ಟ್ರಂಪ್ ಅವರ ಈ ಅಹಂಕಾರದ ಹುಚ್ಚಾಟಗಳು ಅಮೆರಿಕದ ಇತಿಹಾಸದಲ್ಲೇ ಒಂದು ಕರಾಳ ಅಧ್ಯಾಯವಾಗಿದೆ. ತಮ್ಮ ಅವಿವೇಕ, ಹುಂಬತನ ಮತ್ತು ಸರ್ವಾಧಿಕಾರಿ ಧೋರಣೆಯಿಂದ ಅವರು ದೇಶದ ಆಡಳಿತ ವ್ಯವಸ್ಥೆಯ ಭದ್ರ ಬುನಾದಿಯನ್ನೇ ಬುಡಮೇಲು ಮಾಡಿದ್ದಾರೆ. ಈ ‘ಟ್ರಂಪ್ ಯುಗ’ ಅಮೆರಿಕನ್ನರಿಗೆ ಮರೆಯಲಾಗದ ಕಟು ಸತ್ಯವೊಂದನ್ನು ಕಲಿಸಿದೆ
ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಅಸಂಘಟಿತ ಮನಸ್ಥಿತಿ ಮತ್ತು ಅಸ್ವಸ್ಥ ವ್ಯಕ್ತಿತ್ವವು ಈಗ ಕೇವಲ ಅವರ ವೈಯಕ್ತಿಕ ಸಮಸ್ಯೆಯಾಗಿ ಉಳಿದಿಲ್ಲ. ಕಳೆದ ಕೆಲವು ತಿಂಗಳುಗಳಿಂದ, ವಿಶೇಷವಾಗಿ ಇತ್ತೀಚಿನ ವಾರಗಳಲ್ಲಿ ಟ್ರಂಪ್ ಅವರ ಈ ವಿಚಿತ್ರ ಮನೋಭಾವ ಇಡೀ ಆಡಳಿತ ಯಂತ್ರದ ಪ್ರತಿಯೊಂದು ಹಂತದಲ್ಲೂ ವ್ಯಾಪಕವಾಗಿ ಹರಡುತ್ತಿದೆ. ಜಗತ್ತಿನ ಅತಿ ದೊಡ್ಡಣ್ಣ ಎನಿಸಿಕೊಂಡಿದ್ದ ಅಮೆರಿಕ ದೇಶದ ಆಡಳಿತ ವ್ಯವಸ್ಥೆಯು ಇದೀಗ ಸಂಪೂರ್ಣವಾಗಿ ‘ಸಾಂಸ್ಥಿಕ ಮನೋವಿಕಾರ’ಕ್ಕೆ (Institutional Psychosis) ತುತ್ತಾಗಿದೆ. ಟ್ರಂಪ್ ಅವರು ಅಮೆರಿಕವನ್ನು ಅಕ್ಷರಶಃ ಒಂದು ‘ಹುಚ್ಚರ ಸಂತೆ’ಯನ್ನಾಗಿ ಪರಿವರ್ತಿಸುತ್ತಿದ್ದಾರೆ ಎಂಬ ತೀವ್ರ ಆತಂಕ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ವ್ಯಕ್ತವಾಗುತ್ತಿದೆ.
ಸರ್ಕಾರದಲ್ಲಿರುವ ಪ್ರತಿಯೊಬ್ಬ ಅಧಿಕಾರಿ ಅಥವಾ ಸಿಬ್ಬಂದಿ ಮಾನಸಿಕವಾಗಿ ಅಸ್ಥಿರರಾಗಿದ್ದಾರೆ ಎಂದರ್ಥವಲ್ಲ, ಅಥವಾ ಇದು ಅಧ್ಯಕ್ಷರ ವೈದ್ಯಕೀಯ ವರದಿ ಕೂಡ ಅಲ್ಲ. ಆದರೆ, ಇಡೀ ಆಡಳಿತ ವ್ಯವಸ್ಥೆಯು ವಾಸ್ತವದೊಂದಿಗಿನ ಸಂಪರ್ಕವನ್ನು ಕಡಿದುಕೊಂಡಿದೆ ಎಂಬುದೇ ಇಲ್ಲಿನ ಪ್ರಮುಖ ಸಮಸ್ಯೆಯಾಗಿದೆ. ಸರ್ಕಾರದ ಯೋಚನಾ ಲಹರಿ ಸಂಪೂರ್ಣವಾಗಿ ದಿಕ್ಕುತಪ್ಪಿದೆ. ಟ್ರಂಪ್ ಅವರ ಅತಿಯಾದ ಅಹಂಕಾರ, ಹಠಾತ್ ನಿರ್ಧಾರಗಳು, ಅಸಂಗತ ನಡವಳಿಕೆಗಳು ಮತ್ತು ವಾಸ್ತವದಿಂದ ಬಹುದೂರವಿರುವ ಕಲ್ಪನೆಗಳೇ ಇಂದು ಅಮೆರಿಕದ ರಾಷ್ಟ್ರೀಯ ನೀತಿಯಾಗಿ ಮಾರ್ಪಟ್ಟಿವೆ. ಇದು ಇಡೀ ಜಗತ್ತಿಗೆ ಒಂದು ಹೊಸ, ಗೊಂದಲಮಯ ಹಾಗೂ ಭಯಾನಕ ಪರಿಸ್ಥಿತಿಯನ್ನು ತಂದೊಡ್ಡಿದೆ.
ಟ್ರಂಪ್ ಅವರ ಮೊದಲ ಅಧ್ಯಕ್ಷೀಯ ಅವಧಿಗೂ, ಈಗಿನ ಎರಡನೇ ಅವಧಿಗೂ ಬಹಳ ದೊಡ್ಡ ವ್ಯತ್ಯಾಸವಿದೆ. 2020ರಲ್ಲಿ ಅವರು ಚುನಾವಣಾ ಫಲಿತಾಂಶದ ಬಗ್ಗೆ ಕಟ್ಟುಕಥೆಗಳನ್ನು ಹೆಣೆಯುತ್ತಿದ್ದರು ಅಥವಾ ಕೋವಿಡ್ ರೋಗಿಗಳಿಗೆ ಸೋಂಕು ನಿವಾರಕಗಳನ್ನು ಚುಚ್ಚುವ ಬಗ್ಗೆ ಅಸಂಬದ್ಧವಾಗಿ ಮಾತನಾಡುತ್ತಿದ್ದರು. ಆದರೆ, ಆಗ ತಮ್ಮ ಕಲ್ಪನೆಗಳನ್ನು ವಾಸ್ತವದಲ್ಲಿ ಜಾರಿಗೆ ತರಲು ಅವರಿಗೆ ಹೆಚ್ಚಾಗಿ ಸಾಧ್ಯವಾಗುತ್ತಿರಲಿಲ್ಲ. ಆದರೆ ಎರಡನೇ ಅವಧಿಯಲ್ಲಿ, ಅಧಿಕಾರ ವಹಿಸಿಕೊಂಡ ಮೊದಲ ದಿನದಿಂದಲೇ ಇಡೀ ಆಡಳಿತ ವ್ಯವಸ್ಥೆಯಲ್ಲಿ ಈ ‘ಹುಚ್ಚಾಟಗಳು’ ನಿರಂತರವಾಗಿ ಜಾರಿಯಾಗುತ್ತಿವೆ. ಬರೀ ಮಾತಿನಲ್ಲಿದ್ದ ಅವಿವೇಕ ಈಗ ಕೃತಿಗಿಳಿದು ಅಪಾಯಕಾರಿಯಾಗಿದೆ.
ಟ್ರಂಪ್ ಆಡಳಿತದ ಈ ಗೊಂದಲಮಯ ಮತ್ತು ದಿಕ್ಕುದೆಸೆಯಿಲ್ಲದ ನೀತಿಗೆ ಇರಾನ್ ಮೇಲಿನ ಯುದ್ಧ ಅತ್ಯಂತ ಸ್ಪಷ್ಟ ಉದಾಹರಣೆಯಾಗಿದೆ. ಯಾವುದೇ ನಿರ್ದಿಷ್ಟ ಗುರಿ, ಭವಿಷ್ಯದ ಕಾರ್ಯತಂತ್ರ, ಪರ್ಯಾಯ ಯೋಜನೆಗಳಿಲ್ಲದೆ ಅಮೆರಿಕ ಯುದ್ಧಕ್ಕೆ ಇಳಿಯಿತು. ಕನಿಷ್ಠಪಕ್ಷ ಈ ಯುದ್ಧವೇಕೆ ಮಾಡುತ್ತಿದ್ದೇವೆ ಎಂದು ತನ್ನನ್ನು ತಾನು ಸಮರ್ಥಿಸಿಕೊಳ್ಳುವ ಸಾಮರ್ಥ್ಯವೂ ಅಮೆರಿಕಕ್ಕೆ ಇರಲಿಲ್ಲ. ಈ ಯುದ್ಧದಲ್ಲಿ ಅಮೆರಿಕದ ದೊಡ್ಡ ಶತ್ರು ಇರಾನ್ ಆಗಿರಲಿಲ್ಲ, ಬದಲಾಗಿ ಟ್ರಂಪ್ ಆಡಳಿತದ ಅಸಂಬದ್ಧತೆ ಮತ್ತು ಗೊಂದಲಗಳೇ ಅಮೆರಿಕದ ಪಾಲಿಗೆ ದೊಡ್ಡ ಶತ್ರುವಾಗಿ ಪರಿಣಮಿಸಿದ್ದವು.
ಇರಾನ್ ಯುದ್ಧದ ಸಂದರ್ಭದಲ್ಲಿ ಸರ್ಕಾರದ ನಿಲುವುಗಳು ಕ್ಷಣಕ್ಷಣಕ್ಕೂ ಬದಲಾಗುತ್ತಿದ್ದವು. ಮೊದಲು ಇರಾನ್‌ನಲ್ಲಿ ಆಡಳಿತ ಬದಲಾವಣೆ ಮಾಡುವುದು ಗುರಿ ಎಂದರು, ನಂತರ ಅದನ್ನು ಕೈಬಿಟ್ಟರು. ಶತ್ರುಗಳು ಬೇಷರತ್ತಾಗಿ ಶರಣಾಗಬೇಕು ಎಂದರು, ಮತ್ತೆ ಆ ನಿಲುವನ್ನೂ ಬದಲಿಸಿದರು. ಗಡುವುಗಳನ್ನು ನೀಡಿದರು ಮತ್ತು ತಾವೇ ಅಳಿಸಿಹಾಕಿದರು. ಸಂಪೂರ್ಣ ವಿನಾಶ ಮಾಡುತ್ತೇವೆ ಎಂದು ಬೆದರಿಕೆ ಹಾಕಿ, ನಂತರ ಸುಮ್ಮನಾದರು. ಇರಾನ್ ಮೇಲಿನ ಟ್ರಂಪ್ ಅವರ ನಿಲುವುಗಳು ಪ್ರತಿ ವಾಕ್ಯಕ್ಕೂ ಬದಲಾಗುತ್ತಿರುತ್ತವೆ. ಇಂಥ ಅಸ್ಥಿರ ನಾಯಕತ್ವ ಜಗತ್ತಿನ ಯಾವುದೇ ದೇಶಕ್ಕೂ ಶೋಭೆ ತರುವುದಿಲ್ಲ.
ಇರಾನ್ ಮೇಲೆ ಬಾಂಬ್ ದಾಳಿ ನಡೆಯುತ್ತಿರುವಾಗಲೇ, ತೈಲ ಬೆಲೆ ಏರಿಕೆಯಾಗುತ್ತದೆ ಎಂದು ಹೆದರಿದ ಟ್ರಂಪ್ ಆಡಳಿತ, ಇರಾನ್‌ನ ತೈಲ ಮಾರಾಟದ ಮೇಲಿನ ಕೆಲವು ನಿರ್ಬಂಧಗಳನ್ನು ಸಡಿಲಿಸಿತು. ಇದು ಪರೋಕ್ಷವಾಗಿ ಎದುರಾಳಿಗೆ ಸಹಾಯ ಮಾಡಿದಂತಾಯಿತು. ಯುದ್ಧಕ್ಕೆ ಮುನ್ನವೇ ಮಧ್ಯಪ್ರಾಚ್ಯದ ಬಗ್ಗೆ ಅರಿವಿದ್ದ ತಜ್ಞರನ್ನು, ತೈಲ ಮತ್ತು ಅನಿಲ ಪರಿಣತರನ್ನು ವಜಾಗೊಳಿಸಲಾಗಿತ್ತು. ಇಂಟರ್ನೆಟ್‌ನಲ್ಲಿ ಬರುವ ಸುಳ್ಳು ಸುದ್ದಿಗಳನ್ನು ನಂಬಿ ರಾಷ್ಟ್ರೀಯ ಭದ್ರತಾ ಮಂಡಳಿಯ ನುರಿತ ಸಿಬ್ಬಂದಿಯನ್ನೇ ಕೆಲಸದಿಂದ ತೆಗೆದುಹಾಕಲಾಗಿತ್ತು. ಇದು ಯುದ್ಧದ ಸಮಯದಲ್ಲಿ ಅಮೆರಿಕ ತನ್ನ ಕಾಲ ಮೇಲೆ ತಾನೇ ಕಲ್ಲು ಹಾಕಿಕೊಂಡಂತಾಗಿತ್ತು.
ಇದನ್ನು ಓದಿದ್ದೀರಾ? ಕಪ್ಪು ಮೈಬಣ್ಣ ಭೇದಭಾವಕ್ಕೆ ಅತ್ಯುತ್ತಮ ಆಟವೇ ಪ್ರತ್ಯುತ್ತರ: ಅನುಭವ ತೋಡಿಕೊಂಡ ಟೆನಿಸ್ ದಿಗ್ಗಜ
ಈ ಗೊಂದಲಗಳು ಕೇವಲ ವಿದೇಶಾಂಗ ನೀತಿಗೆ ಸೀಮಿತವಾಗಿಲ್ಲ; ದೇಶದ ಆಂತರಿಕ ಆಡಳಿತದಲ್ಲೂ ಇದೇ ಅರಾಜಕತೆ ತುಂಬಿದೆ. ಉದಾಹರಣೆಗೆ, ‘ಸರ್ಕಾರಿ ದಕ್ಷತಾ ಇಲಾಖೆ'(DOGE- Department of Government Efficiency) ಹೆಸರಿನಲ್ಲಿ ಯಾವುದೇ ಸ್ಪಷ್ಟ ಕಾರಣವಿಲ್ಲದೆ ಸಾವಿರಾರು ಸರ್ಕಾರಿ ಉದ್ಯೋಗಿಗಳನ್ನು ವಜಾಗೊಳಿಸಲಾಯಿತು, ಆಮೇಲೆ ಮತ್ತೆ ಕೆಲವರನ್ನು ನೇಮಿಸಿಕೊಳ್ಳಲಾಯಿತು. ಇದರಿಂದಾಗಿ ಸರ್ಕಾರಿ ವೆಚ್ಚದಲ್ಲಿ ಹೇಳಿಕೊಳ್ಳುವಂತಹ ಕಡಿತವೇನೂ ಆಗಲಿಲ್ಲ, ಬದಲಿಗೆ ಇಡೀ ವ್ಯವಸ್ಥೆಯಲ್ಲಿ ಭಾರಿ ಅವ್ಯವಸ್ಥೆ ಮತ್ತು ಭಯದ ವಾತಾವರಣ ನಿರ್ಮಾಣವಾಯಿತು. ಇಂತಹ ಕ್ರಮಗಳು ಆಡಳಿತದ ದಿವಾಳಿತನವನ್ನು ಸ್ಪಷ್ಟವಾಗಿ ತೋರಿಸುತ್ತವೆ.
ಟ್ರಂಪ್ ಅವರ ನೀತಿಗಳು ಗಾಳಿಯ ದಿಕ್ಕಿಗೆ ತಕ್ಕಂತೆ ಬದಲಾಗುತ್ತಿವೆ. ‘ಇನ್ನು ಯಾವುದೇ ಯುದ್ಧಗಳಿಲ್ಲ’ ಎಂದು ಹೇಳುತ್ತಲೇ ಇರಾನ್ ವಿರುದ್ಧ ಯುದ್ಧ ಸಾರಿದರು. ವೆನೆಜುವೆಲಾ, ಗ್ರೀನ್‌ಲ್ಯಾಂಡ್, ಕ್ಯೂಬಾದಂತಹ ದೇಶಗಳ ಮೇಲೆ ಮಿಲಿಟರಿ ಬಲಪ್ರಯೋಗದ ಬೆದರಿಕೆ ಹಾಕಿದರು. ಉಕ್ರೇನ್ ವಿಚಾರದಲ್ಲಿ ಒಮ್ಮೆ ಬೆಂಬಲಿಸುವ, ಮತ್ತೊಮ್ಮೆ ವಿರೋಧಿಸುವ ದ್ವಂದ್ವ ನೀತಿ ಅನುಸರಿಸಿದರು. ಅಂತಾರಾಷ್ಟ್ರೀಯ ವ್ಯಾಪಾರದ ಮೇಲಿನ ಸುಂಕಗಳನ್ನು ತಮ್ಮ ಇಚ್ಛೆಯಂತೆ ಏರಿಸುವುದು ಮತ್ತು ಇಳಿಸುವುದು ಮಾಡಿದರು. ಗ್ಯಾಸ್ ಬೆಲೆಗಳ ಬಗ್ಗೆಯೂ ನಿರಂತರವಾಗಿ ಸುಳ್ಳು ಮತ್ತು ಗೊಂದಲದ ಹೇಳಿಕೆಗಳನ್ನು ನೀಡಿದರು.
ಯಾವುದೇ ಸಾಮಾನ್ಯ ಸರ್ಕಾರದಲ್ಲಿ ಒಂದು ನೀತಿಯನ್ನು ಜಾರಿಗೆ ತರುವ ಮುನ್ನ ಹಲವು ಇಲಾಖೆಗಳ ತಜ್ಞರಿಂದ ಮಾಹಿತಿ ಸಂಗ್ರಹಿಸಲಾಗುತ್ತದೆ. ರಕ್ಷಣೆ, ಗುಪ್ತಚರ, ಹಣಕಾಸು ಸೇರಿದಂತೆ ಹಲವು ಸಂಸ್ಥೆಗಳ ಅಭಿಪ್ರಾಯ ಕ್ರೋಢೀಕರಿಸಿ ಸಾಧಕ-ಬಾಧಕಗಳನ್ನು ಚರ್ಚಿಸಲಾಗುತ್ತದೆ. ಇದು ಸರ್ಕಾರದ ‘ಮೆದುಳಿನ’ ಯೋಚನಾ ಶಕ್ತಿಯಂತೆ (Prefrontal Cortex) ಕಾರ್ಯನಿರ್ವಹಿಸುತ್ತದೆ. ಆದರೆ ಟ್ರಂಪ್ ಅವರ ಎರಡನೇ ಅವಧಿಯಲ್ಲಿ ಈ ಎಲ್ಲ ಪ್ರಕ್ರಿಯೆಗಳನ್ನು ಮೂಲೆಗುಂಪು ಮಾಡಲಾಗಿದೆ. ತಜ್ಞರ ಮಾತುಗಳಿಗೆ ಬೆಲೆಯೇ ಇಲ್ಲದಂತಾಗಿದೆ. ಆಡಳಿತವು ಸಂಪೂರ್ಣವಾಗಿ ‘ಮಿದುಳಿಲ್ಲದ’ ರೀತಿಯಲ್ಲಿ ವರ್ತಿಸುತ್ತಿದೆ.
“ನಾನು ಇದರೊಂದಿಗೆ ಏನು ಬೇಕಾದರೂ ಮಾಡಬಲ್ಲೆ” ಎಂದು ಕ್ಯೂಬಾ ನೀತಿಯ ಬಗ್ಗೆ ಟ್ರಂಪ್ ನೀಡಿದ ಹೇಳಿಕೆಯೇ ಅವರ ಇಡೀ ಆಡಳಿತದ ಸರ್ವಾಧಿಕಾರಿ ಅಹಂಕಾರವನ್ನು ತೋರಿಸುತ್ತದೆ. ತಜ್ಞರು ಮತ್ತು ಸಾಂಸ್ಥಿಕ ನಿಯಮಗಳನ್ನು ಬದಿಗೊತ್ತಿ, ವಿವೇಚನಾರಹಿತವಾಗಿ ನಿರ್ಧಾರಗಳನ್ನು ಕೈಗೊಳ್ಳಲಾಗುತ್ತಿದೆ. ಹೋಮ್‌ಲ್ಯಾಂಡ್ ಸೆಕ್ಯುರಿಟಿ ಇಲಾಖೆಯಲ್ಲಾದ ಅವ್ಯವಸ್ಥೆ ಮತ್ತು ಕ್ರೂರ ನೀತಿಗಳಿಂದಾಗಿ ಅಮೆರಿಕದ ಬೀದಿಗಳಲ್ಲಿ ಇಬ್ಬರು ಪ್ರಜೆಗಳ ಹತ್ಯೆಯಾಯಿತು. ಸುಸಂಬದ್ಧ ನೀತಿ ಪ್ರಕ್ರಿಯೆ ಮರುಸ್ಥಾಪನೆಯಾಗುವವರೆಗೆ ಇಂತಹ ಅನಾಹುತಗಳು ಅನಿರೀಕ್ಷಿತವಾಗಿ ಸ್ಫೋಟಗೊಳ್ಳುತ್ತಲೇ ಇರುತ್ತವೆ.
ಅಮೆರಿಕದ ಈ ದುಸ್ಥಿತಿಯನ್ನು ಕಂಡು ಹಲವು ಅಂತಾರಾಷ್ಟ್ರೀಯ ಮಾಧ್ಯಮಗಳು ಮತ್ತು ರಾಜಕೀಯ ತಜ್ಞರು ದಂಗಾಗಿದ್ದಾರೆ. ಟ್ರಂಪ್ ಆಡಳಿತವನ್ನು ವಾಸ್ತವಿಕ ಚೌಕಟ್ಟಿನಲ್ಲಿ ಅರ್ಥಮಾಡಿಕೊಳ್ಳಲು ಅವರು ಹೆಣಗಾಡುತ್ತಿದ್ದಾರೆ. ಸದ್ಯಕ್ಕೆ ಅಮೆರಿಕದ ನ್ಯಾಯಾಲಯಗಳು, ಸಂಸತ್ತು (ಕಾಂಗ್ರೆಸ್) ಮತ್ತು ವಿರೋಧ ಪಕ್ಷದ (ಡೆಮಾಕ್ರಟಿಕ್) ಸರ್ಕಾರವಿರುವ ರಾಜ್ಯಗಳು ಮಾತ್ರ ಟ್ರಂಪ್ ಅವರ ಈ ವಿನಾಶಕಾರಿ ನಿರ್ಧಾರಗಳಿಗೆ ಸ್ವಲ್ಪ ಮಟ್ಟಿಗಾದರೂ ತಡೆ ನೀಡಲು ಪ್ರಯತ್ನಿಸುತ್ತಿವೆ. ಇಲ್ಲದಿದ್ದರೆ ಅಮೆರಿಕದ ಪರಿಸ್ಥಿತಿ ಇನ್ನಷ್ಟು ಶೋಚನೀಯವಾಗುತ್ತಿತ್ತು.
ಟ್ರಂಪ್ ಅವರ ಈ ಅಹಂಕಾರದ ಹುಚ್ಚಾಟಗಳು ಅಮೆರಿಕದ ಇತಿಹಾಸದಲ್ಲೇ ಒಂದು ಕರಾಳ ಅಧ್ಯಾಯವಾಗಿದೆ. ತಮ್ಮ ಅವಿವೇಕ, ಹುಂಬತನ ಮತ್ತು ಸರ್ವಾಧಿಕಾರಿ ಧೋರಣೆಯಿಂದ ಅವರು ದೇಶದ ಆಡಳಿತ ವ್ಯವಸ್ಥೆಯ ಭದ್ರ ಬುನಾದಿಯನ್ನೇ ಬುಡಮೇಲು ಮಾಡಿದ್ದಾರೆ. ಈ ‘ಟ್ರಂಪ್ ಯುಗ’ ಅಮೆರಿಕನ್ನರಿಗೆ ಮರೆಯಲಾಗದ ಕಟು ಸತ್ಯವೊಂದನ್ನು ಕಲಿಸಿದೆ: ದೇಶವನ್ನು ಮುನ್ನಡೆಸಲು ಕೇವಲ ಬಾಯಿಬಡಕತನವಿದ್ದರೆ ಸಾಲದು; ಬದಲಾಗಿ ನಾಯಕನಿಗೆ ಮಾನಸಿಕ ಸ್ಥಿರತೆ, ಘನತೆ ಮತ್ತು ಆಡಳಿತದ ಕನಿಷ್ಠ ಅರಿವಿರಬೇಕು.
ಟ್ರಂಪ್ ಆಡಳಿತದ ಈ ಯುಗ ಮುಕ್ತಾಯದ ಹಂತಕ್ಕೆ ಬರುತ್ತಿದ್ದಂತೆ, ಅಮೆರಿಕನ್ನರು ಎಂದಿಗೂ ಮರೆಯಬಾರದಿದ್ದ ಒಂದು ದೊಡ್ಡ ಪಾಠವನ್ನು ಈಗ ಮತ್ತೆ ಕಲಿಯುತ್ತಿದ್ದಾರೆ. ಸರ್ಕಾರಿ ವ್ಯವಸ್ಥೆಗಳಲ್ಲಿ ಲೋಪಗಳಿದ್ದರೆ ಅವುಗಳನ್ನು ಸುಧಾರಿಸಬೇಕೇ ಹೊರತು, ವ್ಯವಸ್ಥೆಯನ್ನೇ ಸಂಪೂರ್ಣವಾಗಿ ನಾಶ ಮಾಡಬಾರದು. ಒಂದು ಸುಭದ್ರ ಆಡಳಿತ ನೀಡಲು ಆತುರ ಮತ್ತು ಅಜ್ಞಾನದಿಂದ ವರ್ತಿಸುವ ನಾಯಕರ ಬದಲು, ನೈಪುಣ್ಯತೆ ಹಾಗೂ ಪ್ರತಿಯೊಂದು ವಿಚಾರದ ಬಗ್ಗೆಯೂ ಸೂಕ್ಷ್ಮ ಗಮನ ಹರಿಸುವ ನಾಯಕತ್ವದ ಅಗತ್ಯವಿದೆ.
ಎಲ್ಲಕ್ಕಿಂತ ಮಿಗಿಲಾಗಿ, ದೇಶವನ್ನು ಮುನ್ನಡೆಸುವ ನಾಯಕನಿಗೆ ‘ಉತ್ತಮ ವ್ಯಕ್ತಿತ್ವ ಮತ್ತು ಮಾನಸಿಕ ಸ್ಥಿರತೆ’ ಇರುವುದು ಜಗತ್ತಿನ ಯಾವುದೇ ದೇಶಕ್ಕಾದರೂ ಅತ್ಯಂತ ಮುಖ್ಯ ಎಂಬ ಕಟುಸತ್ಯವನ್ನು ಈ ಟ್ರಂಪ್ ಆಡಳಿತ ಮತ್ತೊಮ್ಮೆ ನೆನಪಿಸಿದೆ. ಟ್ರಂಪ್ ಅವರು ಅಮೆರಿಕದ ಪ್ರತಿಷ್ಠೆ ಮತ್ತು ಸಾಂಸ್ಥಿಕ ವ್ಯವಸ್ಥೆಗೆ ಮಾಡಿರುವ ಈ ಭೀಕರ ಹಾನಿಯನ್ನು ಸರಿಪಡಿಸಲು ಇನ್ನು ಹಲವು ತಲೆಮಾರುಗಳೇ ಒದ್ದಾಡಬೇಕಾಗಬಹುದು. ಟ್ರಂಪ್ ಅಮೆರಿಕದ ಪಾಲಿಗೆ ಕೇವಲ ಒಬ್ಬ ಕೆಟ್ಟ ಅಧ್ಯಕ್ಷರಷ್ಟೇ ಅಲ್ಲ, ಅದೊಂದು ಎಂದಿಗೂ ಮರೆಯಲಾಗದ ಐತಿಹಾಸಿಕ ದುರಂತ.
ಮಾಹಿತಿ: ನ್ಯೂಯಾರ್ಕ್‌ ಟೈಮ್ಸ್ ಹಾಗೂ ಅಂತಾರಾಷ್ಟ್ರೀಯ ವರದಿಗಳು
