ಸಂಸತ್ ಆವರಣದಲ್ಲಿ ಆಡಳಿತಾರೂಢ ಬಿಜೆಪಿ ಮತ್ತು ಪ್ರತಿಪಕ್ಷ ಕಾಂಗ್ರೆಸ್ ಸಂಸದರು ಪರಸ್ಪರರ ವಿರುದ್ಧ ಮಂಗಳವಾರ ಪ್ರತಿಭಟನೆ ನಡೆಸಿದ್ದಾರೆ. ಈ ವೇಳೆ, ಹಾಸ್ಯಮಿಶ್ರಿತ ರಾಜಕೀಯ ಸನ್ನಿವೇಶವೊಂದು ನಡೆದಿದೆ. ರಾಹುಲ್ ಗಾಂಧಿ ವಿರುದ್ಧ ಘೋಷಣೆ ಕೂಗುತ್ತಿದ್ದ ಬಿಜೆಪಿ ಸಂಸದರ ಗುಂಪಿನ ಬಳಿಗೇ ತೆರಳಿದ ಕಾಂಗ್ರೆಸ್ ಸಂಸದ ಪವನ್ ಖೇರಾ ಅವರು ಕೇಂದ್ರ ಗೃಹ ಸಚಿವ ಅಮಿತ್ ಶಾ ವಿರುದ್ಧ ಘೋಷಣೆ ಕೂಗಿದ್ದಾರೆ. ಈ ವೇಳೆ, ಬಿಜೆಪಿ ಸಂಸದರು ತಬ್ಬಿಬ್ಬಾಗಿದ್ದಾರೆ.
ವಿದ್ಯಾರ್ಥಿಗಳ ಪ್ರತಿಭಟನೆ ವಿಚಾರವಾಗಿ ಸಂಸತ್ತಿನಲ್ಲಿ ಭಾರೀ ಕೋಲಾಹಲ ನಡೆಯುತ್ತಿದೆ. ವಿಪಕ್ಷಗಳು ಮೋದಿ ಸರ್ಕಾರವನ್ನು ತರಾಟೆಗೆ ತೆಗೆದುಕೊಂಡಿವೆ. ಇದೇ ಹೊತ್ತಿನಲ್ಲಿ, ವಿದ್ಯಾರ್ಥಿಗಳ ವಿಚಾರವಾಗಿ ಚರ್ಚೆಗೆ ಗೃಹ ಸಚಿವ ಅಮಿತ್ ಶಾ ಸಿದ್ಧರಿದ್ದರೂ ಪ್ರತಿಪಕ್ಷವೇ ಚರ್ಚೆಯಿಂದ ಹಿಂದೆ ಸರಿಯುತ್ತಿದೆ ಎಂದು ಬಿಜೆಪಿಗರು ಆರೋಪಿಸಿ, ರಾಹುಲ್ ಗಾಂಧಿ ವಿರುದ್ಧ ಪ್ರತಿಭಟನೆ ನಡೆಸಿದ್ದಾರೆ.
ಈ ವೇಳೆ, ಪವನ್ ಖೇರಾ ನೇರವಾಗಿ ಬಿಜೆಪಿ ಸಂಸದರು ಪ್ರತಿಭಟನೆ ನಡೆಸುತ್ತಿದ್ದ ಜಾಗಕ್ಕೆ ತೆರಳಿದ್ದಾರೆ. ಬಿಜೆಪಿ ಸಂಸದರು ರಾಹುಲ್ ಗಾಂಧಿ ಮತ್ತು ಪ್ರತಿಪಕ್ಷವನ್ನು ಗುರಿಯಾಗಿಸಿಕೊಂಡು ಘೋಷಣೆಗಳನ್ನು ಕೂಗುತ್ತಿದ್ದರೆ, ಅವರ ನಡುವೆಯೇ ನಿಂತ ಖೇರಾ ‘ಅಮಿತ್ ಶಾ ಶೇಮ್ ಶೇಮ್… ಹೆದರಿಲ್ಲ ಎಂದಾದರೆ ಸಂಸತ್ತಿಗೆ ಬನ್ನಿ’ ಎಂದು ಹಿಂದಿಯಲ್ಲಿ ಘೋಷಣೆಗಳನ್ನು ಕೂಗಿದ್ದಾರೆ.
SAVAGE PRO MAX 🤣
— Rohini Anand (@mrs_roh08) August 11, 2026
Pawan Khera went to the side of the BJP MPs protesting against Rahul Gandhi & started raising slogans —
“Shame on Amit Shah. Come to the Parliament if you are not scared”🔥
BJP MPs confused & stunned 🤭 pic.twitter.com/MsPIWeYsQ7
ಈ ಘಟನೆಯ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ವಿಡಿಯೋದಲ್ಲಿ; ಖೇರಾ ಅವರ ಅನಿರೀಕ್ಷಿತ ಘೋಷಣೆಯಿಂದ ಕೆಲ ಬಿಜೆಪಿ ಸಂಸದರು ತಬ್ಬಿಬ್ಬಾಗಿದ್ದಾರೆ. ಪರಸ್ಪರ ಮುಖ ನೋಡಿಕೊಂಡು ಪೆಚ್ಚಾಗಿದ್ದಾರೆ.
ಪವನ್ ಖೇರಾ ಅವರು ಘೋಷಣೆಯಿಂದಾಗಿ ಸ್ಥಳದಲ್ಲಿ ಬಿಜೆಪಿಗರ ಪ್ರತಿಭಟನೆಯ ದಿಕ್ಕೇ ಬದಲಾಗಿದೆ. ಬಿಜೆಪಿಗರು ಮತ್ತು ವಿಪಕ್ಷಗಳ ಸಂಸದರು ಪರಸ್ಪರ ಘೋಷಣೆಗಳನ್ನು ಕೂಗಿದ್ದಾರೆ.
ಈ ಘಟನೆಯ ವಿಡಿಯೋವನ್ನು ಹಂಚಿಕೊಳ್ಳುತ್ತಿರುವ ನೆಟ್ಟಿಗರು ಹಾಸ್ಯಭರಿತ ಪ್ರತಿಕ್ರಿಯೆಗಳನ್ನು ಹಂಚಿಕೊಳ್ಳುತ್ತಿದ್ದಾರೆ.
