- ಸಕ್ರೆಬೈಲು ಶಿಬಿರದಿಂದ ಮೂರು ಸಾಕಾನೆಗಳಿಂದ ಕಾರ್ಯಾಚರಣೆ
- ಶನಿವಾರ ಯುವತಿಯನ್ನು ತುಳಿದು ಸಾಯಿಸಿದ್ದ ಕಾಡಾನೆ
ದಾವಣಗೆರೆ ಜಿಲ್ಲೆ ಚನ್ನಗಿರಿ ತಾಲೂಕಿನ ಸೋಮಲಾಪುರ ಗ್ರಾಮದಲ್ಲಿ ಶನಿವಾರ ಯುವತಿಯನ್ನು ತುಳಿದು ಸಾಯಿಸಿದ್ದ ಕಾಡಾನೆಯ ಸೆರೆಗೆ ಅರಣ್ಯ ಇಲಾಖೆ ಸಿಬ್ಬಂದಿ ತೀವ್ರ ಹುಡುಕಾಟ ನಡೆಸಿದ್ದಾರೆ.
ಶನಿವಾರ ಬೆಳಿಗ್ಗೆ ಯುವತಿ ಕವನಾ ಮತ್ತು ಅವರ ತಾಯಿ ಮೇಲೆ ದಾಳಿ ಮಾಡಿದ ನಂತರ ಆನೆಯು ಸೂಳೆಕೆರೆ ಹಿನ್ನೀರಿನಲ್ಲಿ ಗೋಚರಿಸಿತ್ತು. ಸ್ಥಳಕ್ಕೆ ಧಾವಿಸಿದ್ದ ಅರಣ್ಯ ಇಲಾಖೆ ಸಿಬ್ಬಂದಿ ಅದರ ಚಲನವಲನಗಳ ಮೇಲೆ ನಿಗಾ ಇರಿಸಿದ್ದರು.
ಕಾಡಾನೆ ಸೆರೆಗೆ ಶಿವಮೊಗ್ಗದ ಸಕ್ರೆಬೈಲು ಆನೆ ಶಿಬಿರದಿಂದ ಸಾಗರ, ಬಲಭೀಮ ಹಾಗೂ ಬಹದ್ಧೂರ್‌ ಎಂಬ ಮೂರು ಆನೆಗಳನ್ನು ಸೂಳೆಕೆರೆಗೆ ಕರೆತಂದಿದ್ದರು. ಅರಣ್ಯ ಇಲಾಖೆ ಸಿಬ್ಬಂದಿ, ಭಾನುವಾರ ಬೆಳಿಗ್ಗೆಯಿಂದ ಆನೆಗಾಗಿ ಹುಡುಕಾಟ ನಡೆಸಿದ್ದರು. ಸಂಜೆಯ ವೇಳೆಗೆ ಡ್ರೋಣ್‌ ಕ್ಯಾಮೆರಾದಲ್ಲಿ ಆನೆ ಗೋಚರಿಸಿತ್ತು.
ಆನೆಯು ಸೂಳೆಕೆರೆಯಿಂದ, ಅರಿಶಿನ ಘಟ್ಟ, ಗುಡ್ಡದ ಕೊಮಾರನಹಳ್ಳಿ, ಗುಡ್ಡದ ಬೆನಕನಹಳ್ಳಿ, ಮಧುರನಾಯಕನ ಹಳ್ಳಿ, ಯಲೋದಹಳ್ಳಿ ಮೂಲಕ ಶೃಂಗಾರ ಭಾಗ್ ಅರಣ್ಯ ಪ್ರದೇಶಕ್ಕೆ ಬಂದಿರಬಹುದು. ಸಿಬ್ಬಂದಿ, ಪಶುವೈದ್ಯರು, ಅರವಳಿಕ ತಜ್ಞರು ಹಾಗೂ ಮಾವುತರು ಸ್ಥಳದಲ್ಲಿ ಬೀಡುಬಿಟ್ಟಿದ್ದಾರೆ.
ಸಕ್ರೇಬೈಲು ಆನೆ ಶಿಬಿರದಿಂದ ಕರೆತರಲಾದ ಮೂರು ಆನೆಗಳನ್ನು ಅರಸನಗಟ್ಟ ಮಠದಲ್ಲಿ ಇರಿಸಲಾಗಿದೆ. ಅವುಗಳ ನೆರವಿನೊಂದಿಗೆ ಸಫಾರಿ ಮೂಲಕ ತೆರಳಿ ಕಾಡಿನಲ್ಲಿ ಓಡಾಡುತ್ತಿರುವ ಆನೆಗೆ ಅರವಳಿಕೆ ಮದ್ದು ನೀಡುವ ಮೂಲಕ ಸೆರೆ ಹಿಡಿಯಲಾಗುವುದು. ಮನೆ ಬಿಟ್ಟು ಹೊರಗೆ ಬಾರದಂತೆ ಸುತ್ತಮುತ್ತಲ ಗ್ರಾಮಗಳ ಜನರಿಗೆ ಧ್ವನಿವರ್ಧಕದ ಮೂಲಕ ಎಚ್ಚರಿಕೆ ನೀಡಲಾಗಿದೆ.
