಪ್ತಿ ಆಗಬೇಕು ಎಂಬುದು ಎಲ್ಲರ ಆಸೆ. ಮರಣದ ನಂತರ ದೊರೆಯುವ ಇಂತಹ ಸೌಲಭ್ಯಕ್ಕಾಗಿ ತಮ್ಮ ಜೀವಿತಾವಧಿಯಲ್ಲಿ ಸಾಧ್ಯವಾದಷ್ಟು ಧರ್ಮಕಾರ್ಯಗಳನ್ನು ಮಾಡುವಲ್ಲಿ ನಿರತರಾಗಿರುತ್ತಾರೆ. ಅನ್ನದಾನ ಮಾಡುತ್ತಾರೆ. ಪ್ರೀತಿ ಮಾತುಗಳನ್ನು ಆಡುತ್ತ ಸತ್ಯ ಮಾರ್ಗದಲ್ಲಿ ನಡೆದುಕೊಳ್ಳುತ್ತಾರೆ. ದೇವಾಲಯ ಮತ್ತಿತರ ಸಾರ್ವಜನಿಕ ಸ್ಥಳಗಳಲ್ಲಿ ಅರವಟ್ಟಿಗೆಯನ್ನು ಇಟ್ಟು ನೀರು, ಮಜ್ಜಿಗೆ, ಪಾನಕಗಳನ್ನು ಭಕ್ತರಿಗೆ ನೀಡುತ್ತಾರೆ. ಕೆರೆ ಕಟ್ಟೆಗಳನ್ನು ಕಟ್ಟಿಸಿ ಪುಣ್ಯ ಕಟ್ಟಿಕೊಳ್ಳುತ್ತಾರೆ. ಇವೆಲ್ಲಾ ಮಾಡುವುದು ಮರಣದಿಂದ ಮೇಲೆ ಸ್ವರ್ಗ ಉಂಟು. ಅಲ್ಲಿ ಸೇರಿಕೊಳ್ಳಬೇಕು ಎಂಬ ಆಸೆಯಿಂದ. ಅಲ್ಲಮ ಇದನ್ನು ಒಪ್ಪುವುದಿಲ್ಲ. ಅಲ್ಲಮ ಹೇಳುವಂತೆ ಸ್ವರ್ಗಲೋಕ ಮರ್ಥ್ಯ ಲೋಕಗಳನ್ನು ಜೀವಿತಾವಧಿಯಲ್ಲಿ ಇಲ್ಲಿಯೇ ಕಾಣಬೇಕು. ಶಿವನ ನಿಜವನ್ನು ಅರಿಯಬೇಕು. ಅಂತಹ ಅರಿವು ಫಲವಿಲ್ಲದ ಫಲ. ಮರಣಾನಂತರ ನಾನೇನಾಗುತ್ತೇನೆ ಎಂಬುದರ ಬಗ್ಗೆ ಚಿಂತಿಸದೆ ಬದುಕಿರುವಾಗ ಸುಂದರ ಜೀವನ ಸಾಗಿಸಬೇಕು. ಇದು ಕಠೋಪನಿಷತ್ ಸಂದೇಶ. ಇದೇ ಅಲ್ಲಮನ ವಚನದ ಆಶಯ.
ಪದಪ್ರಯೋಗಾರ್ಥ:
ನನ್ನಿಯ ನುಡಿ. ನನ್ನಿ ಅಂದರೆ ಪ್ರೀತಿ. ನನ್ನಿಯ ನುಡಿ ಅಂದರೆ ಪ್ರೀತಿಯ ಮಾತುಗಳು. ನನ್ನಿಯ ನುಡಿಗಳಿಗೆ ಶರಣ ಸಾಹಿತ್ಯದಲ್ಲಿ ವಿಶೇಷ ಸ್ಥಾನವಿದೆ. ಬಸವಣ್ಣನ ವಚನದಲ್ಲಿ ನನ್ನಿಯ ನುಡಿಗಳು ಹೇಗಿರಬೇಕು ಎಂಬ ಚಿತ್ರಣವೇ ಇದೆ. “ಕಂಡ ಭಕ್ತರಿಗೆ ಕೈಮುಗಿವಾತನೇ ಭಕ್ತ; ಮೃದುವಚನವೇ ಸಕಲ ಜಪಂಗಳಯ್ಯಾ, ಮೃದುವಚನವೇ ಸಕಲ ತಪಂಗಳಯ್ಯಾ, ಸದುವಿನಯವೇ ಸದಾಶಿವ ನೊಲುಮೆಯಯ್ಯಾ” ನನ್ನಿಯ ನುಡಿ ಅಲ್ಲಮ ಹುಟ್ಟು ಹಾಕಿದ ಅನನ್ಯ ಪದ. ಅಲ್ಲಮನ ನಂತರ 16ನೇ ಶತಮಾನದಲ್ಲಿ ಬಂದ ಸರ್ವಜ್ಞನು ಅಲ್ಲಮ ಹೇಳಿದ ಅನ್ನವನಿಕ್ಕಿ ನನ್ನಿಯ ನುಡಿದು ಎಂಬ ಪದಗಳನ್ನೇ ಆಧರಿಸಿ ತನ್ನ ತ್ರಿಪದಿಯನ್ನು ರಚಿಸಿದ್ದು ಗಮನ ಸೆಳೆಯುತ್ತದೆ. “ಅನ್ನವನು ಇಕ್ಕುವುದು ನನ್ನಿಯನು ನುಡಿಯುವುದು ತನ್ನಂತೆ ಪರರ ಬಗೆದಡೆ ಕೈಲಾಸ ಬಿನ್ನಣವಕ್ಕು ಸರ್ವಜ್ಞ” ಅಲ್ಲಮ ಹೇಳಿದ ಶಿವನ ನಿಜವು ಸಾಧ್ಯವಾಗುವುದು ಮತ್ತು ಸರ್ವಜ್ಞ ಹೇಳಿದ ಕೈಲಾಸ ಬಿನ್ನಣವಕ್ಕು ಎಂಬ ಎರಡೂ ಅಭಿವ್ಯಕ್ತಿಗಳ ಆಂತರ್ಯ ಒಂದೇ. ಹಾಗಾಗಿ ಅಲ್ಲಮನ ವಚನಗಳು ಇಂದಿಗೂ ಮತ್ತು ಎಂದೆಂದಿಗೂ ನಮಗೆ ನನ್ನಿಯ ನುಡಿಗಳು.
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಒಡಲು
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಮಾಯದ ಮಂಜು
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ದಳದುಳಿ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಬಯಲು
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ನಷ್ಟಸಂತಾನ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಅಗ್ನಿಸ್ತಂಭದ ರಕ್ಷೆ
ಹರಿಹರ ಶಿವಕುಮಾರ್
ಲೇಖಕ, ವೃತ್ತಿಯಿಂದ ಚಾರ್ಟರ್ಡ್ ಅಕೌಂಟೆಂಟ್. ಲೆಕ್ಕಪರಿಶೋಧನೆ ಮತ್ತು ತೆರಿಗೆ ವಿಚಾರಗಳಲ್ಲಿ ಪರಿಣತಿ. ಕನ್ನಡದಲ್ಲಿ ಕಂಪ್ಯೂಟರ್ ಬಳಕೆ ಇವರ ಹವ್ಯಾಸ. ಕನ್ನಡ ಭಾಷೆ ಮತ್ತು ಸಾಹಿತ್ಯದಲ್ಲಿ ಆಸಕ್ತರು. ಶಿವಮೊಗ್ಗ ಜಿಲ್ಲೆಯವರು, ಸದ್ಯ ಬೆಂಗಳೂರಿನಲ್ಲಿ ನೆಲೆ.
