ಜೂನ್ ತಿಂಗಳು ಆರಂಭವಾಗಿ ಏಳು ದಿನಗಳು ಕಳೆದರೂ ರಾಜ್ಯದ ಪ್ರಮುಖ ಜಲಾಶಯಗಳಲ್ಲಿ ಒಂದಾದ ವಿಜಯಪುರದ ಆಲಮಟ್ಟಿ ಲಾಲ್ ಬಹದ್ದೂರ್ ಶಾಸ್ತ್ರಿ ಜಲಾಶಯಕ್ಕೆ ನಿರೀಕ್ಷಿತ ಮಟ್ಟದಲ್ಲಿ ನೀರಿನ ಒಳಹರಿವು ಬಾರದಿರುವುದು, ಬೇಸಾಯಕ್ಕೆ ಜಲಾಶಯವನ್ನು ಅವಲಂಬಿಸಿರುವ ಕೃಷ್ಣಾ ತೀರದ ರೈತರ ಆತಂಕಕ್ಕೆ ಕಾರಣವಾಗಿದೆ.
ಸಾಮಾನ್ಯವಾಗಿ ಜೂನ್ ಮೊದಲ ವಾರದಲ್ಲೇ ಮಹಾರಾಷ್ಟ್ರ ಮತ್ತು ಉತ್ತರ ಕರ್ನಾಟಕದಲ್ಲಿ ಮುಂಗಾರು ಮಳೆ ಬಿರುಸುಗೊಂಡು, ಕೃಷ್ಣಾ ನದಿಯ ಮೂಲಕ ಆಲಮಟ್ಟಿ ಜಲಾಶಯಕ್ಕೆ ನೀರಿನ ಒಳಹರಿವು ಆರಂಭವಾಗುತ್ತಿತ್ತು. ಆದರೆ ಈ ಬಾರಿ ಸಮರ್ಪಕ ಮಳೆಯಾಗದ ಕಾರಣ ಜಲಾಶಯಕ್ಕೆ ನಿರೀಕ್ಷಿತ ಪ್ರಮಾಣದ ನೀರು ಇನ್ನೂ ಹರಿದು ಬಂದಿಲ್ಲ.
ಜೂನ್ 7 ಉತ್ತರ ಕರ್ನಾಟಕದ ರೈತರಿಗೆ ವಿಶೇಷ ದಿನವಾಗಿದೆ. ಸಾಮಾನ್ಯವಾಗಿ ಈ ವೇಳೆಗೆ ಮುಂಗಾರು ಚುರುಕುಗೊಂಡು ಕೃಷ್ಣಾ ನದಿಗೆ ನೀರಿನ ಹರಿವು ಹೆಚ್ಚಾಗಿ, ಜಲಾಶಯಗಳಿಗೆ ಒಳಹರಿವು ಆರಂಭವಾಗುತ್ತಿತ್ತು. ಇದು ಕೃಷ್ಣಾ ಅಚ್ಚುಕಟ್ಟು ಪ್ರದೇಶದ ರೈತರಲ್ಲಿ ಹೊಸ ಆಶಾಭಾವನೆ ಮೂಡಿಸುತ್ತಿತ್ತು. ಜುಲೈ ತಿಂಗಳ ಗುರುಪೂರ್ಣಿಮೆ ಅಥವಾ ಕಡ್ಲಿಗರ ಹುಣ್ಣಿಮೆಯ ವೇಳೆಗೆ ಜಲಾಶಯಗಳು ಭರ್ತಿಯ ಹಂತ ತಲುಪಿ, ರೈತರು ಬಾಗಿನ ಅರ್ಪಿಸಿ ಸಂಭ್ರಮಿಸುತ್ತಿದ್ದರು. ಆದರೆ, ಈ ವರ್ಷ ಮಳೆಯ ಕೊರತೆಯಿಂದ ಜೂನ್ ಮೊದಲ ವಾರ ಕಳೆದರೂ ಜಲಾಶಯಗಳಿಗೆ ನಿರೀಕ್ಷಿತ ಪ್ರಮಾಣದ ಒಳಹರಿವು ಆರಂಭವಾಗದೆ ರೈತರಲ್ಲಿ ಆತಂಕ ಮನೆ ಮಾಡಿದೆ.
ಆಲಮಟ್ಟಿ ಜಲಾಶಯಕ್ಕೆ ಮಹಾರಾಷ್ಟ್ರದ ಪಶ್ಚಿಮಘಟ್ಟ ಪ್ರದೇಶಗಳಲ್ಲಿ ಸುರಿಯುವ ಮಳೆಯೇ ಪ್ರಮುಖ ಆಸರೆಯಾಗುತ್ತದೆ. ರಾಜ್ಯದಲ್ಲಿ ಮಳೆಯಾಗದಿದ್ದರೂ ಕೃಷ್ಣಾ ನದಿ ಉಗಮ ಸ್ಥಾನ ಮಹಾಬಲೇಶ್ವರ ಸೇರಿದಂತೆ ಕೃಷ್ಣಾ ಜಲಾನಯನ ವ್ಯಾಪ್ತಿಯಲ್ಲಿ ಸುರಿವ ಮಳೆಯಿಂದಾಗಿ ಆಲಮಟ್ಟಿ ಜಲಾಶಯ ಭರ್ತಿಯಾಗುತ್ತಾ ಬಂದಿದೆ. ಅಲ್ಲಿ ಭಾರಿ ಪ್ರಮಾಣದಲ್ಲಿ ಮಳೆಯಾದಾಗ ಕೃಷ್ಣೆಯ ಉಪನದಿಗಳಾದ ಕೊಯ್ತಾ, ದೂದಗಂಗಾ, ವೇದಗಂಗಾ, ಘಟಪ್ರಭಾ ಸೇರಿದಂತೆ ನಾನಾ ನದಿಗಳು ತುಂಬಿ ಹರಿದು ಆಲಮಟ್ಟಿ ಜಲಾಶಯಕ್ಕೆ ಹೇರಳ ಪ್ರಮಾಣದಲ್ಲಿ ನೀರು ಬರುತ್ತದೆ.
ಅಲ್ಲದೇ ಕೆಲ ಬಾರಿ ಪ್ರವಾಹ ಕೂಡ ಉಂಟಾಗಿದೆ. ಆದರೆ, ಸದ್ಯ ಪಶ್ಚಿಮ ಘಟ್ಟಗಳಲ್ಲಿ ಮಳೆ ಬಾರದ ಕಾರಣ ಒಳಹರಿವು ಉಂಟಾಗಿಲ್ಲ. ಇದರಿಂದ ಕೃಷ್ಣಾನದಿ ತೀರದ ರೈತರು, ವಿಶೇಷವಾಗಿ ನೀರಾವರಿ ಆಧಾರಿತ ಬೆಳೆಗಳನ್ನು ಬೆಳೆಯುವವರು ಚಿಂತೆಗೆ ಒಳಗಾಗಿದ್ದಾರೆ.
519.60 ಮೀಟರ್ 123.081 ಟಿಎಂಸಿ ನೀರು ಸಂಗ್ರಹ ಸಾಮರ್ಥ್ಯದ ಆಲಮಟ್ಟಿ ಜಲಾಶಯದಲ್ಲಿಗ 508.39 ಮೀಟರ್ ಎತ್ತರದಲ್ಲಿ 22.888 ಟಿಎಂಸಿ ನೀರು ಸಂಗ್ರಹವಿತ್ತು. ಕೆರೆ ತುಂಬಲು ಸೇರಿದಂತೆ ಒಟ್ಟು 1,806 ಕ್ಯುಸೆಕ್ ಹೊರಹರಿವು ಇತ್ತು. 2025ರ ಜೂ.6ರಂದು 514.09 ಮೀಟರ್ ಎತ್ತರದಲ್ಲಿ 55.392 ನೀರು ಸಂಗ್ರಹವಿತ್ತು.5,885 ಕ್ಯುಸೆಕ್ ಒಳಹರಿವು ಇತ್ತು. ಕುಡಿವ ನೀರು ಸೇರಿದಂತೆ ಒಟ್ಟು 2,158 ಕ್ಯುಸೆಕ್ ಹೊರಹರಿವು ಇತ್ತು. 2025ಕ್ಕೆ ಹೋಲಿಸಿದರೆ ಈ ವರ್ಷ 32.504 ಟಿಎಂಸಿ ನೀರು ಕಡಿಮೆ ಇದೆ.
ಸದ್ಯ ಆಲಮಟ್ಟಿ ಜಲಾಶಯದಲ್ಲಿ ಸಂಗ್ರಹಗೊಂಡಿರುವ 22.888 ಟಿಎಂಸಿ ನೀರಿನಲ್ಲಿ ಡೆಡ್ ಸ್ಟೋರೇಜ್ 17.61 ಟಿಎಂಸಿ ಹೊರತು ಪಡಿಸಿ 5.268 ಟಿಎಂಸಿ ನೀರು ಬಳಸಬಹುದಾಗಿದೆ. ಈ ನೀರನ್ನು ಕೇವಲ ಕುಡಿವ ನೀರಿನ ಉದ್ದೇಶಕ್ಕೆ ಬಳಸಲಾಗುತ್ತದೆ.
ಜಲಾಶಯಕ್ಕೆ ಮೇ ಮತ್ತು ಜೂನ್ ತಿಂಗಳಲ್ಲಿ ಒಳಹರಿವು ಆರಂಭವಾಗುತ್ತದೆ. 2025ರಲ್ಲಿ ಮೇ 19ರಿಂದ ಒಳಹರಿವು ಆರಂಭಗೊಂಡಿತ್ತು. ಮೇ ತಿಂಗಳ ಮೂರನೇ ವಾರಕ್ಕೆ ಒಳಹರಿವು ಕಂಡು ಬಂದಿರುವುದು ಜಲಾಶಯ ಇತಿಹಾಸದಲ್ಲಿಯೇ ಅದು ಮೊದಲ ಬಾರಿಯಾಗಿತ್ತು.2022ರಲ್ಲಿ ಅಸಾನಿ ಚಂಡ ಮಾರುತದ ಪರಿಣಾಮ ಸುರಿದ ಮಳೆಯಿಂದಾಗಿ ಮೇ 21ಕ್ಕೆ ಒಳ ಹರಿವು ಹೆಚ್ಚಾದರೆ, 2021ರಲ್ಲಿ ತೌತೆ ಚಂಡ ಮಾರುತ ದಿಂದ ಮೇ 24ಕ್ಕೆ ಒಳಹರಿವು ಶುರುವಾಯಿತು.2020ರಲ್ಲಿ ಜೂ.5ಕ್ಕೆ ಆರಂಭ, 2019ರಲ್ಲಿ ಜು.3ರಂದು ಒಳಹರಿವು ಆರಂಭವಾಗಿತ್ತು.
ಈದಿನ. ಕಾಮ್ ಜೊತೆ ರೈತ ಮುಖಂಡ ಅರವಿಂದ ಕುಲಕರ್ಣಿ ಮಾತನಾಡಿ, ಈ ಬಾರಿ ಸಮರ್ಪಕವಾಗಿ ಮಳೆಯಾಗದ ಕಾರಣ ರೈತ ಸಮುದಾಯದಲ್ಲಿ ಆತಂಕ ಮನೆ ಮಾಡಿದೆ. ಕೃಷಿ ಚಟುವಟಿಕೆಗಳು ಮುಂಗಾರು ಮಳೆಯನ್ನೇ ಅವಲಂಬಿಸಿರುವುದರಿಂದ ಅನ್ನದಾತರು ವರುಣನ ಕೃಪೆಗಾಗಿ ಎದುರು ನೋಡುತ್ತಿದ್ದಾರೆ. ಆಲಮಟ್ಟಿ ಜಲಾಶಯಕ್ಕೂ ಇನ್ನೂ ನಿರೀಕ್ಷಿತ ಪ್ರಮಾಣದ ಒಳಹರಿವು ಆರಂಭವಾಗಿಲ್ಲ. ಶೀಘ್ರದಲ್ಲೇ ಉತ್ತಮ ಮಳೆಯಾಗಿ ಜಲಾಶಯಗಳು ತುಂಬಿ ರೈತರಲ್ಲಿ ಹೊಸ ಆಶಾಭಾವನೆ ಮೂಡಲಿ ಎಂಬ ನಿರೀಕ್ಷೆಯಿದೆ” ಎಂದು ಅಭಿಪ್ರಾಯಪಟ್ಟರು.
ರಮೇಶ ಎಸ್ ಹೊಸಮನಿ
ವಿಜಯಪುರ ಜಿಲ್ಲಾ ಸಂಯೋಜಕರು
