ಅಮೆರಿಕ ಮತ್ತು ಇಸ್ರೇಲ್ ನಡೆಸಿದ ದಾಳಿಯಲ್ಲಿ ಇರಾನ್‌ನ ಸರ್ವೋಚ್ಚ ನಾಯಕ ಅಯಾತುಲ್ಲಾ ಅಲಿ ಖಮೇನಿ ಹತ್ಯೆಯಾದ ಬಳಿಕ, ಹಿರಿಯ ಶಿಯಾ ಧರ್ಮಗುರು ಅಯಾತುಲ್ಲಾ ಅಲಿರೆಜಾ ಅರಾಫಿ ಅವರನ್ನು ಇರಾನ್‌ನ ಹಂಗಾಮಿ ಸರ್ವೋಚ್ಚ ನಾಯಕರನ್ನಾಗಿ ನೇಮಿಸಲಾಗಿದೆ ಎಂದು ಇರಾನ್‌ನ ಸರ್ಕಾರಿ ಮಾಧ್ಯಮ ‘ಐಆರ್‌ಎನ್‌ಎ’ ಇಂದು (ಭಾನುವಾರ) ವರದಿ ಮಾಡಿದೆ.
ಖಮೇನಿ ಅವರ ಉತ್ತರಾಧಿಕಾರಿಯ ಅಧಿಕೃತ ನೇಮಕವಾಗುವವರೆಗೆ ಸರ್ವೋಚ್ಚ ನಾಯಕನ ಜವಾಬ್ದಾರಿಗಳನ್ನು ನಿರ್ವಹಿಸಲು ತಾತ್ಕಾಲಿಕ ನಾಯಕತ್ವ ಮಂಡಳಿಯನ್ನು ರಚಿಸಲಾಗಿದೆ. 67 ವರ್ಷದ ಅರಾಫಿ ಅವರು ಇರಾನ್‌ನ ಪ್ರಭಾವಿ ‘ಗಾರ್ಡಿಯನ್ ಕೌನ್ಸಿಲ್’ನ ಸದಸ್ಯರಾಗಿದ್ದು, ಈ ತಾತ್ಕಾಲಿಕ ಮಂಡಳಿಯಲ್ಲಿ ನ್ಯಾಯಶಾಸ್ತ್ರಜ್ಞ ಸದಸ್ಯರಾಗಿ ಕಾರ್ಯನಿರ್ವಹಿಸಲಿದ್ದಾರೆ. ಈ ಹಂಗಾಮಿ ಮಂಡಳಿಯಲ್ಲಿ ಇರಾನ್ ಅಧ್ಯಕ್ಷ ಮಸೂದ್ ಪೆಜೆಶ್ಕಿಯಾನ್, ಮುಖ್ಯ ನ್ಯಾಯಮೂರ್ತಿ ಗುಲಾಮ್-ಹೊಸೇನ್ ಮೊಹ್ಸೇನಿ-ಎಜೆ ಮತ್ತು ಗಾರ್ಡಿಯನ್ ಕೌನ್ಸಿಲ್‌ನ ಮತ್ತೊಬ್ಬ ಧರ್ಮಗುರುಗಳು ಒಳಗೊಂಡಿದ್ದಾರೆ.
ಯಾರು ಈ ಅಯಾತುಲ್ಲಾ ಅಲಿರೆಜಾ ಅರಾಫಿ?
ಅರಾಫಿ ಅವರು 1959ರಲ್ಲಿ ಇರಾನ್‌ನ ಯಾಜ್ಡ್ ಪ್ರಾಂತ್ಯದ ಮೇಬೋಡ್‌ನಲ್ಲಿ ಧಾರ್ಮಿಕ ಹಿನ್ನೆಲೆಯ ಕುಟುಂಬದಲ್ಲಿ ಜನಿಸಿದರು. ಇರಾನ್‌ನ ಮೂಲಗಳ ಪ್ರಕಾರ, ಇವರ ವಂಶಾವಳಿಯು 19ನೇ ಶತಮಾನದಲ್ಲಿ ಇಸ್ಲಾಂ ಧರ್ಮಕ್ಕೆ ಮತಾಂತರಗೊಂಡ ಪಾರ್ಸಿ ಸಮುದಾಯಕ್ಕೆ ಸೇರಿದೆ. ಇವರ ತಂದೆ ಅಯಾತುಲ್ಲಾ (ಶೇಖ್ ಹಾಜಿ) ಮೊಹಮ್ಮದ್ ಇಬ್ರಾಹಿಂ ಅರಾಫಿ ಅವರು, 1979ರ ಕ್ರಾಂತಿಯ ನಂತರ ಇಸ್ಲಾಮಿಕ್ ಗಣರಾಜ್ಯದ ಸಂಸ್ಥಾಪಕರಾದ ರುಹೊಲ್ಲಾ ಖೊಮೇನಿ ಅವರ ಆಪ್ತರಾಗಿದ್ದರು ಎಂದು ಸರ್ಕಾರಿ ಮಾಧ್ಯಮಗಳು ತಿಳಿಸಿವೆ.
ಇದನ್ನು ಓದಿದ್ದೀರಾ? ತಾನೇ ಸಾಕಿದ ಗಿಣಿ ಹದ್ದಾಗಿ ಕುಕ್ಕಿತಲ್ಲೋ: ಅಫ್ಘಾನ್ ಜೊತೆ ಪಾಕ್ ದೋಸ್ತಿ ಹಳಸಿದ್ದೆಲ್ಲಿ?
ಖಮೇನಿ ಅವರಂತೆಯೇ ಇವರೂ ಸಹ ಹಿರಿಯ ಇಸ್ಲಾಮಿಕ್ ವಿದ್ವಾಂಸ (ಮುಜ್ತಾಹಿದ್) ಎಂಬುದನ್ನು ಸೂಚಿಸುವ ‘ಅಯಾತುಲ್ಲಾ’ ಎಂಬ ಬಿರುದನ್ನು ಹೊಂದಿದ್ದಾರೆ. ‘ಗಾರ್ಡಿಯನ್ ಕೌನ್ಸಿಲ್’ ಜೊತೆಗೆ, ಇವರು ‘ಅಸೆಂಬ್ಲಿ ಆಫ್ ಎಕ್ಸ್‌ಪರ್ಟ್ಸ್’ನ ಸದಸ್ಯರಾಗಿಯೂ ಕಾರ್ಯನಿರ್ವಹಿಸುತ್ತಿದ್ದಾರೆ. ಈ ಹಿಂದೆ ಅವರು ಈ ಅಸೆಂಬ್ಲಿಯ ಎರಡನೇ ಉಪಾಧ್ಯಕ್ಷರಾಗಿಯೂ ಸೇವೆ ಸಲ್ಲಿಸಿದ್ದಾರೆ.
ಇದಕ್ಕೂ ಮುನ್ನ ಅರಾಫಿ ಅವರು ‘ಅಲ್-ಮುಸ್ತಫಾ ಅಂತಾರಾಷ್ಟ್ರೀಯ ವಿಶ್ವವಿದ್ಯಾಲಯ’ದ ಅಧ್ಯಕ್ಷರಾಗಿದ್ದರು. ಅರೇಬಿಕ್ ಮತ್ತು ಇಂಗ್ಲಿಷ್ ಭಾಷೆಗಳಲ್ಲಿ ನಿರರ್ಗಳವಾಗಿ ಮಾತನಾಡುವ ಇವರು, ಇರಾನ್‌ನಲ್ಲಿ ಕೃತಕ ಬುದ್ಧಿಮತ್ತೆ ತಂತ್ರಜ್ಞಾನಕ್ಕೆ ಒಗ್ಗಿಕೊಳ್ಳುವ ಮತ್ತು ಅದನ್ನು ಅಳವಡಿಸಿಕೊಳ್ಳುವ ಅಗತ್ಯವನ್ನು ಪ್ರತಿಪಾದಿಸಿದವರಾಗಿದ್ದಾರೆ.
ಇರಾನ್‌ನ ಕ್ರಾಂತಿಕಾರಿ ಧರ್ಮಗುರುಗಳ ಮೊದಲ ತಲೆಮಾರು ತೆರೆಯಮರೆಗೆ ಸರಿಯುತ್ತಿರುವ ಈ ಸಂದರ್ಭದಲ್ಲಿ, ಇರಾನ್‌ನ ಬದಲಾಗುತ್ತಿರುವ ಅಧಿಕಾರ ರಚನೆಯಲ್ಲಿ ಉನ್ನತ ಸ್ಥಾನಕ್ಕೇರಲು ಅಗತ್ಯವಿರುವ ಅರ್ಹತೆ ಮತ್ತು ಸಂಪರ್ಕಗಳನ್ನು ಹೊಂದಿರುವ ಪ್ರಮುಖ ನಾಯಕರಾಗಿ ಅರಾಫಿ ಗುರುತಿಸಿಕೊಂಡಿದ್ದಾರೆ.
