ದೀಪಾವಳಿ ಹಬ್ಬದ ಸಂದರ್ಭದಲ್ಲಿ ನಗರದಲ್ಲಿ ಸಂಭವಿಸಿದ ಸಾಲು ಸಾಲು ಬೆಂಕಿ ಅವಾಂತರಗಳ ಹಿನ್ನೆಲೆಯಲ್ಲಿ ಬೃಹನ್ಮುಂಬೈ ಮಹಾನಗರ ಪಾಲಿಕೆ (ಬಿಎಂಸಿ) ಮತ್ತು ಮುಂಬೈ ನಗರ ವಿಪತ್ತು ನಿರ್ವಹಣಾ ಪ್ರಾಧಿಕಾರವು ಮಹತ್ವದ ನಿರ್ಧಾರ ಕೈಗೊಂಡಿದೆ. ನಗರಾದ್ಯಂತ ರಾಕೆಟ್ ಮತ್ತು ವೈಮಾನಿಕ (ಆಕಾಶಕ್ಕೆ ಚಿಮ್ಮುವ) ಪಟಾಕಿಗಳ ಬಳಕೆಯನ್ನು ನವೆಂಬರ್ 25ರವರೆಗೆ ತಕ್ಷಣದಿಂದ ಜಾರಿಗೆ ಬರುವಂತೆ ಸಂಪೂರ್ಣವಾಗಿ ನಿಷೇಧಿಸಿದೆ.
ದೀಪಾವಳಿಯ ಹಬ್ಬದ ಅವಧಿಯಲ್ಲಿ ಮುಂಬೈನಲ್ಲಿ ಒಟ್ಟು 142 ಬೆಂಕಿ ಅವಾಂತರದ ಕರೆಗಳು ದಾಖಲಾಗಿದ್ದು, ಅದರಲ್ಲಿ 137 ಪ್ರಕರಣಗಳು ಪಟಾಕಿಗಳಿಂದಲೇ ಸಂಭವಿಸಿವೆ ಎಂದು ಬಿಎಂಸಿ ಆಡಳಿತ ಸ್ಪಷ್ಟಪಡಿಸಿದೆ. ವಿಶೇಷವಾಗಿ, ಆಕಾಶಕ್ಕೆ ಹಾರಿಸುವ ರಾಕೆಟ್‌ಗಳು ನಿಯಂತ್ರಣ ತಪ್ಪಿ ಬಹುಮಹಡಿ ಕಟ್ಟಡಗಳ ಬಾಲ್ಕನಿ, ಟೆರೇಸ್, ಮತ್ತು ಜನನಿಬಿಡ ಝೋಪಡ್‌ಪಟ್ಟಿ (ಕೊಳೆಗೇರಿ) ಪ್ರದೇಶಗಳ ಮೇಲೆ ಬಿದ್ದು ಬೆಂಕಿ ಹೊತ್ತಿಕೊಂಡಿರುವುದು ತನಿಖೆಯಲ್ಲಿ ತಿಳಿದುಬಂದಿದೆ.
ಇದನ್ನೂ ಓದಿ: ಮಾಲಿನ್ಯ ಮುಕ್ತ ದೀಪಾವಳಿ ಸಂದೇಶ: ಬಿಜೆಪಿ ಆಕ್ಷೇಪದ ಬೆನ್ನಲ್ಲೇ ನಟಿ ದಿಯಾ ಮಿರ್ಜಾ ವಿಡಿಯೊ ತೆಗೆದ ಬಿಎಂಸಿ
ವಿಪತ್ತು ನಿರ್ವಹಣಾ ಕಾಯ್ದೆಯಡಿ ಬಿಎಂಸಿ ಆಯುಕ್ತರು ಹೊರಡಿಸಿರುವ ಈ ಆದೇಶವು ಮುಂಬೈ ನಗರ ಮತ್ತು ಉಪನಗರಗಳ ಎಲ್ಲಾ ಭಾಗಗಳಿಗೂ ಅನ್ವಯಿಸುತ್ತದೆ. ವಸತಿ ಸಮುಚ್ಛಯಗಳು, ಅಪಾರ್ಟ್‌ಮೆಂಟ್ ಬಾಲ್ಕನಿಗಳು ಮತ್ತು ಟೆರೇಸ್‌ಗಳಿಂದ ರಾಕೆಟ್ ಹಾರಿಸುವುದನ್ನು ಸಂಪೂರ್ಣವಾಗಿ ತಡೆಯಲಾಗಿದೆ.
ಕೊಳೆಗೇರಿ ಪ್ರದೇಶಗಳು, ತೆರೆದ ಸಾರ್ವಜನಿಕ ಮೈದಾನಗಳು ಮತ್ತು ಪಾರ್ಕಿಂಗ್ ಸ್ಥಳಗಳಲ್ಲೂ ಈ ನಿಷೇಧ ಜಾರಿಯಲ್ಲಿರುತ್ತದೆ. ನಿಯಮ ಉಲ್ಲಂಘಿಸಿ ರಾಕೆಟ್ ಅಥವಾ ವೈಮಾನಿಕ ಪಟಾಕಿ ಹಾರಿಸುವವರ ವಿರುದ್ಧ ಕಾನೂನು ಕ್ರಮ ಮತ್ತು ಜೈಲು ಶಿಕ್ಷೆ ವಿಧಿಸಲಾಗುವುದು ಎಂದು ಎಚ್ಚರಿಸಲಾಗಿದೆ.
ಸದ್ಯ ರಾಕೆಟ್ ಮತ್ತು ವೈಮಾನಿಕ ಪಟಾಕಿಗಳನ್ನು ಹೊರತುಪಡಿಸಿ ಇತರ ಸಾಮಾನ್ಯ ಪಟಾಕಿಗಳ ಬಳಕೆಗೆ ಅನುಮತಿ ನೀಡಲಾಗಿದೆ. ಆದರೆ ಸಾರ್ವಜನಿಕರು ನ್ಯಾಯಾಲಯ ಮತ್ತು ಸಮಾಜದ ಸುರಕ್ಷತಾ ಮಾರ್ಗಸೂಚಿಗಳನ್ನು ಕಡ್ಡಾಯವಾಗಿ ಪಾಲಿಸಬೇಕು. ಸಾರ್ವಜನಿಕರು ಯಾವುದೇ ತುರ್ತು ಬೆಂಕಿ ಅನಾಹುತದ ಸಂದರ್ಭದಲ್ಲಿ ಅಗ್ನಿಶಾಮಕ ದಳ 101 ಅಥವಾ ಬಿಎಂಸಿ ಸಹಾಯವಾಣಿ 1916ಗೆ ಸಂಪರ್ಕಿಸಲು ಕೋರಲಾಗಿದೆ.
