ಮಹಿಳಾ ವಿಶ್ವ ಬಾಕ್ಸಿಂಗ್ ಚಾಂಪಿಯನ್ಶಿಪ್ನಲ್ಲಿ ಭಾರತದ ನಿಖತ್ ಝರೀನ್ ನೂತನ ದಾಖಲೆ ಬರೆದಿದ್ದಾರೆ. ಹೊಸದಿಲ್ಲಿಯಲ್ಲಿ ನಡೆಯುತ್ತಿರುವ ಚಾಂಪಿಯನ್ಶಿಪ್ನ 50 ಕೆಜಿ ವಿಭಾಗದಲ್ಲಿ ಝರೀನ್, ವಿಯೆಟ್ನಾಂನ ಬಾಕ್ಸರ್ ಎನ್ಗುಯೆನ್ ಥಿ ಥಾಯ್ ವಿರುದ್ಧ 5-0 ಅಂತರದಲ್ಲಿ ಏಕಪಕ್ಷೀಯ ಜಯ ಸಾಧಿಸಿದರು. ಆ ಮೂಲಕ ಸತತ ಎರಡನೇ ವರ್ಷ ಚಿನ್ನದ ಪದಕ ಗೆದ್ದ ದಾಖಲೆ ನಿರ್ಮಿಸಿದರು.
2022ರ ಸಾಲಿನ ವಿಶ್ವ ಚಾಂಪಿಯನ್ಷಿಪ್ನ 52 ಕೆಜಿ ವಿಭಾಗದಲ್ಲಿ ಝರೀನ್ ಚಿನ್ನದ ಪದಕ ಗೆದ್ದಿದ್ದರು. ಇದರೊಂದಿಗೆ ದಿಗ್ಗಜ ತಾರೆ ಮೇರಿ ಕೋಮ್ ಬಳಿಕ ವಿಶ್ವ ಬಾಕ್ಸಿಂಗ್ ಚಾಂಪಿಯನ್ಷಿಪ್ನಲ್ಲಿ ಎರಡನೇ ಚಿನ್ನದ ಪದಕ ಗೆದ್ದ ಎರಡನೇ ಭಾರತೀಯ ಬಾಕ್ಸರ್ ಎಂಬ ಕೀರ್ತಿಗೆ ಕಾಮನ್ವೆಲ್ತ್ ಚಾಂಪಿಯನ್ ನಿಖತ್ ಭಾಜನರಾಗಿದ್ದಾರೆ.
ಕೆ ಡಿ ಜಾಧವ್ ಒಳಾಂಗಣ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಝರೀನ್, 28-27, 28-27, 28-27, 29-26 ಮತ್ತು 28-27 ಅಂತರದಲ್ಲಿ ಎನ್ಗುಯೆನ್ ವಿರುದ್ಧ ಗೆಲುವು ಸಾಧಿಸಿದರು.
ಭಾರತಕ್ಕೆ 4 ಚಿನ್ನದ ಪದಕ
ಟೋಕಿಯೋ ಒಲಿಂಪಿಕ್ಸ್ ಪದಕ ವಿಜೇತೆ ಲವ್ಲಿನಾ ಬೊರ್ಗೊಹೈನ್, 75 ಕೆಜಿ ಮಿಡ್ಲ್ ವೇಟ್ ವಿಭಾಗದ ಫೈನಲ್ನಲ್ಲಿ ಆಸ್ಟ್ರೇಲಿಯದ ಕೈಟ್ಲಿನ್ ಪಾರ್ಕರ್ ವಿರುದ್ಧ 5-2 ಅಂತರದಿಂದ ಗೆಲುವು ಸಾಧಿಸಿದರು. ಇದು ಭಾನುವಾರ ಭಾರತಕ್ಕೆ ಲಭಿಸಿದ 2ನೇ ಚಿನ್ನದ ಪದಕ. ಇದರೊಂದಿಗೆ 2023ರ ವಿಶ್ವ ಮಹಿಳಾ ಬಾಕ್ಸಿಂಗ್ ಚಾಂಪಿಯನ್ಷಿಪ್ನಲ್ಲಿ ಭಾರತ ಒಟ್ಟು 4 ಚಿನ್ನದ ಪದಕಗಳನ್ನು ಗೆಲ್ಲುವ ಮೂಲಕ ದಾಖಲೆ ಬರೆದಿದೆ. ಇದಕ್ಕೂ ಮೊದಲು ನೀತು ಗಂಗಾಸ್ ಮತ್ತು ಸ್ವೀಟಿ ಬೂರಾ ಅವರು ಕ್ರಮವಾಗಿ 48 ಕೆಜಿ ಹಾಗೂ 81 ಕೆಜಿ ವಿಭಾಗಗಳಲ್ಲಿ ಚಾಂಪಿಯನ್ ಆಗಿದ್ದರು.