ಬದುಕಿನ ಸಂಧ್ಯಾಕಾಲದಲ್ಲಿ ನಿಂತು ಹಿಂದಿನ ಸವಿ ನೆನಪುಗಳನ್ನು ಮೆಲುಕು ಹಾಕುವುದು ಒಂದು ಅಪರೂಪದ ಅನುಭವ. ಅದರಲ್ಲೂ ಪ್ರೀತಿಯ ಆರಂಭಿಕ ದಿನಗಳು ಯಾರ ಮನಸ್ಸಿನಲ್ಲಿಯೂ ಚಿರಕಾಲ ಅಚ್ಚಳಿಯದೆ ಉಳಿದಿರುತ್ತವೆ. ಅಂತಹದ್ದೇ ಭಾವನಾತ್ಮಕ ಲೋಕಕ್ಕೆ ನಮ್ಮನ್ನು ಸೋನಿಯಾ ಗಾಂಧಿ ಅವರು ಕರೆದೊಯ್ದಿದ್ದಾರೆ.
ಸೋನಿಯಾ ಗಾಂಧಿ ಅವರು ವಿಶೇಷ ಸಂದರ್ಶನವೊಂದರಲ್ಲಿ ತಮ್ಮ ಜೀವನದ ಅತ್ಯಮೂಲ್ಯ ದಿನಗಳನ್ನು ಕಣ್ಣೀರಂಚಿನ ನಗುವಿನೊಂದಿಗೆ ತೆರೆದಿಟ್ಟಿದ್ದಾರೆ. ಹಳೆಯ ಕಪ್ಪು-ಬಿಳುಪು ಭಾವಚಿತ್ರಗಳ ಪುಟಗಳನ್ನು ಒಂದೊಂದಾಗಿ ತಿರುವಿಹಾಕುತ್ತಾ, ಅವರು ರಾಜೀವ್ ಗಾಂಧಿ ಅವರೊಂದಿಗಿನ ತಮ್ಮ ಪ್ರೇಮಕಥೆಯ ಹಳೆಯ ಮರೆಯಲಾಗದ ಸುಂದರ ಅಧ್ಯಾಯಗಳನ್ನು ಮೆಲುಕು ಹಾಕಿದ್ದಾರೆ.
ಯೌವನದ ದಿನಗಳಲ್ಲಿ ವಿದೇಶದಲ್ಲಿ ಬದುಕು ನಡೆಸುವುದು ಅಷ್ಟು ಸುಲಬವಾಗಿರಲಿಲ್ಲ. ವಿಶೇಷವಾಗಿ ಇಂಗ್ಲೆಂಡಿನಲ್ಲಿ ಅಂದು ಇಂದಿನಂತೆ ನೂರಾರು ರೆಸ್ಟೋರೆಂಟ್‌ಗಳು ಅಥವಾ ವಿವಿಧ ತಿನಿಸುಗಳು ಲಭ್ಯವಿರಲಿಲ್ಲ. ತವರಿಗೆ ದೂರವಿರುವಾಗ ತಮ್ಮ ತಾಯ್ನಾಡಿನ ರುಚಿಯನ್ನು ನೆನಪಿಸುವ ಇಟಾಲಿಯನ್ ಶೈಲಿಯ ಆಹಾರವನ್ನು ಹುಡುಕಲು ಸೋನಿಯಾ ಅವರು ಪಟ್ಟ ಪಾಡು ದೊಡ್ಡದೇ ಇತ್ತು.
ಇದನ್ನೂ ಓದಿ: ಈ ದಿನ ಸಂಪಾದಕೀಯ | ಸೋನಿಯಾ ಆತ್ಮಕಥನ ಕುರಿತು ಮೋದಿಗೇಕೆ ಭಯ?
ನಿರಂತರ ಅಲೆದಾಟದ ಬಳಿಕ ಅವರು ಕೊನೆಗೂ ಒಂದು ಗ್ರೀಕ್ ರೆಸ್ಟೋರೆಂಟನ್ನು ಕಂಡುಕೊಂಡರು. ಆ ಜಾಗವೇ ಅವರ ಜೀವನದ ಮಹತ್ವದ ತಿರುವಿಗೆ ಸಾಕ್ಷಿಯಾಗುತ್ತದೆ ಎಂದು ಅಂದಿಗೆ ಅವರಿಗೆ ತಿಳಿದಿರಲಿಲ್ಲ. ಯುರೋಪಿಯನ್ ಮತ್ತು ಭಾರತೀಯ ವಿದ್ಯಾರ್ಥಿಗಳು ತಮ್ಮ ಊಟಕ್ಕಾಗಿ ಆಗಮಿಸುತ್ತಿದ್ದ ಆ ಜನಸಂದಣಿಯ ನಡುವೆಯೇ ಅವರು ಕಂಡಿದ್ದು ತಮ್ಮ ಜೀವನದ ಪ್ರೀತಿಯನ್ನು.
ಯಾವ ಪೂರ್ವಯೋಜನೆಗಳಿಲ್ಲದೆ ಆ ಗ್ರೀಕ್ ರೆಸ್ಟೋರೆಂಟ್‌ನಲ್ಲಿ ನಡೆದ ಒಂದು ಕಾಕತಾಳೀಯ ಭೇಟಿ ಸೋನಿಯಾ ಅವರ ಇಡೀ ಜೀವನದ ಹಾದಿಯನ್ನೇ ಬದಲಾಯಿಸಿತು. ಇಬ್ಬರಿಗೂ ಪರಿಚಯವಿದ್ದ ಸಾಮಾನ್ಯ ಸ್ನೇಹಿತರೊಬ್ಬರು ಅವರಿಬ್ಬರನ್ನು ಪರಸ್ಪರ ಪರಿಚಯ ಮಾಡಿಕೊಟ್ಟರು. ಆ ಮೊದಲ ನೋಟದಲ್ಲೇ ರಾಜೀವ್ ಗಾಂಧಿ ಅವರ ವ್ಯಕ್ತಿತ್ವ ಸೋನಿಯಾ ಅವರ ಮನಸ್ಸಿನಲ್ಲಿ ಗಾಢವಾದ ಮುದ್ರೆಯನ್ನು ಒತ್ತಿತು. “ಅವರನ್ನು ನೋಡಿದ ಕ್ಷಣವೇ ಇವರು ನನ್ನ ಬದುಕಿನ ವಿಶೇಷ ವ್ಯಕ್ತಿಯಾಗಲಿದ್ದಾರೆ ಎಂಬ ಭಾವನೆ ನನ್ನ ಮನಸ್ಸಿನಲ್ಲಿ ಮೂಡಿತ್ತು. ಅಷ್ಟೇ ಅಲ್ಲದೆ, ರಾಜೀವ್ ಅವರ ಕಡೆಯಿಂದಲೂ ತಕ್ಕುದಾದ ಸ್ಪಂದನೆ ಸಿಕ್ಕಿತು” ಎಂದು ಸೋನಿಯಾ ಅವರು ಆ ದಿನಗಳನ್ನು ನೆನೆಯುತ್ತಾರೆ.
ಪರಿಚಯ ಸ್ನೇಹವಾಗಿ ಬದಲಾಗಿ, ಆ ಸ್ನೇಹ ಗಟ್ಟಿಯಾದ ಪ್ರೇಮವಾಗಿ ರೂಪುಗೊಳ್ಳಲು ಹೆಚ್ಚು ಸಮಯ ಹಿಡಿಯಲಿಲ್ಲ. ಸ್ನೇಹಿತರೊಂದಿಗೆ ಒಟ್ಟಾಗಿ ವಿವಿಧ ಪಾರ್ಟಿಗಳಲ್ಲಿ ಭಾಗವಹಿಸುವುದು, ಇಂಗ್ಲೆಂಡಿನ ಸುಂದರ ತಾಣಗಳಿಗೆ ಭೇಟಿ ನೀಡುವುದು ಹಾಗೂ ಸುತ್ತಮುತ್ತಲಿನ ಸೌಂದರ್ಯವನ್ನು ಆಸ್ವಾದಿಸುವುದು ಅವರ ದಿನಚರಿಯಾಯಿತು. ಅದರಲ್ಲೂ ವಿಶೇಷವಾಗಿ ಒಂದು ವೇಲೆಂಟೈನ್ಸ್ (ಪ್ರೇಮಿಗಳ ದಿನ) ಪಾರ್ಟಿಯಲ್ಲಿ ವಿದ್ಯಾರ್ಥಿಗಳ ನಡುವೆ ಕಳೆದುಹೋದ ಆ ಮಧುರ ಸಂಜೆಗಳು ಅವರ ನೆನಪಿನಾಳದಲ್ಲಿ ಎಂದೆಂದಿಗೂ ಹಸಿರಾಗಿವೆ. ಪ್ರತಿಯೊಂದು ಕ್ಷಣವೂ ಹೊಸ ಭರವಸೆಯನ್ನು, ಹೊಸ ಉಲ್ಲಾಸವನ್ನು ತಂದುಕೊಟ್ಟಿತ್ತು ಎಂಬುದನ್ನು ತಮ್ಮ ಸಂದರ್ಶನದಲ್ಲಿ ನೆನೆದು ಸೋನಿಯಾ ಗಾಂಧಿ ಅವರು ಭಾವುಕರಾಗಿದ್ದಾರೆ.
ರಾಜೀವ್ ಗಾಂಧಿ ಅವರು ಕೇವಲ ಆಕರ್ಷಕ ನೋಟದವರಷ್ಟೇ ಅಲ್ಲದೆ, ಅತ್ಯಂತ ಮೃದು ಹಾಗೂ ಸೌಮ್ಯ ಸ್ವಭಾವದವರಾಗಿದ್ದರು. ಅವರ ಆ ನಿಷ್ಕಲ್ಮಶ ನಗು ಮತ್ತು ವಿನಯಶೀಲತೆ ಸೋನಿಯಾ ಅವರ ಮನಸ್ಸನ್ನು ಸಂಪೂರ್ಣವಾಗಿ ಸೆರೆಹಿಡಿದಿತ್ತು. ಹೊರಗಿನ ಜಗತ್ತಿಗೆ ಅವರು ಗಂಭೀರ ವ್ಯಕ್ತಿಯಾಗಿ ಕಂಡರೂ, ತಮ್ಮ ಆಪ್ತರೊಂದಿಗೆ ಅವರ ತೋರುತ್ತಿದ್ದ ಮೃದುತ್ವವೇ ಸೋನಿಯಾ ಅವರನ್ನು ಮರುಳಾಗಿಸಿತ್ತು. “ಅವರ ಆ ಸೌಮ್ಯತೆಯೇ ನನ್ನನ್ನು ಆಳವಾಗಿ ಸ್ಪರ್ಶಿಸಿತು” ಎಂದು ಸೋನಿಯಾ ಗಾಂಧಿ ಹೇಳುವಾಗ ಅವರ ಧ್ವನಿಯಲ್ಲಿ ಬಾಗಿದ ಪ್ರೀತಿ ಮತ್ತು ಅಗಲಿಕೆಯ ನೋವಿನ ಅನುಭವ ಸ್ಪಷ್ಟವಾಗಿ ಗೋಚರಿಸುತ್ತದೆ.
ಇಂದಿಗೂ ಆ ಹಳೆಯ ಫೋಟೋಗಳನ್ನು ನೋಡುವಾಗ ತಾವಿಬ್ಬರೂ ಜೊತೆಯಾಗಿ ಕಳೆದ ಆ ದಿನಗಳು ಕಣ್ಣಮುಂದೆ ಹಾದುಹೋಗುತ್ತವೆ ಎಂದು ಸೋನಿಯಾ ಗಾಂಧಿ ಭಾವುಕರಾಗುತ್ತಾರೆ. ರಾಜೀವ್ ಜತೆಗಿನ ಪ್ರಥಮ ಭೇಟಿಯನ್ನು ಮತ್ತು ಆ ಅತಿ ಸುಂದರ ದಿನಗಳನ್ನು ತಾವೆಂದಿಗೂ ಮರೆಯಲು ಸಾಧ್ಯವಿಲ್ಲ ಎಂದು ಅವರು ಹೆಮ್ಮೆಯಿಂದಲೂ ನೋವಿನಿಂದಲೂ ನುಡಿಯುತ್ತಾರೆ. ರಾಜಕೀಯದ ಬಿರುಗಾಳಿಗಳು, ಬದುಕಿನ ಏಳುಬೀಳುಗಳು ಏನೇ ಇರಲಿ, ಒಂಟಿತನದ ಪಯಣದಲ್ಲಿ ಈ ಪ್ರೀತಿಯ ನೆನಪುಗಳೇ ಅವರಿಗೆ ದೊಡ್ಡ ಆಸರೆಯಾಗಿವೆ ಎಂಬುದನ್ನು ಈ ವಿಶೇಷ ಸಂದರ್ಶನವು ಸಾರಿ ಹೇಳುತ್ತದೆ.
