ಜಾಗತಿಕ ತಾಪಮಾನ ಏರಿಕೆಯ ಕುರಿತು ವಿಶ್ವಸಂಸ್ಥೆಯು (UN) ಅತ್ಯಂತ ಆತಂಕಕಾರಿ ವರದಿಯೊಂದನ್ನು ಬಿಡುಗಡೆ ಮಾಡಿದೆ. ಮುಂದಿನ 5 ವರ್ಷಗಳಲ್ಲಿ ಜಾಗತಿಕ ತಾಪಮಾನವು ಈಗಿರುವ ಸುರಕ್ಷತಾ ಮಿತಿಯನ್ನ ಪದೇ ಪದೇ ಮೀರುವ ಸಾಧ್ಯತೆ ದಟ್ಟವಾಗಿದೆ ಎಂದಿವೆ ಇತ್ತೀಚಿನ ಹೊಸ ಮುನ್ಸೂಚನೆಗಳು. ಜಗತ್ತು ಈಗ ತನ್ನದೇ ಆದ ಹಿಂದಿನ ಎಲ್ಲಾ ತಾಪಮಾನದ ದಾಖಲೆಗಳನ್ನು ಮುರಿಯುವ ಹಾದಿಯಲ್ಲಿದ್ದು, ಹವಾಮಾನ ತುರ್ತು ಪರಿಸ್ಥಿತಿ ಇನ್ನಷ್ಟು ಭೀಕರವಾಗಲಿದೆ ಎಂದು ವಿಶ್ವಸಂಸ್ಥೆ ಎಚ್ಚರಿಸಿದೆ.
ವಿಶ್ವ ಹವಾಮಾನ ಸಂಸ್ಥೆ (WMO) ವರದಿಯ ಪ್ರಕಾರ, ಆರ್ಕ್ಟಿಕ್ (Arctic) ಪ್ರದೇಶವು ಅತ್ಯಂತ ಆತಂಕಕಾರಿ ವೇಗದಲ್ಲಿ ಬಿಸಿಯಾಗುತ್ತಿದ್ದು, 2030ರ ವೇಳೆಗೆ ಅಲ್ಲಿನ ತಾಪಮಾನ ಸುಮಾರು 3 ಡಿಗ್ರಿ ಫ್ಯಾರನ್‌ಹೀಟ್‌ನಷ್ಟು ಹೆಚ್ಚಾಗಬಹುದು. ಇದೇ ವೇಳೆ, ಅಮೆಜಾನ್ ಮಳೆಕಾಡುಗಳು ತೀವ್ರ ತಾಪಮಾನ ಮತ್ತು ಭೀಕರ ಬರಗಾಲವನ್ನು ಎದುರಿಸಲಿದ್ದು, ವಿನಾಶಕಾರಿ ಕಾಳ್ಗಿಚ್ಚುಗಳು ಸಂಭವಿಸುವ ಭೀತಿ ಎದುರಾಗಿದೆ. ಕಲ್ಲಿದ್ದಲು, ತೈಲ ಮತ್ತು ಗ್ಯಾಸ್‌ಗಳಂತಹ ಇಂಧನಗಳ ನಿರಂತರ ಬಳಕೆಯೇ ಈ ಜಾಗತಿಕ ಪ್ರವಾಹಗಳು, ತೀವ್ರ ಉಷ್ಣಗಾಳಿ ಮತ್ತು ದೀರ್ಘಕಾಲದ ಬರಗಾಲಕ್ಕೆ ಕಾರಣ ಎಂದು ವಿಜ್ಞಾನಿಗಳು ಸ್ಪಷ್ಟಪಡಿಸಿದ್ದಾರೆ.
ವಿಶ್ವಸಂಸ್ಥೆಯ ಹವಾಮಾನ ಸಂಸ್ಥೆ ಮತ್ತು ಯುನೈಟೆಡ್ ಕಿಂಗ್‌ಡಮ್‌ನ ಹವಾಮಾನ ಕಚೇರಿ ಜಂಟಿಯಾಗಿ ಸಿದ್ಧಪಡಿಸಿರುವ ವರದಿಯ ಪ್ರಕಾರ, 2026 ರಿಂದ 2030ರ ನಡುವಿನ ಸರಾಸರಿ ಜಾಗತಿಕ ತಾಪಮಾನವು ಪ್ಯಾರಿಸ್ ಹವಾಮಾನ ಒಪ್ಪಂದದಲ್ಲಿ ನಿಗದಿಪಡಿಸಲಾದ 1.5 ಡಿಗ್ರಿ ಸೆಲ್ಸಿಯಸ್ ಮಿತಿಯನ್ನು ಮೀರಲು ಶೇ.75 ರಷ್ಟು ಸಾಧ್ಯತೆಗಳಿವೆ. ಈ ಉಷ್ಣತೆಯ ಹೆಚ್ಚಳವು ತಾತ್ಕಾಲಿಕವಾಗಿದ್ದರೂ ಸಹ, ಹವಳದ ಹರಹುಗಳು ಮತ್ತು ಹಿಮನದಿಗಳಂತಹ ಸೂಕ್ಷ್ಮ ಪರಿಸರ ವ್ಯವಸ್ಥೆಗಳ ಮೇಲೆ ವಿನಾಶಕಾರಿ ಪರಿಣಾಮ ಬೀರಲಿದೆ ಎಂದು ವಿಜ್ಞಾನಿಗಳು ಎಚ್ಚರಿಸಿದ್ದಾರೆ. ಪ್ರತಿಯೊಂದು 0.1 ಡಿಗ್ರಿ ಸೆಲ್ಸಿಯಸ್ ತಾಪಮಾನದ ಹೆಚ್ಚಳವೂ ಸಹ ಭೀಕರ ಪರಿಣಾಮವನ್ನು ಉಂಟುಮಾಡುತ್ತದೆ ಎಂದು ಯುಕೆ ಮೆಟ್ ಆಫೀಸ್‌ನ ಸಹ-ಲೇಖಕಿ ಮೆಲಿಸ್ಸಾ ಸೀಬ್ರೂಕ್ ತಿಳಿಸಿದ್ದಾರೆ.
ಇಂಪೀರಿಯಲ್ ಕಾಲೇಜ್ ಲಂಡನ್‌ನ ಫ್ರೀಡೆರಿಕೆ ಒಟ್ಟೊ ಅವರ ಪ್ರಕಾರ, ತಾಪಮಾನವು 1.5 ಡಿಗ್ರಿ ಸೆಲ್ಸಿಯಸ್‌ಗಿಂತ ಹೆಚ್ಚಾಗುವುದರಿಂದ ಜಗತ್ತಿನಾದ್ಯಂತ ಲಕ್ಷಾಂತರ ಜನರು ಪ್ರಾಣ ಕಳೆದುಕೊಳ್ಳಬೇಕಾಗಬಹುದು. ಅಲ್ಲದೆ, ಆಹಾರ ಪದಾರ್ಥಗಳ ಬೆಲೆಗಳು ಗಗನಕ್ಕೇರಲಿವೆ ಮತ್ತು ಕಾಳ್ಗಿಚ್ಚಿನ ತೀವ್ರತೆ ಹೆಚ್ಚಾಗಲಿದೆ. ಬಲಗೊಳ್ಳುತ್ತಿರುವ ‘ಎಲ್ ನಿನೊ’ ಪ್ರಭಾವದಿಂದಾಗಿ 2027ರ ವರ್ಷವು 2024ರ ತಾಪಮಾನದ ದಾಖಲೆ ಮುರಿದು, ಭೂಮಿಯನ್ನು ಹಿಂದೆಂದೂ ಕಾಣದ ಭೀಕರ ಉಷ್ಣತೆಯ ಪ್ರಪಾತಕ್ಕೆ ತಳ್ಳಬಹುದು ಎಂದು ಅಂದಾಜಿಸಲಾಗಿದೆ.
ಜಗತ್ತಿನ ಇತರ ಭಾಗಗಳಿಗೆ ಹೋಲಿಸಿದರೆ ಆರ್ಕ್ಟಿಕ್ ಪ್ರದೇಶವು ಮೂರೂವರೆ ಪಟ್ಟು ವೇಗವಾಗಿ ಕಾಯುತ್ತಿದೆ. ಹಿಮದ ಹೊದಿಕೆ ಕಡಿಮೆಯಾಗುತ್ತಿರುವುದರಿಂದ ಸೂರ್ಯನ ಕಿರಣಗಳನ್ನು ಪ್ರತಿಫಲಿಸುವ ಶಕ್ತಿ ಭೂಮಿಗೆ ಕಡಿಮೆಯಾಗುತ್ತಿದೆ. ಮುಂದಿನ 5 ವರ್ಷಗಳಲ್ಲಿ ಇಲ್ಲಿನ ಚಳಿಗಾಲದ ತಾಪಮಾನವು ಸುಮಾರು 2.8 ಡಿಗ್ರಿ ಸೆಲ್ಸಿಯಸ್‌ನಷ್ಟು ಹೆಚ್ಚಾಗುವ ಸಾಧ್ಯತೆಯಿದೆ.
ಜಗತ್ತಿಗೆ ಆಮ್ಲಜನಕ ನೀಡುವ ಅಮೆಜಾನ್ ಬೇಸಿನ್ ತೀವ್ರ ಬರಗಾಲಕ್ಕೆ ತುತ್ತಾಗಲಿದ್ದು, ಇದು ಜಾಗತಿಕ ಇಂಗಾಲದ ಹೊರಸೂಸುವಿಕೆಯನ್ನು ಮತ್ತಷ್ಟು ಹೆಚ್ಚಿಸಲಿದೆ. ಮತ್ತೊಂದೆಡೆ, ಆಫ್ರಿಕಾದ ಸಾಹೇಲ್ ಪ್ರದೇಶವು ಅತಿಯಾದ ಮಳೆಗೆ ಸಾಕ್ಷಿಯಾಗಲಿದ್ದು, ಭೀಕರ ಪ್ರವಾಹದ ಅಪಾಯವನ್ನು ಎದುರಿಸಲಿದೆ.
ಹವಾಮಾನ ವೈಪರೀತ್ಯದ ವಿರುದ್ಧ ಜಾಗತಿಕವಾಗಿ ಸೂಕ್ತ ಕ್ರಮಗಳನ್ನು ಕೈಗೊಳ್ಳದ ಕಾರಣ ಇಡೀ ಜಗತ್ತು ಈಗಾಗಲೇ ದೊಡ್ಡ ಬೆಲೆ ತೆರುತ್ತಿದೆ ಎಂದು ವಿಶ್ವಸಂಸ್ಥೆಯ ಹವಾಮಾನ ಮುಖ್ಯಸ್ಥ ಸೈಮನ್ ಸ್ಟಿಲ್ ಕಳವಳ ವ್ಯಕ್ತಪಡಿಸಿದ್ದಾರೆ. ಯುರೋಪ್ ಹಾಗೂ ಭಾರತದಲ್ಲಿ ಕಂಡುಬರುತ್ತಿರುವ ತೀವ್ರ ಉಷ್ಣಗಾಳಿ, ವಿನಾಶಕಾರಿ ಬಿರುಗಾಳಿಗಳು ಮತ್ತು ಕಾಳ್ಗಿಚ್ಚುಗಳು ಕೇವಲ ಪರಿಸರದ ಮೇಲಷ್ಟೇ ಅಲ್ಲದೆ, ಮಾನವನ ಆರ್ಥಿಕತೆಯ ಮೇಲೂ ತೀವ್ರ ಹೊಡೆತ ನೀಡುತ್ತಿವೆ ಎಂದು ಅವರು ಎಚ್ಚರಿಸಿದ್ದಾರೆ.
ಇದನ್ನೂ ಓದಿ: ಕಾಕ್ರೋಚ್‌ ಪಾರ್ಟಿ ʼXʼ ಖಾತೆ ನಿರ್ಬಂಧ; ತಕ್ಷಣದ ಮರುಸ್ಥಾಪನೆಗೆ ಡೆಲ್ಲಿ ಹೈಕೋರ್ಟ್ ನಕಾರ
ಸದ್ಯ ಈಗಿರುವ ಶಾಖವೇ ಬೆಂಕಿ ಹಬೆಯಲ್ಲಿ ಕುದಿಯುತ್ತಿರುವ ಅನುಭವ ನೀಡುತ್ತಿದೆ. ಇನ್ನು ಮುಂದಿನ ದಿನಗಳಲ್ಲಿ ಈ ಹಿಂದಿನ ಎಲ್ಲಾ ದಾಖಲೆಗಳನ್ನೂ ಮೀರಿದ ತಾಪಮಾನವನ್ನು ಅನುಭವಿಸಲೇಬೇಕಾಗಿದೆ. ತಾಪಮಾನ ಏರಿಕೆಯ ನಿಯಂತ್ರಣ ಕ್ರಮಗಳೆಲ್ಲ ಜಾಗೃತಿ ಕಾರ್ಯಕ್ರಮಗಳಿಗೆ, ಮಕ್ಕಳ ಪಾಠಕ್ಕೆ ಮಾತ್ರ ಸೀಮಿತವಾಗಿದ್ದೇ ಈ ದುರಂತಕ್ಕೆ ಮುಖ್ಯ ಕಾರಣ. ಕೋವಿಡ್‌ ಮಹಾಮಾರಿಯ ಸಂದರ್ಭದಲ್ಲಿ ಜನ ರಸ್ತೆಯಲ್ಲೇ ಕುಸಿದು ಬಿದ್ದು ಸಾವನ್ನಪ್ಪುತ್ತಿದ್ದ ದೃಶ್ಯಗಳು ಭೀಕರ ಎನಿಸುತ್ತಿದ್ದವು. ಈಗ ವಿಶ್ವಸಂಸ್ಥೆ ಕೊಟ್ಟಿರುವ ತಾಪಮಾನದ ಎಚ್ಚರಿಕೆ ಎದೆ ನಡುಗಿಸುತ್ತದೆ. ಮಾನವನೇನೋ ಮಾಡಿದ್ದನ್ನೇ ಉಣ್ಣಬೇಕಾಗಿದೆ. ಆದರೆ, ಪ್ರಾಣಿ-ಪಕ್ಷಿ, ಕೀಟ, ಜಲಚರಗಳ ಪರಿಸ್ಥಿತಿ ಏನಾಗಲಿದೆಯೋ ಎನ್ನುವುದನ್ನು ಊಹಿಸುವುದೂ ಕಷ್ಟ. ಮನುಷ್ಯ ಪ್ರಾಣಿ ಈಗಲಾದರೂ ಕಳ್ಳ ನಿದ್ದೆಯಿಂದ ಏಳಲಿದೆಯೇ ಕಾದು ನೋಡಬೇಕು!
