- ಬೆಂಗಳೂರಿನ ಎಚ್ಎಸ್ಆರ್ ಲೇಔಟ್ನಲ್ಲಿದೆ ಜೈಲ್ ರೆಸ್ಟೋರೆಂಟ್
- ಪೊಲೀಸ್ ಹಾಗೂ ಖೈದಿಗಳ ರೀತಿ ಬಟ್ಟೆ ಧರಿಸಿದ ವೇಟರ್ಗಳಿಂದ ಸರ್ವ್
ರಾಜ್ಯ ರಾಜಧಾನಿ ಬೆಂಗಳೂರಿನಲ್ಲಿ ಒಂದಿಲ್ಲೊಂದು ವಿನೂತನ ಪ್ರಯೋಗ ನಡೆಯುತ್ತಿರುತ್ತದೆ. ಇದೀಗ ನಗರದಲ್ಲಿ ಜೈಲ್ ವಿನ್ಯಾಸ ಹೊಂದಿರುವಂತಹ ವಿಶಿಷ್ಟವಾದ ರೆಸ್ಟೋರೆಂಟ್ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ಬೆಂಗಳೂರಿನ ಎಚ್ಎಸ್ಆರ್ ಲೇಔಟ್ನಲ್ಲಿ ‘ಸೆಂಟ್ರಲ್ ಜೈಲ್ ರೆಸ್ಟೋರೆಂಟ್’ ಇದೆ. ಸಾಮಾನ್ಯವಾಗಿ ಇತರೇ ಹೋಟೆಲ್ ಅಥವಾ ರೆಸ್ಟೋರೆಂಟ್ಗಳಿಗೆ ಹೋದಾಗ ಅಲ್ಲಿ ಜಗಮಗಿಸುವ ಲೈಟ್ಗಳು, ಅಲಂಕಾರ, ಚಿತ್ತಾರ ಕಣ್ಣಿಗೆ ಆನಂದ ನೀಡುವಂತಹ ರಚನೆ ಸಾಮಾನ್ಯವಾಗಿ ಎಲ್ಲ ಹೊಟೇಲ್ಗಳಲ್ಲಿಯೂ ಇರುತ್ತದೆ. ಆದರೆ, ಈ ಒಂದು ಹೋಟೆಲ್ಗೆ ಹೋದರೆ ಜೈಲಿನ ಒಳಗಡೆ ಹೋದ ಹಾಗೆ ಭಾಸವಾಗುತ್ತದೆ.
ಈ ಹೋಟೆಲ್ ಅನ್ನು ಸಂಪೂರ್ಣವಾಗಿ ಜೈಲಿನ ರೀತಿ ನಿರ್ಮಾಣ ಮಾಡಿದ್ದು, ಹೊರಗಡೆ ಮುಖ್ಯ ದ್ವಾರದಲ್ಲಿ ಸೆಂಟ್ರಲ್ ಜೈಲ್ ಎಂದು ಬರೆಯಲಾಗಿದೆ. ರೆಸ್ಟೋರೆಂಟ್ ಒಳಗಡೆ ಹೋದರೆ ಸಂಪೂರ್ಣವಾಗಿ ಜೈಲಿನ ರೀತಿ ರಚನೆ ಮಾಡಿದ್ದಾರೆ. ಪೊಲೀಸ್ ಹಾಗೂ ಖೈದಿಗಳ ರೀತಿ ಬಟ್ಟೆ ಧರಿಸಿದ ವೇಟರ್ಗಳು ಸರ್ವ್ ಮಾಡುತ್ತಿದ್ದಾರೆ. ಜೈಲಿನಲ್ಲಿ ಬಳಸುವ ಹಾಗೇ ಸಿಲ್ವರ್ ತಟ್ಟೆ ಹಾಗೂ ಸಿಲ್ವರ್ ಪಾತ್ರೆಗಳಲ್ಲಿಯೇ ಊಟವನ್ನು ನೀಡುತ್ತಾರೆ. ರೆಸ್ಟೋರೆಂಟ್ನಲ್ಲಿ ಒಳಗಡೆ ಜೈಲು ಕಂಬಿಗಳಿದ್ದು, ಅಲ್ಲಿಯೇ ಊಟ ಮಾಡಬೇಕು.
ಉದ್ಯಮಿ ಹರ್ಷ್ ಗೋಯೆಂಕಾ ಎಂಬವರು ವಿಡಿಯೋವನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ. ಈ ವಿಡಿಯೋ ವೈರಲ್ ಆಗಿದೆ.