ಡೆಫಿಟೋಲಿಯೊ ಹೆಸರಿನಲ್ಲಿ ನಕಲಿ ಯಕೃತ್ತಿನ ಔಷಧಿ ಭಾರತ ಹಾಗೂ ಟರ್ಕಿಯಲ್ಲಿ ಮಾರಾಟವಾಗುತ್ತಿದೆ ಎಂದು ವಿಶ್ವ ಆರೋಗ್ಯ ಸಂಸ್ಥೆ ಎಚ್ಚರಿಕೆ ನೀಡಿದೆ.
ಡೆಫಿಟೆಲಿಯೊ (ಡೆಫಿಬ್ರೊಟೈಡ್ ಸೋಡಿಯಂ) ಔಷಧಿಯ ಒಂದು ಬ್ಯಾಚ್ ನಕಲಿಯಾಗಿದೆ ಎಂದು ವಿಶ್ವ ಆರೋಗ್ಯ ಸಂಸ್ಥೆ ತನ್ನ ಎಚ್ಚರಿಕೆಯ ಸಂದೇಶದಲ್ಲಿ ತಿಳಿಸಿದೆ. ಈ ನಕಲಿ ಔಷಧ ಭಾರತಕ್ಕೆ 2023ರ ಏಪ್ರಿಲ್ನಲ್ಲಿ ಹಾಗೂ ಟರ್ಕಿಯಲ್ಲಿ ಜುಲೈ 2023ರಲ್ಲಿ ಪತ್ತೆಯಾಗಿದ್ದು, ಇದನ್ನು ನಿಯಂತ್ರಿತ ಹಾಗೂ ಅಧಿಕೃತ ಸ್ಥಳಗಳಿಂದ ಹೊರಗೆ ಸರಬರಾಜು ಮಾಡಲಾಗುತ್ತಿದೆ ಎಂದು ಸ್ಪಷ್ಟಪಡಿಸಿದೆ.
ವಿಓಡಿ (ವೆನೊ ಒಕ್ಲುಸಿವ್ ಡಿಸೀಸ್) ರೋಗಕ್ಕೆ ಹೆಮಿಟೊಪೊಯೆಟಿಕ್ ಅಂಗಾಂಶ ಕಸಿ (ಎಚ್ಎಸ್ಸಿಟಿ) ಚಿಕಿತ್ಸೆಗೆ ಡೆಫಿಟೆಲಿಯೊ ಔಷಧ ಬಳಸಲಾಗುತ್ತದೆ. ಇದನ್ನು ವಯಸ್ಕರು, ಪ್ರೌಢಾವಸ್ಥೆಯವರು, ಮಕ್ಕಳು ಮತ್ತು ಒಂದು ವರ್ಷಕ್ಕಿಂತ ಮೇಲ್ಪಟ್ಟ ಮಕ್ಕಳ ಚಿಕಿತ್ಸೆಗೆ ನೀಡಲಾಗುತ್ತದೆ. ವಿಓಡಿ ಎನ್ನುವುದು ಯಕೃತ್ತಿನ ರಕ್ತನಾಳಗಳಲ್ಲಿ ತಡೆ ಉಂಟಾಗುವ ಕಾಯಿಲೆಯಾಗಿದ್ದು, ಇದರಿಂದ ಈ ಅಂಗಾಂಗ ಸಮರ್ಪಕವಾಗಿ ಕಾರ್ಯನಿರ್ವಹಿಸುವುದಿಲ್ಲ.
ಈ ಸುದ್ದಿ ಓದಿದ್ದೀರಾ? ನಾಲ್ಕು ಓಟು ಕಡಿಮೆ ಆಗುತ್ತದೆ ಎಂದರೆ, ದೇಶದ ಹೆಸರನ್ನು ಬದಲಿಸಬಹುದೇ?: ಕೇಜ್ರಿವಾಲ್ ಖಂಡನೆ
ಒಂದು ವೇಳೆ ನೀವು ಅಥವಾ ನಿಮಗೆ ತಿಳಿದಿರುವ ಯಾರಾದರೂ, ಈ ನಕಲಿ ಉತ್ಪನ್ನವನ್ನು ಬಳಸಿದ್ದರೆ ಅಥವಾ ಬಳಕೆಯ ನಂತರ ಪ್ರತಿಕೂಲ ಅಡ್ಡಪರಿಣಾಮವನ್ನು ಅನುಭವಿಸಿದರೆ, ಆರೋಗ್ಯ ವೃತ್ತಿಪರರಿಂದ ತಕ್ಷಣದ ವೈದ್ಯಕೀಯ ಸಲಹೆಯನ್ನು ಪಡೆಯಬೇಕು. ಇದರ ಜೊತೆಗೆ ವೈದ್ಯ ಸಿಬ್ಬಂದಿ ಕೂಡ ರಾಷ್ಟ್ರೀಯ ನಿಯಂತ್ರಣ ಪ್ರಾಧಿಕಾರಗಳು/ರಾಷ್ಟ್ರೀಯ ಫಾರ್ಮಾಕೋವಿಜಿಲೆನ್ಸ್ ಕೇಂದ್ರಕ್ಕೆ ವರದಿ ಮಾಡಬೇಕು. ರಾಷ್ಟ್ರೀಯ ನಿಯಂತ್ರಕ/ಆರೋಗ್ಯ ಅಧಿಕಾರಿಗಳು ಈ ನಕಲಿ ಉತ್ಪನ್ನಗಳನ್ನು ಗುರುತಿಸಿದರೆ ತಕ್ಷಣವೇ ವಿಶ್ವ ಆರೋಗ್ಯ ಸಂಸ್ಥೆಗೆ ವರದಿ ಮಾಡಬೇಕು ಎಂದು ಸಂದೇಶದಲ್ಲಿ ತಿಳಿಸಲಾಗಿದೆ.
ಡೆಫಿಟೆಲಿಯೊ ಔಷಧವನ್ನು ವಿಶ್ವಸಂಸ್ಥೆಯ ಈ ಅಂಗಸಂಸ್ಥೆ ಅಧಿಕೃತವಾಗಿ ಉತ್ಪಾದನೆ ಮಾಡುತ್ತದೆ. ಆದರೆ ಈ ಔಷಧಿಯ 20ಜಿ20ಎ ಲಾಟ್, ಜರ್ಮನ್/ಆಸ್ಟ್ರೇಲಿಯನ್ ಪ್ಯಾಕೇಜಿಂಗ್ನಲ್ಲಿ ಪ್ಯಾಕ್ ಆಗಿತ್ತು. ಆದರೆ ಈ ನಕಲಿ ಉತ್ಪನ್ನ ಇಂಗ್ಲೆಂಡ್/ ಐರ್ಲೆಂಡ್ ಪ್ಯಾಕೇಜಿಂಗ್ ಹೊಂದಿದೆ. ಇದರ ಅವಧಿ ಮೀರುವ ದಿನಾಂಕ ಕೂಡಾ ತಪ್ಪಾಗಿದ್ದು, ನೋಂದಾಯಿತ ಅವಧಿಯ ಕ್ರಮಕ್ಕೆ ಬದ್ಧವಾಗಿಲ್ಲ. ಮೇಲೆ ಹೇಳಲಾದ ಸೀರಿಯಲ್ ನಂಬರ್ ಗೂ 20ಜಿ20ಎಗೂ ಸಂಬಂಧ ಇಲ್ಲ. ಈ ಔಷಧಿಯನ್ನು ಭಾರತ ಹಾಗೂ ಟರ್ಕಿಯಲ್ಲಿ ಮಾರಾಟ ಮಾಡುವುದಕ್ಕೆ ಅನುಮತಿ ಇಲ್ಲ ಎಂದು ವಿಶ್ವ ಆರೋಗ್ಯ ಸಂಸ್ಥೆ ಸ್ಪಷ್ಟಪಡಿಸಿದೆ.
ಎಲ್ಲ ಔಷಧಗಳು ಮತ್ತು ಇತರ ವೈದ್ಯಕೀಯ ಉತ್ಪನ್ನಗಳನ್ನು ಅಧಿಕೃತ ಮತ್ತು ಪರವಾನಗಿ ಪೂರೈಕೆದಾರರಿಂದ ಖರೀದಿಸಬೇಕು.
ಈ ನಕಲಿ ಉತ್ಪನ್ನಗಳು ಎಲ್ಲಿಯಾದರೂ ಮಾರಾಟವಾಗುತ್ತಿರುವ ಹಾಗೂ ತಯಾರಿಕೆಯ ಬಗ್ಗೆ ಸಾರ್ವಜನಿಕರಿಗೆ ತಿಳಿದು ಬಂದರೆ ವಿಶ್ವ ಆರೋಗ್ಯ ಸಂಸ್ಥೆಯ ಇಮೇಲ್ [email protected] ಗೆ ಸಂಪರ್ಕಿಸಿ ದೂರು ನೀಡಬಹುದು.