- ರಿಶ್ರಾದಲ್ಲಿ ರಾಮ ನವಮಿ ಹೊಸ ಸಂಘರ್ಷ
- ಪ್ರದೇಶದಲ್ಲಿ ರೈಲು ಸೇವೆಯಲ್ಲಿ ವ್ಯತ್ಯಯ
ಪಶ್ಚಿಮ ಬಂಗಾಳದ ಮತ್ತೆ ರಾಮ ನವಮಿ ಸಂಘರ್ಷ ಭುಗಿಲೆದ್ದಿದೆ. ರಾಜ್ಯದ ಹೂಗ್ಲಿ ಜಿಲ್ಲೆಯ ರಿಶ್ರಾ ಪ್ರದೇಶದಲ್ಲಿ ಸೋಮವಾರ (ಏಪ್ರಿಲ್ 3) ತಡರಾತ್ರಿ ಕೋಮು ಹಿಂಸಾಚಾರ ವರದಿಯಾಗಿದೆ.
ಬಿಜೆಪಿಯು ಭಾನುವಾರ ರಾಮನ ಉತ್ಸವದ ಶೋಭಾ ಯಾತ್ರೆ ನಡೆಸುವ ವೇಳೆ ಎರಡು ಗುಂಪಿನ ನಡುವೆ ಕೋಮು ಸಂಘರ್ಷ ನಡೆದಿತ್ತು. ಸೋಮವಾರವೂ ಮತ್ತೆ ಹಿಂಸಾಚಾರ ನಡೆದಿದೆ. ಹೂಗ್ಲಿ ಜಿಲ್ಲೆಯಲ್ಲಿ ಕ್ಷಿಪ್ರ ಕಾರ್ಯ ಪಡೆಯನ್ನು ನಿಯೋಜಿಸಲಾಗಿದೆ.
ಎರಡು ಗುಂಪುಗಳ ಸಂಘರ್ಷದಿಂದ ಪ್ರದೇಶದಲ್ಲಿ ಕಲ್ಲು ತೂರಾಟ ನಡೆದಿದೆ. ಇದರಿಂದ ಹೌರಾ-ಬಂಡೇಲ್‌ ವಲಯದ ಸ್ಥಳೀಯ, ಎಕ್ಸ್‌ಪ್ರೆಸ್ ರೈಲು ಸೇವೆಯನ್ನು 3 ತಾಸು ಸ್ಥಗಿತಗೊಳಿಸಲಾಗಿತ್ತು ಎಂದು ಪೂರ್ವ ರೈಲ್ವೆ ಮುಖ್ಯ ಸಾರ್ವಜನಿಕ ಸಂಪರ್ಕಾಧಿಕಾರಿ ಕೌಶಿಕ್‌ ಮಿಶ್ರಾ ಹೇಳಿದ್ದಾರೆ.
ಮಧ್ಯರಾತ್ರಿ ನಂತರ ರೈಲು ಸೇವೆಗಳನ್ನು ಪುನರಾರಂಭಿಸಲಾಯಿತು. ಹಿಂಸಾಚಾರದ ಕಾರಣದಿಂದ ದೂರ ಪ್ರಯಾಣದ ರೈಲುಗಳ ಸಂಚಾರ ತಡವಾಯಿತು ಎಂದು ರೈಲ್ವೆ ಅಧಿಕಾರಿಗಳು ಹೇಳಿದ್ದಾರೆ.
ರಾಮನ ಉತ್ಸವದ ಮೆರವಣಿಗಳ ವೇಳೆ ಕೋಲ್ಕತ್ತ ಬಳಿಯ ಹೂಗ್ಲಿ ಮತ್ತು ಹೌರಾ ಜಿಲ್ಲೆಗಳಲ್ಲಿ ಉಂಟಾದ ಕೋಮು ಸಂಘರ್ಷಗಳಿಂದ ಪರಿಸ್ಥಿತಿ ಉದ್ವಿಗ್ನಗೊಂಡಿದೆ.
ಕಳೆದ ಗುರುವಾರ (ಮಾರ್ಚ್ 30) ರಾಮ ನವಮಿ ಉತ್ಸವದ ಸಂದರ್ಭದಲ್ಲಿ ಹೌರಾದಲ್ಲಿ ಎರಡು ಗುಂಪುಗಳ ನಡುವೆ ಘರ್ಷಣೆ ನಡೆದಿತ್ತು. ಈ ವೇಳೆ ಹಲವು ವಾಹನಗಳು ಬೆಂಕಿಗೆ ಆಹುತಿಯಾದವು. ಘರ್ಷಣೆಯಲ್ಲಿ ಬಿಜೆಪಿ ಶಾಸಕ ಬಿಮನ್‌ ಘೋಷ್‌ ಗಾಯಗೊಂಡಿದ್ದರು. ಇದಾದ ಬಳಿಕ, ರಾಜ್ಯದ ವಿವಿಧೆಡೆ ಹಿಂಸಾಚಾರ ಘಟನೆಗಳು ನಡೆದಿವೆ. ಬಿಜೆಪಿ ಹಾಗೂ ಟಿಎಂಸಿ ಕಾರ್ಯಕರ್ತರ ಗುಂಪುಗಳು ಪರಸ್ಪರ ಹೊಡೆದಾಡಿಕೊಂಡಿವೆ.
ಈ ಸುದ್ದಿ ಓದಿದ್ದೀರಾ? ಹೊಸ ಸಂಸತ್ತಿನ ಹೊರಗೆ ಪ್ರಧಾನಿ ಮೋದಿ ಪದವಿ ದಾಖಲೆಗಳ ಪ್ರದರ್ಶನವಾಗಲಿ; ಸಂಜಯ್ ರಾವುತ್ ಆಗ್ರಹ
ಬಿಜೆಪಿ ಶೋಭಾ ಯಾತ್ರೆ ನಡೆಸುವ ಪ್ರದೇಶದಲ್ಲಿ ಆಡಳಿತಾರೂಢ ತೃಣಮೂಲ ಕಾಂಗ್ರೆಸ್‌ (ಟಿಎಂಸಿ) ಅಂತರ್ಜಾಲ ಸೇವೆ ಸ್ಥಗಿತಗೊಳಿಸಿ ನಿಷೇಧಾಜ್ಞೆ ಜಾರಿಗೊಳಿಸುತ್ತಿದೆ. ಬಿಜೆಪಿ ಹೌರಾದಲ್ಲಿ ಕೋಮು ಸಂಘರ್ಷ ನಡೆಸುತ್ತಿದೆ ಎಂದು ಟಿಎಂಸಿ ಆರೋಪಿಸಿದೆ. ಘರ್ಷಣೆಗೆ ಬಿಜೆಪಿಯೇ ಕಾರಣವೆಂದು ಟಿಎಂಸಿ ನಾಯಕ ಅಭಿಷೇಕ್‌ ಬ್ಯಾನರ್ಜಿ ಆರೋಪಿಸಿದ್ದಾರೆ.
ರಾಮ ನವಮಿ ಹಿಂಸಾಚಾರದ ಈ ವಿಡಿಯೋ ಹೌರಾದಲ್ಲಿ ನಡೆದ ಮೆರವಣಿಗೆಯದ್ದು ಅಲ್ಲ. ಇದು ವಿಶ್ವ ಹಿಂದೂ ಪರಿಷತ್‌ ಆಯೋಜಿಸದ ಮೆರವಣಿಗೆಯಲ್ಲಿ ಸಂಭವಿಸಿದ ಘಟನೆ ಎಂದು ಬಿಜೆಪಿ ವಾದಿಸಿದೆ.
