ವಿದೇಶಿ ವಿನಿಮಯ ನಿರ್ವಹಣಾ ಕಾಯ್ದೆ (FEMA) ಉಲ್ಲಂಘನೆ ಮತ್ತು ಅಘೋಷಿತ ವಿದೇಶಿ ಆಸ್ತಿ ಹೊಂದಿರುವ ಆರೋಪದ ಮೇಲೆ ಬಾಲಿವುಡ್ ನಟ ಶೇಖರ್ ಸುಮನ್ ಅವರ ಆಪ್ತ ಹಾಗೂ ಮುಂಬೈ ಮೂಲದ ಚಲನಚಿತ್ರ ನಿರ್ಮಾಪಕ ಧರ್ಮೇಶ್ ಸಂಗಾನಿ ಮತ್ತು ಅವರ ಕಂಪನಿಯ ಮೇಲೆ ಜಾರಿ ನಿರ್ದೇಶನಾಲಯ (ಇ.ಡಿ.) ದಾಳಿ ನಡೆಸಿ ಶೋಧ ಕಾರ್ಯ ಕೈಗೊಂಡಿದೆ.
ಇತ್ತೀಚಿಗೆ ಶೇಖರ್ ಸುಮನ್ ಅವರು ತಮ್ಮ youtube ಚಾನಲ್‌ನಲ್ಲಿ “ರಾಜ ಮತ್ತು ಮಾಂತ್ರಿಕ ಕನ್ನಡಿ’ಯ ವಿಡಂಬನೆ ಆಧಾರಿತ ಕಾಲ್ಪನಿಕ ಕತೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಪ್ರಸ್ತುತ ಕೇಂದ್ರ ಸರ್ಕಾರದ ಆಡಳಿತ ವ್ಯವಸ್ಥೆಯ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ್ದರು. ಈಗಿನ ಇ.ಡಿ ದಾಳಿ ಕೂಡ ಪ್ರತಿಕಾರದ ಉದ್ದೇಶವಿರಬಹುದು ಎಂಬ ಮಾತುಗಳು ಕೇಳಿಬರುತ್ತಿವೆ.
ಮುಂಬೈ ಮೂಲದ ‘ಕಲಾನಿ ಇಂಪೆಕ್ಸ್ ಪ್ರೈವೇಟ್ ಲಿಮಿಟೆಡ್’ (Kalanee Impex Pvt Ltd) ಹಾಗೂ ಅದರ ನಿರ್ದೇಶಕರಾದ ಧರ್ಮೇಶ್ ಸಂಗಾನಿ, ಅವರ ಪತ್ನಿ ರಂಜಿತಾ ಸಂಗಾನಿ ಮತ್ತು ನರೇಂದ್ರ ಸಂಗಾನಿ ಅವರಿಗೆ ಸೇರಿದ ಸ್ಥಳಗಳಲ್ಲಿ ಇ.ಡಿ. ಅಧಿಕಾರಿಗಳು ಪರಿಶೀಲನೆ ನಡೆಸಿದ್ದಾರೆ. ಧರ್ಮೇಶ್ ಸಂಗಾನಿ ಅವರು ನಟ ಶೇಖರ್ ಸುಮನ್ ಅವರೊಂದಿಗೆ ಚಲನಚಿತ್ರ ನಿರ್ಮಾಣದಲ್ಲಿ ತೊಡಗಿಸಿಕೊಂಡಿದ್ದು, ಶೇಖರ್ ಸುಮನ್ ಪ್ರವರ್ತಿಸಿರುವ ‘ಫಿಲ್ಮ್ ಅಕಾಡೆಮಿ’ಯ ಸಹ-ಸಂಸ್ಥಾಪಕರೂ ಆಗಿದ್ದಾರೆ. ಸದ್ಯ ನಡೆಯುತ್ತಿರುವ ತನಿಖೆಯು ಕೇವಲ ಸಂಗಾನಿ ಕುಟುಂಬ ಮತ್ತು ಅವರ ಕಂಪನಿಗೆ ಮಾತ್ರ ಸೀಮಿತವಾಗಿದೆ ಎಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.
ಶೋಧ ಕಾರ್ಯಾಚರಣೆಯ ವೇಳೆ ಧರ್ಮೇಶ್ ಸಂಗಾನಿ ಅವರಿಗೆ ಸೇರಿದ ಕೆನಡಾ, ಅಮೆರಿಕ (ಯು.ಎಸ್.) ಮತ್ತು ಯುಎಇ ಗಳಲ್ಲಿರುವ ಅಘೋಷಿತ ವಿದೇಶಿ ಕಂಪನಿಗಳು ಹಾಗೂ ಬ್ಯಾಂಕ್ ಖಾತೆಗಳ ಕುರಿತು ಮಹತ್ವದ ದಾಖಲೆಗಳು ಪತ್ತೆಯಾಗಿವೆ. ಈ ಮಾಹಿತಿಗಳನ್ನು ಅವರು ತಮ್ಮ ಆದಾಯ ತೆರಿಗೆ ರಿಟರ್ನ್ಸ್‌ನಲ್ಲಿ ಘೋಷಿಸಿರಲಿಲ್ಲ. ರಫ್ತು ವಹಿವಾಟಿಗೆ ಸಂಬಂಧಿಸಿದಂತೆ ಬರಬೇಕಿದ್ದ ಕೋಟ್ಯಂತರ ರೂಪಾಯಿಗಳ ಆದಾಯವು ನಿಗದಿತ ಕಾಲಮಿತಿಯೊಳಗೆ ಭಾರತಕ್ಕೆ ಬಂದಿಲ್ಲ ಎಂಬುದು ತನಿಖೆಯಿಂದ ಬಹಿರಂಗವಾಗಿದೆ. ಅಲ್ಲದೆ, ರಫ್ತು ಆದಾಯವನ್ನು ಮರಳಿ ಪಡೆಯಲು ರಿಸರ್ವ್ ಬ್ಯಾಂಕ್ (ಆರ್‌ಬಿಐ) ಅಥವಾ ಅಧಿಕೃತ ಡೀಲರ್ ಬ್ಯಾಂಕ್‌ಗಳಿಂದ ಯಾವುದೇ ಕಾಲಾವಕಾಶ ವಿಸ್ತರಣೆಯನ್ನೂ ಈ ಕಂಪನಿ ಪಡೆದಿರಲಿಲ್ಲ. ಹೀಗಾಗಿ ಮೇ 2026ರಲ್ಲಿ ಕಸ್ಟಮ್ಸ್ ಇಲಾಖೆಯು ಈ ಕಂಪನಿಯನ್ನು ‘ಸುಸ್ತಿದಾರ’ (Defaulting) ರಫ್ತುದಾರರ ಪಟ್ಟಿಗೆ ಸೇರಿಸಿ ಸಾರ್ವಜನಿಕ ನೋಟಿಸ್ ಜಾರಿ ಮಾಡಿತ್ತು ಎಂದು ಇ.ಡಿ. ತಿಳಿಸಿದೆ.
ಇದನ್ನು ಓದಿದ್ದೀರಾ? ಈ ದಿನ ಸಂಪಾದಕೀಯ | ಹೆಣ್ಣುಮಕ್ಕಳ ಸುರಕ್ಷತೆ ಕೇವಲ ರಾಜಕೀಯ ಭಾಷಣದ ಸರಕಾಗದಿರಲಿ
ದಾಳಿಯ ವೇಳೆ ಡಿಜಿಟಲ್ ಸಾಕ್ಷ್ಯಗಳನ್ನು ನಾಶಪಡಿಸುವ ಉದ್ದೇಶದಿಂದ ಧರ್ಮೇಶ್ ಸಂಗಾನಿ ಅವರು ತಮ್ಮ ಮೊಬೈಲ್ ಫೋನ್ ಅನ್ನು ಕಟ್ಟಡದ 13ನೇ ಮಹಡಿಯಿಂದ ಕೆಳಗೆ ಎಸೆದಿದ್ದಾರೆ ಎಂದು ಇ.ಡಿ. ಆರೋಪಿಸಿದೆ. ಅಧಿಕಾರಿಗಳು ನಂತರ ಮೊಬೈಲ್ ಅನ್ನು ಯಶಸ್ವಿಯಾಗಿ ವಶಪಡಿಸಿಕೊಂಡಿದ್ದು, ಸಾಕ್ಷ್ಯ ನಾಶದ ಯತ್ನದ ಅಡಿ ಮುಂಬೈ ಪೊಲೀಸರಿಗೆ ಅಧಿಕೃತ ದೂರು ನೀಡಿದ್ದಾರೆ.
ಸಂಗಾನಿ ಅವರ ವ್ಯವಹಾರಗಳ ಮೇಲೆ ಅಮೆರಿಕ ಮತ್ತು ಬ್ರಿಟನ್ ಕಸ್ಟಮ್ಸ್ ಅಧಿಕಾರಿಗಳು ಕೂಡ ನಿಗಾ ಇಟ್ಟಿದ್ದಾರೆ ಎಂಬ ಅಂಶವೂ ತನಿಖೆಯಲ್ಲಿ ತಿಳಿದುಬಂದಿದೆ. ಜೂನ್ 2025ರಲ್ಲಿ ಅಮೆರಿಕದ ಕಸ್ಟಮ್ಸ್ ಮತ್ತು ಬಾರ್ಡರ್ ಪ್ರೊಟೆಕ್ಷನ್ ಅಧಿಕಾರಿಗಳು ಅಕ್ರಮವಾಗಿ ಸಾಗಿಸಲಾಗುತ್ತಿದ್ದ ಹಾಗೂ ನಕಲಿ ಟ್ರೇಡ್‌ಮಾರ್ಕ್ ಹೊಂದಿದ್ದ ಸುಮಾರು 3 ಮಿಲಿಯನ್ ಅಮೆರಿಕನ್ ಡಾಲರ್ (28.665 ಕೋಟಿ) ಮೌಲ್ಯದ ಚಿನ್ನಾಭರಣಗಳನ್ನು ಜಪ್ತಿ ಮಾಡಿದ್ದಕ್ಕೆ ಸಂಬಂಧಿಸಿದ ದಾಖಲೆಗಳೂ ಇ.ಡಿ. ದಾಳಿ ವೇಳೆ ಪತ್ತೆಯಾಗಿವೆ. ಇದಲ್ಲದೆ, ಸೆಪ್ಟೆಂಬರ್ 2016ರಲ್ಲಿ ಲಂಡನ್‌ನ ಹೀಥ್ರೂ ವಿಮಾನ ನಿಲ್ದಾಣದಲ್ಲಿ ಧರ್ಮೇಶ್ ಸಂಗಾನಿ ಅವರಿಂದ 7.41 ಕೆ.ಜಿ.ಯಷ್ಟು ‘ಘೋಷಣೆಯಾಗದ’ ಚಿನ್ನಾಭರಣಗಳನ್ನು ಯು.ಕೆ. ಬಾರ್ಡರ್ ಫೋರ್ಸ್ ಅಧಿಕಾರಿಗಳು ವಶಪಡಿಸಿಕೊಂಡಿದ್ದರು.
