1985ರ ಏರ್ ಇಂಡಿಯಾ ‘ಕನಿಷ್ಕ’ (ಫ್ಲೈಟ್ 182) ಬಾಂಬ್ ದಾಳಿಯ ಹಿಂದೆ ಕೆನಡಾ ಮೂಲದ ಖಲಿಸ್ತಾನಿ ಉಗ್ರರ ಕೈವಾಡವಿತ್ತು ಎಂಬುದನ್ನು ಕೆನಡಾದ ಗುಪ್ತಚರ ಸಂಸ್ಥೆ (CSIS) ಮೊದಲ ಬಾರಿಗೆ ಅಧಿಕೃತವಾಗಿ ಒಪ್ಪಿಕೊಂಡಿದೆ. ದುರಂತ ಸಂಭವಿಸಿ 41 ವರ್ಷಗಳ ಬಳಿಕ ಕೆನಡಾ ಸರ್ಕಾರ ಈ ಸತ್ಯವನ್ನು ಸಾರ್ವಜನಿಕವಾಗಿ ಘೋಷಿಸಿದೆ.
CSIS (Canadian Security Intelligence Service) ತನ್ನ ಅಧಿಕೃತ ಸಾಮಾಜಿಕ ಮಾಧ್ಯಮ ಖಾತೆಯಲ್ಲಿ, “ಜೂನ್ 23, 1985 ರಂದು ಕೆನಡಾ ಮೂಲದ ಖಲಿಸ್ತಾನಿ ಉಗ್ರಗಾಮಿಗಳು ಇರಿಸಿದ್ದ ಬಾಂಬ್ ವಿಮಾನವನ್ನು ಧ್ವಂಸಗೊಳಿಸಿತು” ಎಂದು ನೇರವಾಗಿ ಉಲ್ಲೇಖಿಸಿದೆ.
ಇದನ್ನೂ ಓದಿ: ಮಾದಕ ವಸ್ತು ಕಳ್ಳಸಾಗಣೆ; ಭಾರತ ಮೂಲದ ಕೆನಡಾ ಪ್ರಜೆ ಅಮೆರಿಕದಲ್ಲಿ ಬಂಧನ
ಈ ಬಾಂಬ್ ದಾಳಿಯ ಹಿಂದೆ ನಿಷೇಧಿತ ಖಲಿಸ್ತಾನಿ ಉಗ್ರಗಾಮಿ ಸಂಘಟನೆ ‘ಬಬರ್ ಖಾಲ್ಸಾ’ ಪಾತ್ರವಿದೆ ಎಂದು ಭಾರತ ಮೊದಲಿನಿಂದಲೂ ಹೇಳುತ್ತಾ ಬಂದಿತ್ತು. ಆದರೆ ಇಷ್ಟು ವರ್ಷಗಳ ಕಾಲ ಕೆನಡಾ ಸರ್ಕಾರವಾಗಲಿ ಅಥವಾ ಅಲ್ಲಿನ ತನಿಖಾ ಸಂಸ್ಥೆಗಳಾಗಲಿ ಈ ದುರಂತವನ್ನು ಕೇವಲ ‘ವಿಮಾನ ಅಪಘಾತ’ ಅಥವಾ ‘ಭಯೋತ್ಪಾದಕ ಕೃತ್ಯ’ ಎಂದು ಕರೆಯುತ್ತಿದ್ದವೇ ಹೊರತು ‘ಖಲಿಸ್ತಾನಿ ಉಗ್ರರು’ ಎಂಬ ಪದವನ್ನು ಬಳಸಲು ಹಿಂಜರಿಯುತ್ತಿದ್ದವು. ಆದರೆ ಈಗ ಇತಿಹಾಸದಲ್ಲೇ ಮೊದಲ ಬಾರಿಗೆ ಕೆನಡಾ ತಾನಾಗಿಯೇ ಈ ಖಲಿಸ್ತಾನಿ ಉಗ್ರಗಾಮಿ ಸಂಘಟನೆ ಹೆಸರನ್ನು ಉಲ್ಲೇಖಿಸಿದೆ. ಇದರಿಂದಾಗಿ ಭಾರತದ ಸುದೀರ್ಘ ಹೋರಾಟಕ್ಕೆ ಮತ್ತು ನಿಲುವಿಗೆ ಜಯ ಸಿಕ್ಕಂತಾಗಿದೆ.
ಏನಿದು ಕನಿಷ್ಕ ವಿಮಾನ ದುರಂತ?
1985ರ ಜೂನ್ 23ರಂದು ಟೊರಾಂಟೋದಿಂದ ಮುಂಬೈಗೆ ಹೊರಟಿದ್ದ ಏರ್ ಇಂಡಿಯಾ ಬೋಯಿಂಗ್ 747 ‘ಕನಿಷ್ಕ’ ವಿಮಾನವು ಅಟ್ಲಾಂಟಿಕ್ ಸಾಗರದ ಮೇಲೆ (ಐರ್ಲೆಂಡ್ ಕರಾವಳಿಯ ಸಮೀಪ) ಹಾರಾಟ ನಡೆಸುತ್ತಿದ್ದಾಗ ಉಗ್ರರು ಲಗೇಜ್ ಬಾಕ್ಸ್ನಲ್ಲಿ ಇಟ್ಟಿದ್ದ ಬಾಂಬ್ ಸ್ಫೋಟಗೊಂಡಿತ್ತು.
ಈ ಸ್ಫೋಟದಲ್ಲಿ ವಿಮಾನದಲ್ಲಿದ್ದ 329 ಪ್ರಯಾಣಿಕರು ಮತ್ತು ಸಿಬ್ಬಂದಿ ದುರ್ಮರಣಕ್ಕೀಡಾದರು. ಈ ಪೈಕಿ 268 ಮಂದಿ ಕೆನಡಾ ಪೌರತ್ವ ಹೊಂದಿದ್ದ ಭಾರತೀಯ ಮೂಲದವರಾಗಿದ್ದರು ಹಾಗೂ 24 ಮಂದಿ ಭಾರತೀಯರಾಗಿದ್ದರು.
2001ರ ಸೆಪ್ಟೆಂಬರ್ 11ರ (9/11) ಅಮೆರಿಕ ದಾಳಿಗೂ ಮುನ್ನ, ವಾಯುಯಾನ ಇತಿಹಾಸದಲ್ಲೇ ನಡೆದ ಅತ್ಯಂತ ಭೀಕರ ವಿಮಾನ ಬಾಂಬ್ ದಾಳಿ ಇದಾಗಿತ್ತು. ಪ್ರಮುಖ ಖಲಿಸ್ತಾನಿ ಉಗ್ರಗಾಮಿ ಸಂಘಟನೆಯಾದ ‘ಬಬ್ಬರ್ ಖಲ್ಸಾ’ ಈ ಕೃತ್ಯದ ಮಾಸ್ಟರ್ ಮೈಂಡ್ ಆಗಿತ್ತು ಎಂದು ತನಿಖೆಗಳಿಂದ ಸಾಬೀತಾಗಿತ್ತು.
ಕೆನಡಾದ ಈ ಐತಿಹಾಸಿಕ ಒಪ್ಪಿಗೆಯನ್ನು ‘ಹಿಂದೂ ಕೆನಡಿಯನ್ ಫೌಂಡೇಶನ್’ ಸೇರಿದಂತೆ ಹಲವು ಸಂಘಟನೆಗಳು ಸ್ವಾಗತಿಸಿವೆ. “ಈ ಸ್ಪಷ್ಟತೆ ಅತ್ಯಂತ ಅಗತ್ಯವಾಗಿತ್ತು. ಇಷ್ಟು ವರ್ಷಗಳ ಕಾಲ ಸಂತ್ರಸ್ತರ ಕುಟುಂಬಗಳಿಗೆ ನ್ಯಾಯ ಸಿಕ್ಕಿರಲಿಲ್ಲ. ಈಗಲಾದರೂ ಕೆನಡಾ ಸರ್ಕಾರ ಅಲ್ಲಿನ ಖಲಿಸ್ತಾನಿ ಉಗ್ರಗಾಮಿಗಳನ್ನು ಜಾಗತಿಕ ಭಯೋತ್ಪಾದಕರು ಎಂದು ಘೋಷಿಸಿ ಕಠಿಣ ಕ್ರಮ ಕೈಗೊಳ್ಳಬೇಕು” ಎಂದು ಸಂತ್ರಸ್ತರ ಪರ ಹೋರಾಟಗಾರರು ಒತ್ತಾಯಿಸಿದ್ದಾರೆ.
