ಮೂರು ವರ್ಷಗಳಿಂದ ಸಿದ್ಧತೆಯ ಹಂತದಲ್ಲಿದ್ದ ʼಡಾನ್ 3ʼ ಚಿತ್ರದಿಂದ ಕೊನೆಯ ಕ್ಷಣದಲ್ಲಿ ಹಿಂದೆ ಸರಿದು, ಕೋಟ್ಯಂತರ ರೂ ನಷ್ಟ ಉಂಟಾಗಿರುವ ಆರೋಪದ ಮೇಲೆ ಬಾಲಿವುಡ್ ನಟ ರಣವೀರ್ ಸಿಂಗ್‌ರನ್ನು ಫೆಡರೇಶನ್‌ ಆಫ್ ವೆಸ್ಟರ್ನ್‌ ಇಂಡಿಯಾ ಸಿನಿ ಎಂಪ್ಲಾಯೀಸ್‌ (FWICE) ಚಿತ್ರರಂಗದಿಂದ ದೂರವಿಡುವ ನಿರ್ಧಾರ ಕೈಗೊಂಡಿದೆ. ಸಿನಿ ಕೆಲಸಗಳಿಂದ ದೂರವಿಡುವ FWICE ನಿರ್ಧಾರಕ್ಕೆ ಕಾನೂನು ಏನು ಹೇಳುತ್ತದೆ? ಒಂದು ವೇಳೆ ಚಿತ್ರರಂಗದಿಂದ ಬ್ಯಾನ್ ಆದರೆ, ನಟ ರಣವೀರ್ ಸಿಂಗ್ ಅವರ ಮುಂದಿನ ನಡೆ ಏನಿರಬಹುದು? ಎಂಬುದು ಸದ್ಯದ ಕುತೂಹಲ.
ಏನಿದು ವಿವಾದ?
ಆಗಸ್ಟ್ 2023ರಲ್ಲಿ, ನಿರ್ಮಾಪಕ ಫರ್ಹಾನ್ ಅಖ್ತರ್ ಮತ್ತು ರಿತೇಶ್ ಸಿಧ್ವಾನಿ ಅವರ ‘ಎಕ್ಸೆಲ್ ಎಂಟರ್ಟೈನ್‌ಮೆಂಟ್’ ಸಂಸ್ಥೆ ರಣವೀರ್ ಸಿಂಗ್ ಮುಖ್ಯ ಭೂಮಿಕೆಯಲ್ಲಿ ‘ಡಾನ್ 3’ ಚಿತ್ರವನ್ನು ಘೋಷಿಸಿತ್ತು. ಆದರೆ, ಡಿಸೆಂಬರ್ 2025ರಲ್ಲಿ ರಣವೀರ್ ಸಿಂಗ್ ಈ ಚಿತ್ರದಿಂದ ಹೊರನಡೆದರು.
ರಣವೀರ್ ಸಿಂಗ್ ವಾದ
ಕಳೆದ ಎರಡು ವರ್ಷಗಳಿಂದ ಚಿತ್ರಕಥೆ ಅಂತಿಮವಾಗಿರಲಿಲ್ಲ ಮತ್ತು ಸೃಜನಾತ್ಮಕವಾಗಿ ಅಸಮಾಧಾನವಿತ್ತು. ಆರಂಭದಲ್ಲಿ ಭರವಸೆ ನೀಡಿದಷ್ಟು ದೊಡ್ಡ ಮಟ್ಟದಲ್ಲಿ ಸಿನಿಮಾ ಮೂಡಿಬರುತ್ತಿರಲಿಲ್ಲ. ಯಾವುದೇ ಮುಂಗಡ ಹಣ ಸಿಕ್ಕಿರಲಿಲ್ಲ ಮತ್ತು ಇತರ ಸಿನಿಮಾಗಳನ್ನು ಕೈಬಿಟ್ಟಿದ್ದಕ್ಕೆ ಪರಿಹಾರ ನೀಡಿರಲಿಲ್ಲ ಎಂಬುದು ಸಿನೆಮಾದಿಂದ ಹೊರನಡೆದಿದ್ದಕ್ಕೆ ನಟ ರಣವೀರ್ ಕೊಟ್ಟ ಕಾರಣ.
ಎಕ್ಸೆಲ್ ಎಂಟರ್ಟೈನ್‌ಮೆಂಟ್ ವಾದ
ಚಿತ್ರಕಥೆಯನ್ನು ಹಂತಹಂತವಾಗಿ ಹಂಚಿಕೊಳ್ಳಲಾಗಿತ್ತು ಮತ್ತು ರಣವೀರ್ ಪ್ರತಿ ಹಂತಕ್ಕೂ ಒಪ್ಪಿಗೆ ನೀಡಿದ್ದರು. ನಟನ ಹಠಾತ್ ನಿರ್ಗಮನದಿಂದಾಗಿ ಅಂತಾರಾಷ್ಟ್ರೀಯ ಲೊಕೇಶನ್ ಹುಡುಕಾಟ, ಹೋಟೆಲ್ ಬುಕಿಂಗ್ ಸೇರಿದಂತೆ ಇಲಾಖಾ ವೆಚ್ಚಗಳ ರೂಪದಲ್ಲಿ ರೂ. 45 ಕೋಟಿ ನಷ್ಟವಾಗಿದೆ. ಇದನ್ನು ರಣವೀರ್ ಅವರೇ ಭರಿಸಬೇಕು ಎಂಬುದು ನಿರ್ಮಾಪಕರ ವಾದ.
ಈ ವಿಷಯ FWICE ಗೆ ತಲುಪಿದ್ದು ಹೇಗೆ?
ಮೊದಲು ಈ ವಿವಾದವನ್ನು ‘ಪ್ರೊಡ್ಯೂಸರ್ಸ್ ಗಿಲ್ಡ್ ಆಫ್ ಇಂಡಿಯಾ’ ಮತ್ತು ‘ಇಂಡಿಯನ್ ಫಿಲ್ಮ್ ಅಂಡ್ ಟೆಲಿವಿಷನ್ ಡೈರೆಕ್ಟರ್ಸ್ ಅಸೋಸಿಯೇಷನ್’ (IFTDA) ಗೆ ತಲುಪಿಸಲಾಗಿತ್ತು. IFTDA ಇದು FWICE ನ ಅಂಗಸಂಸ್ಥೆಯಾಗಿರುವುದರಿಂದ, ವಿಷಯವು ಮುಖ್ಯ ಒಕ್ಕೂಟಕ್ಕೆ ತಲುಪಿತು.
ಮೇ.25ರಂದು ಮುಂಬೈನಲ್ಲಿ ಪತ್ರಿಕಾಗೋಷ್ಠಿ ನಡೆಸಿದ FWICE, ರಣವೀರ್ ಸಿಂಗ್ ಅವರಿಗೆ ಹಲವು ಬಾರಿ ನೋಟಿಸ್ ನೀಡಿದರೂ ಅವರು ಪ್ರತಿಕ್ರಿಯಿಸಲಿಲ್ಲ ಎಂದು ಆರೋಪಿಸಿತು. ರಣವೀರ್ ಅವರ ಕಾರ್ಯದರ್ಶಿ ಇಮೇಲ್ ಮೂಲಕ “ಈ ವಿಷಯದಲ್ಲಿ FWICE ಗೆ ಯಾವುದೇ ಅಧಿಕಾರ ವ್ಯಾಪ್ತಿ ಇಲ್ಲ” ಎಂದು ತಿಳಿಸಿದ್ದರು. ಇದರಿಂದ ಅಸಮಾಧಾನಗೊಂಡ FWICE, ತನ್ನ ಅಡಿಯಲ್ಲಿರುವ ಎಲ್ಲಾ 32 ತಂತ್ರಜ್ಞರ ಒಕ್ಕೂಟಗಳಿಗೆ (ಲೈಟ್‌ಮ್ಯಾನ್, ಸ್ಪಾಟ್ ಬಾಯ್ಸ್ ಸೇರಿದಂತೆ) ರಣವೀರ್ ಸಿಂಗ್ ಜೊತೆ ಸಹಕರಿಸದಂತೆ ನಿರ್ದೇಶನ ನೀಡಿತು.
ಕಾನೂನು ವಿಶ್ಲೇಷಣೆ: ಈ ನಿಷೇಧ ಎಷ್ಟು ಬದ್ಧವಾಗಿದೆ?
TOI ವರದಿ ಮಾಡಿರುವಂತೆ, ಭಾರತದ ಸುಪ್ರೀಂ ಕೋರ್ಟ್‌ ಹಿರಿಯ ವಕೀಲ ಮತ್ತು ಸಾಂವಿಧಾನಿಕ ತಜ್ಞ ವಿವೇಕ್ ನಾರಾಯಣ್ ಶರ್ಮಾ ಅವರ ಪ್ರಕಾರ, FWICE ನಿರ್ದೇಶನ ಕಾನೂನುಬದ್ಧವಾಗಿಲ್ಲ. FWICE ಒಂದು ಕಾರ್ಮಿಕ ಸಂಘವೇ ಹೊರತು ನ್ಯಾಯಾಂಗ ಸಂಸ್ಥೆಯಲ್ಲ. ಅದಕ್ಕೆ ಯಾರನ್ನೂ ಕಾನೂನುಬದ್ಧವಾಗಿ ನಿಷೇಧಿಸುವ ಅಧಿಕಾರವಿಲ್ಲ. ಇದು ಕೇವಲ ಅವರ ಒಕ್ಕೂಟದ ಆಂತರಿಕ ನಿರ್ಧಾರವಾಗಿದೆ. ಆದರೆ ಪ್ರಾಯೋಗಿಕವಾಗಿ, FWICE ಅಡಿಯಲ್ಲಿ 4 ಲಕ್ಷಕ್ಕೂ ಹೆಚ್ಚು ಸದಸ್ಯರಿರುವುದರಿಂದ, ತಂತ್ರಜ್ಞರು ಕೆಲಸ ನಿಲ್ಲಿಸಿದರೆ ರಣವೀರ್ ಅವರ ಸಿನಿಮಾಗಳ ಚಿತ್ರೀಕರಣ ಕಷ್ಟವಾಗಬಹುದು. ಅಂದರೆ ಇದಕ್ಕೆ ಕಾನೂನಿನ ಹಲ್ಲಿಲ್ಲದಿದ್ದರೂ, ಚಿತ್ರರಂಗದಲ್ಲಿ ಬಲವಾದ ಸ್ನಾಯುಶಕ್ತಿ ಇದೆ.
“ಈ ವಿವಾದ FWICE ವ್ಯಾಪ್ತಿಗೆ ಬರುವುದಿಲ್ಲ. ರಣವೀರ್ ಸಿಂಗ್ ಮತ್ತು ಎಕ್ಸೆಲ್ ಎಂಟರ್ಟೈನ್‌ಮೆಂಟ್ ನಡುವಿನ ವಿವಾದವು ಸಿವಿಲ್ ಅಥವಾ ವಾಣಿಜ್ಯ ಒಪ್ಪಂದಕ್ಕೆ ಸಂಬಂಧಿಸಿದ್ದಾಗಿದೆ. ರಣವೀರ್ ಅವರು FWICE ನ ಸದಸ್ಯರಾಗಲಿ ಅಥವಾ ಉದ್ಯೋಗಿಯಾಗಲಿ ಅಲ್ಲ. ಅವರು ಒಬ್ಬ ಸ್ವತಂತ್ರ ಗುತ್ತಿಗೆದಾರ. ಆದ್ದರಿಂದ ರಣವೀರ್ ತಂಡದ ವಾದ ಕಾನೂನುಬದ್ಧವಾಗಿ ಸರಿಯಾಗಿದೆ”
ರಣವೀರ್ ಸಿಂಗ್ ಇದನ್ನು ನ್ಯಾಯಾಲಯದಲ್ಲಿ ಎದುರಿಸಬಹುದು. ಅವರು ಬಾಂಬೆ ಹೈಕೋರ್ಟ್ ಮೆಟ್ಟಿಲೇರಲು ಕೂಡ ಬಲವಾದ ಕಾರಣಗಳಿವೆ. ಯಾವುದೇ ವ್ಯಕ್ತಿಯನ್ನು ಅವರ ವೃತ್ತಿಯಿಂದ ದೂರವಿಡುವ ಅಥವಾ ಕಪ್ಪುಪಟ್ಟಿಗೆ ಸೇರಿಸುವ ನಿರ್ದೇಶನವನ್ನು ಸಂವಿಧಾನದ ಮೂಲಭೂತ ಹಕ್ಕಿನ ಉಲ್ಲಂಘನೆ ಎಂದು ಸವಾಲು ಮಾಡಬಹುದು. FWICE ಕೇವಲ ನಿರ್ಮಾಪಕರ ವಾದವನ್ನು ಕೇಳಿ ಈ ನಿರ್ಧಾರ ತಳೆದಿದೆ. ಎದುರು ಪಾರ್ಟಿಯ ವಾದ ಆಲಿಸದೆ ಕೈಗೊಳ್ಳುವ ಇಂತಹ ಕ್ರಮಗಳು ಕೋರ್ಟ್‌ನಲ್ಲಿ ನಿಲ್ಲುವುದಿಲ್ಲ. ಯಾವುದೇ ವ್ಯಕ್ತಿಯ ಕಾನೂನುಬದ್ಧ ವೃತ್ತಿ ಅಥವಾ ವ್ಯವಹಾರವನ್ನು ತಡೆಯುವ ಒಪ್ಪಂದಗಳು ಅಸಿಂಧು ಎಂದು ಈ ಕಾಯ್ದೆ ಹೇಳುತ್ತದೆ. ಹೀಗಾಗಿ ಈ ವಿವಾದದಲ್ಲಿ ರಣವೀರ್ ಅವರ ವಾದ ಬಲವಾಗಿ ನಿಂತು ನಿರ್ಮಾಪಕರಿಗೆ ಹಿನ್ನಡೆಯಾಗುವ ಸಾಧ್ಯತೆಗಳು ಬಹಳಷ್ಟಿವೆ ಎಂದಿದ್ದಾರೆ.
ರೂ. 45 ಕೋಟಿ ನಷ್ಟ ಪರಿಹಾರದ ಕ್ಲೈಮ್ ಕಥೆಯೇನು?
ಎಕ್ಸೆಲ್ ಎಂಟರ್ಟೈನ್‌ಮೆಂಟ್‌ನ ರೂ. 45 ಕೋಟಿ ನಷ್ಟದ ದಾವೆ ಅಷ್ಟು ಸುಲಭವಲ್ಲ. ರಣವೀರ್ ಸಿಂಗ್ ಅವರು ‘ಅಂತಿಮ ಚಿತ್ರಕಥೆ ಸಿಕ್ಕಿರಲಿಲ್ಲ’ ಎಂದು ಸಾಬೀತುಪಡಿಸಿದರೆ, ಅದನ್ನು ಒಪ್ಪಂದದ ಉಲ್ಲಂಘನೆ ಎಂದು ಕರೆಯಲು ಸಾಧ್ಯವಿಲ್ಲ. ಒಪ್ಪಂದ ಕಾಯ್ದೆಯ ಸೆಕ್ಷನ್ 73 ರ ಪ್ರಕಾರ, ನಷ್ಟ ಅನುಭವಿಸಿದ ಸಂಸ್ಥೆಯು ತಾನು ಮಾಡಿದ ಖರ್ಚುಗಳು ನ್ಯಾಯಸಮ್ಮತವಾಗಿದ್ದವು ಎಂಬುದನ್ನು ನ್ಯಾಯಾಲಯದಲ್ಲಿ ಸಾಬೀತುಪಡಿಸಬೇಕಾಗುತ್ತದೆ.
ಒಂದು ವೇಳೆ ಈ ಅಸಹಕಾರ ನಿರ್ದೇಶನದಿಂದಾಗಿ ರಣವೀರ್ ಸಿಂಗ್ ಅವರಿಗೆ ಆರ್ಥಿಕ ನಷ್ಟ ಉಂಟಾದರೆ, ಉಲ್ಟಾ ರಣವೀರ್ ಅವರೇ FWICE ಮತ್ತು ಅದರ ಪದಾಧಿಕಾರಿಗಳ ವಿರುದ್ಧ ನಷ್ಟ ಪರಿಹಾರ ಕೋರಿ ನ್ಯಾಯಾಲಯದಲ್ಲಿ ದಾವೆ ಹೂಡಬಹುದು.
FWICE ಕೈಗೊಂಡಿರುವ ‘ಅಸಹಕಾರ’ ನಿರ್ಧಾರಕ್ಕೆ ಕಾನೂನಿನ ಮಾನ್ಯತೆ ಇಲ್ಲದಿದ್ದರೂ, ಅದರ 4 ಲಕ್ಷ ಕಾರ್ಮಿಕರ ಬಲದಿಂದಾಗಿ ರಣವೀರ್ ಸಿಂಗ್ ಅವರ ಮುಂದಿನ ಚಿತ್ರಗಳ ಚಿತ್ರೀಕರಣ ಸ್ಥಗಿತಗೊಳ್ಳುವ ಭೀತಿ ಎದುರಾಗಿದೆ. ಇದು ಅವರೊಂದಿಗೆ ಸಿನಿಮಾ ಮಾಡುತ್ತಿರುವ ಇತರ ನಿರ್ಮಾಪಕರಿಗೂ ಆರ್ಥಿಕ ನಷ್ಟ ತರಬಹುದು. ನ್ಯಾಯಾಲಯದಲ್ಲಿ ಸುದೀರ್ಘ ಹೋರಾಟ ನಡೆಸುವುದರಿಂದ ಚಿತ್ರದ ನಿರ್ಮಾಪಕರಿಗಾಗಲಿ, ನಟನಿಗಾಗಲಿ ಅಥವಾ ಚಿತ್ರರಂಗದ ಕಾರ್ಮಿಕರಿಗಾಗಲಿ ಯಾವುದೇ ತಕ್ಷಣದ ಲಾಭವಿಲ್ಲ. ಆದ್ದರಿಂದ, ಕಾನೂನು ಹೋರಾಟದ ಜೊತೆಜೊತೆಗೇ ಪ್ರೊಡ್ಯೂಸರ್ಸ್ ಗಿಲ್ಡ್ ಅಥವಾ ಹಿರಿಯ ಚಿತ್ರರಂಗದ ಗಣ್ಯರ ಮಧ್ಯಸ್ಥಿಕೆಯಲ್ಲಿ ರೂ. 45 ಕೋಟಿ ನಷ್ಟದ ಮೊತ್ತವನ್ನು ಸರಿಹೊಂದಿಸಿ, ವಿವಾದವನ್ನು ಸೌಹಾರ್ದಯುತವಾಗಿ ಬಗೆಹರಿಸಿಕೊಳ್ಳುವುದೇ ಅತ್ಯಂತ ಪ್ರಾಯೋಗಿಕ ಮತ್ತು ಸೂಕ್ತ ಮಾರ್ಗ. ಈ ಪ್ರಕರಣ ಮುಂಬರುವ ದಿನಗಳಲ್ಲಿ ಬಾಲಿವುಡ್ ತಾರೆಗಳು ಮತ್ತು ನಿರ್ಮಾಣ ಸಂಸ್ಥೆಗಳ ನಡುವಿನ ಲಿಖಿತ ಒಪ್ಪಂದಗಳು ಹಾಗೂ ಚಿತ್ರಕಥೆಗಳ ಅಂತಿಮಗೊಳಿಸುವಿಕೆಯ ಪ್ರಕ್ರಿಯೆಗೆ ಹೊಸದೊಂದು ಕಾನೂನು ಚೌಕಟ್ಟನ್ನು ರೂಪಿಸುವುದರಲ್ಲಿ ಸಂಶಯವಿಲ್ಲ.
