ನಾಮಪತ್ರ ಹಿಂಪಡೆಯಲು ಕೆಲವೇ ಗಂಟೆಗಳ ಅವಕಾಶವಿರುವಾಗ ಕಾಂಗ್ರೆಸ್ ಬಾರಾಮತಿ ಉಪಚುನಾವಣೆಯಿಂದ ತನ್ನ ಅಭ್ಯರ್ಥಿಯನ್ನು ಹಿಂತೆಗೆದುಕೊಂಡಿದೆ. ವಿಮಾನ ಅಪಘಾತದಲ್ಲಿ ನಿಧನರಾದ ಮಹಾರಾಷ್ಟ್ರದ ಮಾಜಿ ಉಪಮುಖ್ಯಮಂತ್ರಿ ಅಜಿತ್ ಪವಾರ್ ಅವರಿಗೆ ಗೌರವದ ಸಂಕೇತವಾಗಿ ಚುನಾವಣೆಯಿಂದ ಹಿಂದೆ ಸರಿಯುತ್ತಿರುವುದಾಗಿ ಕಾಂಗ್ರೆಸ್ ಹೇಳಿದೆ. ಇದರಿಂದಾಗಿ ಅಜಿತ್ ಪತ್ನಿ ಸುನೇತ್ರಾ ಪವಾರ್ ದಾರಿ ಸುಗಮವಾಗಿದೆ.
ಜನವರಿ 28ರಂದು ಬಾರಾಮತಿಯಲ್ಲಿ ನಡೆದ ವಿಮಾನ ಅಪಘಾತದಲ್ಲಿ ಅಜಿತ್ ಪವಾರ್ ಅವರು ನಿಧನರಾಗಿದ್ದಾರೆ. ಅವರ ನಿಧನದಿಂದ ತೆರವಾದ ಬಾರಾಮತಿ ವಿಧಾನಸಭಾ ಕ್ಷೇತ್ರಕ್ಕೆ ಪತ್ನಿ ಸುನೇತ್ರಾ ಪವಾರ್ ಕಣಕ್ಕಿಳಿದಿದ್ದಾರೆ. ಕಳೆದ ಕೆಲವು ದಿನಗಳಿಂದ, ಎನ್‌ಸಿಪಿಯ ಎರಡೂ ಬಣಗಳ ನಾಯಕರು ಈ ಕ್ಷೇತ್ರದಲ್ಲಿ ಸುನೇತ್ರಾ ಪವಾರ್ ಅವರನ್ನು ಅವಿರೋಧವಾಗಿ ಆಯ್ಕೆ ಮಾಡಲು ಅವಕಾಶ ನೀಡಬೇಕು, ಅದಕ್ಕಾಗಿ ಕಾಂಗ್ರೆಸ್ ನಾಮಪತ್ರ ಹಿಂಪಡೆಯಬೇಕು ಎಂದು ಮನವಿ ಮಾಡುತ್ತಲೇ ಇತ್ತು.
ಇದನ್ನು ಓದಿದ್ದೀರಾ? ಮಹಾರಾಷ್ಟ್ರ | ಅಜಿತ್ ಪವಾರ್ ಪತ್ನಿ ಸುನೇತ್ರಾಗೆ ಉಪ ಮುಖ್ಯಮಂತ್ರಿ ಹುದ್ದೆ
ಹಲವು ದಿನಗಳಿಂದ ಕಾಂಗ್ರೆಸ್ ನಾಯಕರ ಮನವೊಲಿಸುವ ಪ್ರಯತ್ನವನ್ನು ಎನ್‌ಸಿಪಿಯ ಎರಡೂ ಬಣಗಳ ನಾಯಕರು ಮಾಡಿದ್ದಾರೆ. ಇದೀಗ ಕಾಂಗ್ರೆಸ್ ನಾಮಪತ್ರ ಹಿಂಪಡೆದಿದೆ. “ಗೌರವದ ಸಂಕೇತವಾಗಿ (ಅಜಿತ್ ಪವಾರ್ ನಿಧನಕ್ಕೆ) ಕಾಂಗ್ರೆಸ್ ಉಪಚುನಾವಣೆಯಲ್ಲಿ ಸ್ಪರ್ಧಿಸುತ್ತಿಲ್ಲ” ಎಂದು ಎಐಸಿಸಿ ಪ್ರಧಾನ ಕಾರ್ಯದರ್ಶಿ ರಮೇಶ್ ಚೆನ್ನಿತ್ತಲ ಹೇಳಿದ್ದಾರೆ. ಕಳೆದ ವಾರದಿಂದ, ಬಿಜೆಪಿ ಕೂಡ ಕಾಂಗ್ರೆಸ್ ಅನ್ನು ನಾಮಪತ್ರ ಹಿಂಪಡೆಯುವಂತೆ ಮನವಿ ಮಾಡಿತ್ತು.
ಗುರುವಾರ ಮುಂಬೈನಲ್ಲಿ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಕಾಂಗ್ರೆಸ್ ಮಹಾರಾಷ್ಟ್ರ ಅಧ್ಯಕ್ಷ ಹರ್ಷವರ್ಧನ್ ಸಪ್ಕಲ್, “ಮಹಾರಾಷ್ಟ್ರದ ಸಂಪ್ರದಾಯ ಮತ್ತು ಇತರೆ ಪಕ್ಷಗಳು ನಡೆಸಿದ ಮಾತುಕತೆಯನ್ನು ಪರಿಗಣಿಸಿ ಪಕ್ಷವು ನಮ್ಮ ಅಭ್ಯರ್ಥಿ ಆಕಾಶ್ ಮೋರೆ ಅವರನ್ನು ಬಾರಾಮತಿ ಉಪಚುನಾವಣೆಯಿಂದ ಹಿಂತೆಗೆದುಕೊಳ್ಳಲು ನಿರ್ಧರಿಸಿದೆ” ಎಂದು ಹೇಳಿದರು.
ಆದರೆ ಸುನೇತ್ರಾ ಅವರು ಅವಿರೋಧವಾಗಿ ಆಯ್ಕೆಯಾಗುತ್ತಿಲ್ಲ. ಸ್ವತಂತ್ರ ಅಭ್ಯರ್ಥಿಗಳು ಕಣದಲ್ಲಿರುವುದರಿಂದ, ಬಾರಾಮತಿ ಉಪಚುನಾವಣೆ ಸಂಪೂರ್ಣವಾಗಿ ಸುನೇತ್ರಾ ಅವಿರೋಧವಾಗಿ ಆಯ್ಕೆಯಾಗುವುದಿಲ್ಲ. ಸುನೇತ್ರಾ ಪವಾರ್ ಮುಂದೆ ಯಾವುದೇ ಪ್ರಮುಖ ಪಕ್ಷದ ಅಭ್ಯರ್ಥಿಗಳು ಇಲ್ಲದಿದ್ದರೂ ಸ್ವತಂತ್ರ ಅಭ್ಯರ್ಥಿಗಳ ಮುಂದೆ ಕಣಕ್ಕಿಳಿಯಬೇಕಾಗಿದೆ. ಆದರೆ ಸುನೇತ್ರಾ ಯಾವುದೇ ತೊಂದರೆಯಿಲ್ಲದೆ ಸ್ಪರ್ಧೆಯಲ್ಲಿ ಗೆಲ್ಲುವ ಸಾಧ್ಯತೆಯಿದೆ.
ಇನ್ನು ತಮ್ಮ ಈ ನಿರ್ಧಾರವನ್ನು ಸಮರ್ಥಿಸಿಕೊಂಡ ಕಾಂಗ್ರೆಸ್ ನಾಯಕ ಸಪ್ಕಲ್, “ಅಜಿತ್ ಪವಾರ್ ಅವರ ಸಾವು ಖಂಡಿತವಾಗಿಯೂ ದುರದೃಷ್ಟಕರ. ಅವರು ಹಿಂದೆಯೂ ಕಾಂಗ್ರೆಸ್‌ನೊಂದಿಗೆ ಸಂಬಂಧ ಹೊಂದಿದ್ದರು. ಸುನೇತ್ರಾ ಪವಾರ್ ಇಂದಿನವರೆಗೆ ಮೂರು ಬಾರಿ ನನಗೆ ದೂರವಾಣಿ ಕರೆ ಮಾಡಿದ್ದರು. ನಿಯೋಗವೂ ನನ್ನನ್ನು ಭೇಟಿ ಮಾಡಿತ್ತು. ಹಿರಿಯ ಎನ್‌ಸಿಪಿ ನಾಯಕರಾದ ಛಗನ್ ಭುಜಬಲ್ ಮತ್ತು ಧನಂಜಯ್ ಮುಂಡೆ ಕರೆ ಮಾಡಿ ಅಭ್ಯರ್ಥಿ ಹಿಂಪಡೆಯಲು ಮನವಿ ಮಾಡಿದ್ದಾರೆ. ಎನ್‌ಸಿಪಿ ಎಸ್‌ಪಿ ಶಾಸಕ ರೋಹಿತ್ ಪವಾರ್ ಕೂಡ ಅದೇ ಮನವಿಯನ್ನು ಮಾಡಿದ್ದಾರೆ. ಕಾಂಗ್ರೆಸ್ ವಿರುದ್ಧ ನೀಡಿದ ಹೇಳಿಕೆಗೆ ವಿಷಾದ ವ್ಯಕ್ತಪಡಿಸಿದ್ದಾರೆ” ಎಂದು ತಿಳಿಸಿದ್ದಾರೆ.
ಇದನ್ನು ಓದಿದ್ದೀರಾ? ಅಜಿತ್ ಪವಾರ್ ವಿಮಾನ ಅಪಘಾತ: ಸಮಗ್ರ ತನಿಖೆಗೆ ಆಗ್ರಹಿಸಿ ಅಮಿತ್ ಶಾಗೆ ರೋಹಿತ್ ಪವಾರ್ ಪತ್ರ
ಇನ್ನು ಗುರುವಾರ ಬೆಳಿಗ್ಗೆ ಶರದ್ ಪವಾರ್ ನೇತೃತ್ವದ ಎನ್‌ಸಿಪಿ ಬಣದ ರೋಹಿತ್ ಪವಾರ್ ಅವರು ಮುಂಬೈನ ಆಶ್ರಮದಲ್ಲಿ ಸಪ್ಕಲ್ ಅವರನ್ನು ಭೇಟಿ ಮಾಡಿ ಸಭೆ ನಡೆಸಿದ್ದಾರೆ. ನಂತರ ಕಾಂಗ್ರೆಸ್ ಈ ನಿರ್ಧಾರಕ್ಕೆ ಬಂದಿದೆ. ಕಾಂಗ್ರೆಸ್ ನಿರ್ಧಾರದ ಬಗ್ಗೆ ಪ್ರತಿಕ್ರಿಯಿಸಿದ ರೋಹಿತ್ ಪವಾರ್, “ಅಜಿತ್ ಪವಾರ್ ಅವರ ದುರದೃಷ್ಟಕರ ನಿಧನದ ನಂತರ, ಬಾರಾಮತಿ ಜನರು ಚುನಾವಣೆಯು ಅವಿರೋಧವಾಗಿ ನಡೆಯುತ್ತದೆ ಎಂದು ಆಶಿಸುತ್ತಿದ್ದರು. ಅದು ಅಜಿತ್ ದಾದಾ ಅವರಿಗೆ ನಿಜವಾದ ಗೌರವ. ಅದರಂತೆ, ಕಾಂಗ್ರೆಸ್ ನಾಯಕರ ನಿರ್ಧಾರಕ್ಕಾಗಿ ನಾವು ಸ್ವಾಗತಿಸುತ್ತೇವೆ ಮತ್ತು ಧನ್ಯವಾದಗಳನ್ನು ಅರ್ಪಿಸುತ್ತೇವೆ” ಎಂದು ಹೇಳಿದ್ದಾರೆ.
ರೋಹಿತ್ ಪವಾರ್ ಅವರಲ್ಲದೆ, ಎನ್‌ಸಿಪಿ-ಅಜಿತ್ ಪವಾರ್ ಬಣವು ಮಹಾರಾಷ್ಟ್ರ ಪರಿಹಾರ ಮತ್ತು ಪುನರ್ವಸತಿ ಸಚಿವ ಮಕರಂದ್ ಪಾಟೀಲ್ ನೇತೃತ್ವದಲ್ಲಿ ಶಾಸಕರಾದ ಸಂಜಯ್ ಖೋಡ್ಕೆ, ರಾಜೇಶ್ ವಿಟೇಕರ್, ಮನೋಜ್ ಕಾಯಂಡೆ ಮತ್ತು ಸನಾ ಮಲಿಕ್ ಸೇರಿದಂತೆ ಐದು ಸದಸ್ಯರ ನಿಯೋಗವನ್ನು ಗುರುವಾರ ಸಪ್ಕಲ್ ಅವರನ್ನು ಭೇಟಿ ಮಾಡಲು ಕಳುಹಿಸಿತ್ತು.
ಈ ಹಿಂದೆ ಬಿಜೆಪಿ ಸಚಿವ ಚಂದ್ರಶೇಖರ್ ಬವಾಂಕುಲೆ, “ಹರ್ಷವರ್ಧನ್ ಸಪ್ಕಲ್ ಅವರು ನಾಮಪತ್ರವನ್ನು ಹಿಂಪಡೆಯುವಂತೆ ನಾನು ವಿನಂತಿಸುತ್ತೇನೆ. ನಾನು ಇದನ್ನು ಮೊದಲೇ ಹೇಳಿದ್ದೇನೆ. ಇದು ಅಜಿತ್ ದಾದಾ ಅವರ ಸ್ಥಾನ. ಅವರ ನಿಧನವು ತುಂಬಾ ದುರದೃಷ್ಟಕರವಾಗಿದ್ದು. ಜನರು ಇನ್ನೂ ಆಘಾತದಲ್ಲಿದ್ದಾರೆ. ಆದ್ದರಿಂದ ಕಾಂಗ್ರೆಸ್ ಜನರ ಅಭಿಪ್ರಾಯ, ಭಾವನೆಗೆ ಗೌರವ ನೀಡಬೇಕು” ಎಂದು ಹೇಳಿದ್ದರು.
ಸದ್ಯ ಬಾರಾಮತಿಯಲ್ಲಿ ಧನಂಜಯ್ ಮುಂಡೆ ಅವರ ಎರಡನೇ ಪತ್ನಿ ಕರುಣಾ ಮುಂಡೆ ಸೇರಿದಂತೆ 23 ಅಭ್ಯರ್ಥಿಗಳು ಕಣದಲ್ಲಿದ್ದಾರೆ. ಆದ್ದರಿಂದ ಏಪ್ರಿಲ್ 23ರಂದು ಚುನಾವಣೆ ನಡೆಯಲಿದೆ.
ಶರದ್ ಪವಾರ್ ರಾಜಕೀಯ ಪ್ರವೇಶಿಸಿದ 1960ರ ದಶಕದಿಂದ, ಬಾರಾಮತಿ ಪವಾರ್ ಅವರ ಭದ್ರಕೋಟೆಯಾಗಿತ್ತು. ಅಜಿತ್ ಪವಾರ್ ರಾಜಕೀಯಕ್ಕೆ ಪ್ರವೇಶಿಸಿದಾಗ ಬಾರಾಮತಿಯಿಂದ ಸ್ಪರ್ಧಿಸಿದ್ದರು. ಅಜಿತ್ ಒಟ್ಟು ಏಳು ಬಾರಿ ಬಾರಾಮತಿಯಲ್ಲಿ ಚುನಾವಣೆಯಲ್ಲಿ ಸ್ಪರ್ಧಿಸಿ ಗೆದ್ದಿದ್ದಾರೆ.
