ಮಾಹಿತಿ ಹಕ್ಕು ಕಾಯ್ದೆ (ಆರ್‌ಟಿಐ) ಅಡಿಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರ ವಿದೇಶಿ ಪ್ರವಾಸದ ವಿಮಾನಯಾನ ದಾಖಲೆಗಳನ್ನು ಬಹಿರಂಗಪಡಿಸುವಂತೆ ಭಾರತೀಯ ವಾಯುಪಡೆಗೆ (IAF) ಕೇಂದ್ರ ಮಾಹಿತಿ ಆಯೋಗ (CIC) ನೀಡಿದ್ದ ಆದೇಶವನ್ನು ದೆಹಲಿ ಹೈಕೋರ್ಟ್ ರದ್ದುಗೊಳಿಸಿದೆ. ಪ್ರಯಾಣಿಕರ ವಿವರಗಳನ್ನು ಗೌಪ್ಯವಾಗಿಟ್ಟರೂ ಸಹ, ಲಭ್ಯವಿರುವ ಇತರ ಮಾಹಿತಿಯೊಂದಿಗೆ ಅದನ್ನು ತಾಳೆ ನೋಡಿದಾಗ ಪ್ರಧಾನಿಯವರ ಭದ್ರತಾ ವ್ಯವಸ್ಥೆಯ ಸೂಕ್ಷ್ಮ ವಿಚಾರಗಳು ಬಹಿರಂಗಗೊಳ್ಳುವ ಹಾಗೂ ರಾಷ್ಟ್ರೀಯ ಭದ್ರತೆಗೆ ಅಪಾಯ ತಂದೊಡ್ಡುವ ಸಾಧ್ಯತೆಯಿದೆ ಎಂದು ನ್ಯಾಯಾಲಯ ಅಭಿಪ್ರಾಯಪಟ್ಟಿದೆ.
ಅಕ್ಟೋಬರ್ 15ರಂದು ಏರ್ ಹೆಡ್‌ಕ್ವಾರ್ಟರ್ಸ್‌ನ ಕೇಂದ್ರ ಸಾರ್ವಜನಿಕ ಮಾಹಿತಿ ಅಧಿಕಾರಿಯ (CPIO) ಅರ್ಜಿಯ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಅಮಿತ್ ಮಹಾಜನ್ ಅವರಿದ್ದ ಪೀಠ ಈ ತೀರ್ಪು ನೀಡಿದೆ. 2020ರ ಜುಲೈ 8ರಂದು ಸಿಐಸಿ ನೀಡಿದ್ದ ಆದೇಶವನ್ನು ಬದಿಗೊತ್ತಿರುವ ಪೀಠ, ‘ಪಾರ್ಟ್ II ಸ್ಪೆಷಲ್ ಫ್ಲೈಟ್ ರಿಟರ್ನ್ಸ್’ (SFR-II) ಮಾಹಿತಿಯನ್ನು ಬಹಿರಂಗಪಡಿಸುವಂತಿಲ್ಲ ಎಂದು ವಾಯುಪಡೆಯ ಮನವಿಯನ್ನು ಪುರಸ್ಕರಿಸಿದೆ.
ರಾಷ್ಟ್ರೀಯ ಭದ್ರತೆ ಹಾಗೂ ಪ್ರಧಾನಿಯವರ ಜೀವ ಬೆದರಿಕೆಯ ಕಾರಣಗಳನ್ನು ಮುಂದಿಟ್ಟು ಆರ್‌ಟಿಐ ಕಾಯ್ದೆಯ ಸೆಕ್ಷನ್ 8(1)(a) ಮತ್ತು 8(1)(g) ಅಡಿಯಲ್ಲಿ ಮಾಹಿತಿ ನೀಡಲು ವಿನಾಯಿತಿ ಕೋರಿದ್ದ ವಾಯುಪಡೆಯ ಕ್ರಮವನ್ನು ನ್ಯಾಯಾಲಯ ಎತ್ತಿಹಿಡಿದಿದೆ. ಆರ್‌ಟಿಐ ಕಾಯ್ದೆಯ ಸೆಕ್ಷನ್ 8(1)(a) ರಾಷ್ಟ್ರೀಯ ಭದ್ರತೆಯನ್ನು ರಕ್ಷಿಸಿದರೆ, ಸೆಕ್ಷನ್ 8(1)(g) ಒಬ್ಬ ವ್ಯಕ್ತಿಯ ಜೀವಕ್ಕೆ ಅಥವಾ ದೈಹಿಕ ಸುರಕ್ಷತೆಗೆ ಅಪಾಯವನ್ನುಂಟುಮಾಡುವ ಮಾಹಿತಿಯನ್ನು ತಡೆಹಿಡಿಯಲು ಅವಕಾಶ ನೀಡುತ್ತದೆ.
ನಿವೃತ್ತ ಕಮೊಡೋರ್ ಲೋಕೇಶ್ ಕೆ. ಬಾತ್ರಾ ಅವರು 2018ರ ಜೂನ್ 5ರಂದು ಆರ್‌ಟಿಐ ಅರ್ಜಿ ಸಲ್ಲಿಸಿ, 2013ರ ಏಪ್ರಿಲ್ 1ರಿಂದ ವಾಯುಪಡೆ ವಿಮಾನಗಳಲ್ಲಿ ಪ್ರಧಾನಿಗಳು ಕೈಗೊಂಡ ವಿದೇಶಿ ಪ್ರವಾಸದ ದಾಖಲೆಗಳನ್ನು ಕೋರಿದ್ದರು. ಈ ಬಗ್ಗೆ ಉತ್ತರಿಸಿದ್ದ ವಾಯುಪಡೆಯು, ಪ್ರಧಾನಿ ಮೋದಿ ಅವರ ಕೆಲವು ಪ್ರವಾಸಗಳ ಮಾಹಿತಿಯನ್ನು ನೀಡಿತ್ತಾದರೂ, ಭದ್ರತೆಯ ದೃಷ್ಟಿಯಿಂದ ‘ಪಾರ್ಟ್-1’ ಮತ್ತು ‘ಪಾರ್ಟ್-2’ ವಿಶೇಷ ಫ್ಲೈಟ್ ರಿಟರ್ನ್ಸ್ ವಿವರಗಳನ್ನು ನೀಡಲು ನಿರಾಕರಿಸಿತ್ತು. ಇದರಲ್ಲಿ ವಿಮಾನ, ಸಿಬ್ಬಂದಿ, ಪ್ರಯಾಣಿಕರು ಮತ್ತು ‘ವಿಶೇಷ ರಕ್ಷಣಾ ಗುಂಪಿನ’ (SPG) ವಿವರಗಳು ಇರುತ್ತವೆ. ಆದರೆ, 2020ರಲ್ಲಿ ಸಿಐಸಿ ಈ ‘ಪಾರ್ಟ್-2’ ಮಾಹಿತಿಯ ದೃಢೀಕೃತ ಪ್ರತಿಗಳನ್ನು ಒದಗಿಸುವಂತೆ ವಾಯುಪಡೆಗೆ ಆದೇಶಿಸಿತ್ತು. ಇದನ್ನು ಪ್ರಶ್ನಿಸಿ ವಾಯುಪಡೆ ಹೈಕೋರ್ಟ್ ಮೆಟ್ಟಿಲೇರಿತ್ತು.
ಭದ್ರತಾ ಸಿಬ್ಬಂದಿಯ ಹೆಸರುಗಳನ್ನು ಮರೆಮಾಚಿದರೂ ಅಪಾಯ ತಪ್ಪುವುದಿಲ್ಲ ಎಂದು ವಾಯುಪಡೆ ವಾದಿಸಿತ್ತು. ದಾಖಲೆಯಲ್ಲಿರುವ ಹುದ್ದೆಗಳು, ಗುರುತಿನ ಸಂಖ್ಯೆಗಳು, ಪ್ರಯಾಣಿಕರ ಸಂಖ್ಯೆ ಮತ್ತು ಇತರ ವಿವರಗಳನ್ನು ಸಾರ್ವಜನಿಕವಾಗಿ ಲಭ್ಯವಿರುವ ಮಾಹಿತಿಯೊಂದಿಗೆ ಹೋಲಿಸಿ ನೋಡಿದರೆ ಭದ್ರತಾ ವ್ಯವಸ್ಥೆಯ ಸ್ವರೂಪ ಶತ್ರುಗಳಿಗೆ ತಿಳಿಯುವ ಅಪಾಯವಿದೆ ಎಂದು ವಾಯುಪಡೆ ನ್ಯಾಯಾಲಯಕ್ಕೆ ವಿವರಿಸಿತು. ಇದನ್ನು ನ್ಯಾಯಾಲಯ ಸಂಪೂರ್ಣವಾಗಿ ಮಾನ್ಯ ಮಾಡಿದೆ. ಭದ್ರತಾ ಸಂಸ್ಥೆಗಳ ವ್ಯಕ್ತಿನಿಷ್ಠ ತೀರ್ಮಾನಗಳಲ್ಲಿ ನ್ಯಾಯಾಲಯ ಅಥವಾ ಸಿಐಸಿ ಹಸ್ತಕ್ಷೇಪ ಮಾಡಲಾಗದು ಎಂದು ಪೀಠ ಸ್ಪಷ್ಟಪಡಿಸಿದೆ.
ಪ್ರಧಾನಿ ಜೊತೆ ತೆರಳಿದ ಖಾಸಗಿ ವ್ಯಕ್ತಿಗಳ ವಿವರಗಳನ್ನು ಮಾತ್ರ ತಾವು ಕೇಳುತ್ತಿದ್ದು, ಪ್ರವಾಸಕ್ಕೆ ಸಾರ್ವಜನಿಕರ ಹಣ ಬಳಕೆಯಾಗಿರುವುದರಿಂದ ಈ ಮಾಹಿತಿ ಬಹಿರಂಗವಾಗಬೇಕು ಎಂದು ಅರ್ಜಿದಾರರ ಪರ ವಕೀಲರು ವಾದಿಸಿದ್ದರು. ಇದಕ್ಕೆ ಪ್ರತಿಕ್ರಿಯಿಸಿದ ನ್ಯಾಯಾಲಯ, “ಕೇವಲ ಸಾರ್ವಜನಿಕರ ಹಣ ಬಳಕೆಯಾಗಿದೆ ಎಂಬ ಕಾರಣಕ್ಕೆ ಭದ್ರತೆಗೆ ಧಕ್ಕೆ ತರುವಂತಹ ಮಾಹಿತಿಗಳನ್ನು ಬಹಿರಂಗಪಡಿಸುವಂತೆ ನಿರ್ದೇಶಿಸಲು ಸಾಧ್ಯವಿಲ್ಲ. ದೊಡ್ಡ ಮಟ್ಟದ ಸಾರ್ವಜನಿಕ ಹಿತಾಸಕ್ತಿಯನ್ನು ಸಾಬೀತುಪಡಿಸದ ಹೊರತು ಈ ಮಾಹಿತಿಯನ್ನು ನೀಡುವಂತಿಲ್ಲ” ಎಂದು ಸ್ಪಷ್ಟ ಆದೇಶ ನೀಡಿದೆ.
