ಜಮೀನಿನ ಪಹಣಿ ಅಥವಾ ಖಾತೆ ಬದಲಾವಣೆಗಾಗಿ (ಮ್ಯುಟೇಶನ್) ರೈತರು ಕಂದಾಯ ಕಚೇರಿಗಳಿಗೆ ಅಲೆಯುವ ಮತ್ತು ಅಧಿಕಾರಿಗಳ ಸಹಿಗಾಗಿ ಕಾಯುವ ದಿನಗಳು ಇನ್ನು ಮುಗಿಯಲಿವೆ. ಸರ್ಕಾರದ ಹೊಸ ಡಿಜಿಟಲ್ ವ್ಯವಸ್ಥೆಯಿಂದಾಗಿ ಈಗ ಪಹಣಿ ತಿದ್ದುಪಡಿ ಪ್ರಕ್ರಿಯೆ ‘ಸ್ವಯಂಚಾಲಿತ’ವಾಗಿ ನಡೆಯಲಿದೆ.
ಏನಿದು ಹೊಸ ಬದಲಾವಣೆ? ಈ ಮೊದಲು ನೀವು ಜಮೀನು ಖರೀದಿ ಮಾಡಿದಾಗ (ಕ್ರಯ), ದಾನ ಪತ್ರ ಅಥವಾ ವಿಭಾಗ ಪತ್ರ ಮಾಡಿಸಿದಾಗ ಪಹಣಿ ಬದಲಾವಣೆಗೆ ಅರ್ಜಿ ಸಲ್ಲಿಸುತ್ತಿದ್ದಿರಿ. ಇದಕ್ಕೆ ಕನಿಷ್ಠ 7 ರಿಂದ 15 ದಿನಗಳ ಕಾಲ ನೋಟೀಸ್ ಅವಧಿ ಇರುತ್ತಿತ್ತು.
ಈ ಅವಧಿ ಮುಗಿದ ಮೇಲೆ ರೆವೆನ್ಯೂ ಇನ್ಸ್‌ಪೆಕ್ಟರ್ (RI) ಅವರು ಖುದ್ದಾಗಿ ಡಿಜಿಟಲ್ ಸಹಿ ಮಾಡಬೇಕಿತ್ತು. ಇದರಿಂದಾಗಿ ಸಾವಿರಾರು ಅರ್ಜಿಗಳು ಬಾಕಿ ಉಳಿದು ರೈತರಿಗೆ ತೊಂದರೆಯಾಗುತ್ತಿತ್ತು.
ಆದರೆ, ಈಗ ಜಾರಿಗೆ ಬಂದಿರುವ ಹೊಸ ತಂತ್ರಾಂಶದ ಪ್ರಕಾರ, 7 ಅಥವಾ 15 ದಿನಗಳ ನೋಟೀಸ್ ಅವಧಿ ಮುಗಿಯುತ್ತಿದ್ದಂತೆಯೇ ಯಾವುದೇ ಅಧಿಕಾರಿಯ ಸಹಿಯ ಅಗತ್ಯವಿಲ್ಲದೆ, ಸರ್ವರ್ ಮೂಲಕವೇ ‘ಸ್ವಯಂಚಾಲಿತವಾಗಿ’ (Automatic) ನಿಮ್ಮ ಮ್ಯುಟೇಶನ್ ಅನುಮೋದನೆಗೊಳ್ಳುತ್ತದೆ. ಕೆಲಸ ಮುಗಿದ ತಕ್ಷಣ ನಿಮ್ಮ ಮೊಬೈಲ್‌ಗೆ ಎಸ್‌ಎಂಎಸ್ ಕೂಡ ಬರಲಿದೆ.
ಈ ಸುದ್ದಿ ಓದಿದ್ದೀರಾ? ದಾಂಡೇಲಿಯಲ್ಲಿ ಕರಗುತ್ತಿರುವ ಕಲರವ; ಪ್ರವಾಸಿಗರ ಅಬ್ಬರಕ್ಕೆ ಬೆದರಿದ ʼಹಾರ್ನ್‌ಬಿಲ್‌ʼ ಪಕ್ಷಿ ಪ್ರಭೇದ!
ಆಕ್ಷೇಪಣೆ ಸಲ್ಲಿಸಲು ಅವಕಾಶವಿದೆ: ಒಂದು ವೇಳೆ ಈ ಮ್ಯುಟೇಶನ್ ಬಗ್ಗೆ ಯಾರಿಗಾದರೂ ವಿರೋಧವಿದ್ದರೆ ಅಥವಾ ಸರ್ಕಾರಿ ಆಕ್ಷೇಪಣೆಗಳಿದ್ದರೆ, ಆ ನಿಗದಿತ 7 ಅಥವಾ 15 ದಿನಗಳ ಒಳಗಾಗಿ ಆನ್‌ಲೈನ್ ಮೂಲಕವೇ ದೂರು ನೀಡಬಹುದು. ದೂರು ದಾಖಲಾದರೆ ಮಾತ್ರ ಅಂತಹ ಪ್ರಕರಣಗಳನ್ನು ತಹಶೀಲ್ದಾರರ ನ್ಯಾಯಾಲಯಕ್ಕೆ ವರ್ಗಾಯಿಸಲಾಗುತ್ತದೆ. ಯಾವುದೇ ತಕರಾರು ಇಲ್ಲದಿದ್ದರೆ ಕೆಲಸ ಫಟಾಫಟ್ ಆಗಲಿದೆ.
ಆಧಾರ್ ಜೋಡಣೆ ಯಾಕೆ ಮುಖ್ಯ? ನಿಮ್ಮ ಪಹಣಿಗೆ (RTC) ಆಧಾರ್ ಕಾರ್ಡ್ ಜೋಡಣೆ ಮಾಡಿಸುವುದು ಈಗ ಬಹಳ ಮುಖ್ಯವಾಗಿದೆ. ನಿಮ್ಮ ಜಮೀನಿನ ದಾಖಲೆಗಳಲ್ಲಿ ಏನಾದರೂ ಬದಲಾವಣೆಯಾದರೆ ಅಥವಾ ಯಾರಾದರೂ ಅದನ್ನು ಬದಲಿಸಲು ಪ್ರಯತ್ನಿಸಿದರೆ ತಕ್ಷಣ ನಿಮ್ಮ ಮೊಬೈಲ್‌ಗೆ ಸಂದೇಶ ಬರುತ್ತದೆ. ಇದರಿಂದ ಮೋಸ ಹೋಗುವುದನ್ನು ತಡೆಯಬಹುದು. ಹೀಗಾಗಿ, ಈವರೆಗೆ ಆಧಾರ್ ಜೋಡಣೆ ಮಾಡದ ರೈತರು ಕೂಡಲೇ ಅದನ್ನು ಪೂರ್ಣಗೊಳಿಸಬೇಕೆಂದು ಜಿಲ್ಲಾಧಿಕಾರಿ ಕೆ.ಲಕ್ಷ್ಮೀಪ್ರಿಯ ಅವರು ಮನವಿ ಮಾಡಿದ್ದಾರೆ.
ರೈತರಿಗಾಗುವ ಲಾಭಗಳು: ಅಧಿಕಾರಿಗಳಿಗಾಗಿ ಕಾಯುವ ಕಿರಿಕಿರಿ ಇರುವುದಿಲ್ಲ, ಲಂಚ ಅಥವಾ ಮಧ್ಯವರ್ತಿಗಳ ಕಾಟ ತಪ್ಪುತ್ತದೆ, ಕೆಲಸ ಮುಗಿದ ಬಗ್ಗೆ ಮೊಬೈಲ್‌ನಲ್ಲೇ ಮಾಹಿತಿ ಸಿಗುತ್ತದೆ, ವ್ಯವಸ್ಥೆಯಲ್ಲಿ ಪಾರದರ್ಶಕತೆ ಇರುತ್ತದೆ.
