ಅಯೋಧ್ಯೆಯ ರಾಮಮಂದಿರದಲ್ಲಿ ನಡೆದಿರುವ ಹುಂಡಿ ಲೂಟಿಯನ್ನು ಬಾಲಿವುಡ್ ನಟ ಅನುಪಮ್ ಖೇರ್ ಸಮರ್ಥಿಸಿಕೊಂಡಿದ್ದಾರೆ. ‘ಇದೊಂದು ಮಾಮೂಲಿ ವಿಚಾರ’ ಎಂದಿದ್ದಾರೆ. ಅವರ ಹೇಳಿಕೆ ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ. ನೆಟ್ಟಿಗರು ಅವರನ್ನು ವ್ಯಾಪಕವಾಗಿ ಟ್ರೋಲ್ ಮಾಡುತ್ತಿದ್ದಾರೆ.
ಇತ್ತೀಚೆಗೆ ಮಾಧ್ಯಮವೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಅನುಪಮ್ ಖೇರ್, “ರಾಮ ಮಂದಿರದಲ್ಲಿ ನಡೆದಿರುವ ಅಕ್ರಮವು ‘ಬಹಳ ಸಣ್ಣ ವಿಷಯ’. ಹಿಂದೆ ಮುಘಲರು ನಮ್ಮ ದೇಶವನ್ನು ಲೂಟಿ ಮಾಡಿ, ದೌರ್ಜನ್ಯ ಎಸಗಿದ್ದರಲ್ಲವೇ? ಆ ಮಹಾ ಲೂಟಿಗೆ ಹೋಲಿಸಿದರೆ ಈ ಕಳವು ಅತ್ಯಂತ ಕ್ಷುಲ್ಲಕ ಮತ್ತು ಸಣ್ಣ ಸಂಗತಿ” ಎಂದಿದ್ದಾರೆ.
“ಕ್ಷುಲ್ಲರ ವಿಚಾರವನ್ನು‌ಜನರು ಇದನ್ನು ದೊಡ್ಡ ವಿಷಯ ಮಾಡುತ್ತಿದ್ದಾರೆ. ಮಂದಿರದಲ್ಲಿ ಲೂಟಿ ನಡೆಯುತ್ತಿದೆ ಎನ್ನುತ್ತಿದ್ದಾರೆ. ನಿಜವಾದ ಲೂಟಿ ನಡೆದಿದ್ದು ಮುಘಲರ ಕಾಲದಲ್ಲಿ. ಅವರು ನಮ್ಮ ಮಂದಿರಗಳನ್ನು ಧ್ವಂಸಗೊಳಿಸಿದರು, ಬ್ರಾಹ್ಮಣರನ್ನು ಕೊಂದರು. ಇತಿಹಾಸದ ಆ ದೊಡ್ಡ ಕರಾಳ ದಿನಗಳಿಂದಲೇ ದೇಶ ಹೊರಬಂದಿರುವಾಗ, ಈ ಕಳವು ಒಂದು ದೊಡ್ಡ ಸಮಸ್ಯೆಯೇ ಅಲ್ಲ” ಎಂದು ಖೇರ್ ತರ್ಕಿಸಿದ್ದಾರೆ.
ಈ ಸಂದರ್ಶನದ ವಿಡಿಯೋ ಎಕ್ಸ್‌ನಲ್ಲಿ ವೈರಲ್ ಆಗಿದೆ. ನೆಟ್ಟಿಗರು ನಟ ಖೇರ್ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಬಳಕೆದಾರೊಬ್ಬರು, “ಅನುಪಮ್ ಜಿ, 1000 ವರ್ಷಗಳ ಹಿಂದಿನ ಇತಿಹಾಸದ ಉದಾಹರಣೆ ನೀಡಿ ಇಂದಿನ ತಪ್ಪುಗಳನ್ನು ಸಮರ್ಥಿಸಿಕೊಳ್ಳುವುದು ಎಷ್ಟು ಸರಿ? ಯಾರಾದರೂ ನಿಮ್ಮ ಮನೆ ಲೂಟಿ ಮಾಡಿ ನಿಮಗೆ ಭಾವನಾತ್ಮಕವಾಗಿ ಧಕ್ಕೆ ತಂದರೆ, ಅದನ್ನು ಕೇವಲ ಆಸೆಯೆಂದು ಬಿಟ್ಟುಬಿಡಲು ಸಾಧ್ಯವೇ?” ಎಂದು ಪ್ರಶ್ನಿಸಿದ್ದಾರೆ.
ಮತ್ತೊಬ್ಬರು, “ಆಡಳಿತ ಪಕ್ಷದ ತಪ್ಪುಗಳನ್ನು ಮತ್ತು ಭ್ರಷ್ಟಾಚಾರವನ್ನು ಮುಚ್ಚಿಡಲು ಪ್ರತಿಯೊಂದಕ್ಕೂ ಮುಘಲರ ಹೆಸರನ್ನು ಎಳೆದು ತರುವುದನ್ನು ನಿಲ್ಲಿಸಿ. ಮಂತ್ರಿಗಳು ಮತ್ತು ಅವರ ಬೆಂಬಲಿಗರ ದುರಾಸೆ ರಸ್ತೆಗಳಿಂದ ಹಿಡಿದು ಮಂದಿರದ ದಾನದವರೆಗೂ ಸ್ಪಷ್ಟವಾಗಿ ಕಾಣಿಸುತ್ತಿದ್ದರೂ, ಸರ್ಕಾರವನ್ನು ಸಮರ್ಥಿಸಿಕೊಳ್ಳುವ ಅನಿವಾರ್ಯತೆ ನಿಮಗೇಕೆ?” ಎಂದು ತರಾಟೆಗೆ ತೆಗೆದುಕೊಂಡಿದ್ದಾರೆ.
ವಿವಾದದ ಬೆನ್ನಲ್ಲೇ ಮಾರ್ಮಿಕ ಪೋಸ್ಟ್ ಹಾಕಿದ ನಟ ಅನುಪಮ್ ಖೇರ್, “ಒಬ್ಬ ಪ್ರಾಮಾಣಿಕ ವ್ಯಕ್ತಿಯ ಅತಿ ದೊಡ್ಡ ಆಸ್ತಿ ಆತನ ನಿರ್ಭಯತ್ವ. ಮನಸ್ಸಿನಲ್ಲಿ ಕಳ್ಳತನವಿಲ್ಲದವನ ಕಣ್ಣುಗಳು ಎಂದಿಗೂ ತಗ್ಗುವುದಿಲ್ಲ” ಎಂದು ಬರೆದುಕೊಂಡಿದ್ದಾರೆ.
ರಾಮಮಂದಿರ ಲೂಟಿ ಪ್ರಕರಣದಲ್ಲಿ ಜೂನ್ 7ರಂದು ಬೆಳಕಿಗೆ ಬಂದಿತ್ತು. ಪ್ರಕರಣವನ್ನು ವಿಶೇಷ ತನಿಖಾ ತಂಡ (SIT) ತನಿಖೆ‌ನಡೆಸುತ್ತಿದೆ. ಜೂನ್ 25 ರಂದು ಅಧಿಕೃತವಾಗಿ ಎಫ್‌ಐಆರ್ ದಾಖಲಾಗಿದ್ದು, ಪ್ರಕರಣಕ್ಕೆ ಸಂಬಂಧಿಸಿದಂತೆ ಈಗಾಗಲೇ ಎಂಟು ಮಂದಿಯನ್ನು ಬಂಧಿಸಲಾಗಿದೆ.
