ದೆಹಲಿ ಅಬಕಾರಿ ನೀತಿ ಪ್ರಕರಣದಲ್ಲಿ ತಮ್ಮನ್ನು ನ್ಯಾಯಾಲಯ ಖುಲಾಸೆಗೊಳಿಸಿದ ಬೆನ್ನಲ್ಲೇ, ಎಎಪಿ ರಾಷ್ಟ್ರೀಯ ಸಂಚಾಲಕ, ಮಾಜಿ ಮುಖ್ಯಮಂತ್ರಿ ಅರವಿಂದ ಕೇಜ್ರಿವಾಲ್ ಅವರು ಪ್ರಧಾನಿ ನರೇಂದ್ರ ಮೋದಿ ಮತ್ತು ಗೃಹ ಸಚಿವ ಅಮಿತ್ ಶಾ ವಿರುದ್ಧ ವಾಗ್ದಾಳಿ ನಡೆಸಿದ್ದಾರೆ. “ಇಂದು ನಾನು ಮೋದಿ ಅವರಿಗೆ ಸವಾಲು ಹಾಕುತ್ತೇನೆ. ಅವರಿಗೆ ಧೈರ್ಯವಿದ್ದರೆ, ಅವರು ದೆಹಲಿಯಲ್ಲಿ ಹೊಸ ಚುನಾವಣೆ ನಡೆಸಲಿ. ಅವರ ಪಕ್ಷ (ಬಿಜೆಪಿ) 10ಕ್ಕೂ ಹೆಚ್ಚು ಸ್ಥಾನಗಳನ್ನು ಪಡೆದರೆ, ನಾನು ರಾಜಕೀಯವನ್ನೇ ತ್ಯಜಿಸುತ್ತೇನೆ” ಎಂದು ಸವಾಲು ಹಾಕಿದ್ದಾರೆ.
ದೆಹಲಿಯಲ್ಲಿ ಸುದ್ದಿಗೋಷ್ಠಿ ನಡೆಸಿ ಅವರು ಮಾತನಾಡಿದರು. “ನಮ್ಮ ವಿರುದ್ಧ ಮೋದಿ ಮತ್ತು ಶಾ ಪಿತೂರಿ ನಡೆಸಿದರು. ಇಡಿ, ಸಿಬಿಐ, ಪೊಲೀಸ್ ಮತ್ತು ಆದಾಯ ತೆರಿಗೆ ಇಲಾಖೆಯನ್ನು ನಮ್ಮ ವಿರುದ್ಧ ಛೂಬಿಟ್ಟರು. ನಮ್ಮ ಐದು ನಾಯಕರನ್ನು ಜೈಲಿಗೆ ಹಾಕಿದರು. ಆದರೆ, ಅವರಿಬ್ಬರೂ ನಮ್ಮನ್ನು ಹಿಡಿದಿಟ್ಟುಕೊಳ್ಳಲು ಸಾಧ್ಯವಾಗಲಿಲ್ಲ” ಎಂದು ಹೇಳಿದ್ದಾರೆ.
“ಕೇಜ್ರಿವಾಲ್‌ನನ್ನು ತಡೆಯಲು ಅವರಿಗೆ (ಮೋದಿ-ಶಾ) ಏಕೈಕ ಮಾರ್ಗವೆಂದರೆ ನಮ್ಮನ್ನು ಕೊಲ್ಲುವುದು, ನಿರ್ಮೂಲನೆ ಮಾಡುವುದು. ಏಕೆಂದರೆ, ಅವರಿಗೆ ಬೇರೆ ಯಾವುದೇ ದಾರಿಯಿಲ್ಲ. ಅವರು ಎಲ್ಲವನ್ನೂ ಪ್ರಯತ್ನಿಸಿದ್ದಾರೆ” ಎಂದಿದ್ದಾರೆ.
“ಇನ್ನೊಂದು ಮಾರ್ಗವಿದೆ. ನಾನು ಇದನ್ನು ಮೊದಲೇ ಹೇಳಿದ್ದೇನೆ. ಆದರೆ, ಅದನ್ನು ಮಾಡಲು ಮೋದಿ ಅವರಿಗೆ ಸಾಧ್ಯವಿಲ್ಲ. ನಾನು ದೆಹಲಿಯಲ್ಲಿ 500 ಶಾಲೆಗಳನ್ನು ನಿರ್ಮಿಸಿದ್ದೇನೆ; ನೀವು ದೇಶಾದ್ಯಂತ 5,000 ಶಾಲೆಗಳನ್ನು ನಿರ್ಮಿಸಿರಿ. ನಾನು ದೆಹಲಿಯಲ್ಲಿ ರಸ್ತೆಗಳನ್ನು ಸುಧಾರಿಸಿದ್ದೇನೆ; ನೀವು ಇಡೀ ರಾಷ್ಟ್ರದಾದ್ಯಂತ ರಸ್ತೆಗಳನ್ನು ಸರಿಪಡಿಸಿರಿ. ಆಗ ಯಾರೂ ಕೇಜ್ರಿವಾಲ್ ಬಗ್ಗೆ ಕೇಳುವುದಿಲ್ಲ. ಆದರೆ, ಇದನ್ನು ಮಾಡಲು ಮೋದಿಗೆ ಸಾಧ್ಯವಿಲ್ಲ” ಎಂದು ಟೀಕಿಸಿದ್ದಾರೆ.
ಈ ಲೇಖನ ಓದಿದ್ದೀರಾ?: ಕೇಂದ್ರದ ಜಾತಿವಾರು ಸಮೀಕ್ಷೆಯಲ್ಲಿ ಅಲೆಮಾರಿಗಳ ಪ್ರಶ್ನೆ
“ಕಳೆದ ನಾಲ್ಕು ವರ್ಷಗಳಿಂದ, ನಮ್ಮ ವಿರುದ್ಧದ ಮದ್ಯ ಹಗರಣವನ್ನು ಬಯಲಿಗೆಳೆಯಲು ಇಡಿ, ಸಿಬಿಐ ಮತ್ತು ಎಲ್ಲ ಕೇಂದ್ರ ಸಂಸ್ಥೆಗಳನ್ನು ಬಳಸಲಾಗುತ್ತಿತ್ತು. ಸಿಬಿಐ ಮತ್ತು ಇಡಿ ಪ್ರಕರಣದಲ್ಲಿ ಚಾರ್ಜ್‌ಶೀಟ್‌ಗಳನ್ನು ಸಲ್ಲಿಸಿತು. ಸುಮಾರು 600 ಪುಟಗಳ ಆದೇಶದಲ್ಲಿ, ಎಲ್ಲ ಪುರಾವೆಗಳು ಮತ್ತು ಎಲ್ಲ ಸಾಕ್ಷಿಗಳ ಹೇಳಿಕೆಗಳನ್ನು ಪರಿಗಣಿಸಿದ ನಂತರ, ವಿಚಾರಣೆ ನಡೆಸುವುದನ್ನು ಸಮರ್ಥಿಸಲು ಒಂದು ಸಣ್ಣ ಸಾಕ್ಷ್ಯವೂ ಇಲ್ಲ, ವಿಶ್ವಾಸಾರ್ಹ ಸಾಕ್ಷಿ ಹೇಳಿಕೆಗಳೂ ಇಲ್ಲವೆಂದು ನ್ಯಾಯಾಲಯ ಹೇಳಿದೆ” ಎಂದು ವಿವರಿಸಿದ್ದಾರೆ.
“ನೀವು (ಮೋದಿ-ಶಾ) ನ್ಯಾಯಾಲಯದ ಆದೇಶವನ್ನು ಓದಬೇಕು. ಇದು ಐತಿಹಾಸಿಕ ಆದೇಶ. ನ್ಯಾಯಾಲಯವು ಸ್ಪಷ್ಟವಾಗಿ ಹೇಳುವಂತೆ, ಒಂದೇ ಒಂದು ಸಾಕ್ಷ್ಯವಿಲ್ಲ, ಒಬ್ಬ ಸಾಕ್ಷಿಯೂ ಇಲ್ಲ. ಅದರ ಆಧಾರದ ಮೇಲೆ ವಿಚಾರಣೆ ನಡೆಸಬಹುದು. ಈ ಪಿತೂರಿ ಯಾರು ಮಾಡಿದ್ದು ಮತ್ತು ಏಕೆ? ಈ ಸಂಪೂರ್ಣ ಪಿತೂರಿಯನ್ನು ಇಬ್ಬರು ವ್ಯಕ್ತಿಗಳು ಜಂಟಿಯಾಗಿ ನಡೆಸಿದ್ದಾರೆ. ಅವರೇ ಪ್ರಧಾನಿ ನರೇಂದ್ರ ಮೋದಿ ಮತ್ತು ಕೇಂದ್ರ ಗೃಹ ಸಚಿವ ಅಮಿತ್ ಶಾ” ಎಂದು ಆರೋಪಿಸಿದ್ದಾರೆ.
