ಪುರುಷೋತ್ತಮ ಬಿಳಿಮಲೆ ಒಬ್ಬರು ಪ್ರಜ್ಞಾವಂತರು, ಮೇಲಾಗಿ ಜಾನಪದ ಸಂಶೋಧಕರು. ಹೀಗಿರುವಾಗ ಒಂದೇ ರಾಜ್ಯದಲ್ಲಿರುವ ತಾವು ಕೃಷ್ಣೆಯ ಕುರಿತು ಕೇವಲವಾಗಿ ಹೇಳಿಕೆ ನೀಡಿರುವುದು ಸರಿಯಲ್ಲ. ಕೃಷ್ಣಾ ನದಿಯ ಇತಿಹಾಸವನ್ನು ಸಂಪೂರ್ಣ ತಿಳಿದುಕೊಳ್ಳದೆ ಅಜ್ಞಾನಿಗಳಂತೆ ಹಗುರವಾಗಿ ಹೇಳಿಕೆ ನೀಡಿರುವುದು ಅವರ ಸ್ಥಾನಕ್ಕೆ ಶೋಭೆ ತರುವಂಥದ್ದಲ್ಲ. ತಾವು ಕೂಡಲೇ ತಪ್ಪು ಹೇಳಿಕೆ ಹಿಂಪಡೆದು ರಾಜ್ಯದ ಜನರಲ್ಲಿ ಕ್ಷಮೆಯಾಚಿಸಬೇಕು ಎಂದು ಅಖಂಡ ಕರ್ನಾಟಕ ರೈತ ಸಂಘದ ರಾಜ್ಯ ಪ್ರಧಾನ ಕಾರ್ಯದರ್ಶಿ ಅರವಿಂದ್ ಕುಲಕರ್ಣಿ ಹಾಗೂ ಸಂಘಟನಾ ಕಾರ್ಯದರ್ಶಿ ವಿಠ್ಠಲ್ ಬಿರಾದಾರ್ ಆಗ್ರಹಿಸಿದರು.
ಈ ಕುರಿತು ಪತ್ರಿಕಾ ಹೇಳಿಕೆ ನೀಡಿರುವ ಅವರು, “ರಾಜ್ಯಕ್ಕೆ ಶೇ.60ರಷ್ಟು ಜನರ ಜೀವ ರಕ್ಷಕವಾದ ಕೃಷ್ಣಾ ನದಿ ಇತಿಹಾಸ ಅರಿಯದೆ ಕೃಷ್ಣೆ ನಮ್ಮ ಅಸ್ಮಿತೆಯಲ್ಲ, ಕೇವಲ ಕಾವೇರಿ ಮಾತ್ರ ನಮ್ಮ ಅಸ್ಮಿತೆ ಎನ್ನುವ ಮೂಲಕ ಕನ್ನಡಿಗರ ಭಾವನೆಗೆ ಧಕ್ಕೆ ತರುವ ಕೆಲಸ ಮಾಡಿದ್ದಾರೆ. ಕೃಷ್ಣೆ ಮತ್ತು ಕಾವೇರಿ ಕರ್ನಾಟಕದ ಎರಡು ಕಣ್ಣುಗಳಿದ್ದಂತೆ ನಾವೆಲ್ಲರೂ ಕನ್ನಡಿಗರು. ಹೀಗಿರುವಾಗ ಸಮಾನತೆಯಿಂದ ನೋಡಬೇಕು. ಕಾವೇರಿಗಿಂತಲೂ ಮೂರು ಪಟ್ಟು ಆಲಮಟ್ಟಿ ಅಣೆಕಟ್ಟಿನಲ್ಲಿ ನೀರಿನ ಸಂಗ್ರಹವಾಗುತ್ತದೆ. ದಕ್ಷಿಣ ಭಾರತದಲ್ಲಿ 2ನೇ ಅತಿ ದೊಡ್ಡ ಜಲಾಶಯ ಇದಾಗಿದೆ. ಇಂತಹ ಬೃಹತ್ ಜಲಾಶಯ ಹಾಗೂ ಕೃಷ್ಣೆಯ ಬಗ್ಗೆ ಮಾತನಾಡುವವರು, ಹಿಂದಿನ ಇತಿಹಾಸದ ಬಗ್ಗೆ ಸಂಪೂರ್ಣ ತಿಳಿದುಕೊಂಡು ಹೇಳಿಕೆ ನೀಡುವುದು ಸೂಕ್ತ” ಎಂದರು.
ಈ ಸುದ್ದಿ ಓದಿದ್ದೀರಾ? ಉಡುಪಿ ಜಿಲ್ಲೆಯಲ್ಲಿ ಶೇ.50ರಷ್ಟು ಮಳೆ ಕೊರತೆ: ಎಲ್ ನಿನೋ ಪರಿಣಾಮದ ಮುನ್ಸೂಚನೆಯೇ?
“ಕೃಷ್ಣಾ ನದಿ ಸುಮಾರು 1400 ಕಿಲೋಮೀಟರ್‌ವರೆಗೆ ಹರಿದು ಆಂಧ್ರದ ಕೃಷ್ಣಾ ಜಿಲ್ಲೆಯ ಹಂಸಲಾದೇವಿ ಬಳಿ ಬಂಗಾಳ ಕೊಲ್ಲಿಯನ್ನು ಸೇರುತ್ತದೆ. ಸಾಕಷ್ಟು ಕಪ್ಪು ಮಣ್ಣಿನಿಂದ ಕೂಡಿರುವ ಕೃಷ್ಣಾ ನದಿಯು ತನ್ನದೇ ಆದ ಇತಿಹಾಸ ಹೊಂದಿದೆ. ಉತ್ತರ ಕರ್ನಾಟಕದ ಜನ ಎಂದಿಗೂ ಕಾವೇರಿ ಬಗ್ಗೆ ಕಡೆಗಣಿಸಿದ ಉದಾಹರಣೆ ಇಲ್ಲ. ಕೃಷ್ಣೆಯ ಬಗ್ಗೆ ತಮಗೆ ಮಾಹಿತಿ ಕೊರತೆ ಇದ್ದರೆ ಈ ಭಾಗದಲ್ಲಿ ಸಾಕಷ್ಟು ನೀರಾವರಿ ತಜ್ಞರು, ಕೃಷ್ಣೆಯ ಕುರಿತು ಸಾಕಷ್ಟು ಅಧ್ಯಯನದ ಮಾಡಿದವರು ಇದ್ದಾರೆ. ಅಂಥವರನ್ನು ಸಂಪರ್ಕಿಸಿ ಮಾಹಿತಿ ಪಡೆದುಕೊಳ್ಳುವುದನ್ನು ಬಿಟ್ಟು, ಈ ರೀತಿ ಕೃಷ್ಣೆಯ ಬಗ್ಗೆ ಕೀಳರಿಮೆ ತೋರಿಸುವುದು ಕಾವೇರಿ ಬಗ್ಗೆ ಎತ್ತಿ ಹಿಡಿಯುವುದು ಮಾತನಾಡುವುದು ತಮ್ಮ ಸ್ಥಾನಕ್ಕೆ ನೀಡಿರುವ ಹೇಳಿಕೆ ಯೋಗ್ಯವಲ್ಲ ಕೂಡಲೇ ತಮ್ಮ ಹೇಳಿಕೆಯನ್ನು ಹಿಂಪಡೆದು ರಾಜ್ಯದ ಜನರಿಗೆ ಕ್ಷಮೆ ಕೋರಬೇಕೆಂದು ಅರವಿಂದ್ ಕುಲಕರ್ಣಿ ಹಾಗೂ ವಿಠ್ಠಲ್ ಬಿರಾದಾರ ಆಗ್ರಹಿಸಿದ್ದಾರೆ.
