ಗೋವಾ ಎಂದರೆ ತಕ್ಷಣವೇ ಕಣ್ಣಮುಂದೆ ಬರುವ ಸಮುದ್ರತೀರಗಳು, ಪ್ರವಾಸೋದ್ಯಮ ಹಾಗೂ ಪಾರ್ಟಿಗಳ ಸೀಮಿತ ಚೌಕಟ್ಟು. ಅದನ್ನು ದಾಟಿ, ಅಲ್ಲಿನ ನೈಜ ಸಾಂಸ್ಕೃತಿಕ ಪರಂಪರೆಯನ್ನು ಇಡೀ ದೇಶದ ಮುಂದೆ ಪ್ರಸ್ತುತಪಡಿಸುತ್ತೇವೆ ಎಂದು ರಾಷ್ಟ್ರ ಪ್ರಶಸ್ತಿ ವಿಜೇತ ನಿರ್ದೇಶಕ ಆದಿತ್ಯ ಜಾಂಭಳೆ ಹೇಳಿದ್ದಾರೆ.
ಗುಜರಾತ್‌ನ ಕೆವಡಿಯಾದಲ್ಲಿ ನಡೆದ ರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿ ಸಮಾರಂಭದ ವೇಳೆ ಮಾಧ್ಯಮದೊಂದಿಗೆ ಅವರು ಜಾಂಭಳೆ ಮಾತನಾಡಿದರು. “ಚತುರ್ಥಿ, ಶಿಗ್ಮೋ ಹಬ್ಬಗಳು, ದೇವಾಲಯಗಳು ಹಾಗೂ ಶ್ರದ್ಧೆಯಿಂದ ಕೂಡಿದ ಗೋವಾದ ಸಾಂಸ್ಕೃತಿಕ ಆತ್ಮವನ್ನು ತಮ್ಮ ಮುಂಬರುವ ಚಿತ್ರದ ಮೂಲಕ ಪ್ಯಾನ್-ಇಂಡಿಯಾ ಮಟ್ಟದಲ್ಲಿ ಬೆಳ್ಳಿತೆರೆಗೆ ತರುತ್ತೇವೆ” ಎಂದು ತಿಳಿಸಿದ್ದಾರೆ.
“ಚಲನಚಿತ್ರಗಳಲ್ಲಿ ಇದುವರೆಗೆ ಗೋವಾವನ್ನು ಪ್ರವಾಸೋದ್ಯಮದ ಕಣ್ಣಿನಿಂದ ಮಾತ್ರ ತೋರಿಸಲಾಗಿದ್ದು, ಅಲ್ಲಿನ ನೈಜ ಜನಜೀವನ ನಿರ್ಲಕ್ಷ್ಯಕ್ಕೆ ಒಳಗಾಗಿದೆ” ಎಂದು ಅಭಿಪ್ರಾಯಪಟ್ಟಿದ್ದಾರೆ.
“ಮುಂಬರುವ ತಮ್ಮ ಸಿನಿಮಾದಲ್ಲಿ ಗೋವಾ ಕೇವಲ ಚಿತ್ರೀಕರಣದ ಲೊಕೇಷನ್ ಆಗಿಷ್ಟೇ ಉಳಿಯದೆ, ಕಥೆಯ ಮೂಲ ಆಧಾರವಾಗಿರಲಿದೆ. ‘ದಿ ಸರ್ಜಿಕಲ್ ಸ್ಟ್ರೈಕ್’ ಚಿತ್ರದ ಮೂಲಕ ಗಮನಸೆಳೆದಿದ್ದ ಅವರು, ಈ ಹೊಸ ಯೋಜನೆಯು ಗೋವಾದ ಮಣ್ಣು, ಭಾಷೆ, ಶೈಲಿ ಮತ್ತು ಪರಂಪರೆಯನ್ನು ಒಳಗೊಂಡಿದ್ದರೂ, ಇಡೀ ಭಾರತದ ಪ್ರೇಕ್ಷಕರನ್ನು ತಲುಪುವ ಸಾರ್ವತ್ರಿಕ ಕಥಾಹೇಳಿಕೆಯನ್ನು ಹೊಂದಿರುತ್ತದೆ” ಎಂದು ಸ್ಪಷ್ಟಪಡಿಸಿದ್ದಾರೆ.
“ಸ್ಥಳೀಯ ಸಿನಿಮಾಗಳು ಕೇವಲ ಸರ್ಕಾರಿ ಆರ್ಥಿಕ ಸಹಾಯದ ಮೇಲೆ ಅವಲಂಬಿತರಾಗದೆ, ಉತ್ತಮ ಕಥೆ ಮತ್ತು ವೃತ್ತಿಪರ ನಿರ್ಮಾಣ ಗುಣಮಟ್ಟದ ಮೂಲಕ ತಮಗಾಗಿಯೇ ಸ್ವಂತ ಪ್ರೇಕ್ಷಕವರ್ಗವನ್ನು ಸೃಷ್ಟಿಸಿಕೊಳ್ಳಬೇಕು” ಎಂದಿದ್ದಾರೆ.
“ರಾಷ್ಟ್ರ ಪ್ರಶಸ್ತಿಯು ತಮ್ಮ ಜವಾಬ್ದಾರಿಯನ್ನು ಮತ್ತಷ್ಟು ಹೆಚ್ಚಿಸಿದ್ದು, ಗೋವಾ ಎಂದರೆ ಕೇವಲ ಪ್ರವಾಸೀ ತಾಣವಲ್ಲ, ಅದೊಂದು ಕಥೆಗಳನ್ನು ಹೇಳುವ ಸಮೃದ್ಧ ಭೂಮಿ ಎಂಬುದನ್ನು ಪ್ರೇಕ್ಷಕರಿಗೆ ತಲುಪಿಸುವುದು ತಮ್ಮ ಮುಖ್ಯ ಉದ್ದೇಶವಾಗಿದೆ” ಎಂದು ಅವರು ಹೇಳಿದ್ದಾರೆ.
ವರದಿ: ಸಚಿನ್ ಕೊರ್ಡೆ
