2027ರ ಜನಗಣತಿ ಪ್ರಕ್ರಿಯೆಯು ಹಲವು ವಿಧಗಳಲ್ಲಿ ಒಂದು ‘ಪ್ರಹಸನ’ವಾಗಿ ಮಾರ್ಪಡುತ್ತಿದ್ದು, ಇದು ಮುಂದಿನ ದಿನಗಳಲ್ಲಿ ‘ಗಂಭೀರ ಪರಿಣಾಮಗಳನ್ನು’ ಬೀರಲಿದೆ ಎಂದು ಕಾಂಗ್ರೆಸ್ ಮಂಗಳವಾರ (ನವೆಂಬರ್ 17) ಕೇಂದ್ರ ಸರ್ಕಾರದ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದೆ.
ಜನಗಣತಿಯ ಸ್ವಯಂ-ಗಣತಿ (ಪೋರ್ಟಲ್ನಲ್ಲಿನ ಲೋಪದೋಷಗಳ ಕುರಿತು ಮಾಧ್ಯಮ ವರದಿಯೊಂದನ್ನು ಎಕ್ಸ್ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿರುವ ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ಜೈರಾಮ್ ರಮೇಶ್, ಸರ್ಕಾರದ ಕಾರ್ಯವೈಖರಿಯನ್ನು ಪ್ರಶ್ನಿಸಿದ್ದಾರೆ.
ವರದಿಯ ಪ್ರಕಾರ, ಜನಗಣತಿಯ ಸ್ವಯಂ-ಗಣತಿ ಪೋರ್ಟಲ್ನಲ್ಲಿ ‘ಇತರೆ’ ಧರ್ಮಗಳ ವಿಭಾಗದ ಅಡಿಯಲ್ಲಿ ಒಟ್ಟು 287 ಹೆಸರುಗಳನ್ನು ಪಟ್ಟಿ ಮಾಡಲಾಗಿತ್ತು. ಇದರಲ್ಲಿ ಇಸ್ಕಾನ್ , ರಾಮಕೃಷ್ಣ ಪರಮಹಂಸ, ಸನಾತನ, ಶ್ರೀರಾಮ, ಶ್ರೀಕೃಷ್ಣ, ವಾಲ್ಮೀಕಿ, ರಾಮದೇವ್, ಸೂಫಿ, ಶಿಯಾ, ಸುನ್ನಿ, ಮೆಥೋಡಿಸ್ಟ್ ಮತ್ತು ಪೆಂಟೆಕೋಸ್ಟಲ್ ಮುಂತಾದ ಹೆಸರುಗಳು ಸೇರಿದ್ದವು. ಆದರೆ, ಈ ಕುರಿತು ಕೇಂದ್ರ ಗೃಹ ಸಚಿವಾಲಯಕ್ಕೆ ಪ್ರಶ್ನೆಗಳನ್ನು ಕೇಳಿದ ಬೆನ್ನಲ್ಲೇ, ಯಾವುದೇ ಸ್ಪಷ್ಟನೆ ನೀಡದೆ ಈ ಪಟ್ಟಿಯನ್ನು ಪೋರ್ಟಲ್ನಿಂದ ಸದ್ದಿಲ್ಲದೆ ತೆಗೆದುಹಾಕಲಾಗಿದೆ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.
ಈ ಬೆಳವಣಿಗೆಗೆ ತೀಕ್ಷ್ಣವಾಗಿ ಪ್ರತಿಕ್ರಿಯಿಸಿರುವ ಜೈರಾಮ್ ರಮೇಶ್, “ಇದು ವಿಚಿತ್ರವಾಗಿದೆ ಮತ್ತು ಯಾವುದೇ ತರ್ಕಕ್ಕೆ ನಿಲುಕದಂತಿದೆ. ಎಲ್ಲಿ ಡ್ರಾಪ್-ಡೌನ್ ಮೆನು ನೀಡಬೇಕಿತ್ತೋ—ಉದಾಹರಣೆಗೆ ಪರಿಶಿಷ್ಟ ಜಾತಿ (SC) ಮತ್ತು ಪರಿಶಿಷ್ಟ ಪಂಗಡಗಳನ್ನು (ST) ಹೊರತುಪಡಿಸಿ ಇತರೆ ಜಾತಿಗಳ ಕಾಲಂನಲ್ಲಿ—ಅಲ್ಲಿ ಅದನ್ನು ನೀಡಿಲ್ಲ. 2027ರ ಜನಗಣತಿಯು ಅನೇಕ ವಿಷಯಗಳಲ್ಲಿ ಪ್ರಹಸನವಾಗುತ್ತಿದೆ. ಇದು ಗಂಭೀರ ಪರಿಣಾಮಗಳನ್ನು ಉಂಟುಮಾಡಲಿದೆ” ಎಂದು ಕಿಡಿಕಾರಿದ್ದಾರೆ.
2027ರ ಜನಗಣತಿಯನ್ನು ಕೇಂದ್ರ ಸರ್ಕಾರವು “ಅತ್ಯಂತ ಸಂಶಯಾಸ್ಪದ”ವಾಗಿ ನಡೆಸುತ್ತಿದೆ ಎಂದು ಕಾಂಗ್ರೆಸ್ ಈ ಹಿಂದೆಯೂ ಆರೋಪಿಸಿತ್ತು. ಸಂಗ್ರಹಿಸಲಾಗುತ್ತಿರುವ ದತ್ತಾಂಶದ ಗುಣಮಟ್ಟ ಮತ್ತು ಅದರ ಉದ್ದೇಶದ ಬಗ್ಗೆ ಪಕ್ಷವು ನಿರಂತರವಾಗಿ ಕಳವಳ ವ್ಯಕ್ತಪಡಿಸುತ್ತಾ ಬಂದಿದೆ.
ಇದಕ್ಕೂ ಮುನ್ನ, ಕಾಂಗ್ರೆಸ್ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಮತ್ತು ಲೋಕಸಭೆಯ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ಜಂಟಿಯಾಗಿ ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಪತ್ರ ಬರೆದು, ಜಾತಿ ಗಣತಿಯನ್ನು ಸರಿಯಾದ ರೀತಿಯಲ್ಲಿ ನಡೆಸುವ ಕುರಿತು ಪಕ್ಷದ ಪ್ರಮುಖ ಬೇಡಿಕೆಗಳನ್ನು ಮುಂದಿಟ್ಟಿದ್ದರು.



