ಬೆಂಗಳೂರಿನ ಹೃದಯಭಾಗದಲ್ಲಿ ನೂರು ವರ್ಷಗಳಿಂದಲೂ ಕುದುರೆಗಳ ಓಡಾಟ, ಜನ ಜಂಗುಳಿ, ಬೆಟ್ಟಿಂಗ್ ಎಲ್ಲವೂ ಇತಿಹಾಸವಾಗಲಿದೆ. ಆದರೆ ಕುಣಿಗಲ್‌ನಲ್ಲಿ ರೇಸಿಂಗ್ ಸಂಪ್ರದಾಯ ಮುಂದುವರಿಯಲಿದೆ. ಬೆಂಗಳೂರು ನಗರಕ್ಕೆ ಹೆಚ್ಚು ಹಸಿರು, ಕಡಿಮೆ ದಟ್ಟಣೆ ಸಿಗಬಹುದು ಎಂಬ ನಿರೀಕ್ಷೆಯಿದೆ. ಬೆಂಗಳೂರು ಟರ್ಫ್ ಕ್ಲಬ್ ಇನ್ನು ಮುಂದೆ ಕುಣಿಗಲ್‌ನಲ್ಲಿ ರೇಸ್ ನಡೆಸಲಿದೆ. ಆದರೆ, ಅದರ 100+ ವರ್ಷಗಳ ಕಥೆ ಎಂದಿಗೂ ಮರೆಯಲಾಗದು.
ಫೆಬ್ರವರಿ 12 ರಂದು ಕರ್ನಾಟಕ ಸಚಿವ ಸಂಪುಟ ತೆಗೆದುಕೊಂಡ ಐತಿಹಾಸಿಕ ನಿರ್ಧಾರವೊಂದು ಬೆಂಗಳೂರಿನ ರೇಸ್ ಕೋರ್ಸ್ ಇತಿಹಾಸದಲ್ಲಿ ಹೊಸ ಅಧ್ಯಾಯ ತೆರೆದಿದೆ. ಬೆಂಗಳೂರು ಟರ್ಫ್ ಕ್ಲಬ್ (Bangaluru Turf club)ನ ರೇಸಿಂಗ್ ಚಟುವಟಿಕೆಗಳನ್ನು ತುಮಕೂರು ಜಿಲ್ಲೆಯ ಕುಣಿಗಲ್ ಸ್ಟಡ್ ಫಾರ್ಮ್‌ಗೆ ಸ್ಥಳಾಂತರಿಸಲು ಅನುಮೋದನೆ ನೀಡಲಾಗಿದೆ. 83 ಎಕರೆ ವಿಸ್ತೀರ್ಣದ ಪ್ರಸ್ತುತ ಸ್ಥಳವನ್ನು ಹಸಿರುಮಯವಾಗಿಸಿ ನಗರದ ಲಂಗ್ಸ್ ಸ್ಪೇಸ್‌ ಆಗಿ ಬಳಸಿಕೊಳ್ಳಲು ರಾಜ್ಯ ಸರ್ಕಾರ ನಿರ್ಧರಿಸಿದೆ. ಇದಕ್ಕೆ ಮುಂದಿನ ಎರಡು ವರ್ಷಗಳ ಕಾಲಾವಕಾಶ ನೀಡಲಾಗಿದೆ.
ಬಹುಕಾಲದ ಕಾನೂನು ಹೋರಾಟ, ಬಾಡಿಗೆ ವಿವಾದ ಮತ್ತು ನಗರದ ಸಂಚಾರ ದಟ್ಟಣೆಯ ಸಮಸ್ಯೆಗಳ ನಂತರ ಈ ನಿರ್ಧಾರವನನ ಸರ್ಕಾರ ಕೈಗೊಂಡಿದೆ. ಬೆಂಗಳೂರಿನ ಹೃದಯಭಾಗದಲ್ಲಿ ನೂರಾರು ವರ್ಷಗಳಿಂದ ಇದ್ದ ರೇಸ್ ಕೋರ್ಸ್ ಇನ್ನು ಮುಂದೆ ಇತಿಹಾಸವಾಗಲಿದೆ. ಬೆಂಗಳೂರಿನಲ್ಲಿ ಕುದುರೆ ರೇಸಿಂಗ್‌ನ ಇತಿಹಾಸ 1800 ರ ದಶಕಕ್ಕೆ ಹಿಂದೆ ಹೋಗುತ್ತದೆ. ಆಸ್ಟಿನ್ ಟೌನ್ ಮತ್ತು ಡೊಮ್ಲೂರ್ ಗಡಿಯಲ್ಲಿ ಒಂದು ಕಾಲದಲ್ಲಿ ಚೀತಾ, ಹುಲಿ, ಚಿರತೆಗಳಂತಹ ವನ್ಯಜೀವಿಗಳ ಹೋರಾಟಗಳನ್ನು ನಡೆಸಲಾಗುತ್ತಿತ್ತು. ಬ್ರಿಟಿಷ್ ಸೈನಿಕರು ಇದನ್ನು ಕುದುರೆ ರೇಸಿಂಗ್‌ಗೆ ಬದಲಾಯಿಸಿದರು.
ಮೊದಲ ರೇಸ್ ಕೋರ್ಸ್ ಈಗಿನ HAL ವಿಮಾನ ನಿಲ್ದಾಣ ಸಮೀಪದಲ್ಲಿತ್ತು. ಬ್ರಿಟಿಷ್ ಕ್ಯಾವಲ್ರಿ ಯೂನಿಟ್‌ಗಳು ಹಲಸೂರು ಪ್ರದೇಶದಲ್ಲಿ ಇದ್ದುದು ರೇಸಿಂಗ್‌ಗೆ ಕಾರಣವಾಯಿತು. 1920ರ ಡಿಸೆಂಬರ್ 1ರಂದು ಮೇಜರ್ ಆರ್.ಎಚ್.ಓ.ಡಿ. ಪ್ಯಾಟರ್‌ಸನ್, ಸರ್ ಲೆಸ್ಲಿ ಮಿಲ್ಲರ್, ಮೇಜರ್ ಜೆ.ಎಂ. ಹೋಮ್ಸ್ ಮತ್ತು ಸಿ.ಎನ್. ಸೂರ್ಯನಾರಾಯಣ ರಾವ್ ಹೈ ಗ್ರೌಂಡ್ಸ್‌ನ ಗ್ರ್ಯಾಂಡ್‌ಸ್ಟ್ಯಾಂಡ್‌ನಲ್ಲಿ ಸಭೆ ನಡೆಸಿ ಬೆಂಗಳೂರು ಟರ್ಫ್ ಕ್ಲಬ್ ಸ್ಥಾಪಿಸಿದರು.
1921ರ ಮೇ 20ರಂದು ಉದ್ಘಾಟನೆಯಾಯಿತು. ಮೈಸೂರು ಮಹಾರಾಜರಿಂದ 1923 ರಲ್ಲಿ 92 ಎಕರೆ ಜಮೀನು (ಈಗ 83-85 ಎಕರೆ) ರೇಸ್ ಕೋರ್ಸ್‌ಗೆ ಮಾತ್ರ ಬಳಸಲು ನೀಡಲ್ಪಟ್ಟಿತು. ಮೊದಲು ‘ಬೆಂಗಳೂರು ರೇಸ್ ಕ್ಲಬ್’ ಎಂದು ಕರೆಯಲ್ಪಟ್ಟು, 1956ರ ಕಂಪನೀಸ್ ಆಕ್ಟ್ ನಂತರ ‘ಟರ್ಫ್ ಕ್ಲಬ್’ ಆಯಿತು.
1951ರಲ್ಲಿ ಪ್ರಸ್ತುತ ಹೈ ಗ್ರೌಂಡ್ಸ್ ಸ್ಥಳಕ್ಕೆ ಸ್ಥಳಾಂತರವಾಯಿತು. ಇಲ್ಲಿ 1,950 ಮೀಟರ್ ಟ್ರ್ಯಾಕ್, ಮೂರು ಟ್ರೈನಿಂಗ್ ಟ್ರ್ಯಾಕ್‌ಗಳು, ಕುದುರೆ ಸ್ವಿಮ್ಮಿಂಗ್ ಪೂಲ್, ವೆಟರ್ನರಿ ಆಸ್ಪತ್ರೆ, 1000ಕ್ಕೂ ಹೆಚ್ಚು ಕುದುರೆಗಳ ಸ್ಥಿರತೆ — ಎಲ್ಲವೂ ಇವೆ. ಬೆಂಗಳೂರಿನ ಹವಾಮಾನವು ರೇಸಿಂಗ್‌ಗೆ ಅತ್ಯುತ್ತಮವೆಂದು ಪ್ರಸಿದ್ಧಿ ಪಡೆಯಿತು.
ಕಾನೂನು ಹೋರಾಟ ಮತ್ತು ಬಾಡಿಗೆ ವಿವಾದ!
2006ರಲ್ಲಿ ಬಾಡಿಗೆ ಒಪ್ಪಂದ ಮುಗಿದ ನಂತರವೂ ಕ್ಲಬ್ ಮುಂದುವರೆಯಿತು. 2010 ರಿಂದ ಬಾಡಿಗೆ ದರ ಪರಿಷ್ಕರಣೆಯಾಗಲಿಲ್ಲ. ಸರ್ಕಾರಕ್ಕೆ 15 ವರ್ಷಗಳಲ್ಲಿ ಕೋಟಿಗಟ್ಟಲೆ ನಷ್ಟವಾಯಿತು. ಸುಪ್ರೀಂ ಕೋರ್ಟ್‌ನಲ್ಲಿ ಕೇಸುಗಳು, ರೇಸ್‌ಗಳು ರದ್ದು, ರಾಜಕೀಯ-ಕಾನೂನು ತಿಕ್ಕಾಟಗಳು ನಡೆದವು. 2025 ಅಕ್ಟೋಬರ್‌ನಲ್ಲಿ ಕ್ಲಬ್ ಸ್ಥಳಾಂತರಕ್ಕೆ ಒಪ್ಪಿಗೆ ನೀಡಿತು. ಇದೀಗ ಸರ್ಕಾರ 29+29 ವರ್ಷಗಳ ಲೀಸ್‌ನಲ್ಲಿ ಕುಣಿಗಲ್‌ನ 110 ಎಕರೆ + 20 ಗುಂಟೆ ಜಮೀನನ್ನು 2.5% ಗೈಡೆನ್ಸ್ ವ್ಯಾಲ್ಯೂ ಬಾಡಿಗೆಗೆ ನೀಡಿದೆ.
ಕುಣಿಗಲ್ ಸ್ಟಡ್ ಫಾರ್ಮ್: 230 ವರ್ಷಗಳ ಇತಿಹಾಸ
ಕುಣಿಗಲ್ ಸ್ಟಡ್ ಫಾರ್ಮ್ ಟಿಪ್ಪು ಸುಲ್ತಾನರ ಕಾಲದಿಂದಲೂ (1790ರ ದಶಕ) ಪ್ರಸಿದ್ಧ. ಕ್ಯಾವಲ್ರಿ ಕುದುರೆಗಳನ್ನು ಬೆಳೆಸಲು ಇದನ್ನು ಬಳಸಲಾಗುತ್ತಿತ್ತು. ಬ್ರಿಟಿಷ್ ಆಡಳಿತದಲ್ಲಿ ಅರಬ್ ಕುದುರೆಗಳನ್ನು ಬೆಳೆಸಲು ಬಳಕೆಯಾಯಿತು. 1886 ರಲ್ಲಿ ಭಾರತಕ್ಕೆ ಆಮದು ಮಾಡಲಾದ ಮೊದಲ ಥರೋಬ್ರೆಡ್ ಸ್ಟ್ಯಾಲಿಯನ್ ‘ಪೆರೋ ಗೋಮೆಜ್’ ಇಲ್ಲಿಯೇ ಇದ್ದದ್ದು. 1992 ರಲ್ಲಿ ವಿಜಯ ಮಲ್ಯ ಅವರ ಯುನೈಟೆಡ್ ರೇಸಿಂಗ್ ಅಂಡ್ ಬ್ಲಡ್‌ಸ್ಟಾಕ್ ಬ್ರೀಡರ್ಸ್‌ಗೆ 30 ವರ್ಷಗಳ ಲೀಸ್ ನೀಡಲ್ಪಟ್ಟಿತು. ಭಾರತದ ಅತ್ಯಂತ ಹಳೆಯ ಸ್ಟಡ್ ಫಾರ್ಮ್‌ಗಳಲ್ಲಿ ಒಂದು. ಈಗ ಇಲ್ಲಿಯೇ ಬೆಂಗಳೂರು ರೇಸಿಂಗ್ ಮುಂದುವರಿಯಲಿದೆ.
ಮುಂದೆ ಎನಾಗಬಹುದು?
ಪ್ರಸ್ತುತ ಸ್ಥಳದಲ್ಲಿ ಕ್ಲಬ್ 4 ಎಕರೆಯಲ್ಲಿ ಹೆರಿಟೇಜ್ ಬಿಲ್ಡಿಂಗ್‌ನೊಂದಿಗೆ ಕ್ಲಬ್ ಕಾರ್ಯಗಳನ್ನು ಮುಂದುವರಿಸಲಿದೆ. ಉಳಿದ ಜಾಗ ಹಸಿರು ಪ್ರದೇಶವಾಗಿ ಮಾರ್ಪಡಿಸಲಾಗುತ್ತದೆ. ಕುಣಿಗಲ್‌ನಲ್ಲಿ ಹೊಸ ರೇಸ್ ಕೋರ್ಸ್ ಸಿದ್ಧವಾಗಲಿದೆ. ಇದು ಒಂದು ಯುಗದ ಅಂತ್ಯ ಮತ್ತು ಹೊಸ ಆರಂಭ. ಬೆಂಗಳೂರಿನ ಹೃದಯಭಾಗದಲ್ಲಿ ನೂರು ವರ್ಷಗಳಿಂದಲೂ ಕುದುರೆಗಳ ಓಡಾಟ, ಜನ ಜಂಗುಳಿ, ಬೆಟ್ಟಿಂಗ್ ಎಲ್ಲವೂ ಇತಿಹಾಸವಾಗಲಿದೆ. ಆದರೆ ಕುಣಿಗಲ್‌ನಲ್ಲಿ ರೇಸಿಂಗ್ ಸಂಪ್ರದಾಯ ಮುಂದುವರಿಯಲಿದೆ. ಬೆಂಗಳೂರು ನಗರಕ್ಕೆ ಹೆಚ್ಚು ಹಸಿರು, ಕಡಿಮೆ ದಟ್ಟಣೆ ಸಿಗಬಹುದು ಎಂಬ ನಿರೀಕ್ಷೆಯಿದೆ. ಬೆಂಗಳೂರು ಟರ್ಫ್ ಕ್ಲಬ್ ಇನ್ನು ಮುಂದೆ ಕುಣಿಗಲ್‌ನಿಂದ ರೇಸ್ ನಡೆಸಲಿದೆ. ಆದರೆ, ಅದರ 100+ ವರ್ಷಗಳ ಕಥೆ ಎಂದಿಗೂ ಮರೆಯಾಗದು.
