ಎಲ್ಐಸಿ ಹೌಸಿಂಗ್ ಫೈನಾನ್ಸ್ ಲಿಮಿಟೆಡ್‌ಗೆ (LICHFL) 1,322 ಕೋಟಿ ರೂ. ನಷ್ಟ ಉಂಟುಮಾಡಿದ ಆರೋಪದ ಮೇಲೆ ಮಾಧ್ಯಮ ಉದ್ಯಮಿ ಸುಭಾಷ್ ಚಂದ್ರ ಅವರ ವಿರುದ್ಧ ಜಾರಿ ನಿರ್ದೇಶನಾಲಯ (ED) ಅಕ್ರಮ ಹಣ ವರ್ಗಾವಣೆ ಪ್ರಕರಣವನ್ನು ದಾಖಲಿಸಿದೆ.
ಸಾಲ ಪಡೆಯುವ ಉದ್ದೇಶದಿಂದ ಸುಭಾಷ್ ಚಂದ್ರ ಅವರು ತಮ್ಮ ಆಸ್ತಿಯ ನಿವ್ವಳ ಮೌಲ್ಯವನ್ನು (Net worth) ನಕಲಿಯಾಗಿ ಹೆಚ್ಚಿಸಿ ತೋರಿಸಿ ಎಲ್ಐಸಿಎಚ್‌ಎಫ್‌ಎಲ್‌ನಿಂದ 980 ಕೋಟಿ ರೂ. ಸಾಲ ಪಡೆದು, ಮರುಪಾವತಿಸದೆ ವಂಚಿಸಿದ್ದಾರೆ ಎಂಬ ಸಿಬಿಐ ಎಫ್‌ಐಆರ್ ಆಧರಿಸಿ ಅಕ್ರಮ ಹಣ ವರ್ಗಾವಣೆ ತಡೆ ಕಾಯ್ದೆಯಡಿ (PMLA) ಈ ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ. ಸುಭಾಷ್ ಚಂದ್ರ ಅವರಿಗೆ ಸೇರಿದ ಕಂಪನಿಗಳಿಗೆ ಸಾಲ ಮಂಜೂರು ಮಾಡಲು ನಕಲಿ ಆರ್ಥಿಕ ಪ್ರಮಾಣಪತ್ರಗಳನ್ನು ಬಳಸಲಾಗಿದೆ ಎಂದು ಎಲ್ಐಸಿಎಚ್‌ಎಫ್‌ಎಲ್ ದೂರಿದೆ.
ದೂರಿನ ಪ್ರಕಾರ, ವಸಂತ್ ಸಾಗರ್ ಪ್ರಾಪರ್ಟೀಸ್ ಪ್ರೈವೇಟ್ ಲಿಮಿಟೆಡ್ ಕಂಪನಿಗೆ 500 ಕೋಟಿ ರೂ. (ಪ್ಯಾನ್ ಇಂಡಿಯಾ ಇನ್ಫ್ರಾ ಪ್ರಾಜೆಕ್ಟ್ಸ್ ಸಹ-ಸಾಲಗಾರ) ಹಾಗೂ ಡಿಜಿಟಲ್ ಸಬ್‌ಸ್ಕ್ರೈಬರ್ ಮ್ಯಾನೇಜ್‌ಮೆಂಟ್ ಅಂಡ್ ಕನ್ಸಲ್ಟೆನ್ಸಿ ಸರ್ವೀಸಸ್ ಪ್ರೈವೇಟ್ ಲಿಮಿಟೆಡ್‌ಗೆ 480 ಕೋಟಿ ರೂ. (ಸ್ಪಿರಿಟ್ ಇನ್ಫ್ರಾ ಪವರ್ ಸಹ-ಸಾಲಗಾರ) ಸಾಲ ನೀಡಲಾಗಿತ್ತು.
ಸಾಲ ಮಂಜೂರಾತಿಗಾಗಿ ಮಾರ್ಚ್ 2018ರಲ್ಲಿ ಡಿಜೆಎಂ ಅಂಡ್ ಕಂ ಮೂಲಕ 59,000 ಕೋಟಿ ರೂ. ಹಾಗೂ ಜುಲೈ 2018ರಲ್ಲಿ ಎಂಪಿಜೆ ಅಂಡ್ ಕಂ ಮೂಲಕ 40,562 ಕೋಟಿ ರೂ. ನಿವ್ವಳ ಮೌಲ್ಯ ಹೊಂದಿರುವ ಬಗ್ಗೆ ಸುಭಾಷ್ ಚಂದ್ರ ಪ್ರಮಾಣಪತ್ರಗಳನ್ನು ಸಲ್ಲಿಸಿದ್ದರು. ತರುವಾಯ ಈ ಎರಡೂ ಸಾಲಗಳು ಅನುತ್ಪಾದಕ ಆಸ್ತಿಯಾಗಿ (NPA) ಮಾರ್ಪಟ್ಟಿದ್ದು, ಸಾಲದಾತ ಸಂಸ್ಥೆಗೆ ಒಟ್ಟು 1,322 ಕೋಟಿ ರೂ. ನಷ್ಟವಾಗಿದೆ.
ದಿವಾಳಿತನ ಕಾಯ್ದೆ (IBC) ಅಡಿ 2024ರಲ್ಲಿ ನಡೆದ ವಿಚಾರಣೆ ವೇಳೆ ಸುಭಾಷ್ ಚಂದ್ರ ಅವರು, ಪ್ರಸ್ತುತ ತಮ್ಮ ನಿವ್ವಳ ಮೌಲ್ಯ ಕೇವಲ 31.79 ಕೋಟಿ ರೂ. ಇದೆ ಮತ್ತು 2017-18ರ ಅವಧಿಯಲ್ಲಿ ಅದು 40,000 ಕೋಟಿ ರೂ.ಗಿಂತ ಹೆಚ್ಚಿರಲಿಲ್ಲ ಎಂದು ಹೇಳಿಕೆ ನೀಡಿದ್ದರು. ಸಾಲ ಪಡೆಯುವಾಗ ನೀಡಿದ್ದ ದಾಖಲೆಗೂ, ಈ ಹೇಳಿಕೆಗೂ ಇರುವ ಬೃಹತ್ ವ್ಯತ್ಯಾಸವನ್ನು ಸಿಬಿಐ ತನ್ನ ಎಫ್‌ಐಆರ್‌ನಲ್ಲಿ ಉಲ್ಲೇಖಿಸಿದೆ.
ಸಾಲ ಪಡೆದ ಕಂಪನಿಗಳು ಹಾಗೂ ಅದರ ನಿರ್ದೇಶಕರ ಜೊತೆ ಶಾಮೀಲಾಗಿ ನಕಲಿ ದಾಖಲೆಗಳನ್ನು ಸೃಷ್ಟಿಸಿ ಸಾಲದ ಹಣವನ್ನು ದುರ್ಬಳಕೆ ಮಾಡಿಕೊಳ್ಳಲಾಗಿದೆ ಎಂಬುದು ಪ್ರಮುಖ ಆರೋಪ. 22,006 ಕೋಟಿ ರೂ.ಗಳ ಒಟ್ಟು ಕ್ಲೈಮ್‌ಗಳ ವಿರುದ್ಧ ಸುಭಾಷ್ ಚಂದ್ರ ಅವರ ವೈಯಕ್ತಿಕ ಆಸ್ತಿಯಿಂದ ಕೇವಲ 6.5 ಕೋಟಿ ರೂ.ಗಳನ್ನು ಮಾತ್ರ ಸಾಲಗಾರರಿಗೆ ಮರುಪಡೆಯಲು ಅವಕಾಶ ನೀಡಿದ್ದ ರಾಷ್ಟ್ರೀಯ ಕಂಪನಿ ಕಾನೂನು ನ್ಯಾಯಾಧೀಕರಣದ (NCLT) ಆದೇಶವನ್ನು ಎಲ್ಐಸಿಎಚ್‌ಎಫ್‌ಎಲ್ ಇತ್ತೀಚೆಗಷ್ಟೇ ಮೇಲ್ಮನವಿ ನ್ಯಾಯಾಧೀಕರಣದಲ್ಲಿ (NCLAT) ಪ್ರಶ್ನಿಸಿತ್ತು.
