ಇತ್ತೀಚಿನ ದಿನಗಳಲ್ಲಿ ಮಧ್ಯಪ್ರಾಚ್ಯದ ಭೌಗೋಳಿಕ ರಾಜಕೀಯವು ಅತ್ಯಂತ ಸಂಕೀರ್ಣ ತಿರುವುಗಳನ್ನು ಪಡೆದುಕೊಳ್ಳುತ್ತಿದೆ. ಇಸ್ರೇಲ್ ಮೇಲೆ ದಾಳಿ ನಡೆಸುವ ಉದ್ದೇಶದಿಂದ ಯೆಮೆನ್ನ ಹೌತಿ ಪಡೆಗಳು (ಅನ್ಸಾರ್ ಅಲ್ಲಾ) ಉಡಾವಣೆ ಮಾಡುತ್ತಿರುವ ಕ್ಷಿಪಣಿಗಳು ಹಾಗೂ ಡ್ರೋನ್ಗಳು ಸೌದಿ ಅರೇಬಿಯಾದ ವಾಯುಪ್ರದೇಶದಲ್ಲಿ ಹಾದುಹೋಗುತ್ತಿರುವುದು ಹೊಸ ಬಿಕ್ಕಟ್ಟಿಗೆ ಕಾರಣವಾಗಿದೆ. ಆದರೆ, ತನ್ನ ಮೂಲಸೌಕರ್ಯಗಳ ಮೇಲಿನ ಭದ್ರತಾ ಬೆದರಿಕೆಗಳನ್ನು ಸೌದಿ ಅರೇಬಿಯಾ ಇಸ್ಲಾಂನ ಪವಿತ್ರ ಕ್ಷೇತ್ರ ಮೆಕ್ಕಾದ ಮೇಲಿನ ದಾಳಿ ಎಂದು ಬಿಂಬಿಸುತ್ತಿರುವುದು ಜಾಗತಿಕ ಮಟ್ಟದಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿದೆ. ರಾಷ್ಟ್ರೀಯ ಹಿತಾಸಕ್ತಿಗಳನ್ನು ದೇವರ ಪಾವಿತ್ರ್ಯತೆಯ ಹೊದಿಕೆಯಲ್ಲಿ ಮುಚ್ಚಿಡುವ ತಂತ್ರ ಇಲ್ಲಿ ಸ್ಪಷ್ಟವಾಗಿ ಗೋಚರಿಸುತ್ತಿದೆ.
ದಾಖಲೆಗಳ ಪ್ರಕಾರ, 2025ರ ಸೆಪ್ಟೆಂಬರ್ 2ರಂದು ಯೆಮೆನ್ನ ಹೌತಿ ಪಡೆಗಳು ಇಸ್ರೇಲ್ ಗುರಿಯಾಗಿಸಿ 2 ಕ್ಷಿಪಣಿಗಳನ್ನು ಉಡಾವಣೆ ಮಾಡಿದ್ದವು. ಆದರೆ ಅವು ಸೌದಿ ಅರೇಬಿಯಾದ ಆಗಸದಲ್ಲೇ ಛಿದ್ರಗೊಂಡು ಬಿದ್ದಿದ್ದವು. ಅದೇ ರೀತಿ, 2025ರ ಡಿಸೆಂಬರ್ 9ರಂದು ಇಸ್ಲಾಂನ ಪವಿತ್ರ ಸ್ಥಳಗಳಲ್ಲಿ ಒಂದಾದ ಮದೀನಾ ನಗರದ ಅಲ್-ನಬಾವಿ ಮಸೀದಿಯ ಮೇಲ್ಭಾಗದಲ್ಲಿ ಯೆಮೆನ್ನಿಂದ ಇಸ್ರೇಲ್ ಕಡೆಗೆ ಉಡಾವಣೆಯಾಗಿದ್ದ ಕ್ಷಿಪಣಿಯೊಂದು ಹಾದುಹೋಗಿದ್ದು, ಅದನ್ನು ಸೌದಿ ರಕ್ಷಣಾ ಪಡೆಗಳು ಹೊಡೆದುರುಳಿಸಿವೆ ಎಂಬ ಮಾಹಿತಿ ಹೊರಬಿದ್ದಿದೆ. ಇತ್ತೀಚೆಗೆ ಮೆಕ್ಕಾ ನಗರದ ದಕ್ಷಿಣ ಭಾಗದಲ್ಲಿ ಅನ್ಸಾರ್ ಅಲ್ಲಾ ಡ್ರೋನ್ ಒಂದನ್ನು ತಡೆಹಿಡಿಯಲಾಗಿದೆ ಎಂದು ಸೌದಿ ಹೇಳಿಕೊಂಡಿದೆ. ಆದರೆ, ತಾವು ಮೆಕ್ಕಾ ಸೇರಿದಂತೆ ಯಾವುದೇ ಪವಿತ್ರ ಸ್ಥಳಗಳ ಮೇಲೆ ದಾಳಿ ನಡೆಸುವ ಗುರಿ ಹೊಂದಿಲ್ಲ ಎಂದು ಹೌತಿ ಪಡೆಗಳು ಸ್ಪಷ್ಟಪಡಿಸಿವೆ.
ಈ ಘಟನೆಗಳ ಹಿಂದಿನ ವಾಸ್ತವ ಮತ್ತು ಸೌದಿಯ ಪ್ರತಿಪಾದನೆಗಳ ನಡುವೆ ಭಾರಿ ವ್ಯತ್ಯಾಸವಿದೆ. ಪವಿತ್ರ ಕ್ಷೇತ್ರ ಮೆಕ್ಕಾ ಅಥವಾ ಮದೀನಾದ ಹೆಸರು ಪ್ರಸ್ತಾಪವಾದ ತಕ್ಷಣ, ಸೌದಿ ಅರೇಬಿಯಾದ ರಾಷ್ಟ್ರೀಯ ಭದ್ರತೆಯು ಇಸ್ಲಾಮಿಕ್ ಪವಿತ್ರ ಭೂಗೋಳದೊಂದಿಗೆ ಬೆರೆತುಹೋಗುತ್ತದೆ. ಅಂದರೆ, ಸೌದಿ ಪ್ರಭುತ್ವ, ರಾಜಮನೆತನ ಮತ್ತು ಹರಾಮ್ (ಪವಿತ್ರ ಕ್ಷೇತ್ರ) ಮೂರೂ ಒಂದೇ ಎಂಬಂತೆ ಬಿಂಬಿಸುವ ರಾಜಕೀಯ ತಂತ್ರಗಾರಿಕೆ ಇದಾಗಿದೆ. ಆದರೆ, ಪವಿತ್ರ ‘ಕಾಬಾ’ ಬೇರೆ, ಸೌದಿಯ ಆಡಳಿತ ನಡೆಸುವ ‘ಹೌಸ್ ಆಫ್ ಸೌದ್’ ಬೇರೆ ಎಂಬುದನ್ನು ಅರಿಯುವುದು ಅತ್ಯಗತ್ಯವಾಗಿದೆ. ಇವೆರಡನ್ನೂ ಒಂದೇ ಎಂದು ಪರಿಗಣಿಸುವುದು ರಾಜಕೀಯ ತಂತ್ರವೇ ಹೊರತು ಧಾರ್ಮಿಕ ಶ್ರದ್ಧೆಯಲ್ಲ.
ರಿಯಾದ್ನ ಪ್ರಸ್ತುತ ಭದ್ರತಾ ಬಿಕ್ಕಟ್ಟು ಕೇವಲ ಯೆಮೆನ್ಗೆ ಮಾತ್ರ ಸೀಮಿತವಾಗಿಲ್ಲ. ಗಾಜಾ ಮೇಲಿನ ಇಸ್ರೇಲ್ ದಾಳಿಯನ್ನು ವಿರೋಧಿಸುತ್ತಿರುವ ಅನ್ಸಾರ್ ಅಲ್ಲಾ ಪಡೆಗಳು, ಸೌದಿ ಅರೇಬಿಯಾದ ಮೂಲಸೌಕರ್ಯಗಳು ಹಾಗೂ ಕೆಂಪು ಸಮುದ್ರ ಮತ್ತು ಬಾಬ್ ಎಲ್-ಮಂಡೇಬ್ ಜಲಸಂಧಿಯ ಇಂಧನ ಮಾರ್ಗಗಳ ಮೇಲೆ ತೀವ್ರ ಪರಿಣಾಮ ಬೀರುವ ಸಾಮರ್ಥ್ಯ ಪ್ರದರ್ಶಿಸುತ್ತಿವೆ. ಸೌದಿ ಅರೇಬಿಯಾವು ಅಪಾರ ಸಂಪತ್ತು, ಅತ್ಯಾಧುನಿಕ ಶಸ್ತ್ರಾಸ್ತ್ರಗಳು ಮತ್ತು ದಶಕಗಳ ಪಾಶ್ಚಿಮಾತ್ಯ ಸೇನಾ ಬೆಂಬಲವನ್ನು ಹೊಂದಿದ್ದರೂ, ಕೇವಲ ಶಸ್ತ್ರಾಸ್ತ್ರಗಳ ಬಲದಿಂದ ರಾಜಕೀಯ ಉದ್ದೇಶವನ್ನು ಈಡೇರಿಸಿಕೊಳ್ಳಲು ಸಾಧ್ಯವಿಲ್ಲ ಎಂಬ ಕಠಿಣ ಪಾಠವನ್ನು ಯೆಮೆನ್ ಯುದ್ಧ ಕಲಿಸಿದೆ.
ಇದೇ ವೇಳೆ, ಗಾಜಾದಲ್ಲಿ ಇಸ್ರೇಲ್ ಮುಂದುವರಿಸಿರುವ ಭೀಕರ ಸೇನಾ ಕಾರ್ಯಾಚರಣೆ ಹಾಗೂ ‘ಪ್ಯಾಲಿಸ್ತೀನ್’ ಬಿಕ್ಕಟ್ಟು ಸಮಕಾಲೀನ ಅರಬ್ ಪ್ರಜ್ಞೆಯ ನೈತಿಕ ದುರಂತವಾಗಿ ಮಾರ್ಪಟ್ಟಿದೆ. ಪ್ರಸ್ತುತ ಪ್ಯಾಲಿಸ್ತೀನ್ ಮತ್ತು ಇಸ್ರೇಲ್ ನಡುವೆ ನಡೆಯುತ್ತಿರುವ ರಕ್ತಮಯ ಸಂಘರ್ಷವು ದಿನೇದಿನೇ ತೀವ್ರಗೊಳ್ಳುತ್ತಿದ್ದು, ಸಾವಿರಾರು ಮುಗ್ಧ ಜೀವಗಳು ಬಲಿಯಾಗುತ್ತಿವೆ. ಅತ್ಯಾಧುನಿಕ ಯುದ್ಧವಿಮಾನಗಳು ಹಾಗೂ ಕ್ಷಿಪಣಿಗಳನ್ನು ಹೊಂದಿರುವ ಶ್ರೀಮಂತ ಅರಬ್ ರಾಷ್ಟ್ರಗಳು ಪ್ಯಾಲಿಸ್ತೀನ್ ಪರವಾಗಿ ಕೇವಲ ಮೌಖಿಕ ಬೆಂಬಲ ನೀಡುತ್ತಿವೆ. ಆದರೆ, ಬಡತನದಿಂದ ಬಳಲುತ್ತಿರುವ ಯೆಮೆನ್ನ ಹೌತಿ ಚಳವಳಿಯು, ಪ್ಯಾಲಿಸ್ತೀನ್ ಮೇಲಿನ ಇಸ್ರೇಲ್ ಆಕ್ರಮಣವನ್ನು ವಿರೋಧಿಸಿ ನೇರ ಸೇನಾ ಕಾರ್ಯಾಚರಣೆ ನಡೆಸುವ ಮೂಲಕ, ಅರಬ್ ರಾಷ್ಟ್ರಗಳ ವಿಶ್ವಾಸಾರ್ಹತೆಯನ್ನೇ ಪ್ರಶ್ನಿಸುವಂತೆ ಮಾಡಿದೆ. ಸೌದಿ ಅರೇಬಿಯಾ 2015ರಿಂದ ಯೆಮೆನ್ ಮೇಲೆ ನಡೆಸಿದ ಭೀಕರ ಯುದ್ಧವು ಸೃಷ್ಟಿಸಿದ ಮಾನವೀಯ ಬಿಕ್ಕಟ್ಟು, ಸೌದಿಯ ನೈತಿಕ ನಿಲುವಿಗೆ ಕಪ್ಪುಚುಕ್ಕೆಯಾಗಿ ಉಳಿದಿದೆ.
ಸೌದಿ ಅರೇಬಿಯಾದ ರಾಜ ಕೇವಲ ಒಂದು ದೇಶವನ್ನು ಆಳುವುದಿಲ್ಲ; ಅವರು ‘ಎರಡು ಪವಿತ್ರ ಮಸೀದಿಗಳ ಉಸ್ತುವಾರಿ’ (Custodian of the Two Holy Mosques) ಎಂಬ ಬಿರುದನ್ನು ಹೊಂದಿದ್ದಾರೆ. ಇಸ್ಲಾಮಿಕ್ ಪರಿಭಾಷೆಯಲ್ಲಿ ‘ಉಸ್ತುವಾರಿ’ ಎಂದರೆ ಅದೊಂದು ನಂಬಿಕೆ ಅಥವಾ ಅಮಾನತ್ ಆಗಿದೆಯೇ ಹೊರತು, ಅದರ ಸಂಪೂರ್ಣ ಒಡೆತನವಲ್ಲ. ಪವಿತ್ರ ಕಾಬಾ ಸೌದಿ ರಾಷ್ಟ್ರ ಸ್ಥಾಪನೆಗಿಂತ 13 ಶತಮಾನಗಳಷ್ಟು ಹಳೆಯದು. ಅನೇಕ ಸಾಮ್ರಾಜ್ಯಗಳು ಮತ್ತು ಆಡಳಿತಗಳನ್ನು ಕಂಡಿರುವ ಈ ಪವಿತ್ರ ಸ್ಥಳಗಳನ್ನು, ಪ್ರಸ್ತುತ ರಾಜಕೀಯ ಆಡಳಿತವು ತನ್ನ ರಾಜತಾಂತ್ರಿಕ ರಕ್ಷಾಕವಚವಾಗಿ ಬಳಸಿಕೊಳ್ಳುವುದು ತರ್ಕಬದ್ಧವಲ್ಲ.
ಸೌದಿ ಅರೇಬಿಯಾ, ಪಾಕಿಸ್ತಾನ ಮತ್ತು ಟರ್ಕಿ ದೇಶಗಳು ಆಗಸ್ಟ್ನಲ್ಲಿ ಸಹಿ ಹಾಕಿರುವ ‘ಮೆಕ್ಕಾ ಜಂಟಿ ರಕ್ಷಣಾ ಒಪ್ಪಂದ’ವು ಈ ಪರಿಸ್ಥಿತಿಯನ್ನು ಮತ್ತಷ್ಟು ಸೂಕ್ಷ್ಮಗೊಳಿಸಿದೆ. ಈ ಒಪ್ಪಂದದ ಪ್ರಕಾರ, ಒಂದು ದೇಶದ ಮೇಲಿನ ದಾಳಿಯನ್ನು ಮೂರೂ ದೇಶಗಳ ಮೇಲಿನ ದಾಳಿ ಎಂದು ಪರಿಗಣಿಸಲಾಗುತ್ತದೆ. ಹೀಗಾಗಿ, ಸೌದಿ ಅರೇಬಿಯಾದ ಮೂಲಸೌಕರ್ಯಗಳ ಮೇಲಿನ ಭೌಗೋಳಿಕ ರಾಜಕೀಯ ದಾಳಿಯನ್ನು ‘ಪವಿತ್ರ ಕ್ಷೇತ್ರ ಮೆಕ್ಕಾದ ಮೇಲಿನ ದಾಳಿ’ ಎಂದು ತಪ್ಪಾಗಿ ಬಿಂಬಿಸಿದರೆ, ‘ಪಾಕಿಸ್ತಾನವು ಯೆಮೆನ್ ಯುದ್ಧದಲ್ಲಿ ಪಾಲ್ಗೊಳ್ಳಬೇಕು’ ಎನ್ನುವ ಬದಲು ‘ಪಾಕಿಸ್ತಾನವು ಕಾಬಾವನ್ನು ರಕ್ಷಿಸಬೇಕು’ ಎಂಬ ಭಾವನಾತ್ಮಕ ಒತ್ತಡ ಸೃಷ್ಟಿಯಾಗುತ್ತದೆ. ಇದು ಗಂಭೀರ ಪರಿಣಾಮಗಳನ್ನು ಬೀರಬಲ್ಲ ನಡೆಯಾಗಿದೆ.
ಇಸ್ಲಾಮಿಕ್ ಭಕ್ತಿ ಹಾಗೂ ಪವಿತ್ರ ಯಾತ್ರೆಯ ಸಮಾನತೆಯ ತತ್ವಗಳನ್ನು ಒಂದು ರಾಜಮನೆತನದ ಆಡಳಿತಾತ್ಮಕ ಅನುಕೂಲಕ್ಕಾಗಿ ಅಥವಾ ರಾಜವಂಶದ ಉಳಿವಿಗಾಗಿ ಬಳಸಿಕೊಳ್ಳಬಾರದು. ಭದ್ರತಾ ಬೆದರಿಕೆಗಳನ್ನು ವಾಸ್ತವಿಕ ನೆಲೆಯಲ್ಲಿ ಎದುರಿಸಬೇಕೇ ಹೊರತು, ರಾಜ್ಯದ ಕಡೆಗೆ ಬರುವ ಪ್ರತಿಯೊಂದು ಕ್ಷಿಪಣಿಯೂ ಪವಿತ್ರ ಕ್ಷೇತ್ರ ಮೆಕ್ಕಾದ ಮೇಲೆಯೇ ಬರುತ್ತಿದೆ ಎಂಬ ಭ್ರಮೆ ಸೃಷ್ಟಿಸಬಾರದು. ತೈಲ ಪೈಪ್ಲೈನ್ ಮಸ್ಜಿದ್ ಅಲ್-ಹರಾಮ್ ಆಗಲು ಸಾಧ್ಯವಿಲ್ಲ, ರಾಜಮನೆತನದ ನ್ಯಾಯಾಲಯವು ಪವಿತ್ರ ಆವರಣವಲ್ಲ ಮತ್ತು ಅರಾಮ್ಕೊ (Aramco) ಕಾಬಾ ಅಲ್ಲ ಎಂಬ ವಾಸ್ತವವನ್ನು ಎಲ್ಲರೂ ಅರಿತುಕೊಳ್ಳಬೇಕಿದೆ.
