“ನಾನು ಹಿಂದೆ ಹಿಂದು ಆಗಿದ್ದೆ, ಈಗ ಹೆಮ್ಮೆಯ ಸಂಘಿ ಆಗಿದ್ದೇನೆ” ಎಂದು ಬಿಜೆಪಿ ಸಂಸದೆ, ನಟಿ ಕಂಗನಾ ರಣಾವತ್ ಹೇಳಿಕೊಂಡಿದ್ದಾರೆ. ಅಲ್ಲದೆ, ಸಹ ನಟಿಯರ ಕುರಿತು ವಿವಾದಾತ್ಮಕ ಹೇಳಿಕೆಯನ್ನೂ ನೀಡಿದ್ದಾರೆ.
ಸೋಮವಾರ ತಮ್ಮ ಇನ್‌ಸ್ಟಾಗ್ರಾಂ ಖಾತೆಯಲ್ಲಿ ವಿಡಿಯೋ ಹಂಚಿಕೊಂಡಿರುವ ಕಂಗನಾ, “ನಾನು ಮೊದಲು ಹಿಂದು ಆಗಿದ್ದೆ. ಆದರೆ, ಈಗ ಹೆಮ್ಮೆಯ ಸಂಘಿಯಾಗಿದ್ದೇನೆ. ಬಿಜೆಪಿ ಮತ್ತು ಆರ್‌ಎಸ್‌ಎಸ್‌ನ ವಿಚಾರಧಾರೆಯನ್ನು ಸ್ವೀಕರಿಸಿದ್ದೇನೆ” ಎಂದಿದ್ದಾರೆ.
ಮುಂದುವರೆದು, “ಅನೇಕ ಹಿಂದು ನಟಿಯರನ್ನು ಹತ್ತಿರದಿಂದ ನೋಡಿದ್ದೇನೆ. ಅವರಿಗೆ ರಾಜಕೀಯದ ಬಗ್ಗೆ ಸ್ಪಷ್ಟ ವಿಚಾರಧಾರೆ ಇರುವುದಿಲ್ಲ. ಆದರೆ, ಮುಸ್ಲಿಮರೊಂದಿಗೆ ಮದುವೆ ಅಥವಾ ಸ್ನೇಹ ಬೆಳೆಸಿದ ನಂತರ ಅವರ ಆಲೋಚನೆಗಳು ಬದಲಾಗುತ್ತವೆ. ಅವರು ಎಡಪಂಥೀಯ ವಿಚಾರಧಾರೆಯತ್ತ ವಾಲುತ್ತಾರೆ” ಎಂದು ವಿವಾದಾತ್ಮಕ ಹೇಳಿಕೆ ನೀಡಿದ್ದಾರೆ.
“ಭಾರತದ ಸಂವಿಧಾನ ಪ್ರತಿಯೊಬ್ಬರಿಗೂ ತಮ್ಮ ಧರ್ಮ ಮತ್ತು ನಂಬಿಕೆಯನ್ನು ಅನುಸರಿಸುವ ಸ್ವಾತಂತ್ರ್ಯ ನೀಡಿದೆ. ಯಾರಾದರೂ ತಮ್ಮ ಧರ್ಮ ಅಥವಾ ಸಿದ್ಧಾಂತವನ್ನು ಬದಲಾಯಿಸಬಹುದು. ನಾನು ನನ್ನ ವಿಚಾರಧಾರೆಯನ್ನು ಬದಲಾಯಿಸಿದರೆ ಮಾತ್ರ ಏಕೆ ಪ್ರಶ್ನಿಸಲಾಗುತ್ತಿದೆ” ಎಂದು ಅವರು ಹೇಳಿದ್ದಾರೆ.
“ನನ್ನನ್ನು ಹಲವರು ‘ನೀವು ಮೊದಲು ಹಿಂದುವಾಗಿದ್ದಿರಿ, ಈಗ ಯಾವಾಗ ಸಂಘಿಯಾದಿರಿ’ ಎಂದು ಕೇಳುತ್ತಾರೆ. ಹೌದು, ನಾನು ಸಂಘಿಯಾಗಲು ಬಯಸಿದ್ದೇನೆ. ಬಿಜೆಪಿ ಮತ್ತು ಆರ್‌ಎಸ್‌ಎಸ್‌ನ ಹಿಂದು ಸಿದ್ಧಾಂತವನ್ನು ಅಳವಡಿಸಿಕೊಳ್ಳಲು ಇಚ್ಛಿಸುತ್ತೇನೆ. ಹತ್ತು ವರ್ಷಗಳ ಹಿಂದಿನ ನನ್ನ ವಿಡಿಯೊಗಳನ್ನು ತೋರಿಸಿ ಟೀಕೆ ಮಾಡುತ್ತಾರೆ. ಆದರೆ ನಾನು ಬದಲಾಗಿದ್ದೇನೆ” ಎಂದು ಹೇಳಿಕೊಂಡಿದ್ದಾರೆ.
ಸದ್ಯ, ಕಂಗನಾ ಅವರೇ ಹೇಳುವಂತೆ; ಅವರು ಧಾರ್ಮಿಕವಾಗಿ ಹಿಂದು ಧರ್ಮವನ್ನು ಪಾಲಿಸುವುದರಿಂದ ಬದಲಾಗಿ, ಹಿಂದುತ್ವ ಕೋಮುವಾದಿ ಅಜೆಂಡಾಗಳನ್ನು ಮೈಗೂಡಿಸಿಕೊಂಡಿದ್ದಾರೆ. ಕೋಮು ರಾಜಕಾರಣ, ದ್ವೇಷ ಭಾಷಣಕ್ಕೆ ಮಾರುಹೋಗಿದ್ದಾರೆ. ಅಂದಹಾಗೆ, ಅವರಿಗೆ ಗೊತ್ತಿರಬಹುದು; ಧಾರ್ಮಿಕವಾಗಿ ಹಿಂದು ಧರ್ಮವನ್ನು ಪಾಲಿಸುವುದು ವೈಯಕ್ತಿಕ ನಂಬಿಕೆ, ಆಧ್ಯಾತ್ಮಿಕತೆ, ಪೂಜೆ, ಸಂಪ್ರದಾಯ ಹಾಗೂ ಜೀವನ ಮೌಲ್ಯಗಳಿಗೆ ಸಂಬಂಧಿಸಿದ ವಿಷಯ. ಇದು ವ್ಯಕ್ತಿಯ ಧಾರ್ಮಿಕ ಆಚರಣೆ ಮತ್ತು ಆತ್ಮಸಂಬಂಧಿತ ಆಯ್ಕೆಯಾಗಿರುತ್ತದೆ. ಆದರೆ, ಹಿಂದುತ್ವ ಎಂಬುದು ಧರ್ಮಕ್ಕಿಂತ ಹೆಚ್ಚಾಗಿ ರಾಜಕೀಯ-ಸೈದ್ಧಾಂತಿಕ ಪರಿಕಲ್ಪನೆ. ಇಲ್ಲಿ, ಧರ್ಮಿಕ ಆಚರಣೆ ಮತ್ತು ನಂಬಿಕೆಗಿಂತ, ಮತ್ತೊಂದು ಕೋಮುವಿನ ವಿರುದ್ಧದ ದ್ವೇಷ, ದ್ವೇಷ ಭಾಷಣಗಳೇ ಆವರಿಸಿಕೊಂಡಿರುತ್ತವೆ. ಈಗ ಕಂಗನಾ ಅವರೂ ಇದೇ ಹಿಂದುತ್ವದ ಕೋಮು ದ್ವೇಷ ರಾಜಕಾರಣಕ್ಕೆ ಮಾರುಹೋಗಿದ್ದಾರೆ.
